Lukö 6

Zozii plöö‑ Sabaa‑gwlɛylʋʋ' 'kämänyɔ

(Matie 12.1‑8; Makö 2.23‑28)

1 Sabaa‑gwlɛylʋʋ ‑bhlo 'kʋ, Zozii ‑kʋ bhä ‑nyʋʋ‑zizee' ghläädä, 'nɩ ɔɔ' 'kʋgënyʋa kplä bhä 'klaa 'mnö ‑nyʋʋ 'yii. Wa 'tütlünʋ bhä wlɩɩ' 'nɩ, wa luu bhä. 2Falizɩɛnyʋa niwa‑ lä 'yi nä, 'nɩ wa yiwa 'ylä, wlä ‑ɔnözä 'nɩ sää‑ ‑wʋ lä kʋ ‑ŋwa nynä nyɩkpɔ nʋ Sabaa‑gwlɛylʋʋ 'kʋ nä, a nʋ bhä sɔɔ? 3'Nɩ Zozii yiwa soo, ɔ lä wälɩklëa Davidö ‑nʋ bhlä nä, a 'nöa ‑läzä Laagɔ‑bɔɔgʋʋ 'mnö ‑zɛnö ‑a? 'Tänyɩɛ 'mnö ‑gbugbe bhlä bhlä Davidöö' ‑yä ɔɔ' 'kʋnämʋnyʋa 'sɔ nä, 4kä Davidö ‑plä Laagɔɔ' bʋbɔda, 'nɩ ɔ bhlüü‑ ‑mɔɔ' 'flɔɔ 'kʋ, 'nɩ ɔ yi lü. Ɔ 'nyɛmʋ‑ ɔɔ' 'kʋnämʋnyʋa 'nɩ wa yi ‑lü 'sɩɩ. ‑Bhlɛ kä ‑Jlämaa ci bhlä nynä ‑lɔɔ' 'flɔɔ nä, 'Cibhisänyʋa' ‑za ʋ ‑kʋ bhlä ‑lɔɔ. 5'Nɩ Zozii yiwa bʋkʋ soo, ɔ lä Sabaa‑gwlɛylʋʋ nä, Nyɩkpɔɔ ‑Yowli 'mɔɔ‑ plöö‑ lä ʋʋ' 'kämänyɔ.

Zozii ‑yamä ‑klɔɔpɛ‑käänyɔ Sabaa‑gwlɛylʋʋ 'kʋ

(Matie 12.9‑14; Makö 3.1‑6)

6 Sabaa‑gwlɛylʋʋ ‑bhlo ‑ŋëë bʋkʋ, 'nɩ Zozii ‑plä Laagɔ‑bhutuu 'mnö, 'nɩ ɔ yi cɩalɩ 'kʋ cie. ‑Mä ‑klɔɔpɛ‑käänyɔ ‑kʋ bhä ‑mɔɔ. Ɔɔ' lüüklä‑sɔɔ nä, kʋ ‑kɔ bhä. 7Nä, ‑Jlämöcɩanyʋa ‑yä Falizɩɛnyʋa ‑wa ‑kʋ bhlä ‑lɔɔ nä, wa tää bhä gbëgëdëë' laa ‑a yi bhlä Zozii gbʋ klaa nä. Ɩ ‑kä 'ŋnö nä, wa ‑fä bhä Zozii plɛkʋ ‑yä, ɔ kä nyɩkpɔ ‑yamä Sabaa‑gwlɛylʋʋ 'kʋ nä, wa 'kɩ 'ni. 8‑Mä Zozii ‑yi bhlä waa' pleyii wälɩ nä, kɔ ‑soo ‑klɔɔpɛ‑känyɔɔ, ɔ lä ‑n ‑bha 'kʋ ‑yä ‑n 'nynigo ‑jlënä nëëdë! 'Nɩ nyɩkpɔɔ yi 'kʋ ‑bha 'nɩ ɔ yi 'nynigo. 9'Nɩ Zozii yiwa 'ylä, ɔ lä ‑maa, Sabaa‑gwlɛylʋʋ 'kʋ nä, kä ‑Jlämaa ci bhä nynä ‑mä nyɩkpɔ nʋ 'nää ‑a? ‑mä nyenyi‑ ɔ lɔ nʋ bhä ‑a? Ɩ ‑ŋwa bhä 'kʋ nynä ‑mä, nyɩkpɔ puë ɔ ‑lie ‑a, ‑mä ɔ nuë bhä ɔɔ' zëkpë ‑a? 10Zozii cii‑ lä sɔɔ nä, ɔ ‑bie 'yi, 'nɩ ɔ ‑wloo ‑jlëa 'mnö nyɩkpaa. 'Nɩ ɔ yi ‑klɔɔpɛ‑käänyɔɔ soo, ɔ lä ‑n gbɔn ‑naa sɔɔ 'mʋ! ‑Mä sä nyɩkpɔɔ gbɔn‑ lä gää ɔɔ' sɔɔ 'mʋ nä, kɔ ‑yamä. 11‑Mä ‑Jlämöcɩanyʋa ‑yä Falizɩɛnyʋa 'sɔ, kä plɛkʋ ‑siwa. Ɩ kä 'ŋnö nä, wa bhlää bhɛ wamä ‑bhlobhlo pää' 'kʋ ‑yä sä wa 'kä lä Zozii' wälɩɩ klä nä, wa 'kä sɔɔ 'kʋ 'ŋʋʋ.

