Lukö 7

Zozii ‑yamä 'sʋjaa' 'kämänyɔɔ' ‑gänʋnyɔ

(Matie 8.5‑13)

1Zozii ‑bhɩä ylä nyɩkpaa soolɩ nä, kɔ ‑mʋ Kapɛnayumöduu'. 2Wlomɛɛ‑sʋjaa' 'kämänyɔ ‑bhlo ‑kʋ bhä ‑mɔɔ nä, ɔɔ' ‑gänʋnyɔ ‑bhlo ‑ɔ känöɔ bhlä kpänyɩ gbʋ nä, ɔɔ' bhɔɔ ‑yä. Ɔ ‑kʋ bhä 'kwiee numnu 'kʋ. 3Nä, 'sʋjäyuo nuu‑ lä Zozii' yëkuu' wälɩ nä, kɔ ‑lobho 'Zufʋnyʋaa' ‑Dɔɔpänyʋä zio. Ɔ lä wa soo Zozii ‑yä, ɔ yi ‑yä ɔ 'kä ɔɔ' ‑gänʋnyɔɔ yamä. 4'Nɩ wa yi Zozii yëku yi. 'Nɩ wa yio 'wlu slä. Wa ‑sonöɔ wlä, nyɩkpɔɔ ‑ɔ ‑lobhu‑anyɩ lä nä, ɔ ‑ŋwa 'kʋ nynä ‑n wloo ɔɔ' wälɩɩ 'kʋ. 5Ɔ ‑waa kpänyɩ ‑anyɩa 'bhlɩɛ. Ɔmɔɔ‑ slää‑ lä ‑anyɩa Laagɔ‑bhutuu. 6Wa cii‑ lä sɔɔ nä, kä Zozii ‑yʋwa 'sɔ ‑mʋ yɩ. ‑Mä wa ‑kʋ lä mʋdä nä, wa 'kä bhɛ 'gbëa yëku ŋëë 'nɩ, 'sʋjäyuo yi ɔ 'nagwɩä lobho. Ɔ lä a mʋ ‑yä a sonöɔ nynä Kwlienyɔ‑, ‑naa bhɩä ‑lä ‑n yëku 'kwlɩ ‑yä ‑n 'gä yi ‑yä, ‑n 'gä 'naa 'gbëa 'mnö plä! Nn' ‑wʋ 'kʋ ‑ŋwa nynä ‑n plä 'naa daa. 7‑Nɩnɩ 'mɩɩ‑ ‑kä 'ŋnö, 'nɩ nn' ‑wʋ lä mii‑ ‑yä n 'kä‑ä yëku ‑yi ‑amʋ 'titi, 'nɩ n ‑lobho lä nyɩkpa. Nä, ‑n ci wälɩklë ‑mä 'naa ‑gänʋnyɔɔ yi yamä! 8‑Amʋ nä, n ‑kä 'kämänyʋä. 'Nɩ ‑amʋ ‑mä 'sɩɩ, n 'kämä 'sʋjä. N soo ‑nɔnɔ nynä ‑n mʋ! 'nɩ ɔ mʋ. 'Nɩ n soo 'sɩɩ ‑nɔnɔ nynä ‑n yi! 'nɩ ɔ yi. 'Naa ‑gänʋnyɔ nä, n kɔ ‑soo nynä ‑n nʋ ‑nʋnʋ nä, kɔ nʋʋ.

9Zozii nuu‑ lä 'sʋjäyunɔɔ' ciciwälɩɩ nä, kä plɛkʋ 'ninio‑. 'Nɩ nyɩkpaa ‑wa güo‑ bhlä 'kʋ nä, ɔ yiwa 'klʋ tlaa. 'Nɩ ɔ yiwa soo, ɔ lä n sonö'anyɩ nynä nyɩkpɔɔ' lɔɔ ‑ɔ ‑kä lä 'sʋjä‑yunɔ 'bhisäkʋ sää pɔlötɛtɛ 'kädɛ nä, ‑mää 'Yizlɛ‑bhlɩnɛ 'mnö 'titi, n 'nöɔ ‑läzä 'ni. 10Naa, nyɩkpaa 'sʋjäyuo ‑lobho bhlä nä, 'nɩ wa yi 'ylɩbhɔ. ‑Mä wa lä wa mʋ ‑mɔɔ gbëë' nä, 'sʋjäyuoo' ‑gänʋnyɔɔ yä bhɛ yamä.

Nayinöduu' 'kuzëlü‑ŋnɔɔ 'yu ‑glɔɔ 'kuëë

11‑Nɩnɩ plöö‑ ylä nä, Zozii ‑mʋ 'du ‑bhlogbe 'kʋ, ʋmʋ wa laa Nayinö. Ɔ mʋ bhlä nä, ɔ ‑yä ɔɔ' 'kʋgënyʋa, ɩyä nyɩkpa ‑bhutukpä 'sɔ nää bhä. 12Ɔ ŋëë‑ lä 'duu kpëkpë 'kʋ nä, ɔ lɔ wloo nä, nyɩkpaa' 'kpä yi bhä. Wa lä bhä ‑gɛzɛ lesi 'kʋ. 'Kuzëlüŋnɔ ‑bhlo, ɔmɔɔ‑ ‑kä bhlä ɔɔ' 'yuŋwadi ‑bhlo 'coo nä, 'yunɔ, ɔmɔɔ‑ kuu‑ bhlä. 13Kwlienyɔ nii‑ lä 'Kuzëlü‑ŋnɔɔ 'yi nä, kä ŋäzö ‑jɛnöɔ 'kʋ. 'Nɩ ɔ yio soo, ɔ lä ‑naa 'tu ‑lä! 14'Nɩ Zozii yi 'ku‑gbäpʋʋ yëku 'mɛ 'nɩ ɔ yiu 'taa. ‑Wa bhɛɛ‑ lä ‑gɛzɛɛ nä, 'nɩ wa yi 'nynigo. 'Nɩ Zozii yi ci, ɔ lä nyëbluu‑! N sonö‑ö nynä ‑n ‑bha 'kʋ! 15‑Mä ɔ cii‑ lä sɔɔ nä, kä nyëbluo ‑bha 'kʋ, 'nɩ ɔ yi sä 'kʋ, 'nɩ ɔ yi 'mʋ ‑säälɩ 'kʋ cie. 'Nɩ Zozii yi 'yuo ɔ ‑nɔɔ 'nyɛ. 16‑Mä nyɩkpaa 'fɩɩn kä 'ŋänö ‑plʋwa. Wa fään bhä Laagɔ 'ŋnu, 'nɩ wa ci bhä, wlä Laagɔɔ' 'plɔfɛtɩ 'kädɔ yä‑anyɩ nëëdë yi! Wa ci bhä 'sɩɩ, wlä Laagɔ yä ʋʋ' 'yua 'kʋ yi! 17Wälɩnɩ Zozii ‑nʋ bhlä nä, ɩ kplü ‑bhlü Zudee‑bhlɩɛ 'fɩɩn, 'nɩ ɩ ‑ŋëë ɛɛ' kpëkpëkʋʋ' 'bhlɩɩ 'mnö.

Zään Badisö ‑lobho ɔɔ' 'kʋgënyʋä 'sɔ Zozii yëku

(Matie 11.2‑19)

18‑Mä Zään' 'kʋgënyʋa ‑yi 'nɩ wa yio Zozii' yëkuu' 'döö 'fɩɩn ‑sää. Zään nuu‑ lä wälɩɩ nä, kɔ laa‑ waa' nëëdëë' lʋä 'sɔ, 19'nɩ ɔ yiwa lobho. Ɔ ‑lobhua Kwlienyɔ Zozii yëku. Ɔ lä wa 'ylɔɔ nynä ‑mä, Puënyɔɔ ‑ɔ 'gä bhlä yi nä, ‑mɔɔ plöɔ‑ bhä ‑a? ‑Mä, ‑a ‑bɛɛ bhä 'yigädalɔɔ ‑a? 20Zään' 'kʋgënyʋa ‑ŋëë lä Zozii yëku nä, 'nɩ wa yio soo, wlä Zään Badisö 'mɔɔ‑ ‑lobhu‑anyɩ lä. Ɔ lä ‑a 'ylä‑ä ‑mä, Puënyɔɔ ‑ɔ 'gä bhlä yi nä, ‑mɔɔ plöɔ‑ bhä ‑a? ‑Mä ‑a ‑bɛɛ bhä 'yigädalɔɔ ‑a? 21‑Lɔɔ' 'tänyɩɛ ‑bhlobhlo 'mnö nä, Zozii ‑yamä nyɩkpa ‑bhutukpä. Ɔ ‑yamä 'bhlʋlɛ ‑käänyʋä, ɔ ‑sä ‑nänʋä ‑zizinyenyi kätää', 'nɩ ɔ welie‑ 'yikpüü' kʋnyʋä ‑bhutukpää' 'yii. 22'Nɩ ɔ yi Zään' 'kʋgënyʋä soo, ɔ lä 'yikpüü' kʋnyʋää' 'yii welio, 'kpläkplänyʋä nää, 'zläbhlänyʋä yamä, 'nyukwli‑gbʋgbɔnyʋä nu, 'kudukuë glɔɔ 'kuëë, 'nɩ wa sää yɩ ŋäzönyʋa Laagɔɔ' 'Nägädöö! A mʋ ‑yä sa nii‑ lä 'yi, 'nɩ sa nuu‑ lä nä, a ‑sään sɔɔ Zään! 23Nä, nyɩkpɔɔ' ‑lɔmɔ ‑ɔɔ ‑lä lä pɔlötɛtɛɛ' ‑blɔɔ 'kʋ ‑bha 'naa ‑za nä, ɔ yä 'pʋ!

