LUQAASI 3

CUUAANCHU YOHAANNISI LALLAWA

(Mat 3:1-12; Maq 1:1-18; Yoh 1:19-28)

1Roomunnihu jawu moote Xiberiyoosi moohihunni tonaa ontikki diro Phenxenichu Philaaxoosi Yihudu gobba gashshe no. Heeroodisi Galiilu gobba gashshaanchooti; rodiisi Filiphoosino Ixuriyunna Xirakondoosi gashshaanchooti. Lisaaniyoosi qole Abileene gobba gashshe no. 2Hannanna Qeyaafa qeesootu roorroota ikkite noo yannara, Zakkaariyaasi beetti Yohaannisi halalla hee'reenna Maganu qaali isiwa dayi. 3Yohaannisi Yordaanoosi wayi qaccera noo gobba baala gaangaawanni, «Cubbo'ne agurranni'ne gede aagintaabbine cuuamme!» yaanni lallawi. 4Kuni ikkinohuno, himanaanchu Isayaasi Yohaannisi daafira balaxe,

«‹Mootichu doogo qixxeesse;

doogosi taashshe!

5Xeichu baalu wo'mo;

ilaallanna gaarra diigante taalo uulla ikkito.

Shokkitino doogono subbo;

boono fultino doogono taalo ikkito.

6Mannu baalu Maganu gatisaanchimma afanno›

yaanni halalla raaranno manchi huurooti» yee coyi'rino garinniiti.#Isa 40:3-5 lai.

7Lowo manni cuuamara Yohaannisiwa dayita, «Ki'ne buutete ooso, daannohu Maganu hanqinni gattinanni gede ayi kuli'ne? 8Xaate aagintaawa'ne leellishanno looso loosse ikkinnina, ninke Abirihaami sirchooti yitinanni wodani'nenni boo'nitinoonte. Maganu tenne kinna giddonni Abirihaamira ila kayisa dandaannota kuleemmo'ne. 9Xa meesane haqqete rumushshi hunda no. Kunnira, dancha guma laalannokki haqqa baala karre giirate tunganni» yiinsa.

10Mannuno, «Xa ma"assinoyya?» yee Yohaannisi xa'mi.

11Isi qole, «Lame uddano afi'rinohu, mitte hooginohura oo. Sagale afi'rinohuno hooginohura beehona» yiinsa. 12Qaraxaasineno cuuantara isiwa dagge, «Rosiisaancho, ninke ma"assinoyya?» yite xa'mitusi.

13Isino, «Seerunni hajanjoonniha sa'ine adhitinoonte» yiinsa.

14Gama gaaddono dagge, «Ninke ma"assinoyya?» yite xa'mitusi.

Isino, «Manni woxe wolqatenni adhitinoonte; ayeno kaphunni yekkeertinoonte; hunkii'ne waagi ikko'ne» yiinsa.

15Hatte yannara mannu baalu Kiristoosi daa hexxotenni agadhe no; kunnira Yohaannisi, «Kuni manchi Kiristoosaati ikka?» yee hedi. 16Yohaannisi baalunkura, «Ani wayinni cuueemmo'ne; ikkollana wolu ane rooru daanno; ani koattesi suncho nafa tira didandeemmo. Isi Qullaawu Ayyaaninninna giiratenni cuuanno'ne. 17Isi ayiddummete aana noo gide woowansinanni woowancho anga adhe no. Kura badihu gedensaanni dancha gide qaldaho woranno; kura kayinni xo'annokki giira giddo tuganno» yiinsa.

18Yohaannisino manna addi addi garinni seejjanni Dancha Duduwo kuli. 19Galiilu gashshaanchi Heeroodisi kayinni rodiisi Filiphoosi galte Heeroodiyaada adhinohuranna woleno addi addiha busha coye assino daafira rufinosi. 20Heeroodisi bunshete aana bunshe ledanni, Yohaannisino usursiisi.

YESUUSI CUUAMA

(Mat 3:13-17; Maq 1:9-11)

21Mannu baalu cuuamihu gedensaanni Yesuusino cuuami. Isi huucci'ranni hee'reenna gordu fa'nami. 22Qullaawu Ayyaani lembooli daninni aanasi dirri. Hatte yannara, «Baxeemmohu Beetti'ya ateeti; Ani atenni hagiidheemmo» yitanno huuro gordunni daggu.

YESUUSI KIRISTOOSITA ILAMATE KIIRO

(Mat 1:1-17)

23Yesuusi rosiisa hanafi yannara dirisi sajjooho. Mannu Yesuusa Yooseefiho yee hedanno. Yooseefi Eeliho, 24Eeli Maatiho, Maati Leewiho, Leewi Milkiho, Milki Yoonaho, Yoona Yooseefiho, 25Yooseefi Mataatiyuho, Mataatiyu Amootsiho, Amootsi Naahoomiho, Naahoomi Esliimiho, Esliimi Naageho, 26Naage Ma"aatiho, Ma"aati Mataatiyuho, Mataatiyu Semeeyiho, Semeeyi Yooseefiho, Yooseefi Yoodaho, 27Yooda Yonaaniho, Yonaani Reesiho, Reesi Zerubaabeeliho, Zerubaabeeli Selatiyaaliho, Selatiyaali Neeriho, 28Neeri Milkiho, Milki Haadiho, Haadi Qosaamiho, Qosaami Elmodaamiho, Elmodaami Eeriho, 29Eeri Yooseiho, Yoosei Elieezeriho, Elieezeri Yoraamiho, Yoraami Maaxaatiho, Maaxaati Leewiho, 30Leewi Simiooniho, Simiooni Yihudiho, Yihudi Yooseefiho, Yooseefi Yonaaniho, Yonaani Eeliyaaqiimiho, 31Eeliyaaqiimi Meeliyaho, Meeliya Mayinaaniho, Mayinaani Maaxaatiho, Maaxaati Naataaniho, Naataani Daawitiho, 32Daawiti Isseyiho, Isseyi Iyoobeediho, Iyoobeedi Boeeziho, Boeezi Selimooniho, Selimooni Neasooniho, 33Neasooni Aminaadaabiho, Aminaadaabi Raamiho, Raami Ariiniho, Ariini Hetsirooniho, Hetsirooni Faareesiho, Faareesi Yihudiho, 34Yihudi Yaiqoobiho, Yaiqoobi Yisihaaqiho, Yisihaaqi Abirihaamiho, Abirihaami Taaraho, Taara Naakooriho, 35Naakoori Seruugiho, Seruugi Reuho, Reu Faleeqiho, Faleeqi Ebeeriho, Ebeeri Shelaahiho, 36Shelaahi Qayiniimiho, Qayiniimi Arfakisiidiho, Arfakisiidi Seemiho, Seemi Nohiho, Nohi Laamehiho, 37Laamehi Matusaaliho, Matusaali Heenookiho, Heenooki Yaareediho, Yaareedi Melaalieeliho, Melaalieeli Qayinaaniho, 38Qayinaani Heenoosiho, Heenoosi Seetiho, Seeti Addaamiho, Addaami Maganunniho.

Jelenleg kiválasztva:

LUQAASI 3: QulMax

Kiemelés

Megosztás

Másolás