Makö 1

Zään Badisö göglä Zozii' ‑dʋdʋkʋ

(Matie 3.1‑12; Lukö 3.1‑18)

1A ni Laagɔ ‑Yowli Zozi Klisöö' 'Nägädöö' ciedä. 2'Sää ɩ ‑jɩjlɔ lä ‑mɔɔ 'plɔfɛtɩ Ezayii' 'bɔɔgʋʋ 'mnö nynä ‑mä,

Laagɔ lä,

N yi 'naa lobho lobhonyɔ lobho ‑yä

Ɔ 'kä ‑naa ‑blɔkʋ göglä.

3 Nyɩkpɔ woo ‑mɔɔ 'popie 'mnö,

Ɔ lä a göglä Kwlienyɔɔ' ‑dʋdʋkʋ!

Ɩyä a gëë ɔɔ' ‑blɔɔ 'yii! # 1.2‑3 Ɩ bha Mala 3.1; Eza 40.3.

4'Ɩzä Zään Badisö ‑kʋ bhlä ‑mɔɔ 'popie 'mnö 'nɩ ɔ ŋʋ bhlä nyɩkpa 'nyu 'wlu. Ɔ pä bhä wälɩ, ɔ lä a 'cɩcɩ anyɩa nʋnʋgbɩɩ ‑yä a ŋʋɔ 'nyu 'wlu, ɩyä Laagɔ 'kanyɩ ‑kä nyenyi cie.

5Zudee‑bhlɩɛ ‑yä Zolizalɛmʋduu' nyɩkpaa' 'fɩɩn, wa yinöɔ bhä, 'nɩ wa zɛɛ bhä waa' nyenyii' ‑za, 'nɩ ɔ 'ŋʋnʋwa bhä ‑mɔɔ Zludɛɛ‑nyie 'mnö 'nyu 'wlu. 6Zään nä, ɔ ‑plä bhä mnɛku‑kotu 'nɩ ɔ ‑nɛɛ bhä mnɛku‑bɛtʋ 'mnö. Ɔ lü bhä ‑kɔkɔnʋkpö, 'nɩ ɔ mɛɛ bhä ‑nogokpü. 7Ɔ soo bhä nyɩkpaa, ɔ lä nyɩkpɔɔ ‑ɔ yi'i lä klë nä, ɔ ‑kä 'tɛtɩ 'nɩ ɔ ‑zi'i. Nn' ‑wʋ 'sää 'titi 'kʋ ‑ŋwa nynä n kwlio yëku 'kʋ ‑yä n 'tɔsɔ ɔɔ' 'süü' 'bhliye. 8‑Amʋ, n ŋʋ'anyɩ 'nyu 'wlu, ‑mä ɔmɔ nä, Kplɔɔkplɔɔ‑wugɔ 'mnö ɔ 'kanyɩ lä 'ŋʋ.

Zään Badisö ŋʋʋ‑ Zozii 'nyu 'wlu

(Matie 3.13‑17; 4.1‑11; Lukö 3.21‑23; 4.1‑13)

9‑Lɔɔ' ylɩɩ 'mnö nä, Zozii ‑bha Galilee‑bhlɩɛɛ' 'duu wa laa lä Nazalɛtö nä 'mnö 'nɩ ɔ ‑yi 'nɩ Zään yio Zludɛɛ‑nyie 'mnö 'nyu 'wlu 'ŋʋʋ. 10Ɔ ‑bha lä 'gää 'nyiglu nä, ɔ nii‑ ‑laagɔɔ' 'yi 'nɩ ‑mɔɔ ‑känöɔ 'klʋ, 'nɩ Kplɔɔkplɔɔ‑wugɔɔ yio 'kʋ kwlii. Ʋ kwlinöɔ‑ 'kʋ ‑n ‑näsä 'kpaakpu kwli lä nä. 11'Nɩ nuwälɩ ‑ghlää ‑laagɔɔ', ɩ lä ‑n ‑glö 'naa ‑Wawayu, ‑naa plɛkʋ mɛnö'ö kpänyɩ.

