ꓟ˗ꓗꓴ ꓟꓮꓴ ꓢꓮꓴ 13
13
ꓠꓳ ꓗꓴ ꓙꓳꓥ ꓐꓬꓳ ꓡꓳ ꓣ
1ꓮ ꓘꓪꓲ ꓧꓮꓴ ꓠꓳ ꓗꓴ ꓙꓳꓥ ꓟꓮꓲ ꓕꓳ ꓡꓳ ꓘꓴꓠ꓾ ꓬꓰ˗ꓢꓴ ꓰ ꓡ ꓖꓬꓳ ꓣ ꓬꓴ꓾ ꓢ ꓣ ꓰ꓾ ꓪꓴ ꓮ꓾ ꓖꓬꓮꓲ ꓘꓶꓗ ꓰ ꓡꓴ ꓖꓳꓗ ꓰ ꓖꓬꓮꓲ ꓘꓶꓗ ꓰ ꓬꓴꓟ ꓥꓴꓔ ꓔꓳ ꓣ ꓠꓴꓥ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 2ꓬꓰ˗ꓢꓴ ꓖꓶ꓾ ꓫꓲ ꓗꓳ ꓰ ꓬꓴꓟ ꓑꓰ ꓡꓰ ꓠꓥ ꓐꓬꓴ ꓪꓴ ꓐꓰ ꓡꓴ꓾ ꓫꓲ ꓟ ꓮ ꓒꓬꓳ ꓒꓲ ꓬꓟ ꓰ ꓜ꓾ ꓡꓴ ꓖꓳꓗ ꓣ ꓡꓴꓟ ꓰ ꓮ ꓕꓳ ꓟ ꓣ ꓡꓴꓟ ꓡꓥ ꓮ ꓗꓰ ꓡꓳ ꓫꓳ ꓓꓴꓔ ꓐꓬꓴ ꓐ ꓣ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 3ꓧꓮꓴ ꓘꓴꓠ ꓝꓠ ꓡꓴꓠ ꓐꓴꓟ ꓕꓳ ꓟ꓾ ꓠꓳ ꓗꓴ ꓙꓳꓥ ꓓꓪꓲ ꓓꓪꓲ ꓟ ꓜꓴꓥ ꓔꓳ ꓡꓰ꓾ ꓑꓰ˗ꓔꓣꓴ꓾ ꓬ˗ꓗꓴ꓾ ꓬꓳ˗ꓧꓠ ꓰ ꓮꓠ˗ꓓꓣꓰ ꓖꓶ꓾ 4ꓧꓮꓴ ꓖꓴ ꓖꓶ ꓘ ꓠꓟ ꓥꓴꓔ ꓣ ꓕ꓾ ꓫꓲ ꓖꓴ ꓡꓴꓥ ꓡꓥ ꓓꓲꓗ ꓡꓳ ꓣ ꓥꓴꓔ ꓙꓥ ꓧꓮꓲ ꓗꓴꓟ ꓡ ꓓꓠ ꓕꓳ ꓡꓳ ꓣ ꓕ꓾ ꓥ ꓟꓳ ꓡꓰ ꓔꓮꓲ ꓗꓬꓳ ꓣ꓾ ꓖ ꓡꓪꓲ꓾ ꓬꓥ ꓡꓰ ꓧ ꓟꓲ ꓗꓳ ꓰ꓿
ꓬꓰ˗ꓢꓴ ꓰ ꓣ ꓧ ꓪꓳ ꓠꓲ ꓣ ꓟ ꓔꓴ
