Seemthawhnak 45
45
Josef cu a Ule hemah a Phuangtia
1Cutikah Josef cu a hramih a diing tu an zate hmaiah a suptia zo ti lo, culeh, “Ahupoh ka hemin suahsak uh,” tiah a au. Curuangah Josef ni amah leh mah a ule hemih a phuantiak tikah a hemah huhman an om lo. 2Culeh tiakpiih a ṭah ruangah Izipt mipawl ni an za, cun Faraoh ih innsang ni an za. 3Josef ni a ule cu, “Kei hi Josef cu ka ii. Ka pa nung rih im?” tiah a ti hngai. Ihmansela a ule ni an let kho lo, a omhngan ahcun an ṭih vuai.
4Cutikah Josef ni a ule cu, “Ma hnaihdeuh uh,” tiah a ti hngai. Culeh an hnaihdeuh. Ani ni, “Kei hi nan naupa Josef, Izipt ram ih nan zorhtaak mi khi ka ii. 5Hinang ih a ma zuar hngai ruangah nan thin nuam lo’n om hlah uh, nanmah leh mah khaw hehhartia hlah uh; icatile mipawl ih nunnak rung dingah Pathian ni nan hmaiah a ma thlah li. 6Hi kum hnih sung hi ram sungah mangṭaam a tlung rom; culeh thlaithlak leh thlaikhawm a om thok lo nak kum nga an taang rih. 7Pathian ni nanmah ca’h vulei parahhin a taangsunmi zuah ih nan ca’h mi tampi nungdam ih taansak dingah nan hlanah a ma thlah. 8Curuangah hina’h a ma thlah tu hi nangmi nan i lo, Pathian sawn a ii; Faraoh ca’h pa, cun a innsang zate ih bawi leh Izipt ram sung zate cungih uktu ah a ma vua rom. 9Hnawtia u la ka pa hemah hang tatin, ‘Pathian ni Izipt ram zate ih bawi ah a ma vua rom; ka hemah zong, nolnawk hlah. 10Nang leh na tianaupawl leh na tusintiale, na turun leh merunpawl, na cawpe runpawl, cun na ngeihmi an zate, Goshen ram ah omhmun nan khuar thok ih ka hrialah na om thok. 11Mangṭaam tlun thok kum nga a om rih ruangah acunang ahcun ka tan thlak hngai thok, cuticun nang leh na innsang, cun na ngeihmi zate a farah hlah taw cu tiah a ti, tiah sim uh. 12Atu hi nan mit leh ka nau Benjamin ih mit ni ka kaa rori ih ka aan nan hmu. 13Izipt ram ah pipangaiin hmaizah ka ik zia leh nan hmuh rommi hmawh hi ka pa nan sim thok. Hnawtia u la ka pa hina’h zon phatpi uh,” tiah a ti hngai. 14Cuhnukah a nau Benjamin ih hngawng bua hratin a ṭap ih Benjamin ni Josef ih hngawng buain a ṭap ve 15Culeh a ule an zate hnam hngai in an parah a ṭap; culeh cuhnukah a ule ni thu an thluk.
16Faraoh ih innsang ah “Josef ih ule an pha,” tiih thutiahsak a ik tikah Faraoh leh a tungsaule cu an lung a hmui. 17Faraoh ni Josef cu, Na ule hemah, ‘Hihi ti uh: nan sumhnampawl parah thil taangin Kanaan ah kirṭhan uh. 18Nan pa leh nan innsangpawl thiarta u la ma pha uh, cuticun Izipt ram ih a ṭhatleng nang hmun a tan pia hngai taw’ng, cun hi ram ih a lenṭhatnak a awkngah taw cu tiah ti hngai. 19Cuhleiah, ‘Hihi ti uh: nan tepang tete leh nan nupile ciittiak awkah Izipt ram in saileengpawl la ta uh, cun nan pa hruaita u la, pha ṭhan uh. 20Nan ngeihmipawl cu ruah duh hlah uh, icatile Izipt ram ih a ṭhatleng a zate namah ih an ii’ tiah khaw na cah beeng hngai thok,” tiah a ti.
21Israel ih tiale ni acuticun an ti. Josef ni Faraoh ih thupiak mangin saileengpawl a pia hngai, cun an khuallam caah lamcaw a pia hngai. 22An pakhat vek partlai thlengtiaknak a pia hngai; Benjamin zong cu ngun tangka 300 leh partlai voi nga thlengtiaknak a pia. 23A pa cu: Izipt ram thilṭhapawl an parih taangmi laak pahra, caw phurhsakmi laak numi pahra, sang leh a pa ih khuallam caah lamcaw a kuat. 24A ule cu a thlah hngai duau ih an pawh fang ah, “Lam thlurah bottia hla’ u la maw,” tiah a ti hngai.
25Curuangah Izipt ram cun an hang tat ih an pa ih omnak Kanaan ram an pha. 26Culeh amah cu, “Josef a nung rih! Izipt ram zate cung hman ah uktu a ii,” tiah an ti. A mit a darkau; a zum hngai kho lo. 27Ihmansela Josef ih a ti hngaimi aanka zate an sim tik leh amah phurh nakdingah Josef ih kuatmi saileengpawl a hmuh hngai tikahcun an pa Jakob cu a thla a tlung ṭhan. 28Israel ni, “A za vel! Ka tiapa Josef a nung rih. Ka thih hlanah tatin amah ka tuak ta lei,” tiah a ti.
Jelenleg kiválasztva:
Seemthawhnak 45: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
