Makö 7

'Zufʋnyʋaa ŋʋ wa 'bäsɩɩ' tëtë ‑lɔɔ 'klʋkpää' 'nɩ wa gboguë Laagɔɔ' ‑Jlämaa

(Matie 15.1‑20)

1 Falizɩɛnyʋä ‑yä ‑Jlämöcɩanyʋä zio ‑bha Zolizalɛmʋduu' 'nɩ wa ‑yi 'nɩ wa 'wlää‑ Zozii yëku 'wlu. 2Waa' bɩälɩɩ 'mnö nä, wa nii‑ 'yi nynä Zozii' 'kʋgënyʋaa' 'sɔnalʋä, waa' wɔɔ bhɔɔ wlɩ sä 'Zufʋnyʋaa' tëtë ‑lɔɔ ylä bhlä nä, 'nɩ wa lü bhä. 3‑Bhlɛ Falizɩɛnyʋa ‑yä ‑mɔɔ' 'Zufʋnyʋa 'fɩɩn kwa ŋʋ bhä wa 'bäsɩɩ' tëtë lɔɔ 'klʋkpää'. Wa kä cii‑ wa 'kä lü nä, kä wa wɔɔ 'fɩa 'nägäsä wlɩ wa 'bhusä. 4Wa kä 'sɩɩ 'clɩkpää' ‑bha nä, wa ‑wɔɔ 'fɩa wlɩ 'nɩ wa la 'kä lü. 'Klü ‑nɩnɩɩ' ‑lɛɛ bhutukpä ‑kʋ waa' ‑lɔɔ 'mnö 'nɩ wa 'ŋʋmʋɩ 'sɩɩ 'klʋkpää'. Wa ‑kä waa' sä wa wɔɔ lä waa' 'kɔpɩ, ‑yä waa' 'bii ‑yä waa' nyüdüü' nä.

5'Nɩ Falizɩɛnyʋa ‑yä ‑Jlämöcɩanyʋa yi Zozii 'ylä, wlä ‑mä ‑ɔnöza bhä 'nɩ ‑naa 'kʋgënyʋaa' 'ŋʋ bhä ‑a 'bäsɩɩ' tëtë ‑lɔɔ 'klʋkpää', 'nɩ wa kä lü 'nɩ waa' wɔɔ bhä wlɩɩ? 6'Nɩ Zozii yiwa soo, ɔ lä 'kʋ wloowloogbɩɩ' nʋnyʋänyɩ‑! 'Plɔfɛtɩ Ezayii' wälɩ mɛɛ‑ bhä. Kɩ jɩjlɔ‑ anyɩa' ‑za nynä Laagɔ lä

Nyɩkpanä, nimni 'kʋ wa bʋbɔnö'ö lä,

‑Mä waa' pɔlöö kɩ ‑sä'ä gwë fɛɛn. 7'Flɛ wa yi'i lä bʋbɔ ‑kää ‑mä,

Waa' cɩalɩɩ 'mnö nä, 'ylʋzɔkʋnyʋää' ‑lɔɔ 'mʋ wa cɩa. # 7.6‑7 Ɩ bha Eza 29.13.

8'Nɩ Zozii yiwa bʋkʋ soo, ɔ lä anyɩ, a 'bäsɩɩ' tëtë ‑lɔɔ 'mʋ a ŋʋ 'klʋkpää' ‑mä Laagɔɔ' Jlämaa, amä a gboguë. 9A ‑nʋ sää 'fɩɩn ‑tɛɛ 'nɩ a yi Laagɔɔ' Jlämaa 'klä 'pä, 'nɩ a yi a 'bäsɩɩ' tëtë ‑lɔɔ 'kʋ 'bhlü. 10Kä Moyizö cii‑ lä nynä ‑N 'ŋʋ ‑n 'bä ‑yä ‑n ‑nɔɔ!#7.10 Ɩ bha 'Nämʋ 20.12; Detlo 5.16. 'Nɩ ɔ cii‑ 'sɩɩ nynä ‑mä nyɩkpɔ kä ɔ 'bä ‑yä ɔ ‑nɔɔ 'sɔ ‑gbütë nä, ‑lɔɔ' nyɩkpɔɔ wa 'bhlɔ ‑yä ɔ 'ku!#7.10 Ɩ bha 'Nämʋ 21.17. 11'Nɩ anyɩ, a ci lä nynä ‑mä nyɩkpɔ yi mii 'nɩ ɔ yi ɔ 'bä ‑yä ɔ ‑nɔɔ 'sɔ soo nynä ‑mä n yi bhä mii 'nɩ n yi‑i bhä 'kʋ yi ‑mä, ‑lʋʋ n 'kä‑ä bhlä 'nyɛ nä, ʋ ‑glö yɩ klɔbanö. Kɩ sä lä ‑zɔɔ nynä Laagɔ‑ n 'kʋ ylä 'nyɛ. 12Ka gbä 'nɩ nyɩkpɔɔ' nʋ yɩɔ ɔ 'bä ‑yä ɔ ‑nɔɔ 'sɔ lʋʋ ‑gä. 13A bhlü a 'bäsɩɩ' tëtë ‑lɔɔ 'kʋ 'nɩ ʋmʋʋ‑ sä ‑lɔɔ Laagɔɔ' Jlämaa. 'Nɩ a ‑yi 'nɩ a ‑kä bʋkʋ 'sɔɔ gbenyenyi ‑bhutukpä 'nɩ a nʋɩ.