Zozii ‑sä ɔɔ' lobho lobhonyʋä 'kʋgbä 'sɔ

(Matie 10.1‑4; Makö 3.13‑19; Nʋnʋ 1.13)

12‑Lɔɔ' ylɩɩyɩ 'mnö, Zozii ‑mʋ 'kükë 'wlu bhibhie ‑kää. ‑Mä 'saboyɩ nä, ɔ ‑kʋ bhibhiedä ‑aaa, 'nɩ zeli ‑ze. 13Zeli ‑ze ylä nä, kɔ laa‑ ɔɔ' 'kʋgënyʋa. 'Nɩ ɔ yi waa' nëëdë' lʋä 'kʋgbä 'sɔ ‑sä. Wamä ɔ laa‑ lä lobho lobhonyʋä. 14A ni wamä 'kʋgbä 'sɔɔ 'ŋnöö. ‑Bhlo wa lɔɔ Simɔɔ, ‑mä Zozii ‑zienöɔ bhä Pɩɛlö. Ɔ bheli Adlee ‑kʋmʋ bhä. ‑Bhlo plöö‑ Zakö, ‑bhlo plöö‑ Zään, ‑bhlo plöö‑ Filipʋ, ‑bhlo plöö‑ Batlemii, 15‑bhlo plöö‑ Matie, ‑bhlo plöö‑ Tomaa. ‑Bhlo plöö‑ Afee ‑yowli Zakö. ‑Bhlo plöö‑ bhä 'sɩɩ Simɔɔ 'nɩ wa ‑zienöɔ bhä 'Bhlɩɩ 'Kʋ Bhläänyɔ#6.15 'Bhlɩɩ 'kʋ bhläänyɔ: Nyɩkpaa' ‑nänʋä sä 'ŋnöö ‑zɔɔ nynä ‑mä, ɔ ‑glö bhä 'bhlɩ 'kʋ bhläänyʋaa' ‑jɛnyɩɛ 'mnö nyɩkpɔ, 'nɩ ‑nänʋä ci 'sɩɩ nynä ‑mä ɔ ‑glö bhä Moyizöö' ‑Jlämaa' 'kʋ bhläänyɔ.. 16‑Bhlo plöö‑ bhä Zudö. Nyɩkpɔɔ wa laa lä Zakö nä, ɔ ‑yowli bhlä. 'Nɩ ‑bhlo plöö‑ bhä Zuda Sikalɩɔtö. Zuda Sikalɩɔtö 'mɔɔ‑ ‑pëë lä Zozii.