5ꓬꓰ˗ꓢꓴ ꓖꓶ꓾ ꓠꓴꓥ ꓟꓳ ꓚꓥ ꓟ ꓳ ꓥꓴꓔ ꓗꓳ ꓡꓥ ꓘꓬꓳ ꓫꓪꓲ ꓡꓳ ꓥꓳꓸ ꓑꓬꓟ ꓰ ꓮ ꓧꓪꓲ ꓫꓥ ꓖ꓾ ꓢ ꓓꓲ ꓠꓲ ꓗꓰ꓿ 6ꓐꓬꓴ ꓟꓬꓳ ꓟꓬꓳ ꓪ ꓥ ꓟꓲꓥ ꓰ ꓑꓳ ꓕꓳ ꓡꓪꓲ꓾ ꓥꓳ ꓖꓶ ꓧꓮꓴ ꓬꓴ ꓪ ꓥꓴꓔ ꓠꓲ ꓡꓰ꓾ ꓖ ꓡꓪꓲ꓾ ꓟꓬꓳ ꓟꓬꓳ ꓡꓰ ꓘꓬꓳ ꓫꓪꓲ ꓡꓳ ꓥꓳ ꓑꓬꓟ ꓐ ꓗꓳ ꓣ꓿ 7ꓖꓬꓰ ꓜꓠ ꓰ꓾ ꓟꓴꓠ ꓑꓳ ꓡꓳ ꓣ ꓓꓥ ꓡꓴ ꓡꓰ ꓠꓴꓥ ꓟꓳ ꓪꓳ ꓖꓬꓳ ꓙꓥ꓾ ꓘ ꓟꓲꓔ ꓠꓲꓗ ꓘꓲꓗ ꓗꓳ꓾ ꓧꓮꓴ ꓘꓬꓳ ꓑꓰ ꓖꓶ ꓐꓲꓥ ꓡꓳ ꓣ ꓥꓴꓔ ꓡꓰ꓾ ꓥꓴꓔ ꓗꓳ ꓡꓥ ꓧꓮꓴ ꓕꓥ ꓕꓴꓟ ꓰ ꓖꓶ ꓮ ꓥꓴꓔ ꓫꓲ꓿ 8ꓮ ꓟꓬꓴ ꓰ ꓮ ꓟꓬꓴ꓾ ꓣ ꓟꓶꓥ ꓰ ꓣ ꓟꓶꓥ ꓫꓶʼꓓ ꓓ ꓖꓴꓟ ꓡꓮꓴ ꓡꓴꓟ ꓐꓴ ꓗꓳ ꓣ꓾ ꓙꓳ ꓪꓳ ꓖꓳ ꓔꓴ ꓔꓴ ꓟ꓾ ꓡʼꓬꓥ ꓠꓴꓠ ꓡꓳ ꓣ꓾ ꓟꓴꓔ ꓟꓳ ꓡꓰ ꓟꓴꓔ ꓡꓳ ꓣ꓾ ꓧꓮꓴ ꓚꓮꓴ ꓖꓶ ꓪꓲ ꓓꓲꓗ ꓰ ꓮ ꓑꓴꓠ ꓮ ꓪꓥ ꓥꓴꓔ ꓔꓳ ꓡꓰ꓿
ꓜꓶꓥ ꓣꓲ ꓰ ꓧꓪꓲ ꓙꓥ ꓘ ꓢꓴ ꓗꓴꓔ ꓣ
9ꓠꓴꓥ ꓟꓳ ꓬꓴ ꓖꓶ ꓬꓴꓟ ꓢꓶꓥ ꓖꓴꓥ ꓬꓥ ꓢ ꓓꓲ ꓠꓲ ꓗꓰ꓿ ꓬꓥ ꓟꓳ ꓖꓶ ꓢꓴ ꓪꓴꓠ ꓒꓴꓥ ꓟ ꓠꓴꓥ ꓟꓳ ꓡꓰ ꓮꓑ ꓑꓬꓟ ꓐ ꓗꓳ ꓣ꓾ ꓔ ꓣ ꓙꓳꓥ ꓑꓰ ꓟ ꓠꓴꓥ ꓟꓳ ꓠꓴ ꓐꓔ ꓰ ꓧꓪꓲ ꓗꓳ ꓣ꓾ ꓥ ꓟꓲꓥ ꓬꓠ ꓟꓮꓲ ꓜꓮꓴ ꓑꓰ ꓰ ꓘꓳ ꓘꓟ ꓑꓰ ꓚꓥ ꓢꓗ ꓢꓰ ꓓꓴꓔ ꓣ ꓟ ꓔꓴ꓾ ꓬꓥ ꓟꓳ ꓧꓶ ꓟ ꓠꓴꓥ ꓟꓳ ꓪꓳ ꓬꓑ ꓔꓳ ꓗꓳ ꓣ꓾ 10ꓧꓮꓴ ꓗ ꓐꓴ ꓖ ꓣ ꓓꓥ ꓡꓴ ꓡꓰ ꓐꓬꓴ ꓮ ꓟꓬꓴ ꓧꓴ ꓙꓴꓑ ꓫꓳ ꓡꓰ ꓧꓶ ꓪꓳ ꓠꓬꓳ ꓟꓳ ꓫꓲꓔ ꓣ ꓥꓴꓔ ꓡꓰ꓿ 11ꓠꓴꓥ ꓟꓳ ꓡꓰ ꓔ ꓣ ꓮ ꓖꓲ ꓑꓰ ꓚꓥ ꓫꓴꓔ ꓫꓪꓲ ꓰ ꓡꓪꓲ ꓮꓑ ꓑꓬꓟ ꓙꓥ ꓖꓶ꓾ ꓘ ꓢꓴ ꓥꓴ ꓡꓪꓲ ꓓꓥ ꓔꓮꓲ ꓣ ꓲ ꓟꓲꓔ ꓡꓰ ꓧꓶ ꓘ ꓟꓲꓔ ꓠꓲꓗ ꓘꓲꓗ ꓗꓳ꓿ ꓧꓮꓴ ꓘꓲꓥ ꓟ ꓠꓴꓥ ꓟꓳ ꓡꓰ ꓓꓥ ꓔꓮꓲ ꓠꓥ ꓣ ꓰ ꓣ ꓙꓴꓥ ꓜ ꓔꓮꓲ ꓖꓬꓳ ꓗꓰ꓿ ꓘ ꓢꓴ ꓟꓴ ꓖ ꓡꓰ ꓠꓴꓥ ꓟꓳ ꓓꓥ ꓔꓮꓲ ꓠꓲ ꓣ ꓐꓥ ꓮ ꓥꓴꓔ꓾ ꓧꓮꓴ ꓚꓳꓲ ꓬꓴꓥ ꓪꓳꓲ ꓠꓲ ꓬꓥ ꓬꓴ ꓔꓮꓲ ꓠꓲ ꓣ꓿ 12ꓧꓮꓴ ꓘꓴꓠ ꓟ ꓬꓥ ꓟꓥ ꓖꓶ ꓬꓥ ꓖꓴ ꓡꓰ꓾ ꓬꓥ ꓖꓴ ꓖꓶ ꓬꓥ ꓟꓥ ꓡꓰ꓾ ꓬꓥ ꓪ ꓖꓶ ꓬꓥ ꓜꓳ ꓡꓰ꓾ ꓫꓲ ꓰ ꓫꓴꓔ ꓮꓑ ꓧꓥ ꓑꓬꓟ ꓐ ꓗꓳ ꓣ꓾ ꓬꓥ ꓜꓳ ꓑꓰ ꓡꓰ ꓬꓥ ꓠꓴ ꓬꓥ ꓪ ꓑꓰ ꓡꓰ ꓖꓴꓟ ꓡꓮꓴ ꓔꓳ ꓡꓪꓲ꓾ ꓢꓔ ꓑꓬꓟ ꓠꓥ ꓐ ꓗꓳ ꓣ꓿ 13ꓥ ꓟꓲꓥ ꓬꓠ ꓟꓮꓲ ꓐꓬꓴ ꓡꓴꓥ ꓡꓥ ꓐꓥ ꓮ ꓙꓴꓺ ꓮ ꓪꓳꓟ ꓰ ꓠꓴꓥ ꓟꓳ ꓧꓪꓲ ꓗꓳ ꓣ꓾ ꓕꓥ ꓕꓴꓟ ꓙꓰ ꓫꓳ ꓫʼꓣꓥ ꓢꓴ ꓚꓮꓴ ꓖꓶ ꓘꓲ ꓬꓴ ꓰ ꓧꓪꓲ ꓣ ꓥꓴꓔ ꓡꓰ꓿
ꓮ ꓫꓳ ꓮ ꓪꓲ ꓧꓪꓲ ꓣ ꓐꓪꓲ ꓠꓲ ꓟꓳ
14ꓧꓮꓴ ꓡꓳ ꓕꓰꓠ ꓡꓳ ꓒꓬꓳ ꓰ ꓮ ꓛ ꓮ ꓚꓴꓔ ꓖꓶ꓾ ꓮ ꓪꓳ ꓬꓑ ꓣ ꓙꓳ ꓪꓳ ꓙꓥ ꓟ ꓬꓑ ꓔꓳ ꓡꓰ ꓡꓰ꓾ ꓠꓴꓥ ꓟꓳ ꓟꓬꓥ ꓡꓰ ꓖꓶ꓾ (ꓟꓮꓴ ꓢꓮꓴ ꓥꓑ ꓠꓲ ꓰ ꓢꓴ ꓖꓶ꓾ ꓟꓲꓔ ꓪꓴ ꓫꓥ ꓖ꓾) ꓧꓮꓴ ꓘꓴꓠ ꓬꓴ˗ꓓ ꓟꓶꓥ ꓟ ꓠꓲ ꓰ ꓐꓥ ꓖꓶ꓾ ꓐꓴꓟ ꓡꓥ ꓫꓴꓔ ꓒꓥ ꓗꓳ ꓫꓥ ꓖ꓾ 15ꓬꓴꓟ ꓕꓳ ꓟ ꓠꓲ ꓰ ꓢꓴ ꓖꓶ ꓘ ꓖꓬꓳ ꓡꓳ ꓡꓳ꓾ ꓬꓥ ꓰ ꓬꓴꓟ ꓟ ꓜꓰ ꓣ ꓙꓴꓥ ꓙꓴꓥ ꓡꓰ ꓬꓴ ꓣ ꓡꓰ ꓘ ꓪꓥ ꓡꓳ ꓡꓳ꓾ 16ꓬꓳ ꓕꓴꓥ ꓟ ꓠꓲ ꓰ ꓢꓴ ꓡꓰ꓾ ꓬꓥ ꓰ ꓪꓴꓔ ꓐꓴ ꓡꓳ ꓬꓴ ꓣ ꓡꓰ ꓘ ꓔꓮꓴ ꓡꓳ ꓡʼꓫꓥ ꓖ꓿ 17ꓧꓮꓴ ꓐꓪꓲ ꓠꓲ ꓟ ꓖꓴꓥ ꓡꓳ ꓡꓮꓲ ꓐꓥ ꓰ ꓙꓳ ꓫꓥ ꓠꓮꓴ ꓫꓴ ꓮ ꓫꓲ ꓐꓥ ꓖꓶ ꓙ ꓙ ꓪꓲ ꓐ ꓗꓳ ꓣ꓿ 18ꓧꓮꓴ ꓟꓴ ꓡꓪꓲ ꓰ ꓧꓮꓴ ꓖꓶ ꓖꓬꓳ ꓟꓬꓳ ꓡꓰ ꓮ ꓓꓴꓔ ꓫꓥ ꓖ ꓮ ꓗꓬꓴ ꓓꓴꓥ ꓠꓲ ꓗꓰ꓿ 19ꓘ ꓢꓴ ꓟꓴ ꓖ ꓡꓰ꓾ ꓗ˗ꓣꓮꓲ ꓗ˗ꓢꓥ ꓒꓠ ꓔꓳ ꓰ ꓟꓮꓴ ꓧꓶ ꓟꓲ ꓧꓶ ꓟꓮꓲ ꓮ ꓘꓪꓲ ꓙꓰ ꓫꓳ ꓮ ꓓꓴꓔ ꓪꓴ ꓫꓲ ꓰ꓾ ꓕꓥ ꓫꓴꓔ ꓡꓰ ꓮ ꓪꓳ ꓓꓴꓔ ꓣ ꓠꓲꓗ ꓘꓲꓗ ꓰ ꓖꓶ ꓧꓮꓴ ꓐꓪꓲ ꓠꓲ ꓟ ꓓꓴꓔ ꓕꓳ ꓡꓳ ꓐ ꓣ꓿ 20ꓧꓮꓴ ꓐꓪꓲ ꓠꓲ ꓡꓰ꓾ ꓧꓮꓴ ꓬꓴꓟ ꓢꓶꓥ ꓮ ꓡꓳ ꓔꓳꓔ ꓑꓬꓟ ꓡꓰ ꓖꓶ꓾ ꓳ ꓬꓴ ꓰ ꓖꓴꓥ ꓫꓳ ꓡꓰ ꓮ ꓪꓳ ꓡꓴꓔ ꓣ꓾ ꓥꓴꓔ ꓗꓳ ꓡꓥ ꓬꓥ ꓘꓲꓠ ꓬꓴ ꓐꓰ ꓰ ꓘꓲꓠ ꓬꓴ ꓐꓥ ꓰ ꓟ ꓔꓴ꓾ ꓧꓮꓴ ꓐꓪꓲ ꓠꓲ ꓑꓰ ꓡꓰ ꓡꓳ ꓔꓳꓔ ꓔꓳ ꓐꓰ꓿ 21ꓧꓮꓴ ꓘꓴꓠ ꓐꓬꓴ ꓣ ꓬꓴ ꓬꓴ꓾ ꓪꓴ ꓗꓰ꓾ ꓫꓲ ꓟ ꓘꓣꓲꓢ˗ꓔꓴ ꓠꓲ ꓔꓳ ꓣ꓾ ꓮ ꓥꓴꓔ ꓡꓰ꓾ ꓘꓣꓲꓢ˗ꓔꓴ ꓧꓰ ꓟ ꓠꓲ ꓔꓳ ꓣ꓾ ꓖ ꓡꓪꓲ꓾ ꓠꓴꓥ ꓟꓳ ꓡꓰ ꓔꓮꓲ ꓡꓰ ꓖꓶ ꓠꓴꓥ ꓟꓳ ꓘ ꓙꓲꓥ ꓗꓳ꓿ 22ꓘ ꓢꓴ ꓟꓴ ꓖ ꓡꓰ ꓟꓮꓴ ꓰ ꓘꓣꓲꓢ˗ꓔꓴ ꓥꓴꓔ ꓗꓳ ꓡꓥ ꓟꓮꓴ ꓰ ꓟꓲ ꓕꓳꓲ ꓥꓴꓔ ꓗꓳ ꓡꓥ ꓑꓳ ꓕꓳ ꓡꓳ ꓡꓪꓲ꓾ ꓘꓲꓠ ꓬꓴ ꓰ ꓐꓥ ꓡꓰ ꓖꓰ ꓖꓰ ꓪꓳ ꓫꓪꓲ ꓡꓳ ꓥꓳ ꓡꓰ꓾ ꓪꓳ ꓫꓪꓲ ꓡꓳ ꓥꓳ ꓫꓳ꓾ ꓟꓮꓴ ꓒꓳ ꓮ ꓟꓴ ꓕꓳ ꓫꓲꓔ ꓗꓳ ꓣ ꓥꓴꓔ ꓡꓰ꓿ 23ꓠꓴꓥ ꓟꓳ ꓬꓴ ꓢ ꓓꓲ ꓠꓲ ꓗꓰ꓾ ꓥꓳ ꓠꓴꓥ ꓟꓳ ꓡꓰ ꓫꓲ ꓡꓴꓥ ꓡꓥ ꓔꓮꓲ ꓘꓬꓮꓴ ꓔꓳ ꓐꓰ꓿
ꓬꓰ˗ꓢꓴ ꓜꓮꓴ ꓣ ꓡꓲꓥ ꓓꓴꓟ ꓖꓬꓳ ꓡꓳ ꓣ
24ꓠꓲꓗ ꓘꓲꓗ ꓰ ꓕꓥ ꓟ ꓐꓪꓲ ꓠꓲ ꓑꓰ ꓟ ꓐꓪꓲ ꓖꓶ ꓛꓴꓔ ꓐꓬꓴ ꓡꓳ ꓡꓪꓲ ꓡ ꓟꓳ ꓡꓰ ꓫꓴꓟ ꓐꓬꓴ ꓡꓳ ꓐꓲ ꓣ꓿ 25ꓗꓲ ꓑꓰ ꓡꓰ ꓟꓮꓴ ꓘꓴꓥ ꓟꓮꓲ ꓐꓲꓔ ꓖꓬꓳ ꓐꓬꓴ ꓡꓪꓲ꓾ ꓟꓮꓴ ꓘꓴꓥ ꓕꓳ ꓟ ꓙꓳ ꓰ ꓲ ꓝꓟ ꓑꓰ ꓖꓶ ꓠꓠ ꓡꓳ ꓐꓴ ꓗꓳ ꓣ ꓥꓴꓔ ꓡꓰ꓿ 26ꓧꓮꓴ ꓘꓴꓠ ꓡꓰ ꓧꓮꓴ˗ꓐꓬꓴ˗ꓬꓥ˗ꓜꓳ ꓖꓶ ꓓ ꓣꓴ ꓟ ꓖꓟ ꓰ ꓒꓴꓥ ꓪꓴꓑ ꓟꓳ ꓰ ꓟꓴ꓾ ꓟꓴꓔ ꓟꓮꓴ ꓡꓰ ꓙꓲ ꓡꓪꓲ ꓙꓰ ꓡꓰ ꓰ ꓡꓰ꓾ ꓬꓥ ꓟꓳ ꓟꓬꓥ ꓐ ꓗꓳ ꓣ꓿ 27ꓧꓮꓴ ꓘꓴꓠ ꓟꓮꓴ ꓟꓥ ꓑꓰ ꓡꓰ ꓬꓥ ꓠꓥ ꓗꓔ ꓡꓪꓲ꓾ ꓡꓮꓲ ꓟꓲ ꓫꓴꓔ ꓒꓬꓥ ꓟ ꓟꓮꓴ ꓟꓲ ꓕꓴꓟ ꓫꓴꓔ ꓟꓮꓲ ꓟꓮꓴ ꓘꓴꓥ ꓕꓴꓟ ꓰ ꓟ ꓙꓰ ꓫꓳ ꓬꓥ ꓘꓲꓥ ꓬꓴ ꓰ ꓐꓥ ꓡꓰ ꓡꓳ ꓟꓶꓥ ꓬꓴ ꓐꓴ ꓗꓳ ꓣ꓿
