Seemthawhnak 44
44
Josef ni Benjamin a Hreng
1Cuhnukah a inn zokhentu cu, “Hile ih dippawl hi an phurh khawh ding zet caw khat in san hngai la an tangkadip vek cu an dip a cungtatleng ah siah hngai. 2Ka ngun hai cu a hniangtleng pa ih dip cungtatleng a kaa ah caw leinak thok a tangka rum san piak,” tiah thu a pia. Culeh Josef ih a sim mangcun a ti. 3Mawla khua a van caang an laakpawl rum a tlunsak hngai. 4Khuapi in lam hla an phat man hlanah Josef ni a inn zokhentu cu, “Tat la cule cu an dung in zul hngai; culeh na man hngai tikah, ‘Ituruangah ṭhatnak cu siatnak in nan lehrul? Ituruangah ka ngun hai a ma ru hngai? 5Hihi ka bawipa ih sabit din nak a i lo hmen maw? Litinnak ah teh a hmang a i lo hmen maw? Ahi nan ti hi thilpalh vuata rom hmawh cu ee’ ti hngai,” tiah a ti.
6A man hngai tikah hi aanpawl hi a sim hngai. 7Anmimi ni, “Ituruangah ka bawipa ni a himangpawl hi na ang hngai a he? Na salle ni acumang kan ti ding cu a i hrimhrim lo! 8Zoh hman, kan dippawl a kaa ih tangka kan hmuhmi cu Kanaan ram in na hemah kan phatpi ṭhan rom; ituruangah maw bawipa na inn ih sui hai cu kan ruk lei? 9Na tungsaule pakhatkhat hemah hmuh i taw ah amah cu thi kau seh; cuhleiah keimi a taang hmawh ka bawipa ih tungsaule kan i thok,” tiah an ti. 10Ani ni, “Nan ti mangcun i kau tu seh; acui thil a hemih hmuh a i mipa cu ka sal a i thok, a taangmi hmawh zong cu nan luat lei,” tiah a ti. 11Cutikah an dip cu khur ah an ṭhum vek vohvi, cun an kaau vek. 12Ani ni upatleng in thawh in nautatleng tiang an dip sung cu a hrawl; culeh hai cu Benjamin ih dip sungah a hmu. 13Cutikah an partlaipawl an thleek. Culeh an thil cu an laak vek parah taangin khuapi ahcun an kir.
14Judah leh a unaule cu Josef ih inn an phat tikah Josef cu inn ah a om lio; culeh a hmaiahcun khur ah an bok. 15Josef ni an hemah, “Itu i zetzo maw nan thilti cu? Kei mang mi pakhat ni cu li ka ting kho ti teh nan tiah lo maw?” tiah a ti hngai. 16Culeh Judah ni, “Bawipa, na hemah itu hi lei kan sim khawh ti? Itu hi lei kan aan khawh? Khawti’n hi lei kan thiang kan ti tiak khawh? Pathian ni na salle ih sualnak a hmuhngah rom tu hi. A thil sungih hai an hmuh nak pa leh kanmahpawl kan zate hin na salle kan ikau hi,” tiah an ti. 17Ihmansela Josef ni, Acuti ka ti ding cu i hrimhrim hlah seh! A thil sungih hai hmuh a i mipa ceu ka sal a i lei tang; nangmi zong cu nan pa hemah daite’n hang tlung kau tu uh,” tiah a ti.
Judah ni Benjamin Thlah a Ngeen
18Cutikah Judah ni a hnaih ih, “Maw ka bawipa, naktiahte’n namah bul zak in kaa khat te ang kau lang, cun na sal cungah ma hehhar hram hlah law; icatile nang cu Faraoh mang na ikau. 19Bawipa na salle hi, ‘Pa nan ngei maw? Nau teh nan ngei maw?’ tiah a man ti. 20Culeh keimi ni, ‘Pa pahraam kan ngei, cun a hraam hnukih a ngeihmi tia, naupa tepang kan ngei. A upa cu a thi; amah ceu hi a nu ih tiale a’cun a taangmi a ii ih a pa ni a daw ngai’ kan tan ti. 21Cutikah na salle cu, ‘Ka hemah zon hruai u la ka mit in a zoh taw ing,’ tiah a man ti. 22Cutikah bawipa na hemah, ‘Tepangpa ni a pa a mata thiam thok lo, icatile a pa a mattaak a’cun a pa cu a thi thok,’ tiah kan tan ti. 23Cutikah nang ni na salle cu, ‘Nan nauhniang nanmah rum a zon ve lo a’cun ka hmel a ma hmuhngah hngai kho lei lo,’ a man ti. 24Na sal ka pa hem kan kir tikah bawipa na aanmipawl amah kan sim. 25Culeh kan pa ni, ‘Tat sei u la kan ca’h caw tlawmte lei tu uh,’ a man ti tikah, 26‘Kan zong tat kho lo. Kan nauhniang kanmah rum a ik ah ceu kan zong tat thok; icatile kan nauhniang kanmah rum a ik lo a’cun mipa ih hmai kan hmuhngah kho thok lo,’ kan ti. 27Cutikah na sal ka pa ni, ‘Ka nupi ni tiapale pahnih a ma hrin nan tiahkau; 28pakhat ni a ma mata: culeh thlehbauh a i rom kau thok ka ti; akhi khin cu ka hmu thah ti lo. 29Ahi pakhat hi khaw ka hemin nan thiartaak ve ih a parah harnak a tlun a’cun ka ṭuakpaar hi ngaihsia in mithikhua ah nan zong tahsak thok’ tiah a ti. 30Curuangah na sal ka pa hem ka phat tik leh tepangpa kanmah rum a telve lo tikah, a nunnak le tepangpa ih nunnak rum pehtia khawh, 31tepangpa kanmah hemah a i lo ti a hmuh a’cun a thi thok; culeh keimi na salle hi ni na sal kan pa ṭuakpaar cu ngaihsiatnak rum mithikhua kan zong phatsak thok. 32Icatile kei na sal hi ka pa hemah tepangpa ca-ih aamahkhan ah cangin, ‘Amah hi na hemih kan phatpi ṭhan lo a’cun, ka san sung hmawh ka pa hmaiah mawh ka phur kau lei’ tiah ka ti. 33Curuangah, tepangpa canah a tan riantu kei hi na sal in taang sawn lang, cun tepangpa cu a ule rum tlung ṭhan seh. 34Icatile tepangpa ka hemih a ik lo a’cun khawti’n he lei ka pa hem ka tlun ṭhan khawh? Ka pa parih a tlung dingmi tuarnak hmuh lei ka phang,” tiah a ti.
Jelenleg kiválasztva:
Seemthawhnak 44: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