'Dëvlo nyɛɛ‑ Zozii ‑zɔɔpälɩ

12‑Nɩnɩ plöö‑ lä 'gää nä, kä Kplɔɔkplɔɔ‑wugɔɔ ‑fä Zozii ‑mɔɔ 'popie 'mnö, 13'nɩ ɔ ‑sä ‑mɔɔ ylɩɩ gwlɩ 'sɔ. ‑Mä ‑lɔɔ' 'tänyɩɛ 'mnö nä, 'Dëvlo nyɩɔ‑ ‑zɔɔpälɩ. Ɔ ‑kʋ bhä 'klää mnaa nëëdë 'nɩ ‑Laagɔzizi nʋɔ bhä ‑gä.

Zozii cii‑ Laagɔwälɩ

(Matie 4.12‑22; Lukö 4.14‑15; 5.1‑11; Zään 1.35‑43)

14'Tänyɩɛ 'mnö wa ŋʋʋ‑ lä Zään Badisö ‑jɩɩ' nä, Zozii ‑mʋ Galilee‑bhlɩɛ 'mnö 'nɩ ɔ sää bhä Laagɔɔ' 'Nägädöö. Ɔ ci bhä, ɔ lä 15'tänyɩɛ ‑ɛ ŋʋɔ‑ bhlä nä, ɛ yä ŋëë, Laagɔɔ' 'Leyiduu' 'tänyɩɛ yä ŋëë. 'Ɩzä n sonö'anyɩ lä nynä ‑mä, a 'cɩcɩ anyɩa' nʋnʋgbɩɩ ‑yä a ŋoo Laagɔɔ' 'Nägädöö 'kʋ.

Zozii laa‑ zlübhlänyʋä ‑mɔɔnä

16Ylʋʋ ‑bhlo 'kʋ, Zozii ‑kʋ bhɛ Galilee' 'nyiee 'kpʋkpʋʋ 'kʋ nämnödä nä, 'nɩ ɔ nii‑ zlübhlänyʋä 'sɔ. Simɔɔ ‑yä ɔ bheli Adlee, wa pä bhä ‑dädö. 17'Nɩ ɔ yiwa soo, ɔ lä a gë'ë 'kʋ ‑yä n 'kanyɩ nyɩkpaa' jlülɩ cɩa. 18Ɔ cii‑ lä sɔɔ nä, 'kpobhuu ‑bhlo 'kʋ kwa ‑taa waa' ‑dädöö 'yi, 'nɩ wa yio 'kʋ 'gë.

19‑Nɩnɩ plöö‑ ylä nä, ɔ nää‑ 'pɛpɛ, 'nɩ ɔ nii‑ Zebedee ‑yowlie, Zakö ‑yä Zään 'sɔ. Wa ‑kʋ bhä 'gokpëë' 'nɩ wa sä bhä waa' ‑dädö 'jü. 20Sä ɔ lʋwa‑ lä 'gää nä, kwa ‑të ‑lɔɔ wa 'bä Zebedee ‑yä ɔɔ' lebhe‑nʋnyʋa 'sɔ 'gokpëa 'mnö, 'nɩ wa yio 'kʋ 'gë.

Zozii ‑sä nyɩkpɔ ‑zuzunyënyu kätää'

(Matie 8.14‑17; Lukö 4.31‑44; Nʋnʋ 10.38)

21Ylʋʋ ‑bhlo 'kʋ Zozii ‑yä ɔɔ' 'kʋgënyʋa 'sɔ ‑mʋ bhä 'duu wa laa lä Kapɛnayumö nä 'mnö. 'Nɩ Sabaa‑gwlɛylʋʋ 'kʋ, ɔ ‑plä ‑mɔɔ' Laagɔ‑bhutuu 'mnö 'nɩ ɔ yi cɩalɩ 'kʋ cie. 22‑Mä nyɩkpaa ‑wa ‑puo bhlä 'nyukwli nä, kä nükpëë ‑slʋwa ɔɔ' cɩalɩɩ' ‑za. Ɔɔ' cɩa bhɔɔ ‑Jlämöcɩanyʋa 'bhisäkʋ ‑mä, kɔ cɩa bhä nynä Laagɔɔ' 'päwö‑käänyɔ.