ꓫꓲ ꓟꓬꓳ ꓖꓟ ꓓꓥ ꓗꓰ
28ꓧꓮꓴ ꓕꓳ ꓟ ꓫꓲ ꓟꓬꓳ ꓖꓟ ꓡꓰ ꓪꓴ ꓡꓪꓲ꓾ ꓧꓮꓴ ꓰ ꓓꓥ ꓗꓰ ꓡꓰ ꓟꓳ ꓬꓴ ꓔꓳ ꓗꓰ꓾ ꓧꓮꓴ ꓰ ꓮ ꓗꓳ꓾ ꓮ ꓗꓬꓥ ꓚꓴꓑ ꓡꓳ ꓡꓪꓲ꓾ ꓮ ꓧ ꓠꓬꓴꓠ ꓡꓳ ꓙꓥ ꓥꓬꓰ ꓠꓟ ꓚꓥꓸꓽ ꓡꓳ ꓰ ꓡꓰ ꓠꓴꓥ ꓟꓳ ꓢꓰ ꓠꓲ ꓮ ꓗꓳ꓿ 29ꓧꓮꓴ ꓰ ꓣ ꓙꓴꓥ ꓜ ꓧꓮꓴ ꓘꓬꓳ ꓡꓰ ꓓꓴꓔ ꓧꓶ ꓡꓳ ꓰ ꓡꓰ ꓠꓴꓥ ꓟꓳ ꓟꓬꓥ ꓰ ꓘꓴꓠ꓾ ꓬꓥ ꓖꓶ ꓘꓴꓟ ꓓꓳꓥ ꓬꓟ ꓟ ꓚꓥ ꓡꓳ ꓰ ꓡꓰ ꓢꓰ ꓖꓬꓳ ꓠꓲ ꓗꓰ꓿ 30ꓠꓴꓥ ꓟꓳ ꓡꓰ ꓥꓳ ꓔꓰꓥ ꓔꓰꓥ ꓔꓮꓲ ꓗꓳ ꓡꓰ꓾ ꓮ ꓘꓪꓲ ꓠꓲ ꓰ ꓫꓲ ꓣ ꓑꓬꓔ ꓟ ꓮ ꓟꓬꓴ ꓐꓬꓴ ꓑꓰ ꓮ ꓡꓮꓲ ꓡꓳ ꓐꓬꓴ ꓫꓲ ꓡꓰ꓿ ꓧꓮꓴ ꓘꓬꓳ ꓡꓴꓥ ꓡꓥ ꓓꓴꓔ ꓐꓬꓴ ꓐ ꓣ꓿ 31ꓟꓮꓴ ꓘꓴꓥ ꓰ ꓟꓲ ꓖꓴꓥ ꓡꓮꓲ ꓡꓳ ꓐꓬꓴ ꓗꓳ ꓡꓥ ꓥ ꓓꓥ ꓖꓶ ꓮ ꓡꓮꓲ ꓐꓬꓴ ꓣ꓿ 32ꓥꓴꓔ ꓗꓳ ꓡꓥ ꓧꓮꓴ ꓐꓪꓲ ꓠꓲ ꓰ ꓬꓟ ꓡꓰ ꓧꓮꓴ ꓲ ꓪ ꓟꓮꓲ ꓖꓳ ꓙꓰ ꓳ ꓡꓰ ꓮ ꓪꓳ ꓢꓰ꓾ ꓟꓮꓴ ꓘꓴꓥ ꓟ ꓟꓮꓴ ꓟꓥ ꓑꓰ ꓰ ꓧꓮꓴ˗ꓐꓬꓴ˗ꓬꓥ˗ꓜꓳ ꓡꓥ ꓧꓮꓴ ꓡꓰ ꓮ ꓪꓳ ꓢꓰ ꓗꓳ꓿ 33ꓧꓮꓴ ꓬꓟ ꓡꓰ ꓠꓴꓥ ꓟꓳ ꓮ ꓢꓰ ꓔꓳ ꓗꓳ ꓬꓠ ꓟꓮꓲ ꓢ ꓓꓲ ꓟ ꓚ ꓠꓲ ꓗꓰ꓿
