LUQAASI 1
1
1Ayirradu Tewofiloosi:
Ninkera mereero ikkino coye kultanno dhagge albaanni lowo manni borreessino. 2Tenne sokka ninkera sayissinori illetenni affinoreetinna qaalisira soqqantanni heedhinoreeti. 3Kunnira ani uminni kayise baalanka coye xiinxalle laummohu gedensaanni dhagge aante aantetenni borreessammohera hasi'roommo. 4Togo assoommohuno rosootto rosi halaalaancho ikkinota seekkite afatto gedeeti.
CUUAANCHU YOHAANNISI ILAMANNOTA BALANXE KULLOONNI
5Heeroodisi Yihudu gobbara moohe hee'reenna, Abiya qeesooti gaamo giddo, Zakkaariyaasi yinannihu mittu qeesichi no. Isira Aarooni sircho ikkitannoti Elsaabeexi yinanni galte noosi.#1Dud 24:10 lai. 6Lamunku Maganu albaanni hajajosinna Seerasi minshanniri nookki garinni agadhitanni keeraanchimmatenni heedhino. 7Ikkollana, Elsaabeexi gaana ikkitinohura ooso dinonsa. Lamunku lowo geeshsha geedhitino.
8Hatte yannara Zakkaariyaasira qeesootu gaamo soqqanshora bado iilliteennasi, Maganu albaanni qeesimmate soqqansho soqqamanni no. 9Qeesootu assitanno rosi garinni Maganunnihu Qullaawu Minira e"e hixaana giirate hixu iillisi. 10Qullaawa Mine hixaana giirranni yannara mannu baalu gobbaanni uurre huucci'ranno. 11Maganu sokkaasinchi hixaana giirranni dargira qiniiteenni uurre Zakkaariyaasira leelli. 12Zakkaariyaasi sokkaasincho afi yannara waajje huxi'ri. 13Sokkaasinchu kayinni, «Zakkaariyaasi, waajjitooti! Maganu huuccattokki macciishshino; galtekki Elsaabeexi labbaa beetto iltannohe. Su'mano Yohaannisi yite fushshattosi. 14Isi ilama atera hagiirrenna hisanyoote ikkitannohe. Isi ilamanni lowo manni hagiidhanno. 15Isi Mootichu albaanni jawa ikkanno. Woyinete xajjenna wole dimbisanno agono diaganno. Amasi godowi giddo hee'reennanni Qullaawu Ayyaani wo'mannosi.#Kir 6:3 lai. 16Isi Israeelete giddonni lowo manni Mootichu Maganinsawa higanno gede assanno. 17Himanaanchu Eeliyaasi gede Ayyaanunninna wolqatenni wo'me, annuwate wodana oosonsa widira, hajajamannokki manni wodana keeraanote afa widira soorranno; manna jawaachishe Maganoho qixxeessanno» yii.#Mil 4:5-6 lai. 18Zakkaariyaasi kayinni sokkaasinchoho, «Kuni coyi ikkannota mayinni afeemmo? Ani geedhoommo; galte'yano akkaltino» yii.
19Sokkaasinchuno, «Ani Maganu albaanni uurreemmohu Gebirieeliiti. Konne dancha duduwo kulammohera Maganuwiinni soqqame dayommo.#Dan 8:16; 9:21 lai. 20Ati kayinni yannasira wo'mannoha qaale'ya diammanootto. Kunnira, kuni kulummohe coyi baalu wo'ma geeshsha danqicha ikkatto; coyi'rano didandaatto» yiisi.
21Hakko mereero mannu Zakkaariyaasi agaranni no; Qullaawu Mininni fulikkinni keeshshasi kayinni dhagge ikkitinonsa. 22Zakkaariyaasi Qullaawu Mininni fuli yannara mannu ledo coyi'ra didandiino. Kunnira insa Qullaawa Mine ajuuja leeltinosita affu. Isi afuunni coyi'ra hoogino daafira angatenni malaatisanni kulinsa. Hakko garinni danqicha ikke keeshshi.