‑Lɩɩ ‑ɩ pla lä nyɩkpɔ ‑gesi nä

(Matie 15.10‑20)

14Zozii laa‑ bʋkʋ ‑jlëa 'nɩ ɔ yia soo, ɔ lä anyɩ 'fɩɩn, a poo 'nyukwli 'nägäsä ‑yä a 'nu sä n 'kä lä ci nä! 15‑Lʋʋ nyɩkpɔ lü lä 'nɩ ‑ʋ mʋ lä ɔɔ' 'mnö nä, ʋʋ' 'ŋʋɔ ‑wʋ ‑gesi yëku, ‑mä ‑ʋ bha lä nyɩkpɔ nëë' nä, ʋmʋʋ‑ ŋʋɔ lä ‑gesi yëku. [16Nä, ‑ɔ gä 'nyukwli ‑kä nynä ɔ 'kä 'nu nä, ɔ 'nu!]

17Zozii ‑bha lä ‑jlëa yëku 'nɩ ɔ mʋ lä gbëë' nä, kä ɔɔ' 'kʋgënyʋa ylää‑ wälɩɩ ɔ cii‑ bhlä nä, ɩɩ' ‑zɔɔ. 18Ɔ lä anyɩ ‑mä 'sɩɩ, anyɩa' bhobhowluu' ‑wʋ ‑lɔɔ ‑ŋëë ‑a? Aa' ‑wʋ sɔɔ ‑yi nynä lʋʋ nyɩkpɔ lü lä 'nɩ ‑ʋ mʋ lä ɔɔ' 'mnö nä, ʋʋ' plɔɔ ‑wʋ ‑gesi ‑a? 19Aa' ‑wʋ sɔɔ ‑yi nynä ‑lʋʋ nyɩkpɔ lü lä nä, ʋʋ' ŋënöɔ ‑wʋ pleyi ‑mä 'mnö ʋ bhlünöɔ ‑a, 'nɩ 'tänyɩ ‑kʋ ‑lɔɔ 'nɩ ɔ mʋ 'klä yëku ‑a? Kɔ sonʋwa bhlä nynä ‑mä nyɩkpɔ yi mii 'nɩ ɔ yi lülülɩɩ 'fɩɩn lü. 20'Nɩ ɔ yi ci, ɔ lä ‑ɩ bha lä nyɩkpɔ pleyii nä, ɩmɩɩ‑ plɔɔ lä ‑gesi. 21‑Mɔɔ pleyii, ‑mɔɔ bhobholɩ ‑nyenyi bha lä nä, ɩmɩɩ‑ gbä 'nɩ nyɩkpɔ kää lä gbʋʋsä 'klʋ 'tɛtʋ. Ɩmɩɩ‑ gbä 'nɩ ɔ ghlü lä, 'nɩ ɔ bhlä lä 'sɩɩ ɔ ‑lie. 22Ɩmɩɩ‑ gbä 'nɩ 'ŋnɔ ylä lä 'wli 'nɩ ŋwadi ylä lä 'ŋnɔ, ɩmɩɩ‑ gbä lä 'sɩɩ 'nɩ nyɩkpɔ mɛɛ‑ lä 'kʋ, 'nɩ ɔ ‑nyuu lä 'sɩɩ 'mnö. Ɩmɩɩ‑ plöö‑ lä nyɩkpaa' 'nyigëlɩɩ ‑yä ‑käpä ‑käpaa. Ɩmɩɩ‑ plöö‑ lä sä nyɩkpɔ ɔ ‑liee' lʋʋ zɛlɩänöɔ lä 'yi nä. Ɩmɩɩ‑ plöö‑ lä nyenyisaa' 'mʋsäälɩɩ, 'nɩ ɩmɩɩ‑ plöö‑ lä 'sɩɩ ‑blipälɩɩ ‑yä dëbëa. 23Gbenyenyinɩ 'fɩɩn, nyɩkpɔɔ' pleyii ɩ bha lä nä, ɩmɩɩ‑ plɔɔ lä ‑gesi.