23‑Mä ‑mɔɔ Laagɔ‑bhutuu 'mnö nä, nyɩkpɔ ‑kʋ bhä ‑mɔɔ 'nɩ ‑zuzunyënyu ‑kʋɔ bhä kätää'. 'Nɩ nyɩkpɔnɔ yi 'mʋ gaa‑, 24ɔ lä 'aaa! Nazalɛtöö' Zozii‑, wälɩ ‑sä ‑n 'ylänö‑anyɩ bhä? Kä ‑n yi yɩ ‑yä ‑n 'gä‑anyɩ nuë ‑a? ‑Mɔɔ nä, n ‑yi‑i. Laagɔɔ' Kplɔɔkplɔɔnyɔɔ ‑ɔ ‑yi lä 'ylʋzɔɔ nä, ‑mɔɔ plöɔ‑ lä. 25‑Zuzunyënyuu ci bhɛ lä sɔɔ nä, kä Zozii ‑gaanʋ 'kʋ, ɔ lä ‑n bhlü nëkʋ ‑yä ‑n ‑bha nyɩkpɔyɩ kätää'! 26'Kpobhuu ‑bhlo 'kʋ, ‑zuzunyënyuu 'sëka ‑sëka nyɩkpɔɔ 'mʋ 'fɩtɛtɩɩ' 'nɩ ʋ paa‑ 'saglö 'nɩ ʋ yio kätää' ‑bha. 27‑Mä nyɩkpaa 'fɩɩn‑ ‑kʋ bhlä ‑lɔɔ nä, kä plɛkʋ 'niniwa‑, 'nɩ wa sonö sonö bhä, wlä ‑aa ‑läzä sää 'ni! Cɩalɩ ‑lelii' 'cësä ɔ ‑lä bhä 'nɩ ɩ ‑kä bhä sää 'päwää? ‑Zizinyenyii 'titi, ɔ tlii 'nɩ ɩ ŋʋɔ 'klʋkpä! 28‑Mä 'kpobhuu ‑bhlo 'kʋ, Zozii' 'ŋnöö bhlüü‑ Galilee‑bhlɩɛ 'fɩɩn 'kʋ.

Zozii ‑yamä Simɔɔ ɔ 'wʋtɔŋnɔ ‑yä gupanyʋä ‑bhutukpä

(Matie 8.14‑17; Lukö 4.38‑41)

29Zozii ‑bha lä 'gää Laagɔ‑bhutuu 'mnö nä, kɔ ‑yä Zakö ‑yä Zään 'sɔ ‑mʋ Simɔɔ ‑yä Adlee 'sɔ ‑gbäsɩɩ. 30Simɔɔ ɔ 'wʋtɔŋnɔ, wätlɩ ‑kukwë bhlɔɔ bhä, 'nɩ ɔ puu‑ bhä sä. Zozii ‑ŋëë lä 'gää ‑jaa nä, kä wa ‑sonöɔ 'ŋnɔɔ gupa‑wälɩ. 31'Nɩ ɔ yi 'ŋnɔɔ yëku 'jloo, 'nɩ ɔ yio ‑klɔgbä klä, 'nɩ ɔ yio 'kʋ bhɛlɩä. 'Nɩ 'kpobhuu ‑bhlo 'kʋ, wätlɩɩ yi doo‑. 'Nɩ 'ŋnɔɔ yiwa ŋënüü' 'nyɛlɩ 'kʋ cie.

32‑Kugbësä, dä 'ylʋ ‑bhlü bhɛ lä nä, gupanyʋa 'fɩɩn, ɩyä nyɩkpaa ‑zizinyenyii ‑kʋ bhlä kätää' nä, kä wa ‑lʋwa Zozii dëlü. 33Dubhë ‑dubhë ‑yi 'nɩ a 'wlää‑ ‑lɔɔ gbüglënëa nëkʋ 'wlu. 34Zozii ‑yamää ‑lɔɔ gupanyʋää' nü nü nü, 'nɩ ɔ tlüü‑ ‑zizinyenyi ‑bhutukpä. Sä ‑zizinyenyii ‑yio bhlä nä, ɔɔ' 'nyɩɩ bhɔɔ 'mʋsäädä.