23Zakkaariyaasi Qullaawu Mini soqqansho gudihu gedensaanni minisira ha'ri. 24Shiima yanna gedensaanni galtesi Elsaabeexi godobbu. Onte agana wo'ma geeshsha mine keeshshitino. 25«Mootichu konne coye assinoe; mannu mereero noota mishama'ya hoolinoe» yitu.
YESUUSI ILAMANNOTA BALANXE KULLOONNI
26Elsaabeexi godobbuhunni leelki aganira sokkaasinchu Gebirieeli Maganuwiinni soqqame Galiilu gobbara noo katama Naazirete mari. 27Marinohu, Daawiti sircho ikkinohu Yooseefi huucci'rinotewa seemo Maariyaamiwaati. 28Sokkaasinchu isewa daye, «Ati elto wo'mitinoheti, keeru ledokki hee'ro! Maganu ate ledo no. [Ati meentu mereero maassamoottate]» yiise.
29Iseno sokkaasinchu coyi'rino coyi masiseennase, «Kuni hiittoo keereeti!» yitu. 30Sokkaasinchu, «Maariyaami, Maganu albaanni ayirrinye afi'roottana waajjitooti! 31Kuneeti, godobbe labbaa beetto ilatta; su'mano Yesuusa yite fushshattasi. 32Isi jawa ikkanno; Wo'munkura Aliidi Magani Beettootino yinannisi. Mootichu Maganu, annisi Daawitiha ayirrinyu barcima aannosi. 33Yaiqoobi minirano hegerera moohanno. Gashshootisira gawalo dino» yiise.
34Maariyaami sokkaasinchoho, «Ani seemotena, kuni coyi hiitto ikke ikkanno?» yitu.
35Sokkaasinchu qole, «Qullaawu Ayyaani ate aana dirranno; Wo'munkura Aliidi Magani wolqa caalshiishshannohe. Kunnira ati ilatta qaaqqo Qullaawu Maganu Beetti yinanni. 36Fiixikki Elsaabeexi nafa gaanate yinanna keeshshite, xa kune geedhimmate giddo labbaa beetto godobbeenna lee agana ikke noose. 37Maganu dandaannokki coyi dino» yiise.
38Hakkunni gedensaanni Maariyaami, «Kuneeti, ani Mootichu borojjichootina, ati yootto gede ikkoe» yitu. Hatte yannara sokkaasinchu isewiinni ha'ri.
MAARIYAAMI ELSAABEEXI KEERE HAADHARA HADHU
39Hatte yannara Maariyaami rakke ka'e ilaalaame Yihudu gobbara noo katama hadhu. 40Zakkaariyaasi minira marte Elsaabeexi keere haadhu. 41Elsaabeexino Maariyaami keere macciishshituta, godowise giddo noo qaaqqi kukkubbi. Elsaabeexino Qullaawu Ayyaani wo'meennase, 42qoonqose naggi assite, «Ati meentu baalu giddo maassamoottate. Ati ilattahuno maassaminoho. 43Mootichi'ya ama ane keere haadhara daase, anera mageeshshi ayirrinyeeti! 44Ati keere haa'rittaeta godowi'ya giddo noo qaaqqi hagiirrunni kukkubbino. 45Mootichu coyi'rinohe coyi wo'mannota ammanoottati ati hiitto ba'raa'roottate!» yituse.
MAARIYAAMITA GALATU FAARSO
46Maariyaami,
«Wodani'ya Mooticha galatanno;#1Sam 2:1-10 lai.
47lubbo'ya Maganu Gatisaanchi'yanni hagiidhitanno.
48Maganu ane hooffayidita borojjichosi towatinoena,
xaanni kayisse ilama baala ba'raa'roottate yitannoe.#1Sam 1:11 lai.
49Wolqaataamu Magani anera jajjabba coye assinoe;
su'misino qullaawaho.
50Waajjannosi mannira,
ilamatenni ilamate geeshsha maarosi halashshanno.
51Wolqasinni jawaata looso loosino;
boonaleeyye wodaninsa hedonni kainohunni billaallisino.