Nyɩkpa ‑bhutukpä ‑yi Zozii yëku 'nɩ ɔ ‑yamänʋwa

(Matie 4.24‑25; Makö 3.7‑13)

17'Nɩ Zozii ‑yä ɔɔ' 'kʋgënyʋä 'sɔ yi 'kükëa kwli, 'nɩ dää‑ ‑slɔ lä sä nä, wa yi ‑lɔɔ 'nynigo. Ɔɔ' 'kʋgënyʋaa' 'kpä, ɩyä nyɩkpaa' 'yigädälʋä, ‑wa ‑bha bhlä Zudee‑bhlɩɛɛ' dää 'fɩɩn, ɩyä Zolizalɛmʋduu' 'nɩ wa ‑yi bhlä nä, wa 'kpä. Tilö‑bhlɩɛ ‑yä Sidɔɔ‑bhlɩɛɛ' 'nyigbë 'kʋ 'dii 'mnö, ‑nänʋä ‑bha 'sɩɩ ‑mɔɔ 'nɩ wa ‑yi. 18Kä nyɩkpaa ‑yi bhlä ‑yä wa 'kɔ 'nyukwli poo, ɩyä ɔ 'kwa bhä 'sɩɩ yamä. Nyɩkpaa' ‑lʋa ‑zizinyenyi nyɛ bhlä nyäkälɩɩ nä, ɔ yamänʋwa bhä. 19Sä 'päwä bhɔɔ bhlä 'yɛkɛɛ' 'nɩ a yamä bhä nyɩkpa nä, kä ‑jlëa 'mnö nyɩkpaa ‑lefɩɩn tää bhä nynä wa 'kɔ 'taa.

'Nää kʋlɩ ‑yä ‑muzuee' kʋlɩ

(Matie 5.2‑12)

20‑Mä Zozii bhɛlɩä‑ 'wlu 'kʋ, 'nɩ ɔ ‑wloo ɔɔ' 'kʋgënyʋa. Ɔ lä

Anyɩmɔɔ‑ plöö‑ lä ŋäzönyʋa nä,

A yä 'pʋ!

Laagɔɔ' 'Leyiduu ‑glö yɩ anyɩa' lʋʋ.

21Anyɩmɔ ‑gbugbe bhlä lä 'tänyɩnɛ 'mnö nä,

A yä 'pʋ!

'Ylʋ yi ŋëë 'nɩ a yi loo.

Anyɩmɔɔ‑ tu lä 'tänyɩnɛ 'mnö nä,

A yä 'pʋ!

'Ylʋʋ yi ŋëë 'nɩ a yi ‑jäkä nʋ.

22Anyɩmɔ nyɩkpa 'kä lä zɔbhlɛmä,

Ɩyä wa 'kä lä 'tlü nä,

Anyɩmɔ wa 'kä lä 'bhɩsɛ

Ɩyä wa 'kä lä yëku nyima Nyɩkpɔɔ ‑Yowlii' ‑za nä,

A yä 'pʋ!

23'Tänyɩɛ 'mnö ‑nɩnɩ 'kanyɩ lä ŋëë nä, a nʋ ‑pʋpɛ ɩyä a kään ‑jäkä pleyii ‑mä, anyɩa bɔɔpälɩ 'kädɩ ‑kʋ ‑mɔɔ Laagɔduu'! Sä wa ‑kla'anyɩ lä nä, sɔɔ wa 'bäsɩ ‑klä ‑lä 'sɩɩ Laagɔɔ' 'plɔfɛtɩnyʋa.

24Nä, 'kplë ya'anyɩ slää!

Anyɩmɔ ‑ɔ ‑kä lä lɩ nä,

Anyɩa 'nää, a ya wɛzä 'ni!

25'Kplë ya'anyɩ slää!

Anyɩmɔ ‑ɔ ‑loo lä tänyɩnɛɛ' nä,

‑Gbugbe ‑lä 'ganyɩ ylä 'bhlä!

'Kplë ya'anyɩ slää!

