LUQAASI 2

YESUUSI KIRISTOOSI ILAMINO GARA

(Mat 1:18-25)

1Hatte yannara Roomu gashshooti giddo noo manna baala kiirranni gede Jawu Moote Awugisxoosi hajajo fushshi. 2Umo assine manna kiirri yannara Qerenewoosi Sooriyu gobbara moohe no. 3Mittu mittunku kiiramara ilamino gobba ha'ri.

4Yooseefi ilama Daawiti sircho ikkino daafira, Galiilunni Naaziretete kataminni kae, Yihudu gobbara nooha Daawiti katama Beeteliheme ha'ri. 5Kiiramara ha'ri woyite, huucci'rinota Maariyaami ledo adhe ha'rino. Hatte yannara ise godowinni no. 6Beetelihemete heedheenna Maariyaamira iltanno yanna iillituse. 7Hakkiicho heedhe bayira beettose iltu; wosinu galanno dargi nookki daafira, hoccunni xaaxxe hoowete saadate hayisso worranni badiri aana goxissu.

ALLAALAASINENNA SOKKAASINE

8Hakko qooxeessira, hashsha xawoho saadansa agadhite galtino allaalaasine no. 9Insara Mootichu sokkaasinchi leellinsa; hakkunni gedensaanni Mootichunnihu ayirrinyu xawaabbi gaangaawinsara xawi. Insano lowo geeshsha waajjitu. 10Sokkaasinchu kayinni, «Waajjitinoonte! Mannu baalunkura ikkannoha dancha duduwo kulammo'nera dayommo. 11Kuneeti, techo Daawiti katamira Gatisaanchu ilamino'ne. Isi Mooticha Kiristoosaati. 12Malaateho, qaaqqo hoccunni xaanxeenna hoowete saadate hayisso worranni badiri aana goxe nooha affinanni» yiinsa.

13Hedeweelcho haammata gordu sokkaasine sokkaasinchu ledo dagge Magano faarsitanni,

14«Iima gordoho Maganoho ayirrinyu ikkosi!

Baattote aanano Maganu hagiidhannonsa baalira keeru iillo» yitu.

15Sokkaasine insawiinni baxxite gordo fultuta, allaalaasine insa insanaawa, «Ka'e Beeteliheme ha'ne, xa ikki coyenna Maganu kulinonkere la'nona» yitu.

16Rakke hadhe Maariyaami, Yooseefinna saadate hayisso worranni badiri aana goxe noo qaaqqo la'u. 17Qaaqqo affuhu gedensaanni, qaaqqu daafira sokkaasinchu kulinonsare hasaabbu. 18Konne coye macciishshihu baalu allaalaasine kultinonsare dhaggeeffati. 19Maariyaami kayinni, konne coye baala wodanisenni hiincitanni agarte no. 20Allaalaasine, wo'munku coyi sokkaasinchu yiino gede ikkinota affinohuranna macciishshitinohura Magano ayirrissanninna galattanni dargansa higgu.

QAAQQO YESUUSA HAA'NE QULLAAWU MINIRA MASSINI

21Settikki barra qaaqqo barcimshiishate seera wonshinanni hee'ne su'ma Yesuusa yine fushshinisi. Kuni su'mi, godowamara albaanni sokkaasinchu fushshinosi su'maati.#Lew 12:3 lai.

22Muse Seeri garinni, keeraa'mate Seera wonshinanni yanna iillituta, Yooseefinna Maariyaami qaaqqo Yesuusa Mootichu albira shiqishate Yerusaalame haadhe hadhu.#Lew 12:6-8 lai. 23Hatto assitinohu Mootichu Seerira, «Umo ilaminohu labbaa beetti baalu Mootichaho uyineenna qullaawa ikkanno» yine borreessinoonni hajajo noo daafiraati.#Lew 13:2; 12 lai. 24Qolleno Maganu Seerira, «Lame lemboola woy lame bukukkaama kakkalote shiqisha hasiissanno» yine borreessinoonni.

