Makö 2

Zozii ‑yamä 'kpläkplänyɔ 'nɩ ɔ ‑cienöɔ nyenyi

(Matie 9.1‑8; Lukö 5.17‑26)

1Ylɩɩ zio plöö‑ bhɛ lä nä, Zozii 'ylɩbhɔ‑ Kapɛnayumöduu'. ‑Mä nyɩkpaa nuu‑ lä nynä ɔ ‑kʋ bhä gbëë' nä, 2waa' 'kpaa ‑yi 'nɩ wa 'wlää‑ ‑mɔɔ 'wlu. ‑Bhutuu 'mnö ɔ ‑kʋ bhlä nä, ʋ yie‑ bhä nyɩkpa 'kʋ ‑aaa 'nɩ wa gëë‑ ‑glënëa në. Ɩ gbä bhä 'nɩ bhoo' slüëdää' bhɔɔ ‑kʋ. ‑Lɔɔ wa ‑kʋ 'nɩ ɔ cɩwa bhä Laagɔwälɩ. 3‑Ma, nyɩkpa zio ‑yi ‑lɔɔ, waa' nëëdëë' lʋä ‑mɔɔnä bhɛnö‑ bhä 'kpläkplänyɔ ‑amäkɩɩ'. 4‑Mä nyɩkpa ‑zu bhlä ‑lɔɔ kpänyɩ nä, waa' mii bhɔɔ 'nɩ wa 'kɔ Zozii dëlü ‑lä. Ɩ ‑kä 'ŋnö 'nɩ wa gblää‑ ‑bhutuu 'wlu, 'nɩ wa yi ʋʋ' ‑papëa këfë ‑sä, 'nɩ ɔ ‑kʋ ‑amäkɩɛ 'mnö 'nɩ wa yio Zozii dëlü kwlie. 5Zozii nii‑ lä waa' pɔlötɛtɛɛ 'yi nä, kɔ ‑soo 'kpläkplänyɔɔ, ɔ lä 'naa 'yunɔ, ‑naa nyenyii yä cienöɔ!

6Ɔ cii‑ ylä sɔɔ nä, ‑Jlämöcɩanyʋä zio ‑kʋ bhlä ‑lɔɔ nä, wa ylä bhä wa yëku, wlä 7‑ɔnözä 'nɩ nyɩkpɔɔ ci bhä sɔɔyɩ, 'nɩ ɔ zie bhä Laagɔ ‑dii? Nyɩkpɔ‑ ‑sä yi bhä mii, 'nɩ ‑ɔ yi bhä ɔ ‑liee' nyenyi ciee? 'Nɩ ‑ɔnö Laagɔ ‑bhlo! 8‑Mä Zozii ‑yibhë 'gää sä wa bhobho bhlä nä, 'nɩ ɔ yiwa soo, ɔ lä ‑ɔnözä 'nɩ anyɩa' pleyi 'sää bhobholɩ ‑kʋ bhä ‑mɔɔ? 9N 'kä 'kpläkplänyɔɔ soo nynä ‑mä, ‑naa nyenyii yä cienöɔ nä, ɩyä n 'kɔ soo nynä ‑mä, ‑n ‑bha 'kʋ ‑yä ‑n nää nä, 'klünö 'sɔ 'mnöö laa ‑sä 'tɛ bhää? 10Ɩ ‑ŋwa 'kʋ nynä a yibhë sɔɔ ‑mä, ‑mää ‑dʋdʋnʋ 'kʋ nä, Nyɩkpɔɔ ‑Yowli ‑kä 'päwä ‑yä ɔ 'kä nyɩkpa nyenyi cie. Zozii cii‑ lä sɔɔ 'nɩ ɔ yi 'kpläkplänyɔɔ soo, ɔ lä 11n sonö‑ö nynä ‑mä, ‑n ‑bha 'kʋ ‑yä ‑n 'bhlü ‑naa ‑amäkɩɛ 'kʋ ‑yä mʋ ‑naa ‑gbäsɩɩ! 12Nyɩkpaa ‑lefɩɩn 'klʋ 'nɩ 'kpobhuu ‑bhlo 'kʋ, nyɩkpɔɔ yi 'kʋ ‑bha, ɔ bhlüü‑ ɔɔ' ‑amäkɩɛ 'kʋ 'nɩ ɔ yi mʋ. ‑Mä nyɩkpaa nëë' ‑yʋwa, wlä ‑aa ‑läzä sää wälɩ 'ni! Ɩ ‑kä bhä 'ŋnö 'nɩ wa fään bhɛ Laagɔ 'ŋnu.

Zozii ‑yi nyenyinyʋaa' ‑za

(Matie 9.1‑17; Lukö 5.27‑39)

13‑Nɩnɩ 'fɩɩn plöö‑ ylä nä, Zozii 'ylɩbhɔ‑ bʋkʋ Galilee' 'nyibhlëa yëku, 'nɩ nyɩkpa ‑bhutukpä yinöɔ bhä 'nɩ ɔ cɩwa bhä. 14Ɔ ‑kʋ 'plödä 'nɩ ɔ nii‑ ‑mɔɔ' lapoo‑bhutuu 'mnö nyɩkpɔ, Afee ‑yowlio wa laa bhlä Levii nä, 'nɩ ɔ yio soo, ɔ lä ‑mɔɔ, ‑n gë'ë 'kʋ! 'Nɩ Levii yi 'kʋ ‑bha 'nɩ ɔ yio 'kʋ 'gë.

15'Tänyɩ ‑kʋ ‑lɔɔ 'nɩ Zozii ‑mʋ Levii' ‑gbäsɩɩ lü ‑kää ɔ ‑yä ɔɔ' 'kʋgënyʋä 'sɔ. Ɔ ‑yä lapoo‑ylänyʋä ‑yä gbenyenyinyʋää' 'yigädalʋä 'sɔ lüü bhä 'kʋ. 'Sɔɔ nyɩkpa‑cüü, wa ‑zu 'nɩ wa gëë‑ bhlä Zozii 'kʋ. 16Na, Falizɩɛnyʋa ‑yä ‑Jlämöcɩanyʋa nii‑ lä Zozii 'yi 'nɩ, ɔ ‑yʋwa 'sɔ lüü bhlä 'kʋ nä, kwa ylää‑ ɔɔ' 'kʋgënyʋa, wlä ‑ɔnözä 'nɩ ɔ ‑yä lapoo‑ylänyʋä ‑ya gbenyenyinyʋä 'sɔ lüü bhä 'kʋʋ? 17Zozii nuu‑ lä sä wa ci bhlä nä, kɔ ‑sonʋwa, ɔ lä nyɩkpaa' ‑lʋa ‑wanö 'yɛkɛɛ‑ 'tɛ lä 'mʋ nä, waa' tään ‑wʋ gwäzönʋnyʋä, ‑mä gupanyʋä, wamää‑ tään lä gwäzönʋnyʋä. Nyɩkpaa' ‑lʋa ‑wanö nʋnʋgbɩ‑ gëë‑ lä 'yi nä, waa' ‑zä 'nn ‑wʋ ‑yi ‑mä gbenyenyinyʋa, waa' ‑zä n ‑yi lä.

'Kɔgɔbhlägbɩɩ ‑yä Laagɔɔ' 'Nägädöö 'sɔɔ mʋʋ ‑wʋ yëkuu

(Matie 9.14‑17; Lukö 5.33‑39)

18Ylʋʋ ‑kʋ ‑lɔɔ 'nɩ Zään Badisöö' 'kʋgënyʋa ‑yä Falizɩɛnyʋa 'sɔ goo bhä ‑gbügbe. 'Nɩ nyɩkpa ‑yi Zozii yëku, 'nɩ wa yio 'ylä, wlä ‑ɔnöza 'nɩ Zään Badisöö' 'kʋgënyʋa ‑yä Falizɩɛnyʋa goo bhä ‑gbügbe 'nɩ ‑naa lʋa waa' goo bhä ‑gbügbe wamä 'bhisäkʋʋ? 19'Nɩ Zozii yiwa soo, ɔ lä nyɩkpɔ kä 'ŋnɔ flaa‑, 'nɩ wa kä ‑pʋpɛnʋdaa' lülülɩɩ lü nä, nyɩkpaa wa laa‑ lä nä, wa yi bhä ‑lɔɔ 'wlioo 'klʋ kʋ 'nɩ wa yi bhä ‑gbugbe goo ‑a? Ɩɩ' ‑wʋ sɔɔ ‑kʋ nää. Dä wa ‑yä 'wlio 'sɔ ‑kʋ lä ‑lɔɔ nä, waa' ‑lä ci nynä ‑mä waa' lü ‑wʋ. 20‑Mä ylɩɩ yi ŋëë 'nɩ wa yiwa 'wlio nëedë ‑sä. ‑Lɔɔ ylɩɩyɩ 'mnö wa yi lä ‑gbugbe goo.