Anyɩmɔ ‑ɔ nyɩä lä 'tänyɩnɛ 'mnö nä,

Plɛ yi'anyɩ 'mʋ belio, 'nɩ a yi 'tu!

26'Kplë ya'anyɩ slää!

Anyɩmɔ ‑ɔnö 'nää nyɩkpaa 'fɩɩn ci lä nä,

Sä wa ci lä anyɩa' ‑za nä,

Sɔɔ wa 'bäsɩ ci bhlä ‑kpläkplö 'plɔfɛtɩnyʋaa' ‑za 'nää.

Zozii lä nyɩkpɔ wamä ɔɔ' ‑zɔbhlɛgbänyɔ

(Matie 5.38‑48)

27Anyɩmɔɔ‑ ‑poo lä 'naa ciciwälɩɩ 'nyukwlii' nä, n sonö'anyɩ nynä a wamä anyɩa ‑zɔbhlɛgbänyʋä. Nyɩkpaa' ‑lʋa ‑wa ‑zɔɔ'anyɩ lä nä, a nʋwa 'nää! 28Nyɩkpaa' ‑lʋa ‑wa gbütü'anyɩ lä nä, a 'pʋwa 'nyu! Nyɩkpaa' ‑lʋa ‑wa kla'anyɩ lä nyenyisä nä, a bhibhie waa' 'wlu!

29Nyɩkpɔ kä‑ä 'nyuklu 'kpeye paa‑ nä, ‑n tlɔɔ 'sɩɩ ‑mɔɔ' 'nyukluu! Nyɩkpɔ kä ‑naa gbëbie‑lokwi yëku ‑sä nä, ‑n ‑tanöɔ 'yi ‑yä ɔ 'bhlü 'sɩɩ ‑naa 'kotuu 'kʋ! 30Nyɩkpɔ kä‑ä ‑zla nä, ‑n 'nyɩɔ! Nyɩkpɔ kä ‑naa kääkäälʋʋ ‑sä nä, ‑naa 'ylänöɔ 'nyʋ ‑läyɩɔ!

31Sä a ‑waa lä nynä ‑mä nyɩkpa nʋ anyɩa ‑za nä, anyɩ ‑mä 'sɩɩ, a nʋ 'sɔɔ waa' ‑za! 32Nyɩkpaa' ‑lʋa ‑wa ‑wa'anyɩ lä nä, wamä ‑bhlo a kä ‑waa nä, 'nää 'cesä a tään bhää? Gbenyenyinyʋä ‑mä 'sɩɩ, wa nʋ sɔɔ. 33Nyɩkpaa' ‑lʋa ‑wa nʋ'anyɩ lä 'nää nä, wamä anyɩ ‑mä 'sɩɩ a kä 'nää nʋ nä, 'nää 'cesä a tään bhää? Gbenyenyinyʋa ‑mä 'sɩɩ, wa nʋ sɔɔ. 34'Nɩ nyɩkpaa' ‑lʋa ‑wa gbla'anyɩ lä nä, wamä a kä 'sɩɩ gblaa nä, 'nää 'cesä a ‑nʋ bhää? Gbenyenyinyʋa ‑mä 'sɩɩ, wa nʋ sɔɔ. Sä wa nyɛɛ‑ lä wa ‑liesɩ nä, wa ‑kää plɛkʋ nynä wa yiwa 'sɩɩ sɔɔ 'ylɩbha. 35‑Mä anyɩ nä, a wamä anyɩa' ‑zɔbhlɛgbänyʋä ‑yä a nʋwa 'nää! A kä nyɩkpɔ lʋʋ ‑gbla nä, a 'nä 'tɛnöɔ ‑lä dë nynä ‑mä, ɔ yi'anyɩmʋ 'ylɩbha! A kä sɔɔ nʋ nä, a yi bɔɔpälɩ 'kädɩ 'ni. Bʋkʋ 'nɩ, a yi 'Kʋzi Laagɔɔ' 'yuë 'plö. Laagɔ nä, kʋ ‑kä plɛkʋmɛnɔ. Laagɔ nä, kʋ nää‑ ‑abhlɛɛnyʋää' ‑za, 'nɩ ʋ nää‑ 'sɩɩ gbenyenyinyʋaa' ‑za. 36Nä, anyɩ ‑mä 'sɩɩ, sä a 'Bä Laagɔ ‑kä lä kpänyɩ plɛkʋmɛnɔ nä, a kään 'sɩɩ sɔɔ plɛkʋmɛnɔ!

