Lukö 5

‑Dädö‑pänyʋa bhlää‑ zlü ‑bhutukpä

(Matie 4.18‑22; Makö 1.16‑20; Zään 1.35‑51; 21.1‑11)

1'Tänyɩ ‑bhloo', Zozii ‑kʋ bhä Zenezalɛtö‑bhlɩɛɛ' 'nyiee#5.1 Zenezalɛtö‑bhlɩɛɛ' 'nyiee: Galilee' 'nyie 'kädɛɛ 'mɛɛ‑ 'plöö lä 'sɩɩ ‑mɔɔ. ‑kpʋkpʋʋ 'kʋ 'nɩ nyɩkpaa ‑bhutukpä 'mɩmɩänöɔ‑ bhä 'kʋ ‑yä, wa 'kä Laagɔwälɩɩ 'nyukwli poo. 2Ɔ lɔ wloo nä 'gokpü 'sɔ ‑kʋ bhä 'nyi‑kpʋkpʋʋ 'kʋ 'nɩ ɩɩ 'mnö ‑dädö‑pänyʋa kwlii‑ 'nɩ wa wɔɔ bhä waa' ‑dädöö. 3'Nɩ Zozii yi 'gokpüü' laa ‑bhlo plä. Simɔɔ' 'gokpë bhlä. 'Nɩ ɔ yi Simɔɔ soo nynä ɔ ‑sä 'pɛpɛlɩä 'nyi‑kpʋkpʋʋ gwë. 'Nɩ ɔ yi 'gokpëa 'mnö sä kʋ, 'nɩ ɔ yi nyɩkpaa cɩalɩ 'kʋ cie.

4Ɔ ‑bhɩä lä cilɩ nä kɔ ‑soo Simɔɔ, ɔ lä ‑n 'jloo 'nyiee' daa‑ ‑tlʋ lä 'mʋ nä, ɩyä a 'pä ‑dädaa! 5Simɔɔ lä Cɩanyɔ‑, ‑a paa‑ 'sabonö ‑dädö ‑aaa, ‑aa ‑wʋ lʋʋ ‑klä! ‑Mä ‑n yä ylä sɔɔ ci nä, kä n 'kä lä ‑dädaa 'pä. 6‑Mä wa paa‑ lä ‑dädaa 'nyiee' nä, wa ‑klä sää zlü ‑bhutukpä. Ɩ ‑kä 'ŋnö nä, ‑dädaa 'ŋätlönöɔ bhɛ. 7Wa ‑liesɩɩ, ‑wa ‑kʋ bhlä 'gokpëa 'sɔnala 'mnö nä, 'nɩ wa yiwa sɔ 'pää nynä wa yi ‑yä wa 'kwa klää. 'Nɩ wa yi yi, 'nɩ wa ‑yʋwa 'sɔ yi 'gokpüü 'sɔ zlüü 'kʋ yie. ‑Mä zlüü ‑zu bhlä kpänyɩ nä, 'pɛpɛ 'nɩ 'gokpüü' mnɔɔ bhɔɔ 'kʋ. 8Simɔɔ Pɩɛlö nii‑ lä wälɩɩ 'yi nä, kɔ paa Zozii dëlü ‑kokoowli glu, 'nɩ ɔ yio soo, ɔ lä Kwlienyɔ‑, bheeje ‑mä n ‑glö nyenyinyɔ nä, ‑n ‑sä'ä gwë! 9‑Mä sä zlüü ‑zu bhlä nä, Simɔɔ ‑yä ‑lʋa 'fɩɩn ɔ ‑yʋwa 'sɔ ‑kʋ bhlä ‑lɔɔ nä, kä ‑ŋänö ‑plʋwa, 10'ŋʋʋ Simɔɔ' 'kʋnämʋnyʋa Zebedee ‑yowlie Zakö ‑yä Zään 'sɔ. 'Nɩ Zozii yi Simɔɔ soo, ɔ lä Simɔɔ‑, ‑ŋänö 'na 'bhlä‑ä ‑lä ‑mä, ‑a 'bhää ylä ‑zɩkä ‑lää 'kʋ nä, nyɩkpa‑jlünyɔ ‑n 'gä ylä 'plö. 11Zozii cii‑ lä sɔɔ nä, 'nɩ wa yi waa' 'gokpüü 'nyikpʋkpʋ 'kʋ ‑lä. ‑Mä wa ‑të ‑lɔɔ waa' bhɛbhɛlɩɩ 'fɩɩn, 'nɩ wa yio 'kʋ 'gë.