ꓬꓰ˗ꓢꓴ ꓣ ꓡꓲꓥ ꓓꓴꓟ ꓖꓬꓳ ꓡꓳ ꓣ ꓡꓰ ꓣꓴ ꓟ ꓚ ꓠꓲ ꓰ
34ꓧꓮꓴ ꓘꓬꓳ ꓐꓬꓴ ꓣ ꓬꓴ ꓪꓰ ꓰ ꓟꓶꓥ ꓒꓬꓥ ꓰ ꓠꓲ ꓐꓬꓴ ꓡꓪꓲ꓾ ꓬꓥ ꓰ ꓬꓴꓟ ꓡꓰ ꓑꓬꓟ ꓔꓳ ꓡꓰ꓾ ꓬꓥ ꓰ ꓙꓴꓠ ꓑꓰ ꓮ ꓘꓥ ꓐꓲ ꓡꓰ ꓰ ꓣ ꓬꓴ ꓰ ꓣ ꓬꓴ ꓡꓰ ꓮ ꓟꓴ ꓐꓠ ꓖꓟ ꓙꓥ꓾ ꓘꓴꓟ ꓜꓴꓥ ꓢꓴ ꓡꓰ ꓡꓰ ꓟ ꓚ ꓠꓲ ꓫꓥ ꓖ꓾ ꓖ ꓡꓪꓲ꓾ ꓔꓮꓲ ꓔꓳ ꓰ ꓘꓬꓳ ꓡꓰ ꓪꓲ ꓔꓳ ꓣ꓿ 35ꓘ ꓢꓴ ꓟꓴ ꓖ ꓡꓰ ꓧꓮꓴ ꓬꓴꓟ ꓢꓶꓥ ꓖꓶ ꓛꓴꓔ ꓫꓴꓟ ꓡꓰ꓾ ꓖꓟ ꓖꓴꓥ ꓡꓰ꓾ ꓪꓳ ꓔꓴꓠ ꓘꓴꓠ ꓡꓰ꓾ ꓠꓑ ꓗꓬꓳ ꓡꓰ꓾ ꓓꓴꓟ ꓙꓰ ꓡꓳ ꓣ ꓰ ꓡꓰ ꓠꓴꓥ ꓟꓳ ꓮ ꓢꓰ ꓔꓳ ꓰ ꓬꓠ ꓟꓮꓲ ꓣꓴ ꓟ ꓚ ꓠꓲ ꓗꓰ꓿ 36ꓧꓮꓴ ꓢꓴ ꓮ ꓥꓴꓔ ꓡꓰ ꓬꓥ ꓓꓠ ꓡꓳ ꓙꓰ ꓡꓳ ꓡꓪꓲ꓾ ꓠꓴꓥ ꓟꓳ ꓮ ꓐꓴꓠ ꓰ ꓬꓴꓑ ꓠꓲ ꓡꓰ ꓡꓳ ꓟꓬꓥ ꓐ ꓣ꓿ 37ꓠꓴꓥ ꓟꓳ ꓡꓰ ꓥꓳ ꓔꓮꓲ ꓰ ꓰ ꓣ ꓙꓴꓥ ꓜ ꓡꓴꓥ ꓡꓥ ꓡꓰ ꓥꓳ ꓔꓮꓲ ꓔꓳ ꓰ ꓓꓥ ꓖꓶ ꓣꓴ ꓟ ꓚ ꓠꓲ ꓗꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿
Jelenleg kiválasztva:
ꓟ˗ꓗꓴ ꓟꓮꓴ ꓢꓮꓴ 13: ATB1938
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
First published in Fraser script in 1938.
