Makö 6

Zozii ɔ 'bhunyʋä 'nöɔ ‑wʋ 'mänyɩ‑

(Matie 13.53‑58; Lukö 4.16‑30)

1Zozii ‑bha lä ‑lɔɔ nä, 'duu ɔ 'bhʋä lä 'mnö nä,#6.1 Nazalɛtö‑duu 'mʋ wa sä lä. kä ɔ ‑yä ɔɔ' 'kʋgënyʋa 'sɔ ‑mʋ ‑mɔɔ. 2Sabaa‑gwlɛylʋʋ ‑ŋëë bhɛ lä nä, ɔ ‑plä Laagɔ‑bhutuu 'mnö 'nɩ ɔ yi cɩalɩ 'kʋ cie. Nyɩkpa 'fɩɩn ‑wa ‑puo bhlä 'nyukwli nä plɛkʋ 'niniwa‑, wlä 'nɩ däsä ɔ ‑sä bhä nʋnʋgbɩnɩ 'fɩɩn? ‑Ɔ nyɩɔ‑ bhä sää 'fike ‑yä 'päwä 'nɩ ɔ nʋ bhä ‑lää 'yiziziogbɩnɩɩ? 3Malii ‑yowli 'mɔɔ‑ bhä ‑lɔɔ ‑kʋ ‑a? Ɔmɔɔ‑ nʋ bhɛ 'kämnɩlɛɛ ‑a? 'Nɩ ɔ bhelie‑ bhä Zakö ‑yä Zozɛsö, ‑yä Zudö, ‑yä Simɔɔ 'sɔ plöö‑ ‑a? 'Nɩ ɔ bhɛŋwnɩä 'nö‑anyɩ bhä ‑lää nëedë ‑kʋmʋ ‑a? Sä wa ‑yio bhɛ lä nä, kä wa paa‑ ɔɔ' wälɩɩ 'klä. 4'Nɩ Zozii yiwa soo, ɔ lä dää 'fɩɩn 'plɔfɛtɩ yi lä mʋ nä, kä wa ŋʋɔ 'klʋkpää', ‑mä ɔ kä ɔ 'bhlɩɩ ‑yi nä, ɔ 'bhunyʋä ‑yä ɔɔ' 'lɔlʋnyʋä, ɩyä ɔɔ' gbünyʋä waa' 'mänyɩnöɔ ‑wʋ. 5‑Nɩnɩ 'fɩɩn ‑kä bhɛ 'ŋnö nä, Zozii' ‑wʋ 'kwläkwlä mii‑ 'nɩ ɔ 'kä ‑mɔɔ 'yiziziogbɩ 'kädɩ ‑nʋʋ. Gupanyʋä zio, wamä ɔ ‑gbɛɛ ‑klɔgbö 'kʋ 'nɩ wa yi yamä. 6Kɔ 'bhunyʋää' 'nyukwli 'tɛnɔɔ ‑slɔɔ nükpëë'.

Zozii ‑lobho ɔɔ' 'kʋgënyʋa 'kʋgbä 'sɔ

(Matie 10.5‑14; Lukö 9.1‑6; Lukö 10.1‑20)