Zozii ci Zään Badisöö' yëkuu' wälɩ

24 Zään' 'kʋgënyʋa ‑mʋ 'fɩa, 'nɩ Zozii yi ‑jlëa soo, ɔ lä a ‑mʋ bhɛ ‑mɔɔ 'popie 'mnö wloo ‑kää? Gbogwli‑nyakpɔ‑ ‑vʋvɔlʋ 'dɩda 'mʋ nä ʋmʋ a ‑mʋ bhɛ wloo ‑kää ‑a? 25N nä, a ‑mʋ bhɛ 'titi ‑mɔɔ wloo ‑kää? Nyɩkpɔ‑ ‑plä nyɛbhɛlɩsä 'mʋ nä, ɔmɔ a ‑mʋ wloo ‑kää ‑a? ‑Wa plä lä 'nyɛbhɛlɩ‑kwëtii 'mʋ nä, 'nɩ ‑wa ‑kä lä lɩɩ nä, 'leyigbüü' wa kʋ lä! 26N nä a ‑mʋ bhɛ 'titi wloo ‑kää? Laagɔɔ' 'plɔfɛtɩ ‑a? ‑Ɛɛɛ, n sonö'anyɩ nynä ‑mä 'plɔfɛtɩ lä 'zaazɩ ‑mä, ɔ ‑zi 'sɩɩ 'plɔfɛtɩ 'kʋ! 27Zään Badisö, ɔɔ' ‑zä, ɩ ‑jɩjlɔ Laagɔ‑bɔɔgʋʋ 'mnö nynä ‑mä,

N yi 'naa lobho lobhonyɔ lobho ‑yä

Ɔ 'kä ‑naa ‑blɔkʋ göglä. # 7.27 Ɩ bha Mala 3.1.

28N sonö'anyɩ ‑nʋawlɛɛ 'mnö nynä ‑mä, nyɩkpaa' 'fɩɩn ‑ghlää lä ŋnʋmnö nä, waa' 'kʋʋ nyɩkpɔɔ' ‑wʋ 'ghlü 'nɩ ɔ 'kä Zään ‑zi! ‑Bhlɛ ‑mɔɔ Laagɔɔ' 'Leyiduu 'mnö nä, ‑ɔ plöö‑ lä ‑mɔɔ' ‑lɛ 'tɩkɩɩlɛɛ nä, kɔ 'ghlü 'nɩ ɔ ‑zi Zään. 29Nyɩkpaa 'fɩɩn, ‑wa ‑poo lä Zään 'nyukwli nä, 'ŋʋʋ yɩ lapoo‑ylänyʋa, wa ‑yibhë sɔɔ nynä Laagɔɔ' ‑blɔɔ 'mʋʋ‑ gëë‑ 'yi. Ɩ ‑kä 'ŋnö nä, wa ŋoo‑ 'nɩ Zään ŋʋwa‑ 'nyu 'wlu. 30‑Mä Falizɩɛnyʋa ‑yä ‑Jlämöcɩanyʋa, sä Laagɔ ylä bhlä nynä ʋ 'kä waa' ‑za nʋ nä, waa' ‑wʋ sɔɔ 'kʋ ŋoo‑. Ɩ ‑kä ŋnö nä, waa' ‑wʋ ŋoo‑ nynä Zään 'ŋʋwa 'nyu 'wlu.