Lowu‑ŋnɔɔ ‑kä Zozii' pɔlötɛtɛ

(Matie 15.21‑28)

24Zozii ‑bha lä ‑lɔɔ nä, kɔ ‑mʋ Tilö‑bhlɩɛ 'mnö 'nɩ ɔ ‑plä dä ‑bhlo 'kʋ. Ɔɔ' bhɛ ‑waa nynä nyɩkpa yibhënöɔ bhä dä. ‑Mä ɔɔ' ‑wʋ ziziolɩ mii‑. 25'Ŋnɔ ‑bhlo ‑kʋ bhä ‑lɔɔ 'nɩ ɔ ‑kä bhä 'yuŋnʋgbänyɔ 'nɩ 'yuŋnʋgbänyɔɔ ‑zuzunyënyu ‑kʋɔ bhä kätää'. 'Ŋnɔɔ nuu‑ lä Zozii' yëkuu' wälɩ nä, kɔ ‑yi 'nɩ ɔ pɔɔ‑ dëlü ‑kokoowli glu. 26Ɔ ‑glö bhä Silofenisiibhlɩ 'kʋʋ 'ŋnɔ ‑mä ‑ɔɔ bhɔɔ 'Zufʋ‑ylʋkwlä. 'Nɩ ɔ yi Zozii 'wlu slää nynä ɔ ‑yɔŋnɔɔ' kätää' ‑zuzunyënyuu ɔ 'tlu. 27‑Mä Zozii ‑sonöɔ, ɔ lä ‑n ‑taa 'yua 'yi wa 'kä 'fɩa lü wa 'kä loo ‑mä, ɩɩ' ‑wʋ 'kʋ ‑ŋwa nynä wa 'bhlü 'yuëë lülülɩɩ 'kʋ ‑yä wa 'pɩɩ goyuë. 28'Ŋnɔɔ lä ‑ɛɛɛ ‑mä, Kwlienyɔ, 'yua kä lüdä ‑kʋ nä, ‑lɛɛ pɩtaa‑ bhlü lä ‑zɔɔ nä goyuë luwa ‑nä! 29Zozii lä ‑n yä ylä sää ci nä, ‑n 'plö ‑yä ‑n mʋ gbëë' ‑mä ‑zuzunyënyuu yä ‑n ‑yɔŋnɔ kätää' ‑bha! 30'Ŋnɔɔ 'ylɩbhɔ‑ 'nɩ ɔ ‑mʋ lä gbëë' nä, ɔ lɔ wloo nä, ɔ ‑yɔŋnɔ puu‑ bhɛ ‑lɔɔ ‑bɔɔgɩɛ 'kʋ sä. ‑Zuzunyënyuu yɔ bhɛ 'zaazɩ kätää' ‑bha.

Zozii ‑yamä nyɩkpɔɔ ɔɔ' 'nu bhɔɔ 'nɩ ɔɔ' ‑sää bhɔɔ 'mʋ

(Matie 15.29‑31)

31Zozii ‑bha ylä Tilö‑bhlɩɛ 'mnö nä, ɔ ‑ghlää Sidɔɔ‑bhlɩɛ ‑yä 'Di ‑Kakpüü 'Kʋgbää' 'bhlɩɛ 'mnö 'nɩ ɔ yi Galilee‑nyie yëku 'ylɩbhɔ. 32'Nɩ wa yio nyɩkpɔ yëku ‑lä. Nyɩkpɔɔ' 'nu bhɔɔ 'nɩ ɔɔ' ciciwälɩɩ' bhɔɔ ‑kplɔɔ. 'Nɩ wa yi Zozii bhibhie nynä ɔ gbɩɔ ‑klɔgbä 'kʋ ‑yä ɔ 'kä yamä. 33'Nɩ Zozii ‑yä nyɩkpɔɔ 'sɔ yi ‑jlëa gwë ‑sä, 'nɩ ɔ yio wlɩ 'nyukwlii' tlʋʋ. Ɔ ŋwnaa‑ wliiye ‑dlɛɛ 'yii 'nɩ ɔ yi nyɩkpɔɔ' mɩɔɔ 'taa. 34Ɔ ‑wloo ‑laagɔɔ' 'nɩ ɔ yi nyämʋ slu, 'nɩ ɔ yi nyɩkpɔɔ soo, ɔ lä efata! Kɩ sä lä ‑zɔɔ nynä ‑n welio yɩ! 35'Kpobhuu ‑bhlo 'kʋ 'nɩ nyɩkpɔɔ' 'nyukwlii ‑yä ɔɔ' mɩɔ 'sɔ yi welio. 36'Nɩ Zozii yi ‑wa ‑lä bhlä nyɩkpɔɔ nä soo nynä wa kä ‑mʋ nä, waa' ‑sää ‑lä nyɩkpɔ 'dö. ‑Mä sä Zozii yi bhä nyɩkpaa soo ‑kaaa, wa kä ‑mʋ nä, kwa sää bhä nyɩkpa 'dö. 37Wälɩɩ 'fɩɩn Zozii nʋ bhlä nä, ɩ 'ninie bhä kpänyɩ nyɩkpa ‑bhutukpä plɛkʋ, 'nɩ wa ci bhä, wlä 'klüü 'fɩɩn ɔ nʋ lä nä, kɩ nää‑ kpänyɩ! Ɔ gbä 'nɩ ‑waa 'nu ‑wʋ lä nä wa nu, 'nɩ ‑waa mii ‑wʋ lä 'mʋsäälɩ nä, wa sää 'mʋ!

Jelenleg kiválasztva:

Makö 7: god

Kiemelés

Megosztás

Másolás