Zozii bhlü bhä dikakpüü 'nɩ ɔ cɩa bhä ‑mɔɔ' nyɩkpaa. 7Ɔ laa‑ ɔɔ' 'kʋgënyʋa 'kʋgbä 'sɔ 'nɩ ɔ yiwa lobho 'sɔ 'sɔ 'sɔ. Ɔ nyɩwa‑ 'päwä nynä wa 'tlü ‑zizinyenyi. 8'Tänyɩɩ wa 'kä lä mʋ nä, ɔ ‑sonʋwa, ɔ lä a kä mʋdä ‑kʋ nä, aa bhɛɛ ‑lä lʋʋ. 'Kʋtëgë ‑yukwe ‑bhlo a la bhɛɛ, aa' bhɛɛ ‑lä lülülɩɩ, aa' bhɛɛ ‑lä badu, ɩyä aa' 'ŋʋ ‑lä 'sɩɩ monii wlu yëku! 9A plä 'süü, a plä 'kotu ‑bhlo ‑yä aa' bhɛɛ ‑lä ʋʋ' 'cɩcɩlʋʋ! 10A kä ‑mʋ nä, ɩɩ' dä wa 'kanyɩ lä 'kʋplädä 'nyɛ nä, a kʋ ‑lɔɔ ‑kaaa ‑yä anyɩa' duu' ‑bha‑tänyɩ 'kä ŋëë! 11'Ɩzä a kä dä ‑ŋëë 'nɩ ‑lɔɔ' nyɩkpaa nö'anyɩ 'kʋplädä nyɛɛ‑ nä, 'nɩ wa kä 'sɩɩ cii‑ nynä wa nö'anyɩ ‑lä 'nyukwli poo nä, a gbɔtɔɔ ‑lɔɔ anyɩa' ‑kokokpü ‑zɔɔ' ‑bhabhuu! Ɩmɩɩ‑ 'gä lä anyɩa' ‑dläfʋɛ lü nynä ‑mä a ‑gblɩmänʋwa bhä. 12'Nɩ 'kʋgënyʋa yi 'kʋ ‑bha 'nɩ wa yi Laagɔwälɩ ci ‑kää mʋ. Wa soo bhä nyɩkpaa nynä wa 'cɩcɩ waa' nʋnʋgbɩɩ. 13'Nɩ wa tlü bhä 'sɩɩ ‑zizinyenyi ‑bhutukpä 'nɩ wa ŋʋ bhä gupanyʋä ‑bhutukpä 'kpüü 'wlu 'nɩ wa yamä bhä.

'Loyo Elodö nuu‑ Zozii' wälɩ

(Matie 14.1‑12; Lukö 3.19‑20; 9.7‑9)

14Zozii mʋ bhɛ lä sää 'ŋnu nä, 'loyo Elodö 'numʋ‑ ɔɔ' yëkuu' wälɩ. ‑Nänʋä lä Zään Badisö 'mɔɔ‑ ‑kʋ lä ‑lɔɔ! Ɔ yä 'kuëë glɔɔ, ɩɩ' ‑zä ɔ ‑kä lä 'päwä 'nɩ ɔ nʋ lä 'yiziziogbɩ. 15‑Nänʋä lä, 'plɔfɛtɩ Elii 'mɔɔ‑ ‑kʋ lä ‑lɔɔ. ‑Nänʋä lä 'plɔfɛtɩnyʋa nëëdëë' lɔɔ ‑bhlo lä. 16Dä 'loyo Elodö nuu‑ lä wälɩnɩ nä, ɔ lä Zään Badisö n döö‑ lä 'wlu 'kʋ nä, ɔmɔ ‑ɔ ‑glɔɔ lä 'kuëë.

Wa bhlää‑ Zään Badisö

17Sɩ ‑kʋ bhlä naa, 'tänyɩ ‑kʋ ‑lɔɔ 'nɩ Elodö ‑klä Zään Badisö, 'nɩ wa ‑gʋɔ 'nɩ wa yio ‑jɩɩ' 'ŋʋ. Ɔnöza bhɛɛ? Elodö nä, kɔ ‑sä bhä ɔ bheli Filipʋ 'ŋnɔ Elodɩadö, 'nɩ ɔ nönöɔ‑. 18Ɩ ‑kä 'ŋnö nä, kä Zään ‑soo ɔmɔ Elodö nynä ‑mä ɩɩ' ‑wʋ 'kʋ ‑ŋwa nynä ‑n 'ylä ‑n bheliŋnɔ. 19Nä Elodɩadö nuu‑ lä wälɩɩ nä, kɔ ‑zɔbhlɛmä Zään, ɩ ‑kä 'ŋnö 'nɩ ɔ ‑tään bhä nynä ɔ 'kä Zään 'bhlä ‑mä ɔɔ' ‑wʋ ‑lɔɔ' 'casɩɛ nii‑. 20Sä Zään plöö‑ bhlä nyɩkpɔɔ' ‑lɔɔ ‑ɔnö nʋnʋgbɩ‑ nää‑ bhlä, 'nɩ ‑ɔ ‑kplɔ bhlä Laagɔ dëlüü nä, kä Elodö ‑guunöɔ bhä, 'nɩ ɔ 'tɩtɔnöɔ bhä 'kʋ. 'Tänyɩ Zään sonöɔ bhlä nä, ɩ kamänöɔ bhä yëkuu', ‑mä ɩ ‑kʋ sɔɔ 'nɩ ɔ ‑waa bhä ɔɔ' 'nyukwli poolɩ.

