MAARQOOSI 10
10
ADHANTINORI BABBAXXITOONKE
(Mat 19:1-12; Luq 16:18)
1Yesuusi hakkiinni kae, Yihudu gobbanna Yordaanoosi Waa widoonni fuli. Hakka woyite lowo manni isiwa gamba yeenna albinte gede rosiisinsa.
2Farisootu isiwa dagge jiffe la'asira yite, «Manchu galtesi fushshe ha'risannota Seeru fajjannoni?» yite xa'mitu.
3Yesuusi qole, «Konne coye Muse ma yee hajajino'ne?» yiinsa.
4Insa qolte, «Muse, ayiddaanni fushshe ha'risate woraqata anga wore harisanno gede fajjino» #Mar 24:1 lai. yitu.
5Hakka woyite Yesuusi, «Muse tenne hajajo borreessino'nehu, wodani'ne dillaawa ikkinohuraati. 6Ikkollana Maganu umo kalaqamu waro, labbaahanna meyata asse kalaqino. #Kal 1:27 lai. 7Kunnira manchu annasinna amasi agure galtesi ledo hee'ranno. #Kal 2:24 lai. #10:7 ... galtesi ledo hee'ranno yaannohu angatenni borreessinoonnitera albi borro giddo dino. 8Lamunku mitto biso ikkitanno. Kunni ka'a xaate insa mitto bisooti ikkinnina lame manna di"ikkitanno. 9Kunnira, Maganu mitto assinore mannu badoonke» yii.
10Mine hee'reenna rosaanosi hakkonne coye kayisse ledde xa'mitusi. 11Isino, «Galtesi ha'rise wole adhannohu, galtesi agure foorinoho yaate. 12Galtese agurte woleho assidhanno meyatino foortinote yaate» yee qolinsa.
YESUUSI QAAQQUULLE MAASSI'RI
(Mat 19:13-15; Luq 18:15-17)
13Yesuusi anga aanaho worannonsa gede mannu qaaqquulle haa're isiwa abbanni hee'reenna, rosaanosi kayinni abbino manna ruffu. 14Yesuusi konne coye afe hanqe rosaanosi, «Maganu Gashshooti kuriuu gedeerihona, qaaqquullu anewa dayona hooltinoonte! 15Halaale kuleemmo'nena, Maganu Gashshoote qaaqqu gede ikke adhannokkihu baalu horonta dieanno» yii. 16Qaaqquulle haa're hanqafe, angasi aanaho wore maassi'rinsa.
DUREESSU WEDELLICHI XA'MINO XA'MO
(Mat 19:16-30; Luq 18:18-30)
17Yesuusi hakkiinni fule wolewa ha'ranna mittu manchi dodanni daye, albasiinni guluphe, «Dancha Rosiisaancho, hegere heeshsho afi'rammora ma asso?» yee xa'mi'ri. 18Yesuusi qole, «Mayira dancha yiittoe? Mittu ka'a danchu dino. Isino Maganoho. 19Shitooti, foortooti, moortooti, kaphunni naqqassooti, doggooti, annakkinna amakki ayirrisi #Ful 20:12-16; Maq 5:16-20 lai. yitanno hajajo egennootto?» yii.
20Manchu qole, «Rosiisaancho'ya, tenne hajajo anjenni kayise agadhe hee'reemmo» yii.
21Yesuusi mancho lae baxe, «Mittu coyilla gatinohe; hadhe afi'roottore baala hirte woxe buxanete beehi; gordoho jiro afi'rattona. Hakkunni gedensaanni hoode'ya amo!» yiisi.
22Manchu konne coye macciishshe alba kolishshi'ri; lowo jiro noosi daafira dadillanni ha'ri.
23Yesuusi rosaanosi widira caaqqi yee lae, «Dureeyyete Maganu Gashshoote ea mageeshshi qarraati!» yiinsa.
24Rosaanosi yiino coye dhaggeeffattu. Yesuusi qole, «Ooso'ya, Maganu Gashshoote ea hiittoo qarraati! 25Dureessu Maganu Gashshoote eantenni, gaalu marfete xullo giddoonni lulluqqa shota coyeti» yiinsa. 26Rosaanosi konne coye lowo geeshsha dhaggeeffatte, insa insanaawa, «Hatto ikkiro, ayi gatannoyya?» yitu.
27Yesuusi insa la"anni, «Addanko, konne coye Magano ikkinnina, mannu didandaanno. Maganu baalankare dandaanno» yiinsa.
28Hatte yannara Pheexiroosi, «Kuneeti, ninke baalankare agurre ate hoode ha'nanni hee'noommo» yii.
