Seemthawhnak 38
38
Judah leh Tamar
1Acui caan ahcun Judah cu a unaule hemin a zong tat ih a min ah Hirah a i mipa Adullam mi ih omnak hrialah omhmun a khuar. 2Acunang ahcun Kanaan mi pakhat a min ah Shua a i mipa ih tianu a hmu; a pi ih a metpi. 3Nau a pai ih tiapa a hring; culeh a min ah Er a vawh. 4Nau a pai sei ih tiapa a ngei, a min ah Onan a vawh. 5Tiapa a ngei sei ih a min ah Shelah a vawh. Shelah a hrin ah Judah cu Khezib ah a om. 6Judah ni a tiapa upa Er caah nupi a piit piak, a min cu Tamar a ii. 7Ihmansela Judah ih tiapa upa Er cu Bawipa ih hmuhnak ah midupdul a ii ih Bawipa ni a thihsak. 8Cutikah Judah ni Onan hemah, “Na mo metpi hratin a parah vahpa ih ṭuanvo cu ṭuan la; na u ca’h ciitlang ngeih,” tiah a ti. 9Ihmansela Onan ni ciitlang cu amah ih ta a i thok lo ti a tiah ruangah a mo a metpi cang a pami ti cu pawnla ah a suah, cuticun a upa caah ciitlang a omsak duh lo. 10A thiltimi ni Bawipa ih lung a awisak lo ruangah amah khaw a thihsak ve. 11Cutikah Judah ni a vah-nu Tamar cu, “Ka tiapa Shelah a hang hnem hlansung cu na pa ih inn ah nuhmei in om kau,” tiah a ti—icatile ani khaw a ule mangin thi pang lei-a ti a phang. Curuangah Tamar cu a pa ih inn ah om ding cun a tat.
12Caan a rauh nawn tikah Judah ih nupi, Shua ih tianu, cu a thi; Judah ih lungzuur caan a deng tikah, amah leh Adullam mi a rualpi Hirah cu a tuhmul votule omnak Timnah ah an tat. 13Tamar hemah, “Na rang cu a tuhmul vo dingin Timnah ah a tat hekhawh,” tiah an sim tikah 14a nuhmei partlaipawl a phoihtia hngai ih puan paate in a hmai a khumtia, a ruang a zeeltia, culeh Timnah tahnak lam ih Enaim khua luhnak ahcun a to. Shelah cu a hang za vel nain Tamar cu a nupi dingah piak a i rih lo ti a tiah. 15Judah ni a hmuh tikah, a hmai a khumtiak ruangah numizuartia ah a ruat. 16Lam hrialahcun a pan ih, “Ma pha la tan metpi lang,” tiah a ti, icatile a vah-nu a ik a tiah lo. Ani ni, “A ma metpi cu itu ma se thok hmen ci?” tiah a ti. 17Judah ni, “Ka merun sungin a suan pakhat ka tan kuat lei cu,” tiah a ti. Ani ni, “A ma kuat hlansung tiamtiaknak zongbelte ma pia ta la,” tiah a ti. 18Judah ni, “Itu tiamtiaknak tan pia lei hmen ing?” tiah a ti. Ani ni, “Na minkhennak leh a hri, cun na kut ih na teileng cu,” tiah a ti. Curuangah acupawl cu acu nu a pia hngai ih a metpi, culeh amah thawngin acu nu cu nau a pai. 19Cuhnukah a hang tho ih a tat mianmi, a hmaikhum cu phoihtia in a nuhmei iknak partlaipawl a sinthlai hngai.
20Judah ni minu hemih a thutiam la ṭhan dingah a rualpi Adullam mi hemin mesuan a kuat tikah acu nu cu a hmu kho lo. 21“Enaim khua lam hrialih a om ta tu, biakinn ih numizuartia khi khaw’h a he?” tiah khuamipawl a dil hngai. Ihmansela anmimi ni, “Numizuartia pakhat hman hinangah an om thok lo ee,” tiah an ti.
22Curuangah Judah hemah a kirṭhan, “Ka tuak lo ee; cuhleiah khuamipawl ni, ‘Hinangah numizuartia ahuhman an om thah lo’ an ti,” tiah a sim. 23Judah ni, “Thilpawl cu amah ih ta mangin ngeihtia hngai kau seh, culocu nihsan kan i thok hena; ii lam hmanah ahi mesuan ka kuat rom kau ih na hmuh khawh lo cutang,” tiah a let. 24Thla thum hnukah Judah cu, “Na vah nu Tamar cu numizuartia ah a vuatia; cuhleiah a zuartiaknak in a ngahmi cu atu hi nau a pai,” tiah an sim. Cutikah Judah ni, “Hei suah u la mei in tih ii seh,” tiah a ti. 25An hei suah tikah a rang hemah aan a thlah ih, “Hipawl a ngeitu hi a ii naupai ih a ma vua tu cu. Naktiahte’n hipawl hi ahu ih ta an ii—minkhennak leh a hri leh teileng hi, ṭhate’n zoh la hngai law,” tiah a ti. 26Cutikah Judah ni a tiahthiam hngai ih, “Ani hi kei vanin a hmaansawn, amah hi ka tiapa Shelah ca-ih ka piak lo khi ni i hluan in,” tiah a ti. Culeh a metpi ṭhan ti lo.
27A nauhrin caan a phat tikah a sul sungah tiaphiir an om. 28Nausanpiak lioah pakhat cu a kut a hei suah; culeh naudongtu ni a kutngel ah vohri maimaw a khuah ih, “Hihi a suak peita,” tiah a ti. 29A i nain acucaang in a kut a conṭhan ih a upa a va suak; culeh naudongtu ni, “Khawti’n a ii a lakkarih ṭhennak na vuaktiak?” tiah a ti. Curuangah Perez tiah min vawh a ii. 30Acuhnukah a naupa cu a kutngel ih vohri san rum a va suak; culeh a min ah Zerah vawh a ii.
Jelenleg kiválasztva:
Seemthawhnak 38: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