Sä ‑n klä lä ‑n ‑liesɩ nä sɔɔ Laagɔ 'kä‑ä klä

(Matie 7.1‑5)

37Aa' 'ŋʋ ‑lä a ‑liesɩ gbëgëdü yëku ‑lɔɔ Laagɔ nö'anyɩ 'tite 'ŋʋ! A 'nä klaa ‑lä a ‑liesɩ gbɩ, ‑lɔɔ Laagɔ nö'anyɩ ‑lä ‑kä gbʋ klaa! A cie a ‑liesɩ, ‑lɔɔ Laagɔ yi'anyɩ ‑kä cie! 38A 'nyɛmʋ a ‑liesɩ, ‑lɔɔ Laagɔ yi'anyɩ ‑kä 'sɩɩ 'nyɛ! Ʋ yi'anyɩ ‑jɛjɛsä 'nyɛ. Ʋ yi ‑jɛjɛsä 'plü, 'nɩ sʋ plüü‑ lä nä, ʋ yi sɔɔ koo, 'nɩ ʋ yi'anyɩ 'nyɛ ‑kaaa, 'nɩ sä ʋ nyɩ'anyɩ lä nä, ‑sɔɔ yi 'kʋ 'mɩä. ‑Lʋʋ a ‑kä 'nɩ a nyäka lä 'mʋ nä, ʋmʋ Laagɔ 'kä lä 'kʋ 'bhlü, ‑yä sä ʋ nyɩ'anyɩ lä nä, ʋ 'kä lä 'sɩɩ sɔɔ nyäka.

Suklë ‑yä ŋazʋpɛ 'sɔɔ ‑nyädlä

39'Nɩ Zozii yiwa bʋkʋ ‑nyädlää' sonö. Ɔ lä 'yikpü‑käänyɔ yi bhä ɔ ‑liee ‑kʋ lä 'yikpüü' nä 'tie ‑a? Wamä 'sɔ kä nää nä, waa' ‑lä bhä ‑gbazlʋʋ' bhlüü ‑a?

40 'Kʋgënyɔɔ' ‑wʋ 'ghlü, 'nɩ ɔ 'kä ɔɔ' cɩanyɔ ‑zi. ‑Mä 'kʋgënyɔɔ' ‑lɔɔ wa cɩa‑ lä 'nägäsä nä, 'tänyɩ kʋ ‑lɔɔ 'nɩ ɔ ŋëë ɔɔ' cɩanyɔ 'bhisäkʋ.

41Sɩ ‑kʋ bhä 'nɩ, ‑n ‑liee' 'yii ŋazʋpɩɔ 'mɔ ‑n ni bhä 'yii, 'nɩ ‑naa 'yii kplupɛlʋʋ‑ ‑kʋ lä ‑mɔɔ nä, ‑nn 'niu bhä 'yii? 42Kplupɛlʋ ‑kʋ ‑mɔɔ ‑naa 'yii 'nɩ ‑nn 'niu ‑wʋ lä 'yi nä, sä ‑n yi bhä mii 'nɩ, ‑n yi bhä ‑n ‑lie soo nynä ‑mä bheli, ‑n luë ‑mä, ‑naa 'yii ŋazʋpɛ ‑kʋ ‑mɔɔ nä, n 'kɔ ‑mɔɔ ‑sää? 'Kʋ wloo wloogbɩɩ' nʋnyɔ‑, ‑n ‑sä 'fɩa ‑mɔɔ ‑naa 'yii kplupɛlʋʋ! ‑Lɔɔ ‑n yi lä sä 'ni, 'nɩ ‑n yi lä ‑n ‑lioo' 'yii ŋazʋʋ ‑mɔɔ ‑sä.