25Hatte yannara Yerusaalamete Simiooni yinannihu mittu manchi no. Isi Maganoho galino keeraanchooti. Israeelennita gatote hexxo agadhanni hee'rino; Qullaawu Ayyaanino ledosi no. 26Isi Mootichunniha Buuramino Moote afikkinni reyannokkita Qullaawu Ayyaani kulinosi. 27Hakko barra Qullaawu Ayyaani qaagiisseennasi kae Qullaawu Minira ha'ri. Yooseefinna Maariyaami Seeru garinni wonsha hasiissannonsare wonshate qaaqqo haadhe Qullaawu Minira e'uta, 28Simiooni qaaqqo haa're hanqafe, Magano galatanni,

29«Mooticha'ya, kuneeti oottoe hexxo wonshoottona,

xaate ane borojjichokki keerunni geegiissie.

30Gatisaanchimmakki ille'yanni afoommo;

31hattino mannu baalunku albaanni qixxeessoottote.

32Isi mannaho halaale leellishanno caabbicho ikkanno.

Israeelete mannirano ayirrinyeho» yii.

33Yooseefinna Maariyaami qaaqqu daafira yinoonnire dhaggeeffattu. 34Simiooni maassi'rinsahu gedensaanni amasi Maariyaami, «Kuneeti, kuni qaaqqi Israeelete giddo lowo mannira baote, lowo mannira gatote malaate ikkanno. Lowo manni giwannosi. 35Kunninni kainohunni lowo manni wodani giddo go'lite noo hedo xawo fultanno. Ate wodana kayinni bise xoroorrite sa'anno» yiise.

36Hatte yannara Aseeri ga'reti Faanueeli beetto Haanna yinanni himanaancho no. Iseno lowo geeshsha geerchote; ayiddaannise ledo lamala diro heedhuhu gedensaanni isi reyi. 37Hakkunni gedensaanni settayina shoole diro ikkase geeshsha Qullaawu Mininni baxxitukkinni ita aga agurte huuccidhanni, hashshanna barra Maganoho soqqantanni heedhino. 38Hatte yannara ise dagge Magano galatte, qaaqqunnire Yerusaalamete gato hexxotenni agadhanni noo baalira hasaabbu.

39Yooseefinna Maariyaami, Maganu Seeri giddo borreessinoonnire baala wonshituhu gedensaanni Galiilaho noota qaensa Naazirete higgu. 40Qaaqquno lophe jawaata ikki; afano wo'mitusi; Maganu eltono ledosi no.

YESUUSI QULLAAWU MINI GIDDO

41Yooseefinna Maariyaami diru dirunkunni Agure Sa"ate Ayyaana ayirrisara Yerusaalame ha'ranno.#Ful 12:27; Mar 16:1-8 lai. 42Yesuusira tonaa lame diro ikke hee'reennasi, rosinsa garinni Agure Sa"ate Ayyaana ayirrissara hadhu. 43Ayyaana ayirrinse ka'nihu gedensaanni, Yooseefinna Maariyaami qaera higguta, Yesuusi hakko Yerusaalamete gatino. Yesuusi hakko gatinota insa kayinni diafino. 44Doogaasinete ledo daanni nooha laweennansa mittu barri doogo hadhu. Hakkunni gedensaanni Yesuusa fiixinsawanna egentino manniwa hassu. 45Hasse afa hooggino daafira galagalte Yerusaalame higgu. 46Sasu barri gedensaanni Qullaawa Mine affusi; hakkiicho Ayihudete rosiisaano mereero ofolle macciishshanninna xa'manni no. 47Macciishshituri baalu egennosinna qolanno dawaro maalale assidhu. 48Yooseefinna Maariyaami Iso Qullaawa Mine affe dhaggeeffattu. Amasi qolte, «Beetto'ya, togo mayira assittonke? Annikkinna ani ate hansanni qarrammoommo» yitusi.

49Yesuusi qole, «Mayira hassinannie? Anera Anni'ya mine hee'ra hasiissannoeta diegentinoonni?» yiinsa. 50Insa kayinni yiinonsa coye dihuwattino.

51Hakkunni gedensaanni Yesuusi ledonsa Naazirete ha're insara hajajamanni hee'ri. Amasi kayinni baalanka coye wodanaho wodhite no. 52Yesuusi Maganunna mannu albaanni baxame, afatenninna manninatunni lophi.

Jelenleg kiválasztva:

LUQAASI 2: QulMax

Kiemelés

Megosztás

Másolás