Mapookyony 11
11
Nnara wa Babilony
1Ulana loose mmbo lwetiri kishomu kimwi na marero maangu. 2Kyeeri vandu valesamya uka taari ya ngaminy vakalollya uruka lurambalalyi efo Babilony vakakaafo. 3Vakaumburana, “Ndeny, lusongosie matofari eekora na muro nisha. Mmbo vetiri matofari ando a mawe, na lami ando a yeela. 4Vakaamba, Naasa ndeny lutane muri, na uroro lwa vayo lufike iruveeu, luwoni irina iniini, naambo lulasheenyanyaka urukeny koose.”
5Nndumi Iruva kaoloka nashelola muri eto na nnara eto vana va vandu vemma yuutana. 6Nndumi Iruva kaamba, “Lola! Vandu yeva mmbamwi na kishomu kyawo nkimwi, neefyo mfyo vakundye ipooka itana, naambo kulave-fo nndu aidima ipaaya ekyo valangye ikitana! 7Ndeny looloke nafo, lutarakanise kishomu kyawo vare valamannyana wo veni.”
8Naasa Nndumi Iruva kavanyanyata vakwaani urukeny koose; valakidimese itana muri ulya. 9Naasa irina lya vayo lyikavaangwa Babeli, nkyeyaamba nng'u Ndumi Iruva aletarakanisya kishomu kya ulana loose; na Ndumi Iruva kavanyanyata veende ulaniny koose.
Ngyeeri ta Semu
(1 Fye 1:24-27)
10Elu llo ufyari lwa Semu. Semu mmbo etiri myaaka iyana kaira Arifakisadi myaaka ivii numa ya mura ulya. 11Semu ekiira Arifakisadi kakaau myaaka mayana araanu, keera vana va kyuumi na va kyika. 12Arifakisadi kakaa myaaka makumi araru na iraanu kaira Sela. 13Ekiira Sela Arifakisadi kakaa myaaka mayana aana na iraaru, kaira vana va kyuumi na va kyika.
14Sela kakaa myaaka makumi araaru kaira Eberi. 15Ekiira Eberi Sela kakaa myaaka mayana aana na iraanu, keera vana va kyuumi na va kyika. 16Eberi kakaa myaaka makumi araaru na iina kaira Pelegi. 17Eberi ekiira Pelegi kakaa myaaka mayana aana na makumi araaru, kaira vana va kyuumi na va kyika.
18Pelegi kakaa myaaka makumi araaru kaira Reu. 19Pelegi ekiira Reu kakaa myaaka mayana avii na kyeenda kaira vana, va kyuumi na va kyika.
20Reu kakaa myaaka makumi araaru na ivii keera Serugi. 21Reu ekiira Serugi kakaa myaaka mayana avii na mfungare, kaira vana va kyuumi na va kyika.
22Serugi kakaa myaaka makumi kaira Nahori. 23Serugi ekiira Nahori kakaa myaaka mayana avii, kaira Vana va kyuumi na va kyika.
24Nahori kakaa myaaka makumi avii na kyeenda, kaira Tera. 25Nahori ekiira Tera kakaa myaaka iyana na ikumi na kyeenda, kaira vana va kyuumi na va kyika.
26Tera kakaa myaaka makumi mfungare, kaira Abramu, na Nahori na Haran.
Ngyeeri ya Tera
27Na elu llo ufyari lwa Tera. Tera kaira Abramu, na Nahori na Haran. Haran kaira Loti. 28Haran kapooka ifwa ngota ndeeye Tera urukeny lulya alewonikya, llo uruka lwa Vakaldayo. 29Abramu na Nahori vakaipoo vaka. Irina lya nka wa Abramu evaangwa Sarai, na irina lya nka wa Nahori ni Milka, mfu wa Haran, mmbwe eto ekee ndeeye wa Milka na wa Iska. 30Na Sara ekee kyuumba, nalatiri mwana,
31Tera kaipo mwana wakwe Abramu, na Loti mwana wa Haran, mwana wa nsero wakwe, na nkaakwe Sara, nka wa mwanaakwe Abramu, vakasama woose Uru efo urukeny lwa Vakaldayo, veende urukeny lwa Kanaani vakafika Haran vakakaafo. 32Myaaka ya Tera ikava mayana avii na iraanu. Tera kafiiya efo urukeny lwa Haran.
Jelenleg kiválasztva:
Mapookyony 11: MAS2
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
The Holy Bible in Kimashami © Bible Society of Tanzania, 2016.
