Sélimɛ 6
6
Kolocɔlɔɔ n gi kɔ̀rirɔ bi syɔɔn ye kwɔ́ɔ
1 #
Zyɔb 1:6; 2:1 Lǎli ni syɛ́ɛnbèle séli ni nɛʔɛgi lè tári na, á be wɔ́ɔ i calipiigèle sii be ma, 2lǎli bee ni a Kolocɔlɔɔ pìíbèle i syɛ́ɛnbèle cálipiigéle wéle n gi nyaa ke n tɔ̀nɔ n nyɔɔ. A be si ge kèle nyɛ́nɛ n wòlo n pye be càbala. 3Lǎli bee ni a Yawe jo: «Mii pǐli ga yɛlɛ bi kòro ní syɔɔn ní làla o làla í. Níì cán wi i nyɛ cere. Wi sìíw yɛ̀ʔɛlɛ myɛ kánma a pye togoye kɔrɔni.» 4#Cór 13:33 Lǎli ni Kolocɔlɔɔ pìíbèle ba ni sìnɛ́ ní syɛ́ɛnbèle cálipiigéle ní ni pìíbèle sii be na lè, lǎli bee ni a nàndɔnɔ-tèleye#6:4 nàndɔnɔ-tèleye: Mɛ́ɛgi naa i nyɛ Heburu-syɛ́ɛnri ni nefiliimi. Ki kɔ́rɔw si n nɛʔɛ. Ki kɔ́rɔwaa a gbǎn pye syɛɛnfelege, wàlá nànniriye. pye tári na, àlí lǎli bee kàdoʔo ma, a pìíbèle bee pye booma nanniriyi yi pye lè ní fànʔa ní. A yi mɛ́ɛyi wɔ́ɔ̀ yiri gbanʔama.
5 #
Mat 24; Luk 17:26; 1Pyɛ 3:20 A Yawe baa gi nyaa syɔɔn péemi n tɔ̀nɔ n kpɔ́ʔɔ tári na n baa sɔ̀lɔ, á wi fúngi sɔ̀ngurɔ myɛ kòro kapeebyeri na canʔa o canʔa. 6A Yawe gi nyaa woro da caà yɛlɛ bi syɔɔn faan naa tári na í. A gi tɔ̀nɔ n pye wi ma funbɛɛnrɛ. 7A Yawe jo: «Syɛ́ɛnbèle mii faan lè, mii a be pɛ́ɛ láʔa tásaligi na, poro ní yaweeri, ní yáriree di fulolo lè n fàra féjɛɛnri na. Níì cán mii n gi nyaa mii da caà yɛlɛ bi be faan í.» 8Kàjáa Kolocɔlɔɔ maa kacànna pye Nowe na.
Yawe n gi kɔ̀rirɔ bi Nowe yaʔa sìi na
9 #
2Pyɛ 2:5
Nowe yòdaʔayi yi nyɛ yee naa.
Nowe maa pye syɛɛnsiɔn. Wi maa pye kajoolo fun syɔ́ɔn wi lǎli syɛ̀ɛnnɛ nínge ni. Nowe maa pye pínɛnyɛnnɛgɛ na ní Kolocɔlɔɔ ní. 10Nowe maa nàbiigéle taanri see, poro be nyɛ Sɛmi, ní Kami, ní Zyafɛti.
11Tári maa tɔ̀nɔ n kálagi Kolocɔlɔɔ yɛ́ʔɛ ma, ti maa tɔ̀nɔ n nyìn péemi na. 12A Kolocɔlɔɔ tári wéle n gi nyaa ti n tɔ̀nɔ n kálagi. Níì cán syɛ́ɛnbèle myɛ nàʔama maa pee tári na. 13Lǎli bee ni a Kolocɔlɔɔ gi joo Nowe ma níì jo: «Mii n gi kɔ̀rirɔ n tímana bi syɔɔn ye myɛ kwɔ́ɔ láʔa yaà. Níì cán be péemi kèlē n tári nyìn. Mii si a be pínɛ kálagi ní tári ní. 14Ki n yɛlɛ mɔ í kɔ́rɔkpɔʔɔ sámaga miyɛɛ wóʔo ní gofɛɛri tíire ní, mí kɔ́rɔkpɔɔgi bee tíla tíla kpaafunyo mí tári kùraa#6:14 kùraa: Mɔ ga lóʔo tári kùraa, gùdurɔnwaa félege na be nyɛ, wee be ŋuu kóloyi na lè. tɛ́ʔɛ mi gi pɔ̀li fúngi, ní kàdogi na. 15Kánmee na mɔ yɛlɛ bi gi sámaga lè poro bi nyɛ bee naa: Ki tɔnɔganmi n yɛlɛ bi pye mɛ́tiribéle togoye kɔrɔsiin ní kpɔrigɔ. Ki kpɔ́ʔɔganmi si pye mɛ́tiribéle toko ní kagunɔ. Ki ǹjogi tɔnɔganma si pye mɛ́tiribéle kɛɛ ní kagunɔ. 16Mɔ a yatɔngɔ sámaga kɔ́rɔkpɔɔgi na ǹjoʔo ma, mɛ́tiri-tíla si pye ki ní yatɔngi lariga ni, mí kɔ́rɔkpɔɔgi kpaaweele pye kàbanga nibin na. Mí gi sámaga kpaataʔaya, kàa í pye táàma, kàa si pye níngi ni, kàa si pye ǹjogi ni. 17Mii si na, mii a lònɛʔɛgɛ tìrige bi tári tɔ́n, jàngó bi cere yáriri myɛ kálagi di nyɛ lè nyɛ̀ʔɛni láara ni, ŋɔngara si i nyɛ di ni. Dee myɛ di nyɛ lè tári na, ti a kùu. 18Mii si a mii joogaanni kpéʔele ní mɔ ní. Mɔ ní mɔ piibèle, ní mɔ céw, ní mɔ piibèle càbala, yele a jée kɔ́rɔkpɔɔgi ni. 19Mɔ a wɔ́ɔ yaweeri féleye myɛ lége kɔ́rɔkpɔɔgi ni siin-ziin, nàɔn ní cɔlɔɔ, koro ga pye ti wɔ́ɔ kòro sìi na ní mɔ ní. 20Di pye nàɔn ní cɔlɔɔ n yɛlɛ ní di féleyi ní, ti lè féjɛɛnri, ní yaweeri, ní yáriri di fulolo lè tári na, dee bee a pan mɔ ma siin-ziin, jàngó bi kòro sìi na. 21Mɔ si na, tàa láa yáriri féleye myɛ ni ti nyɛ lè lìimɛ, mi lége yaà, dee bee a pye yele yaliiri, mɔ ní bele ní ye nyɛ lè yaà.» 22#Heb 11:7; Mat 24:38-39; Luk 17:27 A Nowe gee bee kpéʔele. Wi n ki myɛ kpéʔele n yɛlɛ ní gi ní àmɛɛ Kolocɔlɔɔ da gi joo n gbàn wi ma lè.
Jelenleg kiválasztva:
Sélimɛ 6: CB10
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kolocɔlɔɔ Syɛ́ɛnri © Bible Society of Côte d'Ivoire, 2008.