Zozii ‑yamä 'zläbhlänyɔ

(Matie 8.1‑4; Makö 1.40‑45)

12Ylʋʋ ‑bhlo 'kʋ, Zozii ‑kʋ bhä 'du ‑bhlogbe 'kʋ, 'nɩ nyɩkpɔɔ' lɔɔ 'zlä 'mɩmɩä bhlä 'kʋ nä, ɔ ‑yi. Ɔ nii‑ lä Zozii 'yi nä, kɔ pɔɔ‑ dëlü ‑kokoowli glu, 'nɩ ɔ yi 'wlu sä glaa. 'Nɩ ɔ yio 'wlu slä, ɔ lä Kwlienyɔ‑, ‑n gä ‑waa nä, ‑n yi mii, 'nɩ ‑n yi'i yamä ‑yä n 'kä kplɔɔ. 13Ɔ cii‑ lä sɔɔ nä, kä Zozii ‑fä ‑klɔgbä 'yikʋ 'nɩ ɔ yio 'taa. 'Nɩ ɔ yio soo, ɔ lä n ŋoo nynä ‑mä ‑n yamä! Nä, ‑n yamä yɩ! 'Kpobhuu ‑bhlo 'kʋ, 'nɩ 'zlaa yi nyɩkpɔɔ yëku bhɩä. 14'Nɩ ɔ yi nyɩkpɔɔ 'nyukwli jlü nynä ɔɔ' soo ‑lä nyɩkpɔ. Ɔ lä ‑n mʋ Laagɔɔ' 'cibhisänyɔɔ yëku ‑yä ɔ 'kä‑ä wloo. Ɩyä 'cibhie Moyizöö' ‑Jläma ci lä nynä 'zläbhlänyɔ kä ‑yamä nä, ɔ ‑sä nä, ‑lɔɔ' 'cibhie ‑n 'gɛ ‑sä. Ɩyä nyɩkpa 'kä 'sɔɔ yibhë nynä ‑n yä 'zaazɩ yamä.

15‑Nɩnɩ 'fɩɩn gbä bhlä nä, kä Zozii' 'ŋnö mʋ bhɛ kpänyɩ. Nä, nyɩkpa ‑bhutukpä 'wlää bhä 'wlu 'kpö 'kpö 'kpö, 'nɩ wa puo bhä 'nyukwlii. 'Nɩ wa yi bhä 'sɩɩ ‑yä ɔ 'kwa yamä. 16‑Mä 'tänyɩ kʋ ‑lɔɔ 'nɩ Zozii ‑zigbë ‑gbäsɩɩ nyɩkpɔɔ' bhɔɔ lä ‑kʋ nä, 'nɩ ɔ bhibhie bhä.

Zozii ‑yamä 'kpläkplänyɔ

(Matie 9.1‑8; Makö 2.1‑12)

17'Tänyɩ ‑bhloo' Zozii cɩa bhä, 'nɩ Falizɩɛnyʋä ‑yä ‑Jlämöcɩanyʋä ‑kʋ bhä ‑lɔɔ sä. Wa ‑bha bhä Galilee' 'dii 'mnö, ɩyä Zudee' 'dii 'mnö. ‑Nänʋä ‑bha bhä 'sɩɩ Zolizalɛmʋ‑duu' 'nɩ wa ‑yi. ‑Mä gupanyʋa nä, Kwlienyɔɔ 'päwaa gbä 'nɩ wa yamä bhä. 18Nyɩkpa ‑yi 'nɩ wa bhɛnö‑ bhä 'kpläkplänyɔ ‑amäkɩɩ'. Wa ‑tää bhä nynä wa ‑yɔsɔ 'kä ‑mɔɔ ‑bhutuu 'mnö plä, ɩyä wa 'kɔ Zozii dëlü 'ŋʋ. 19‑Mä sä nyɩkpaa ‑zu bhlä kpänyɩ, 'nɩ waa' 'ni bhɔɔ lä ghläädä nä, kwa gblää‑ ‑bhutuu kätää', 'nɩ wa ‑sä ‑jigoo këfë 'nɩ gupänyɔɔ ‑kʋ ‑amäkɩɛ 'mnö 'nɩ wa yio këfëa 'mnö ghlää 'nɩ wa yio ‑jlëa nëëdë kwlie, ‑lɔɔ Zozii dëlü. 20‑Mä Zozii nii‑ lä waa' pɔlötɛtɛɛ 'yi nä, kɔ ‑soo 'kpläkplänyɔɔ, ɔ lä ‑mɔɔ, ‑naa nyenyii yä cienöɔ!