29Yesuusi qole, «Halaale kuleemmo'nena, aneranna Danchu Duduwi daafira yee mine woy labbaa roduuwa woy meyaa roduuwa woy ama woy anna woy ooso woy gatesi agurannohu, 30roore afi'ranno. Xiiwanturo nafa, tenne yannarano mine, labbaa roduuwa, meyaa roduuwa, amuuwa, oosonna gate agarannohu xibbe ero afi'ranno; dagganno yannarano hegere heeshsho afi'ranno. 31Ikkollana albiidiri gedensiidire ikkitanno; gedensiidiri albiidire ikkitanno» yii.
YESUUSI REYOSIRE SAYIKKIMEESHSHO COYI'RI
(Mat 20:17-19; Luq 18:31-34)
32Yerusaalame massitanno doogo aana heedheenna, Yesuusi albansaanni ha'ranni no. Rosaanosino dhaggeeffattu; badhensaanni hadhanni noorino waajjitu. Xaano galagale tonaa lamenka rosaanosi woshshe iillannosi coyire, 33«Kuneeti, xa ninke Yerusaalame ha'nammoraati. Manchi Beetto qeesootu roorrootiranna Muse Seeri rosiisaanora sayinse uyinanni. Insano reyote yoo yitannosi; dagate angara sayisse uyitannosi. 34Insano qacifattannosi; anjano tuffannosi; lichetenni gantannosi; shitannosi. Ikkollana sasu barri gedensaanni ka"anno» yii.
YAIQOOBINNA YOHAANNISI HUUCCATTO
(Mat 20:20-28)
35Zebidewoosi ooso Yaiqoobinna Yohaannisi Yesuusiwa marte, «Rosiisaanchonke, xa'mineemmore assattonkera hasi'neemmo» yitusi.
36Isino, «Ma assammo'nera hasidhinanni?» yiinsa.
37Insano, «Ayirrinyu barcimikkira ofollatto yannara, mittu qiniitekkiinni, mittu gurakkiinni ofollineemmo gede assinke» yitusi.
38Yesuusino, «Huuccidhinannire diegentinoonni. Ani ageemmohura qarru finiinchira aga dandiitinannini? Ani cuuameemmo cuuama cuuantine affinannini?» yee xa'minsa.
39Insano, «Ee, dandiineemmo» yitusi.
Yesuusino, «Halaaleho, ani ageemmohura qarru finiinchira agginanni. Ani cuuameemmo cuuama cuuantine affinanni. 40Ikkollana, qiniite'yaanninna gura'yaanni ofolla qixxaabbinorite ikkinnina ofoshshiisheemmohu ane di"ikkoommo. Hatto assannohu Maganoho; hakko ofoshshiishannonsarino qixxaabbinoreeti» yii.
41Gattinori tonnunku konne coye macciishshite, Yaiqoobiranna Yohaannisira hanqitu. 42Yesuusi baalanka woshshe, «Dagate gashshaano roorrootaho yinansara mannu aana wo'ma roorre afidhannota egentinoonni. 43Ki'ne giddo kayinni hattoori hee'ra dihasiissanno. Wo'munkunni rooriidiha ikka hasi'rannohu kayinni, soqqamaancho'ne ikko. 44Hattono mereero'ne albiidiha ikkara hasi'rannohu, borojjicho'ne ikko. 45Manchi Beettino soqqamaranna lowo manna wode gatisate lubbosi sayise aara dayino ikkinnina, soqqammasira didayino» yii.
YESUUSI ILLIWEELU BERXEMOOSI ILLE FANI
(Mat 20:29-34; Luq 18:35-43)
46Hakkunni gedensaanni Iyyaarkote Katama daggu. Yesuusi rosaanosinna lowo manni ledo Iyyaarkote Kataminni fulanno woyite, illiweelu Xemoosi beetti Berxemoosi doogote gama ofolle no. 47Hakkaanni hige sa"anni noohu Naaziretete Yesuusa ikkinota macciishshe, «Daawiti Beetto Yesuusa, ballo mararie!» yaanni qoonqosi naggi asse coyi'ri.
48Lowo manni, «Sammi yii!» yee rufisi. Isi kayinni, «Daawiti Beetto ballo, mararie!» yaanni albinni roorse qoonqosi naggi asse coyi'ri.
49Yesuusi ha'ranni noohu taxxi yee, «Hakkonne mancho woshshe!» yii.
Insano illiweelo, «Hagiidhi! Gotti yii! Yesuusi woshshanni noohe» yitusi. 50Isino handuruffi yee kae uddanosi tuge agure, Yesuusiwa mari.
51Yesuusi, «Ma assammohera hasi'ratto?» yee xa'misi.
Illiweeluno, «Rosiisaancho'ya, la"ammora hasi'reemmo» yii.
52Yesuusino, «Amma'nakki hursitinohena, ha'ri!» yiisi.
Manchuno hakkawoyintenni ille fa'niteennasi lai. Yesuusi hoodeno ha'ri.
Jelenleg kiválasztva:
MAARQOOSI 10: QulMax
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© The Bible Society of Ethiopia; Sidama Holy Bible BSE-UBS 262 P 2014