21'Tänyɩɩ' Elodö ni bhɛ lä ɔɔ' gänöylʋʋ' ‑glɩsɩɩsɩɛ nä, ‑lɔɔ ylʋʋ 'kʋ, ‑lɔɔ Elodɩadö nii‑ 'casɩ ‑yä ɔ 'kä Zään 'bhlä. ‑Lɔɔ' ylʋʋyɩ 'kʋ nä, Elodö laa‑ ɔɔ' 'govlä‑nyɩkpaa ‑yä ɔɔ' 'sʋjaa' 'kämänyʋa ɩyä Galilee‑bhlɩɛ 'mnö nyɩkpa 'kädʋa ‑yä wa ‑yɔsɔ 'kä 'kʋ lüü. 22Nä Elodɩadö ‑yɔŋnɔ ‑plä ‑mɔɔ ‑gbäsɩɩ wa 'nii‑ bhlä ‑glɩsɩɩsɩɛ nä, 'nɩ ɔ ‑ye. Ɔɔ' yelɩɩ ‑kamää Elodö ‑yä nyɩkpaa ɔ ‑yʋwa 'sɔ lü bhlä nä 'tʋ. 'Nɩ ɔ yi ŋnʋgbɛnyɔɔ soo, ɔ lä lʋʋ ‑n gä ‑waa nä, ‑n 'ylänö 'mʋʋ, ‑mä n yi‑i mʋ 'nyɛ! 23Kä n 'sɔlɩ, 'nɩ n ci lä nynä ‑mä, lʋʋ ‑n gä'ä 'ylää‑ nä, n yi‑i mʋ 'nyɛ. Ɩ kä plöö nynä ‑mä n mimi 'naa 'leyi‑bhlɩɛ 'mʋ ‑yä n dɩɛ 'mʋ ‑yä n 'nyɛ‑ɛ nä, n yi sɔɔ nʋ. 24Ɔ cii‑ lä sɔɔ nä, kä ŋnʋgbɛnyɔɔ wlʋʋ‑ ‑zɔɔ 'nɩ ɔ yi ɔ 'nɔ 'ylä, ɔ lä ‑Mami, lʋʋ ‑sä n nä n 'ylää bhä 'loyoo? Wlä ɔ 'nɔ lä ɔ 'nyɛ‑ɛ Zään Badisöö' 'wluu.

