Hechos 12
12
Ko ja Santiagë y'ooky ets ja Pedro yajtsumy
1Jää tiempo ja yajkutujkpë Herodes ojts tpajëtijtä'äky ja mëpëjkpëtëjk, 2ets ojts tni'ënä'ämë ets tkupuxtëty ja Santiagë, ja Juan ja y'äjty. 3Ko t'ijxy ko ja jutiis ja'ayëty tukxoonta'aktë tääts tjaakmajtsy ja Pedro, jää jëtu'un jyäjty kyëpejty ma ja tsajpkääky yajkayën mëti'ipë ka'ap tii levadura tmëëtëtyën. 4Ko ja Pedro ënety të yajmatsy, tääts yajtsuumy; nimajktaxk pëky ja këwent'ajtpë kyëwent'atë, taxkjaty tu'kpëkyjyäty. Ja Herodes jää ënety të tuknipëjktaakë twoowmuka'any ja mayjyä'äy ëmaay xëëwnaxy ets ja Pedro jää tukwinkuwowëja'any ja mayjyä'äy. 5Jëtu'unts ja Pedro ojts jeky tsumy y'ity, ijx'ity këwent'aty, je'eyëp ko ja mëpëjkpëtëjk amëk jotmëk ja Dios tyuknija'amyätsëtë.
Ko Pedro yajke'ekyë ja Tios ja y'anklës pujxn tëkoty
6Jä'ä koots naamka'anëm ënety ja Herodes tpaye'ey ja Pedro, maap ënety jap ja Pedro tsiptuunpë itkujky, kë'ëtsumy tekytsyumy ets ëpëky ja soldadëty jap tëja'p kyëwent'atë. 7Ënet ja Wintsën ja y'anklës ajotkumonë nyimiinë ets pujxn tëkoty jyajtäky. Tääts ja Pedro yajtoony, ojts yajyuxy ets yajnëmaay:
Pëtë'ëk pojën.
Tääts ja pujxntejpxy nyëpojtaay kyë'ëkëjxm, 8ets ja tsajpjotmëtë kukäjpxy y'ënëmaayë:
Tuktëkë mwit ets tukwa'akë mkë'ëk.
Ënet ja Pedro jëtu'un tpatuuny ets ja Wintsën ja y'anklës y'ënëmaayë:
Nenyimu'uxët ets pamiinkës.
9Tääts ja Pedro tpatso'ony ja tsajpjotmëtë kukäjpxy, ka'ap tnijawë pën tëy mëti'ipë ja tsajpjotmëtë kukäjpxy tyuunpyën, jëtu'un nyäjyawëty wiinkumaap yowë. 10Tääts nyajxtë ma mëtu'uk ja këwent'ajtpën ets wiinkpë ja këwent'ajtpë näjyëtu'un tjaakninajxtë. Ko jyajtë pujxntëjk ëkë'ëm, ënät ja mëj pujxntëjk'aaw kë'ëm y'ëwatsy ets pyëtsëëmtë. Ko y'ëwaatsëpëtsëëmtë, tää wäänë jyaakye'eytyë ets ajotkumonë ja Pedro ojts nätyu'uk yaj'ëxmatsy.
11Ënet ja Pedro ojts nyäjya'awëpyäätyë ko tëy mëti'ipë tuunëp jajtëpën. Tää y'ënäny:
Tyamës nja'akyukë ko ja Wintsën ja y'anklës të tkexy etsës npëtsëmëty pujxn tëkoty, këtiipë wi'ix xytyuntëtyës yë Herodes mëët ja jutiis ja'ayëty ijxtëm të tjatuknipëjktaakëtën.
12Ko ënety jëtu'un të myäy të tyäjy, tää ojts nyijkx jam ma ja Maria ja tyëjkën, mëti'ipë Juan tyaak'ajtypën. Ja Juan mëti'ipë näjyëtu'un xyëëwajtypyën Marcos. Jam ja Pedro ojts nyijkx ma ja mayjyä'äyën ma ja Dios ënety jam tja'amyätstën. 13Ënet ja Pedro ojts kyäjpxy jap tëjk ëkë'p, tääts pyëtsiimy tu'uk ja to'oxy'ëna'k mëti'ipë xyëëwajtypyën Rode. 14Ko ojts tyo'kmëtoy ko jyä'äjëty ja Pedro, kä'äp ja tëjk tyaj'ëwatsy, pëyi'ikyë ojts wyimpity ets nikäjpxy:
Tap ja Pedro tëjk ëkë'p.