31'Nɩ Zozii yi bʋkʋ ci, ɔ lä 'bhlɛsʋnʋ 'mnö nyɩkpaa n yiwa bhä ‑zi 'kʋ nyäka 'na ‑a? Wa 'wlʋʋ‑ bhä ‑zi 'titii? 32Kä wa ‑kʋ lä nynä 'yuë lʋä ‑wa ‑kʋ lä duu' 'clɩkpää sä 'nɩ ‑wa sonö sonö lä nä. ‑Nänʋä lä ‑a ‑klä ‑blɩkɔ nynä a 'kä ye, 'nɩ aa' ‑wʋ ‑ye! ‑A ‑bhlɩ 'sɩɩ 'nʋgbʋlɩ nynä a 'kä 'tu, 'nɩ aa' ‑wʋ tuu‑!

33A ni Zään ‑yi lä nä, ɔɔ' lü bhɔɔ 'nɩ ɔɔ' 'mnä bhɔɔ nʋ. Ɩ ‑kä ŋnö nä, ka ci bhä nynä ‑zuzunyënyu ‑kʋɔ kätää'. 34‑Mä Nyɩkpɔɔ ‑Yowli ‑yi 'nɩ ɔ lü, 'nɩ ɔ mnä lä nä ka ci lä nynä ‑mä, ɔ ‑glö ‑lɛɛgbilünyɔ ‑yä nʋmnänyɔ. 'Nɩ a ci bʋkʋ nynä lapoo‑ylänyʋa ‑yä gbenyenyinyʋa 'sɔ, wamää‑ plöö‑ ɔ 'nagwɩä. 35Sɔɔ Laagɔɔ' dɩgälɩɩ ‑kʋ lä. Laagɔɔ' 'yua nä, wa ‑yi sɔɔ nynä ‑mä kʋ dɩgälɩɩ gëë‑ 'yii.

Zozii cie‑ gbenyenyiŋnɔɔ' nyenyi

36'Tänyɩ ‑kʋ ‑lɔɔ 'nɩ, Falizɩɛyu ‑bhlo laa‑ Zozii nynä wa 'kä 'kʋ lüü. 'Nɩ Zozii yi ɔɔ' 'gbëa 'mnö plä, 'nɩ ɔ yi lüda sä kʋ. 37‑Mä ‑lɔɔ' 'duu 'mnö nä, 'ŋnɔ ‑bhlo ‑kʋ bhä ‑mɔɔ. Ɔ ‑glö bhä gbenyenyiŋnɔ. Ɔ nuu‑ lä nynä Zozii ‑yi Falizɩɛyuoo' daa lü ‑kää nä, ɔ bhɛɛ‑ 'kplä 'nɩ a yie‑ bhä ‑daŋwɩɩ 'kʋ. 'Kplaa nä, cɛkʋʋ‑ plöö‑ lä alabatö#7.37 alabatö: Cɛkʋʋ' 'cë ‑bhlo lä. Kʋ 'lelee 'mʋ. Wa bhlu bhä 'kʋ 'nɩ wa nʋ 'kpälö ‑yä ‑flʋbhöö. nä, ʋmʋ wa bhlüü‑ 'kʋ 'nɩ wa ‑tɛnöa bhlä. 38‑Mä 'ŋnɔɔ 'plöö‑ Zozii klë, ɔɔ' 'tutulɔɔ. Ɔɔ' 'mɩɔɔ too bhä Zozii ‑kokokpü 'kʋ, 'nɩ ɔ bhlü ɔ 'wlu nyɩɩ 'kʋ, 'nɩ ɔ sɩʋ bhä. 'Nɩ ɔ nyɛ bhä 'sɩɩ Zozii' ‑kokokpü yëku, 'nɩ ɔ jɛnɩ bhä ‑daŋwɩɩ 'kʋ. 39Falizɩɛyuo ‑ɔ laa‑ bhlä Zozii nä, ɔ nii‑ lä wälɩɩ 'yi nä, kɔ cii‑ ɔɔ' pleyii, ɔ lä nyɩkpɔnɔ kä bhä 'zaazɩ 'plɔfɛtɩ plöö‑ nä, 'ŋnɔnɔ ‑ɔ 'tanöɔ lä nä, ɔ yio bhä yibhë. Ɔ yi bhä sɔɔ yibhë nynä gbenyenyiŋnɔ lä.