25'Nɩ ŋnʋgbɛnyɔɔ yi paa, 'nɩ ɔ yi bʋkʋ 'loyoo dëlü yi 'nɩ ɔ yio soo, ɔ lä n ‑waa nynä ‑mä ‑n nyɛɛ'ɛ Zään Badisöö' 'wluu. Wa 'ŋʋʋ ‑pɛpɛɛ ‑kɔklʋʋ' ‑yä wa ‑lä'ä 'mʋʋ! 26'Loyoo nuu‑ lä 'yuoo' nëë' nä, kä wälɩɩ ‑kamänöɔ yëkuu'. ‑Mä sä ɔ yä bhɛ lä nyɩkpaa 'fɩɩn 'klʋ 'sɔlɩ nä, ɔɔ' bhɛ mii‑ 'nɩ ɔ 'kä cii‑ nynä ɔɔ' 'ylä ‑wʋ. 27Kɔ ‑lobho yɩ 'kpobhuu ‑bhlo 'kʋ ɔɔ' 'sʋjaa' lɔɔ ‑bhlo nynä ɔ mʋ ‑yä ɔ ‑döö Zään Badisö 'wlu 'kʋ ‑yä ɔ ‑lʋʋ. 'Nɩ 'sʋjäyuo yi ‑mɔɔ ‑jɩgbëë mʋ, 'nɩ ɔ yi Zään 'wluu 'kʋ ‑döö. 28Ɔ ŋʋʋ‑ ‑kɔklʋʋ' 'nɩ, ɔ yiu ŋnʋgbɛnyɔɔ ‑lä. 'Nɩ ŋnʋgbɛnyɔɔ yiu ɔ 'nɔ 'nyɛ. 29'Tänyɩɩ Zään Badisöö' 'kʋgënyʋa nuu‑ lä ɔɔ' 'kwiee wälɩɩ nä, kwa ‑yi 'nɩ wa bhlüü‑ ɔɔ' ‑gɛzɛɛ 'kʋ 'nɩ wa yie zizie ‑kää fä.

Zozii ‑loo nyɩkpa ‑bhutukpä

(Matie 14.13‑21; Lukö 9.10‑17; Zään 6.1‑14)

30'Tänyɩ ‑kʋ ‑lɔɔ 'nɩ Zozii' lobho lobhonyʋa ‑yio yëku 'nɩ wa yio waa' lebhee ‑yä cɩalɩɩ 'fɩɩn wa cɩa‑ lä nä, ɩɩ' yëkuu' 'döö ‑sää. 31Nyɩkpaa 'nɩɔkɔ nɩɔkɔ bhɛlä kpänyɩ ‑lɔɔ 'kʋ nä, ɔ ‑yä ɔɔ' 'kʋgënyʋa 'sɔɔ 'ni bhɔɔ sää 'titi 'casɩ ‑yä wa 'kä lʋʋ në koo. Ɩ ‑kä 'ŋnö nä, ɔ ‑sonʋwa, ɔ lä a ‑ya ‑sä ‑lää gwë ‑yä ‑a mʋ ‑gbäsɩɩ nyɩkpɔɔ' ‑wʋ lä ‑kʋ nä, ɩyä a 'kä 'pɛpɛlɩä 'kʋ wɔtɔ!

32'Nɩ wa yi 'gokpë plä 'nɩ wa yi ‑blëlü ‑gbäsɩ mʋʋ. 33‑Mä wa ‑kʋ lä mʋdä nä, nyɩkpa ‑bhutukpä niwa bhä 'yi 'nɩ wa ‑yibhë ‑gbäsɩɩ wa mʋ lä nä. Ɩ ‑kä 'ŋnö nä, nyɩkpaa ‑bha 'dii 'mnö 'nɩ wa ‑paa, 'nɩ wa 'tɔɔ‑ 'gokpë 'yikʋ. Wamää‑ ‑ŋëë tɛɛ ‑lɔɔ dä Zozii ‑yä ɔɔ' 'kʋgënyʋa 'sɔ mʋ bhlä nä.

34Ɔ kwlii‑ lä 'gää nä, ɔ lɔ wloo nä nyɩkpaa' 'kpö 'kädä. 'Nɩ ŋäzö yio 'kʋ ‑jɛɛ waa' ‑za. Wa ‑kʋ bhä nynä 'bhabhlöö' lɩɩ ‑ɩɩ ‑wʋ lä kpanyɔ ‑kä nä. 'Nɩ ɔ yiwa cɩalɩ 'kʋ cie. Ɔ cɩanʋwa‑ ‑lɔɔ wälɩ ‑bhutukpä.