Zozii ‑mʋ dikakpüü 'mnö Laagɔwälɩ cii ‑kää

(Matie 4.23; Lukö 4.42‑44)

35Zözädä, 'cucukpä ‑kʋ bhä ‑lätee ‑dʋdʋkʋ 'nɩ Zozii ‑bha 'kʋ 'nɩ ɔ wlʋʋ‑ ‑zɔɔ. Ɔ ‑bha 'duu 'nɩ ɔ ‑mʋ sää ‑blëlë, ‑gbäsɩɩ nyɩkpɔɔ' ‑bhɔ lä ‑kʋ nä. ‑Mɔɔ ɔ ‑kʋ 'nɩ ɔ bhibhie bhä. 36'Nɩ Simɔɔ ‑yä ‑lʋa ‑wa ‑yɔsɔ nää‑ bhlä nä, wa yio tään ‑kää mʋ. 37Wa nio‑ lä nä, wlä Cɩanyɔ‑, ‑mɔɔ nyɩkpaa' 'fɩɩn tään ylää! 38'Nɩ Zozii yiwa soo, ɔ lä a yi ‑yä ‑a mʋʋ 'yigäda ‑gbäsɩ! ‑Mɔɔ kpëkpë 'kʋʋ 'dii 'mnö, a ‑ya mʋ ‑mɔɔ! Ɩ ‑ŋwa 'kʋ nynä ‑mä n cii 'sɩɩ ‑mɔɔ Laagɔwälɩ nä, 'ɩzä n wlʋʋ‑ lä ‑zɔɔ. 39‑Mä Zozii plö bhä Galilee‑bhlɩɛ 'mnö, 'nɩ ɔ cii bhä ‑mɔɔ' Laagɔ‑bhitii 'mnö Laagɔwälɩ, 'nɩ ɔ tlü bhä ‑zizinyenyi.

Zozii ‑yamä 'zläbhlänyɔ

(Matie 8.1‑4; Lukö 5.12‑16)

40'Zläbhlänyɔ ‑bhlo ‑yi Zozii yëku, 'nɩ ɔ yio ‑kokoowli dëlü glu 'pä, 'nɩ ɔ yio soo, ɔ lä Cɩanyɔ‑, ‑n gä ‑waa nä, ‑n yi mii 'nɩ ‑n yi'i yamä, ‑yä n 'kä kplɔɔ. 41Ɔ cii‑ lä sɔɔ nä, kä ŋäzö ‑jɛɛ Zozii 'kʋ. Ɩ ‑kä 'ŋnö 'nɩ ɔ ‑fä sɔ 'nɩ ɔ 'taa‑ nyɩkpɔɔ, ɔ lä n ŋoo nynä ‑mä ‑n yamä! Nä, ‑n yamä yɩ! 42'Kpobhuu ‑bhlo 'kʋ 'nɩ 'zlaa yi nyɩkpɔɔ 'mʋ ‑bha, 'nɩ ɔ yi yamä. 43‑Mä Zozii ‑bhoo nyɩkpɔɔ ‑kɔkwɩ, 'nɩ ɔ yio soo nynä ɔ mʋ. 44Zozii lä ‑n gä ‑mʋ nä, ‑naa ‑sää ‑lä ‑kä nyɩkpɔ 'dö aa, ‑mä ‑n mʋ Laagɔɔ' 'cibhisänyɔɔ yëku ‑yä ɔ 'kä‑ä wloo. Ɩyä 'cibhie Moyizöö' ‑Jläma ci lä nynä ‑mä, 'zläbhlänyɔ kä ‑yamä nä, ɔ ‑sä nä, ‑lɔɔ' 'cibhie ‑n 'gɛ ‑sä. Ɩyä nyɩkpa 'kä 'sɔɔ yibhë nynä ‑mä ‑n yä 'zaazɩ yamä. 45‑Mä nyɩkpɔɔ ‑mʋ lä nä, kɔ ‑bie wälɩɩ daa 'fɩɩn. Ɩ ‑kä bhɛ 'ŋnö 'nɩ Zozii' mii bhɛ ‑pɛɛ nyɩkpaa' 'klʋ duu' plälɩ. Nä kɔ ‑sä yɩ 'duu gwë, ‑mɔɔ ɔ ‑kʋ 'nɩ nyɩkpa bha bhä dää 'fɩɩn 'nɩ wa yinöɔ bhɛ.

Jelenleg kiválasztva:

Makö 1: god

Kiemelés

Megosztás

Másolás