40'Nɩ Zozii yi Falizɩɛyuo soo, ɔ lä Simɔɔ‑, n 'kä‑ä wälɩklë soo! Simɔɔ lä ‑n ci nä, Cɩanyɔ‑! 41Zozii lä nyɩkpa 'sɔ, wa ‑kä bhä nyɩkpɔɔ' dlu. ‑Bhlo ‑kä bhä ‑flëëgüyii' gwlɩ ‑ngbüü' 'ci ‑ngbüü' dlu (500). 'Nɩ ‑lɔɔ' ‑lɔɔ ‑kä bhä ‑flëëgüyii' gwlɩ 'sɔ 'nɩ 'kʋgbää' dlu. 42‑Mä nyɩkpanä ‑wa ‑kä bhlä dluu nä, waa' mii bhɔɔ ‑yä wa 'kʋ plʋʋ. Ɩ ‑kʋ bhɛ lä sɔɔ nä, nyɩkpɔɔ ‑ɔnö dluu wa ‑kä bhlä nä, kɔ ‑cienʋwa dluu wamä 'sɔ. Naa, Simɔɔ‑, dluu' käänyʋänä 'sɔ nyɩkpɔɔ ‑cie lä nä, waa' lɔɔ ‑sä yi bhä waa' cienyɔɔ kpänyɩ wamää? 43Simɔɔ lä n bhobho nynä ‑lɔɔ ‑ɔnö dluu ‑ʋ ‑zu bhlä kpänyɩ, 'nɩ wa ‑cie lä nä, ɔmɔɔ‑ 'gɔ lä kpänyɩ wamä. Zozii lä ‑n cii‑ 'nää!

44'Nɩ Zozii yi 'ŋnɔɔ 'klʋ tlaa, 'nɩ ɔ yi Simɔɔ soo, ɔ lä ‑n ni 'ŋnɔnɔ 'yi ‑a? N ‑plä lä ‑naa dää nä, ‑n nö'ö ‑wʋ 'nyu nyɛɛ‑ ‑yä n 'kä ‑kokokpü ‑wɔɔ. ‑Mä, ɔ bhlüü‑ ɔɔ' 'mɩɔɔ 'kʋ, 'nɩ ɔ ‑wɔnö'ö ‑kokokpü. 'Nɩ ɔ bhlüü‑ ɔ 'wluu nyɩɩ 'kʋ, 'nɩ ɔ yi'i ‑kokokpü yëku sɩɔ. 45N ‑plä lä 'sɩɩ ‑naa dää nä, ‑n nö'ö ‑wʋ ‑gbëë. ‑Mä ɔmɔ nä, dä n 'nö bhlä ‑lää yi nä, kɔ gbënö'ö lä ‑kokokpü ‑bhlobhlo. 46N ‑yi lä 'sɩɩ nä, ‑n nö'ö ‑wʋ 'kpüü 'wlu ‑bʋä. ‑Mä ɔmɔ nä, ɔ ‑bʋä'ä ‑daŋwɩɩ ‑kokokpü yëku. 47Ɩɩ' ‑zä n 'kä‑ä ylä soo nynä ‑mä, 'ŋnɔnɔɔ' nyenyi ‑bhutukpa 'fɩɩn ɔ yä bhlä nʋ nä, a yä cienöɔ. Ɩmɩɩ‑ ‑kä 'ŋnö 'nɩ ɔɔ' ‑wawʋʋ ‑zu lä. Nyɩkpɔ nä, wa 'nöɔ kpänyɩ ‑cie nä, ɔɔ' ‑wawʋʋ' ‑wʋ ‑zu. 48'Nɩ Zozii yi 'ŋnɔɔ soo, ɔ lä ‑naa nyenyii yä cienöɔ!

49Ɔ cii‑ lä sɔɔ nä, nyɩkpaa ‑wa ‑kʋ bhlä ‑lɔɔ lüdaa nä, wa ylä bhä wa yëku, wlä 'nɩ ‑nɔnɔ ɔ plöö‑ bhä 'nɩ ɔ cie bhä 'titi nyɩkpa nyenyii? 50'Nɩ Zozii yi bʋkʋ 'ŋnɔɔ soo, ɔ lä ‑naa pɔlötɛtɛɛ yä‑ä puë! ‑N 'plö ‑yä, ‑n mʋʋ pɔlöwätɛɛ'!

Jelenleg kiválasztva:

Lukö 7: god

Kiemelés

Megosztás

Másolás