21Ɔ cii‑ ylä sɔɔ nä, ‑Jlämöcɩanyʋa ‑yä Falizɩɛnyʋa ‑wa ‑kʋ bhlä ‑lɔɔ nä, wa ci bhɛ wamä ‑bhlobhlo pää', wlä ‑mä, ‑nɔnɔ plöö‑ bhä 'nɩ ɔ zie bhä Laagɔ ‑dii? Nyɩkpɔ‑ ‑sä yi bhä mii, 'nɩ ‑ɔ yi bhä ɔ ‑liee' nyenyi ciee? 'Nɩ ‑ɔnö Laagɔ ‑bhlo! 22Zozii ‑yibhë lä sä wa bhobho bhlä nä, kɔ ‑sonʋwa, ɔ lä ‑ɔnözä 'nɩ anyɩa plɛɛ 'yii sää bhobholɩ ‑kʋ bhä ‑mɔɔ? 23N 'kɔ soo nynä ‑mä, ‑naa nyenyii yä cienöɔ nä, ɩyä n 'kɔ soo nynä ‑mä, ‑n ‑bha 'kʋ ‑yä ‑n nää nä, 'klünö 'sɔ 'mnöö laa ‑sä 'tɛ bhää? 24Ɩ ‑ŋwa 'kʋ nynä a yibhë sɔɔ ‑mä, ‑mää ‑dʋdʋkʋ nä, Nyɩkpɔɔ ‑Yowli ‑kä 'päwä ‑yä ɔ 'kä nyɩkpa nyenyi cie. 'Nɩ Zozii yi 'kpläkplänyɔɔ soo, ɔ lä n sonö‑ö nynä ‑n ‑bha 'kʋ! ‑N 'bhlü ‑naa ‑amäkɩɛ 'kʋ ‑yä ‑n mʋ ‑naa ‑gbäsɩɩ! 25'Kpobhuu ‑bhlo 'kʋ, 'nɩ nyɩkpɔɔ yi 'kʋ ‑bha, nyɩkpaa 'fɩɩn 'klʋ. 'Nɩ ‑amäkɩɛ wa bhɛnönöɔ‑ bhlä 'mnö nä, ɔ yie 'kʋ 'bhlü. Ɔ ‑kʋ Laagɔ 'ŋnu fään dä 'nɩ ɔ yi ɔɔ' ‑gbäsɩɩ mʋ. 26‑Mä nyɩkpaa 'fɩɩn kä nëë' ‑yɩwa. Ɩ ‑kä 'ŋnö nä, wa fään bhɛ Laagɔ 'ŋnu. Wa gu bhɛ 'sɩɩ 'nɩ wa ci bhä, wlä ‑a yä ‑zɩkää 'plɛkʋ 'niniegbɩ 'ni.

Zozii ‑yi gbenyenyinyʋa' ‑za

(Matie 9.9‑13; Makö 2.13‑17)

27‑Nɩnɩ 'fɩɩn ‑bhɩä ylä nä, 'nɩ Zozii yi ‑zɔɔ 'wlʋ. Ɔ lɔ wloo nä, ‑n ni lapoo‑ylänyɔ, ɔmɔ wa laa bhä Levii. Ɔ ‑kʋ bhä ɔɔ' lebhe‑nʋdaa sä, 'nɩ Zozii yio soo, ɔ lä ‑mɔɔ, ‑n gë'ë 'kʋ! 28Ɔ cii‑ lä sɔɔ nä, kä Levii ‑bha 'kʋ. Ɔ ‑bha ɔɔ' ‑lɩɩ 'fɩɩn yëku, 'nɩ ɔ yio 'kʋ 'gë.