21Nyɩkpɔɔ' 'bhlü ‑wʋ lokupɛlʋ ‑yälʋ 'kʋ 'nɩ ɔ 'kʋ 'kotuzʋ ‑ya 'kplää. Ɔ kä sɔɔ ‑nʋ nä, kä lokupɛlʋ ‑yälʋʋ jlü 'kotuzʋʋ 'nɩ ʋ 'ŋätlönöɔ bʋkʋ 'nɩ këfëa mʋmʋ klä. 22Nyɩkpɔɔ' 'bhlü ‑wʋ 'sɩɩ divaa‑ylä 'kʋ 'nɩ ɔ 'ka 'kɔgwlɛ‑sabhü#2.22 sabhüü: 'Zufʋnyʋaa' sabhüü nä, mnɛkwi wa bhlü 'kʋ 'nɩ wa bhlɩɩ bhä. Mnɛkuu wa klänʋ 'nyu ‑yä ‑bhliibhlʋ ‑yä divaa 'mnö 'nää. 'mnö 'nää klää. Ɔ kä sɔɔ ‑nʋ nä, divaa yi gbä 'nɩ sabhüü yi wlɔɔ, 'nɩ divaa ‑yä sabhüü 'sɔ yi mnɔ. Nä, ɩ ‑ŋwa 'kʋ nynä ‑mä divaa‑ylaa wa 'ŋʋa sabhü yälöö'.

Zozii ‑sä Sabaa‑gwlɛylʋʋ 'gbä

(Matie 12.1‑4; Lukö 6.1‑11)

23 Sabaa‑gwlɛylʋ ‑bhlo 'kʋ, Zozii ‑kʋ bhä ‑nyʋʋ‑zizee'#2.23 ‑nyʋʋ‑zizee: ‑Nyʋʋnʋ 'mʋ wa bhlü lä 'kʋ 'nɩ wa nʋ la 'flɔɔ. ‑Aa ‑wʋ ‑lɔɔ' ‑nyʋʋ ‑abhlɩɩ' ‑kä. ghläädä, 'nɩ ɔɔ' 'kʋgënyʋa kplä bhä 'klaa 'mnö ‑nyʋʋ 'yi 'nɩ wa luu bhä. 24Falizɩɛnyʋa niwa‑ lä 'yi nä, 'nɩ wa yi Zozii soo, wlä ‑n wloo ‑zɩkä sä ‑naa 'kʋgënyʋa nʋ lä Sabaa‑gwlɛylʋʋ 'kʋ nä! ‑Ɔnözä 'nɩ sää‑ ‑wʋ lä kʋ ‑ŋwa nynä nyɩkpɔ nʋ Sabaa‑gwlɛylʋʋ 'kʋ nä, wa nʋ bhä sɔɔ? 25'Nɩ Zozii yiwa soo, ɔ lä wälɩklëa Davidö ‑nʋ bhlä nä, a 'nöa ‑läzä Laagɔ‑bɔɔgʋʋ 'mnö ‑zɛnö ‑a? 'Tänyɩ ‑kʋ ‑lɔɔ 'nɩ, Davidö ‑yä ɔɔ' 'kʋnämʋnyʋa 'sɔ ‑gbugbe bhlʋwa bhä 'nɩ waa' bhɔɔ lülülʋʋ ‑kä, 26'nɩ ɔ ‑plä Laagɔɔ' bʋbɔda, 'Cibhisänyɔ 'kädɔɔ Abiataa' 'tänyɩɩ'. ‑Maa, bʋbɔdaa' 'flɔɔ, Davidö bhluu‑ 'kʋ 'nɩ ɔ ‑luu. Ɔ 'nyɛmʋ‑ ɔɔ' 'kʋnämʋnyʋa 'nɩ wa yi ‑lü 'sɩɩ. ‑Bhlɛ kä ‑Jlämaa ci bhlä nynä ‑lɔɔ' 'flɔɔ nä, 'Cibhisänyʋa' ‑za ʋ ‑kʋ ‑lɔɔ. 27'Nɩ Zozii yiwa bʋkʋ soo, ɔ lä Sabaa‑gwlɛylʋʋ nä, nyɩkpɔɔ' ‑zä ʋ ‑nʋɔ lä, ‑mä nyɩkpɔɔ' ‑wʋ Sabaa‑gwlɛylʋʋ' ‑za ‑nʋɔ. 28'Ɩzä Nyɩkpɔɔ ‑Yowli plöö‑ lä Sabaa‑gwlɛylʋʋ 'titiclöö, ʋʋ' 'kämänyɔ.

Jelenleg kiválasztva:

Makö 2: god

Kiemelés

Megosztás

Másolás