MAARQOOSI 11

YESUUSI LOWO AYIRRINYINNI YERUSAALAME EI

(Mat 21:1-11; Luq 19:28-40; Yoh 12:12-19)

1Yesuusinna rosaanosi Yerusaalame iilla rakkuta, Beetefaagenna Biitaaniyu widoonni higge, Ejedhete Ilaaliwa martu. Yesuusi rosaanosi giddonni lame, 2«Alba'neenni noo qacha marre! Hakka iillitinanni woyite, gulunfe egenninoonnikkita harrichote ilmatticho usurante noota affinannina tirtine abbe"e. 3‹Mayira assitinanni?› yee xa'manno'nehu hee'riro, ‹Mootichu hasi'ranno daafiraatina xaanni qole soyanno› yiiyye» yee soyi. 4Hakkiinni ka'e marte, ilmatticho nafara doogote gama usurroonnita affe tirtu. 5Hakkiicho uurre noo manni giddonni mitu mitu, «Ilmatticho mayira tirtinanni?» yite xa'mitunsa. 6Insano Yesuusi yiinota kulteennansa agurtunsa. 7Rosaanosi ilmatticho Yesuusiwa haadhe abbite, uddannansa aanaho worteenna gulufi. 8Lowo manni uddannansa doogote kari. Gamu manni qole daraame sinna loosu giddonni hiiqqaqqe haa're kari. 9Albasiinninna badhesiinni ha'ranni noo manni,

«Hosaina#11:9 Hosaina yaa Ibiraawootu afiinni Gatisinke yaate; hatto yaa galata Maganoho yaate tiro afidhino.

Maganu su'minni daannohu maassaminoho!

10Daanni noohu, anninke Daawiti Gashshooti maassamo;

iima gordoho hee'rannohura hosaina!»

yaanni faarsi.

11Yesuusi Yerusaalame iilli woyite, Qullaawu Minira e"e baalankare gaangaawe lai. Yanna hawarritino daafira, tonaa lamunku rosaanosi ledo fule Biitaaniya ha'ri.

YESUUSI RUMINOTA BALASETE HAQQICHO

(Mat 21:18-19)

12Yesuusi layinki barra Biitaaniyunni higanni hee're hudi'ri. 13Xeertote hee're, balasete haqqicho latte seekkinota afe, «Laalo afidha ikka?» yee mari. Shiqqi yee la"anno woyite, balase laaltanno yanna ikkitinokkihura, darote ka'a aanaho mitturino dinose. 14Kunnira Yesuusi balase, «Xaanni kayise hegere geeshsha laalokki ayino itoonke!» yii. Hatto yii woyite, rosaanosi macciishshitanni no.

YESUUSI QULLAAWA MINE DADDA'LITANNI NOORE FUSHSHE SHORRI

(Mat 21:12-17; Luq 19:45-48; Yoh 2:13-22)

15Yerusaalame iillitu yannara, Yesuusi Qullaawu Minira e"e hidhitanninna hirtanni noore fushshe shorri. Woxe soorritannori xarapheeyyenna lemboola hirtannori barcimma galchi. 16Ayino uduunne duqqe Qullaawu Mini hoowe giddoonni hige sa"annokki gede hooli. 17Hakkunni gedensaanni, «Mini'ya mannu baalu, ‹Magano huucci'ranno mineeti› yinanni yine diborreessinoonni? Ki'ne kayinni mulqidhannori maaxantanno goda assitinoonni» yee rosiisinsa.

18Qeesootu roorrootinna Muse Seeri rosiisaano hatto yee coyi'ranna macciishshitu. Mannu baalu isi rosiisino coye dhaggeeffatanni noo daafira, waajjitusi. Kunnira shitannosi doogo hassu.

19Yesuusinna rosaanosi hawarro hawarro Yerusaalamete gobbaanni fultanno.

BALASETE HAQQICHO MOOLTU

(Mat 21:19-22)

20Layinki soodo guto hattenne doogo higge sa'anni, balase rumushsho iillite mooltinota affu. 21Pheexiroosi be'ro coye qaage Yesuusa, «Rosiisaancho, kune rumitto balase mooltino» yii. 22Yesuusi qole, «Magano amma'ne! 23Halaale kuleemmo'nena, ayino wodanisinni huluullamikkinni, hasi'ranno coyi wo'mannosi gede amma'ne konne ilaala, ‹Kawiinni ka'e baaru giddo uwi!› yiirono ikkannosi. 24Kunnira ani kuleemmo'neti: Huuccidhinoonnire baala adhitinoonnihu gede assitine kiirre; ikkanno'nena. 25Gordoho noohu Anni'ne cubbo'ne aguranno'ne gede, Magano huuccidhinara ka'inanni woyite, mannaho amaddinoonni koma agurre. 26Ki'ne wolu sao agura hoogginiro kayinni, gordoho noohu Anni'ne ki'ne cubbono diaguranno'ne» yee qolinsa.#11:26Tini kiiro angatenni borreessinoonnitera lowo borro giddo dino.

YESUUSI ROORRE DAAFIRA XA'MINOONNI XA'MO

(Mat 21:23-27; Luq 20:1-8)

27Insano galagalte Yerusaalame daggu. Yesuusi Qullaawu Mini giddo ha'ramanni hee'reenna qeesootu roorrooti, Muse Seeri rosiisaanonna geerru isiwa dagge, 28«Konne coye assattohu mayi roorreenniiti? Woy kayinni togoo coye assate roorre uyinohehu ayeti?» yite xa'mitusi. 29Yesuusi, «Anino mitto coye xa'meemmo'ne; xa'meemmo'nere qoltiniehu gedensaanni, konne coye aye roorrenni asseemmoro kuleemmo'ne» yiinsa. 30«Yohaannisi cuua Maganunnitenso mannunnite? Hanni qolle"e!» yee xa'minsa.

31Insa, «Xa ma yino?» yite insa insanaawa xa'mantu. «‹Maganunnite› yinummoro, ‹Ammana mayira hoogginiyya?› yaannonkena, 32‹Mannunnite› yino ikka?» yitu. (Ikkollana mannu baalu Yohaannisi himanaanchoho yee noo daafira waajjitu.) 33Kunnira, «Ninke dianfoommo» yite dawartusi.

Yesuusi qole, «Hattootiro, ani konne coye aye roorrenni asseemmoro dikuleemmo'ne» yiinsa.

Jelenleg kiválasztva:

MAARQOOSI 11: QulMax

Kiemelés

Megosztás

Másolás