29‑Mä 'tänyɩ ‑kʋ ‑lɔɔ 'nɩ, Levii laa‑ Zozii ɔɔ' ‑gbäsɩɩ nynä wa 'kä lü. 'Nɩ lapoo‑ylänyʋä ‑bhutukpä ‑yä nyɩkpaa' 'yigädalʋä ‑kʋmʋ bhä ‑lɔɔ lüdaa. 30Ɩ ‑kä ŋnö nä, Falizɩɛnyʋa ‑yä waa' ‑jɛnyɩɛ 'mnö ‑Jlämöcɩanyʋa, wa bhɛɛ bhä Zozii. Wa ylä bhä ɔɔ' 'kʋgënyʋa nynä ‑ɔnözä 'nɩ, anyɩ, a ‑yä lapoo‑ylänyʋa ‑yä gbenyenyinyʋa 'sɔ lüü bhä 'kʋʋ? 31'Nɩ Zozii yiwa soo, ɔ lä nyɩkpaa' ‑lʋa ‑wanö 'yɛkɛɛ‑ 'tɛ lä 'mʋ nä, waa' tää ‑wʋ gwäzönʋnyʋä, ‑mä gupanyʋä, wamää‑ tää lä gwäzönʋnyʋä. 32Nyɩkpaa' ‑lʋa ‑wanö nʋnʋgbɩ‑ gëë‑ lä 'yi nä, waa' ‑zä nn' ‑wʋ ‑yi, ‑mä gbenyenyinyʋaa' ‑zä n ‑yi lä ‑yä n 'kä gbä wa 'kä gbenyenyii 'mnö ‑bha.

‑Gbugbee' goolɩɩ' wälɩ

(Matie 9.14‑17; Makö 2.18‑22)

33'Nɩ nyɩkpaa yio bʋkʋ soo, wlä Zään' 'kʋgënyʋa ‑yä Falizɩɛnyʋaa' 'kʋgënyʋa, wa goo ‑gbugbe 'futu 'futu, 'nɩ wa bhibhie. ‑Mä ‑mɔɔ nä, ‑naa 'kʋgënyʋa, waa' goo ‑wʋ ‑gbugbe. Kä wa lü, 'nɩ wa mnä! 34'Nɩ Zozii yiwa soo, ɔ lä nyɩkpɔ kä 'ŋnɔ flaa‑, 'nɩ wa kä ‑lɔɔ ‑pʋpɛnʋdaa' lülülɩɩ lü nä, nyɩkpaa ‑wa ‑yi lä lüdaa nä, wa ‑yä 'wlio 'sɔ yi bhä ‑lɔɔ kʋ, 'nɩ a yiwa bhä soo nynä wa goo ‑gbugbe ‑a? Waa' nʋ ‑wʋ sɔɔ! 35‑Mä ylɩɩ yi ŋëë 'nɩ wa yiwa 'wlio nëedë ‑sä. ‑Lɔɔ ylɩɩyɩ 'mnö wa 'kä lä ‑gbugbe goo.

36'Nɩ Zozii yi bʋkʋ ‑nyädlä 'kʋ 'bhlü, 'nɩ ɔ yiwa soo, ɔ lä nyɩkpɔɔ' sä ‑wʋ lokwi‑ylɛɛ 'pɛlʋ 'kʋ 'nɩ, ɔ 'kʋ 'kotuzʋ ‑ya 'kplää. Ɔ kä sɔɔ ‑nʋ nä, ɔ yä lokwi‑ylɛɛ nyima! 'Nɩ lokwi‑ylɛɛ, ɛɛ' 'pɛlʋʋ, ʋ ‑yä 'kotuzʋʋ 'sɔɔ ‑lä 'sɩɩ 'nää sä klä ‑klä. 37'Nɩ nyɩkpɔɔ' 'bhlü ‑wʋ 'sɩɩ divaa‑ylä 'kʋ 'nɩ ɔ 'ka 'kɔgwlɛ‑sabhü#5.37 sabhü: 'Zufʋnyʋaa' sabhüü nä, mnɛkwi wa bhlü 'kʋ 'nɩ wa bhlɩɩ bhä. Mnɛkuu wa klänʋ 'nyu ‑yä ‑bhliibhlʋ ‑yä divaa 'mnö 'nää. 'mnö 'nää klää. Ɔ kä sɔɔ ‑nʋ nä, divaa‑ylaa yi gbä 'nɩ sabhüü yi wlɔɔ 'nɩ nʋʋ yi sä jɛɛ, 'nɩ sabhüü mnɔ. 38Nä, ɩ ‑ŋwa 'kʋ nynä divaa‑ylaa nä, wa 'ŋʋa sabhü yälöö'. 39'Nɩ nyɩkpɔɔ kä yɩ 'kɔgwlɛ‑divaa mnää‑ nä, ɔɔ' tään yɩɔ bʋkʋ divaa‑ylaa' 'mnälɩ. Kɔ ci ɔ lä 'kɔgwlɛ‑divaa 'mää‑ nää!

Jelenleg kiválasztva:

Lukö 5: god

Kiemelés

Megosztás

Másolás