52Ayirradda gashshaano gashshootinsa aaninni dirrise,
hooffayidire gotti assino.#Iyo 5:11; 12:19 lai.
53Hudidhinore danchu coyinni duushshino;
dureeyye kayinni mulla anganni shorrino.
54-55Annuwankera uyino hexxo wonshate,
Abirihaamiranna sirchisira hegerera leellishinota
maarosi qaage,
borojjichosi Israeeli kaa'lino» yitu.#Kal 17:7 lai.
56Maariyaami Elsaabeexi ledo sasu agani geeshsha keeshshite galagalte qaera higgu.
CUUAANCHU YOHAANNISI ILAMI
57Yanna iillituta, Elsaabeexi labbaa beetto iltu. 58Olliisenna fiixise tenne jawa elle Mootichu assinosetere macciishshe ledose hagiidhi.
59Qaaqqu ilamihunni setti barra barcimshiishate wogarano kae dayi. Su'mano annu su'minni Zakkaariyaasi yee fushshate hedi.#Lew 12:3 lai. 60Ama kayinni, «Hatto di"ikkanno; su'misi Yohaannisiiti» yitu.
61Insa qole, «Fiixikki giddo kunni su'minni woshshinannihu dino» yiise. 62Hakkunni gedensaanni anna, «Qaaqqoho su'ma aye yine fushshinara hasi'ratto» yee malaatunni xa'misi.
63Zakkaariyaasi borreessinannire uyinannisi gede xa'mi're, «Su'misi Yohaannisiiti» yee borreesseenna baalunku dhaggeeffati. 64Zakkaariyaasi hakkawoyintenni arrawu tidhameennasi coyi'ri; Magano galaxxano hanafi. 65Kunninni kainohunni ollaasi waajjillu amadinsa. Duduwuno ilaalaame Yihudu gobba baala iilli. 66Konne coye macciishshituri baalu, «Kuni qaaqqi hiittooha ikkaraati ikka?» yite hasaabbu. Kuni ikkinohu Mootichu wolqa ledosi noo daafiraati.
ZAKKAARIYAASI COYI'RINO HIMANA
67Qaaqqu anni Zakkaariyaasi Qullaawu Ayyaani wo'meennasi,
68«Mannasi wode fushshe wolassinona,
Israeelete Magani Mootichu galatamo!
69Borojjichisi Daawiti sirchinni wolqaataamo Gatisaancho kayisinonke.
70Bi're alba qullaawa himanaano widoonni qole,
71diinnankenna gibbannonkeri anganni gatisannonketa coyi'rino.
72Hatto yiinohu, annuwankera maarosi leellisharanna,
coyi'rinoha qullaawa gondooro wonshara hedeeti.
73Konne xaarinoha gondooru qaale,
anninke Abirihaamira uyinohu,
74diinnanke anganni gatise fushshankeranna,
waajjinummokkinni soqqammeemmosi gedeeti.
75Kunni garinni hee'noommo diri baalunkunni,
Isi albaanni qullaambetenninna keeraanchimmatenni hee'neemmo.
76Qolleno, ate beetto'ya,
Wo'munkura Aliidi Magani himanaanchooti yinannihe.
Atino doogosi seekkate,
balaxxe Mootichu albaanni ha'ratto.#Mil 3:1 lai.
77Mannisi cubbinsa agurameenna,
gatannota kulattonsa.
78Maganinke maarannohanna shaqqado ikkinohura,
gatote caabbichi gordunni xawannonke gede assanno.
79Kuni caabbichi, tunsotenna reyote caalira heedhanno baalira xawanno;
lekkankeno keeru doogo widira qole ha'risanno» yee himani.
80Qaaqquno lophe ayyaanunni jawaata ikki; Israeelete leella geeshsha halallitte gobbara hee'ri.
Jelenleg kiválasztva:
LUQAASI 1: QulMax
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© The Bible Society of Ethiopia; Sidama Holy Bible BSE-UBS 262 P 2014