Su ‑yä ʋʋ' 'bhë 'sɔɔ ‑nyädlä

(Matie 7.16‑20; 12.33‑35)

43A ni su kä nää nä, ʋʋ' tlʋ ‑wʋ 'bhü nyënyü. 'Nɩ su kä 'sɩɩ ‑nyu nä, ʋʋ' tlʋ ‑wʋ 'bhü 'nänö. 44Su nä, ʋʋ' 'bhüü' wa yibhënʋ. Waa' ‑läzä ‑tɩtɩɔ ‑gbukluye 'yii ‑sä, 'nɩ waa' ‑läzä 'sɩɩ ‑gälö nünë‑kpäkä 'yi ‑sä. 45Nyɩkpa 'nänɔ nä, 'nää ‑a ‑kʋɔ lä pleyii nä, amä 'mnö ɔ sä 'nɩ ɔ nʋ lä 'nägägbɩ. 'Ɩzä nyɩkpa ‑nyonyo nä, nyenyii‑ ‑kʋɔ lä pleyii nä, ɩmɩ 'mnö ɔ sä 'nɩ ɔ nʋ lä gbenyenyi. ‑Ɔnö ‑za bhää? Nyɩkpɔ nä, wälɩ‑ ‑kʋɔ pleyii nä, ɩmɩɩ‑ ghlänöɔ nëë'.

‑Bhiti‑cikpɔ 'sɔɔ ‑nyädlä

(Matie 7.24‑27)

46'Nɩ, ‑ɔnözä 'nɩ a lä'ä bhä 'flɛ Kwlienyɔ‑! Kwlienyɔ‑! 'Nɩ aa' nʋ bhä sä n 'ylänö'anyɩ lä nää? 47Nyɩkpɔɔ' lɔɔ ‑ɔ yi'i lä yëku nä, 'nɩ ‑ɔ nu lä 'naa ciciwälɩɩ, 'nɩ ‑ɔ nää lä ɩɩ' saa nä, ‑lʋʋ ɔ 'wlʋʋ‑ lä nä, n 'kanyɩmʋ paa. 48Kɔ ‑kʋ lä nynä nyɩkpɔɔ' lɔɔ ‑ɔ slää‑ lä ‑bhutu nä. Ɔ ‑koto 'nɩ ɔ ‑mʋ glu kpänyɩ, 'nɩ ‑mɔɔ gluu' cɛkʋ ‑kpʋkplaa 'mnö ɔ yi ‑mɔɔ ‑bhutuu glu pään. Ɔ ‑bhɩä lä ‑bhutuu ‑zɔɔ nä, kä 'nyu 'kädʋ ‑bhlä. Ʋ zelio‑ 'nɩ ʋ 'sɛpɩ‑ ‑bhutuu' papɩɩ 'yii. ‑Mä sä nyɩkpɔɔ slää‑ bhlä ‑bhutuu 'nää nä, 'nyuu ‑wʋ mii‑ 'nɩ ʋ 'kʋ ‑wlä. 49‑Mä nyɩkpɔ kä 'naa ciciwälɩɩ 'nu, 'nɩ ɔ 'nö ɩɩ' saa nää nä, kɔ ‑kʋ lä nynä nyɩkpɔɔ' lɔɔ ‑ɔɔ ‑wʋ lä glu ‑koto, 'nɩ ‑ɔ slää‑ lä bhutu nä. Ɔ ‑bhɩä lä ‑bhutuu ‑zɔɔ nä, kä 'nyu 'kädʋ ‑bhlä 'nɩ, ʋ zelio‑ 'nɩ ʋ 'sɛpɩ‑ ‑bhutuu' papɩɩ 'nɩ ‑bhutuu ‑wlɔɔ. Ʋ ‑wlɔɔ 'nɩ ʋ yi 'kwläkwlä sää ‑didi plɔɔ.

Jelenleg kiválasztva:

Lukö 6: god

Kiemelés

Megosztás

Másolás