35'Ylʋ yä bhɛ lä kpänyɩ mʋ nä, kä Zozii' 'kʋgënyʋa ‑yi 'nɩ wa yio soo, wlä Cɩanyɔ‑, 'ylʋ yä kpänyɩ mʋ 'nɩ ‑mää ‑sä kpänyɩ gwë nä, 36‑n gbä ‑yä nyɩkpaa mʋ kpëkpë 'kʋʋ 'dii 'mnö ‑yä ‑bhlüdüü 'kʋ ‑yä wa 'kä waa' lülülʋʋ zɔɔ! 37Zozii lä anyɩ 'titi, a 'nyɩwa lülülɩɩ! Ɔ cii‑ lä sɔɔ nä, 'nɩ wa yio 'ylä, wlä ‑mä ‑a 'gä bhä ‑flëëgüyii' gwlɩ ‑ngbüü' 'ci 'sɔɔ 'flɔɔ zɔɔ ‑yä ‑a 'gwa bhä 'nyɛɛ ‑a? 38'Nɩ ɔ yiwa 'ylä, ɔ lä a mʋ ‑yä a wloo ‑saa, 'flɔɔbhü zio a ‑kä bhää? Wa ‑mʋ 'nɩ wa ‑wloo 'flɔɔ 'nɩ wa yi yi. Wlä ‑a ‑kä 'flɔɔbhü ‑ngbü ‑yä zliiyi 'sɔ.

39 Ɔ lä ‑a, a gbä ‑yä nyɩkpaa kʋ ‑pitii 'klʋ sä 'kpö 'kpö 'kpö! 40'Nɩ wa yi gbä 'nɩ nyɩkpaa yi sä kʋ. 'Kpöö ‑nɩnɩ ‑kʋ bhä nyɩkpaa' gwlɩ ‑ngbüü', 'nɩ ‑nɩnɩ ‑kʋ bhä nyɩkpaa' gwlɩ 'sɔ 'nɩ 'kʋgbää'. 41'Nɩ ɔ yi 'flɔɔbhüü ‑ngbü ‑yä zliiyii 'sɔ 'kʋ 'bhlü. Ɔ ‑wloo ‑laagɔɔ', 'nɩ ɔ yi bhibhie. 'Nɩ ɔ yiu 'mʋ ‑döödö 'nɩ ɔ yi ɔɔ' 'kʋgënyʋa 'nyɛ nynä wa dënʋ ‑jlëa. Wa bhlüü‑ 'sɩɩ zliiyii 'sɔ 'kʋ 'nɩ wa yii nyɩkpa‑gbʋʋ dëë. 42‑Mä waa' ‑lefɩɩn ‑lü 'nɩ wa ‑loo, 'nɩ 'flɔɔ ‑ji 'kʋ 'nɩ wa ‑fämʋ. 43‑Ʋ ‑ji bhlä 'kʋ nä ʋ ‑yä zlüü 'sɔ ‑nʋ ‑takwü 'kʋgbä 'sɔ. 44'Nɩ nyɩkpaa‑ ‑lü lä nä, wa ‑bhlü bhä nyɩkpaa' ‑bhɛgö ‑ngbü (5.000).

Zozii nämʋ 'nyie 'klʋ

(Matie 14.22‑33; Zään 6.16‑21)