15Tääts ja mëpëjkpëtëjk y'ëtsoowë:
Mlokëjajtpmës jää.
Ko ja to'oxy'ëna'k jyaak'ënany ko tyiyëty, ënät y'ënantë:
Yë'ë jëtää ja Pedro y'anklës.
16Ja Pedro, tap ja tëjk ëkë'p kyajpx'ëtë'ëtsy. Ets ko tyaj'ëwatstë ja tëjk'aaw ets ja Pedro t'ijxtë, ojts tsyë'ëkëtë ko jyä'äjëty. 17Je'eyë ja Pedro ojts ja kyë'ë tyaj'ixyë ets amonyë y'itëty. Tää myëtyaktso'ony wi'ix ënety ja Wintsën të yajpëtsëmyën jap pujxn tëkoty. Tää jyaak'ënany:
Tuk'ëwaanëtë ja Santiagë mëët ja nmëku'uk'ajtëmë, wä'än tnijawëtë.
Ko jëtu'un tnimëtyaktaay, tää jam tsyo'ony ets ojts nyijkx wiinktsow.
18Komjëpom ko xyiinytyäky jyajtäky, ënät ja këwent'ajtpë ojts jëtu'unyë kyumon kyutukëtë ko ja Pedro ka'ap jap pën pujxn tëkoty. 19Ja Herodes ojts tni'ënä'ämë ets t'ëxta'atëty ja Pedro e ka'ap maa tpatë, paaty ojts yë'ë ja këwent'ajtpë yajpoky'ixtë ojts yajni'ënä'ämëtyë ets y'ooktëty. Ko ja Herodes jëtu'un y'ëtitsy, ënät ojts tsyo'onë jam Judea y'itjotm ets nyëjkxnë Cesarea.
Ko ja Herodes y'ooky
20Myëtsip'ajtyp ijty ja Herodes ja ja'ayëty mëti'ipë jam tsënaaytyëpën Tirë ets Sidón, mëti'ipë ojts nyäkyajpxëtë ko jam nyëjkxa'antë ma ja Herodes yajkutukyën. Oy ja Blasto tmëëtmëtyaktë ets kyupëjkëtë. Yë Blasto mëj wintsën ijty y'ity ma ja Herodes yajkutukyën. Ojts nëëmëtë ko oy mëët y'ita'antë ets ko ka'ap tiitsip mëët tuna'antë, jä'ä ko ja Tirë ets Sidón jam winë tyajtsoontë ma ja Herodes ja kyutujktaknën. 21Ko ja xëëw tpaty mëti'ipë ja Herodes tyuknipëjktakëpën, ënät ja wit tuktëjkëy ijxtëm ja yajkutujkpë nyäxyoxëtën ets nyaaxwe'tsy ma ja kyutujktaknën. Tääts kyajpxtëjkëy mayjyä'äy wyintum. 22Ënet ja mayjyä'äy tyëjkëtyë yaxpë jojkpë ets y'ënantë:
Ya'atë kyäjpxyën ka'ap yë jyä'äyëty, tios yë'ë.
23Ënet ajotkumonë ojts ja Wintsën ja y'anklës yajpa'ampetyë, jä'ä ko ka'ap tmëjja'aw tjaantyja'awëy ja Dios. Ënet tyënë'këy ets y'o'ky.
24Ja Wintsën ja y'aaw y'ayuk ni'ikyë kyëjääjë ets xii yaa muum yajnikäjpxy yajnimëtyä'äky.
25Ojts ja Bernabé mëët ja Saulo tkë'ëyaktë ja näypyutëkë jam Jerusalén. Jam tsyo'ontë ets ojts nyëjkxtë Antioquía mëët ja Juan mëti'ipë näjyëtu'un yajtijpën Marcos.
Jelenleg kiválasztva:
Hechos 12: QUETZMIXE
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Biblia Dc en Mixe de Quetzaltepec, Oaxaca México © Sociedad Bíblica de México, A.C.
