Seemthawhnak 46
46
Jakob ih Innsang Izipt ah
1Israel cu a ngeihmi zate rum a khualtlon cu a pok ih Beersheba a phat tikah a pa Isaak ih Pathian hemah rai a hri. 2Pathian ni Israel hemah zan ih lannakpawl sungin a ang ih, “Jakob, Jakob,” tiah a ti. Culeh Jakob ni, “Ka omkau hi,” tiah a ti. 3Cutikah Pathian ni, “Kei hi Pathian, na pa ih Pathian ka ii; Izipt ah zong tah ding cu hrul hlah law, icatile acunang ahcun miphun pipa ah ka tan vua thok. 4Kamah rori ni Izipt ah ka tan zon vahpi thok ih ka tan han hruai sei leh thok; cun na thih ah Josef ni tan siikhol leh lei,” tiah a ti.
5Cuhnukah Jakob cu Beersheba in a pok ih, a tiapale ni an pa, an tianole, cun an nupile cu Faraoh ih kuat hngaimi saileengpawl in an thiarta hngai. 6An sumhnampawl leh Kanaan ram sungih an ngahmi thilpawl khaw an thiarta, culeh Izipt ram an pha, 7amah leh a ciitlang zate, a tiapale, a tiapale ih tiapale khaw, cun a tianupawl leh a tiapale ih tianule khaw; a ciitlang an zate Izipt ah a tahpi hngai.
8Hile hi Israel mipawl—Jakob leh a ciitlang—Izipt a pha tu—ih min cu an ii. Jakob ih tia peitleng Reuben, 9cun Reuben ih tianaupawl cu: Hanok, Pallu, Hezron leh Karmi an ii. 10Simeon ih tianaule cu: Jemuel, Jamin, Ohad, Jakhin, Zohar leh Kanaan minu ih tiapa Shaul an ii. 11Levi ih tianaule cu: Gershon, Kohath leh Merari an ii. 12Judah ih tianaule cu: Er, Onan, Shelah, Perez leh Zerah (Er leh Onan cu Kanaan ram ah an thi); cun Perez ih tianaule cu Hezron leh Hamul an ii. 13Issakhar ih tianaule cu Tola, Puvah, Jashub leh Shimron an ii. 14Zebulun ih tianaule cu: Sered, Elon leh Jahleel 15(hile hi Leah ni Paddan-aram ih a om lioah Jakob ca-ih a hrinmi tiapale, cun a tianu Dinah rum siarcih in; a tiapapawl leh a tianupawl an zate sawmthum an ii). 16Gad ih tianaule cu: Zifion, Haggi, Shuni, Ezbon, Eri, Arodi leh Areli an ii. 17Asher ih tianaule cu: Imnah, Ishvah, Ishvi, Beriah, leh an tarnu Serah an ii. Beriah ih tianaule cu: Heber leh Malkhiel (18hile hi Laban ni a tianu Leah a piak mi Zilpah ih tianaule an ii; cun Jakob ca-ih a hrinmi an ii ih mi hleiruk an ii). 19Jakob nupi Rachel ih tianaule cu: Josef leh Benjamin an ii. 20Izipt ram ah On khua tlangbawi Potifera ih tianu Asenath ni Josef cu Izipt ram ah Manasseh leh Efraim a hrin. 21Benjamin ih tianaule cu: Bela, Bekher, Ashbel, Gera, Naaman, Ehi, Rosh, Muppim, Huppim leh Ard 22(hile hi Jakob ca-ih hrinmi Rachel ih tianaule an ii—an zate mi hleili an ii.) 23Dan ih tianaule cu: Hashum. 24Naftali ih tianaule cu: Jahzeel, Guni, Jezer leh Shillem 25(hile hi Laban ni a tianau Rachel a piak mi Bilhah ih tianaule an ii ih Jakob ca-ih a hrinmi an ii—an zate pasarih an ii). 26Hi mipawl an zate hi Izipt ah a pha tu Jakob ih tianaule an ii ih, a vah-nule telloin an zate ah mi sawmruk leh paruk an ii. 27Izipt ram ah Josef ca-ih hrinmi tianaule cu pahnih an ii; Izipt ram a pha tu Jakob ih innsangmi an zate cu sawmsarih an ii.
Jakob cu Goshen ah Hmun a Khuar
28Israel ni Judah cu Goshen ram ah a hmai ih lamhmuhtu dingin Josef hemah a thlah li. Goshen ram an phat tikah, 29Josef ni a saileeng cu a tuahsi ih Goshen ah a pa Israel tuak dingin a hang kai. A pa hem a phat tikah a hngawng in a bua ih a hngawng parahcun hlanawnpi a ṭap. 30Israel ni Josef cu, “Na nung rih ti kamah rori ni ka tan hmuh rom hnuk cu ka thi kho vel,” tiah a ti. 31Josef ni a ulepawl leh a pa ih innsang cu, “Faraoh hemah tat lang khawh amah cu, ‘Kanaan ram ih a ommi ka ulepawl leh ka pa ih innsang ka hem an pha rom. 32Sumhnam vul an ik taak ruangah tukhal an ii; an turun leh merunpawl, an cawrunpawl leh an ngeihmi zate an kengta,’ tiah ka ti thok. 33Faraoh ni tan ko hngai in, ‘Nan rianṭuan itu ii maw?’ tiah a tan dil hngai tikah, 34nangmi ni, ‘Keimi na salle hi cu kan pupale mangin kan tepanlio in atu tiang hi sumhnam vul leh khaal kan ii’ tiah ti lei cu—cuticun Izipt mipawl caah tukhal cu ningtirhṭha an ik ruangah Goshen ram ah omhmun a khuar taw cu,” tiah a ti hngai.
Jelenleg kiválasztva:
Seemthawhnak 46: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