45‑Nɩnɩ 'fɩɩn ‑bhɩä lä 'gää nä, kä Zozii ‑gbä 'nɩ ɔɔ' 'kʋgënyʋa ‑plä 'gokpë ‑yä wa 'kɔ ‑mɔɔ 'nyiee klë ‑bɛɛ ‑kää mʋ, ‑mɔɔ Bɛsayida‑duu 'pɛlʋʋ 'mʋ. Ɩyä ɔmɔ nä, ɔ 'kä klë too ‑yä ɔ 'kä gbä nyɩkpaa 'kä waa' ‑bhäändö mʋ. 46Ɔ ‑gbä lä 'nɩ nyɩkpaa 'fɩɩn ‑mʋ ylä nä, kɔ ‑mʋ 'kükë 'wlu bhibhie ‑kää. 47‑Mä 'ylʋ yä bhɛ bhlü. 'Nɩ ɔɔ' 'kʋgënyʋaa' 'gokpë ‑kʋ bhä 'nyinëëdë, 'nɩ ɔmɔ ‑bhlo ‑too bhlä ‑mɔɔ 'nyie klë. 48‑Mä ɔ niwa‑ 'yi 'nɩ ɔ ‑yibhë sɔɔ nynä ‑mä 'nyiee 'klʋ ‑vʋvɔlʋʋ' 'nyɩwa ‑wʋ 'casɩ ‑yä wa 'kä bhä 'luu. 'Nɩ zözädö‑tänyɩɩ', ɔ yi 'kʋ ‑bha 'nɩ ɔ yi 'kʋgënyʋa 'bɩɩ 'bhää. Ɔ nämnö‑ 'nyiee 'klʋ 'nɩ ɔ yiwa mʋʋ. Ɔ ‑nʋ waa' ‑goo 'plöplösä. 49‑Mä wa nio‑ lä 'yi 'nɩ ɔ nämnö lä 'nyiee 'klʋ nä, wa ‑luë nynä 'ku‑nyaaklɛ yi nä, kä wa ‑kplä 'saglöö. 50'Gää plɛ ‑dlonʋwa 'mnö. Ɔ lä a 'ŋʋ ‑mɔɔ plɛ ‑mä ‑amʋ lä! ‑Ŋänö 'nä bhla'anyɩ lä! 51Ɔ cii‑ lä sɔɔ 'nɩ ɔ yi 'gokpëa' ‑gblää. Sä ɔ ‑gblää lä 'gää nä, kä ‑vʋvɔlʋʋ doo. Waa' ‑lefɩɩn kä nükpëë' ‑slʋwa. 52‑Ɔnöza bhää? Waa' bhɔɔ 'flɔɔ zumëdaa' 'yiziziogbɩɩ 'mʋ nuu‑ waa' 'nyukwli 'tɛnɔɔ' ‑za.

Gupanyʋa 'taa‑ Zozii 'nɩ wa ‑yamä

(Matie 14.34‑36)

53Wa tɔɔ‑ 'nɩ wa yi Zenezalɛtö‑bhlɩɛ 'mnö ŋëë 'nɩ wa yi 'pɛɛ. 54‑Mä sä wa ‑bha lä 'gää 'gokpëa 'mnö nä, kä nyɩkpaa ‑yibhë Zozii. 55Ɩ ‑kä 'ŋnö 'nɩ wa ‑mʋ 'bhlɩɛ 'mnö dää 'fɩɩn 'nɩ wa ‑lä ‑mɔɔ' gupanyʋa. Wa bhɛnönʋwa bhä ‑amäkɩɩ' 'nɩ wa lʋwa bhä dä wa 'nuu‑ bhlä nynä ɔ ‑kʋ nä. 56Dää 'fɩɩn ɔ mʋ bhlä nä, ɩ yi 'du 'kädʋʋ' 'plö ‑o, ɩ yi 'du 'tɩkɩɩlɛɛ' 'plö ‑o, ɩ yi ‑bhlüdë 'plö ‑o, kä nyɩkpa lä bhä gupanyʋä, 'nɩ wa ŋʋwa bhä 'clɩkpöö 'mnö 'nɩ wa bhibhio bhä nynä wa 'kä ɔɔ' ‑bänaa' numnuu' ‑kpakpa 'taa. 'Nɩ gupanyʋa 'fɩɩn‑ 'tanöɔ bhlä nä, wa yamä bhä.

Jelenleg kiválasztva:

Makö 6: god

Kiemelés

Megosztás

Másolás