मत्ती 12
12
विश्रामदिन रा प्रभु
(मरकुस 2:23-28; लूका 6:1-5)
1अक्क विश्रामदिन यीशु बगड़ी मितै चलूरा थू, अतै तसेरै चेलै जो भूख लगी अतै सो बगड़ी थऊँ हिल्लै त्रोड़ी त्रोड़ी करी खाणा लगै। 2फरीसी धर्मगुरू ऐह हेरी करी तैस सोगी बलणा लगै, “हेर, तेरै चेलै सो कम करू करदै हिन, जैडा विश्रामदिन करना ठीक निय्आ।”
3तिनी तियां जो जवाव दिता, “कै तुहै ना पढुरा कि जैहणै राजा दाऊद अतै तसेरै साथी भूखै थियै ता तियैं कै करू थू? 4सो किआं प्रमात्मैं रै तम्बू मन्ज गिच्ची करी तैड़ी चढ़ाऊरी रोटी खाई, जिंआ जो खाणा ना तैस तांयें अतै ना ही तसेरै चेलै तांयें बल्कि सिर्फ याजका तांयें ठीक थू। 5या कै तुहै व्यवस्था मन्ज ना पढुरा कि याजक विश्रामदिन मन्दरा रै नियमा जो त्रोड़णै पुर भी निर्दोष ही भुन्दै हिन।#गिण. 28:9-10; यूह. 7:22-23. 6पर अऊँ तूसु सोगी सच बलदा, कि ऐड़ी सो हा, जैडा मन्दरा थऊँ भी बड़आ हा। 7अगर तुहै ठेरा अर्थ ना जाणदै कि अऊँ दया थऊँ खुश हा, बलिदान थऊँ ना, अगर तुहै ठेरा अर्थ जाणदै ता तुहै मेरै निर्दोष चेलै जो गुनागार ना ठहरान्दै।#होशे 6:6. 8मणु रा पुत्र ता विश्रामदिन रा भी प्रभु हा।”#मर. 2:28.
डुण्ड़ै मणु जो ठीक करना
(मरकुस 3:1-6; लूका 6:6-11)
9तैड़ी थऊँ चली करी सो यहूदी रै सभागार मन्ज आ। 10अतै हेरा, अक्क मणु थू, जैसेरा हत्थ डुण्ड़ा थू; अतै तिन्यै तैस पुर दोष लाणै तांयें तैस थऊँ पूछु, “कै विश्रामदिन चंगा करना ठीक हा?”
11तिनी तियां सितै बल्लू; “तूसु मन्ज ऐसा कुण हा, जसेरी अक्क ही भैड़ भोआ, अतै सो विश्रामदिन गत्ता मन्ज पैई गच्छा, ता सो तैहा जो गत्ता थऊँ ना नकाळा? 12भला, मणु रा मूल भैड़ा थऊँ कैतना बददी करी हा; ठेरैतांये विश्रामदिन भलाई करना ठीक हा।” ता तिनी तैस मणु सोगी बल्लू “अपणा हत्था अगो कर।”
13तिनी अगो करू, अतै सो फिरी दूये हत्था सैईये ठीक भूच्ची गो। 14ता फरीसी झट बाहर गिच्ची करी सलाह करना लगै कि तसेरा किआं नाश करन?
प्रमात्मैं रा चुणुरा सेवक
15ऐह जाणी करी यीशु तैड़ी थऊँ चली गो; अतै मतै सारै मणु तसेरै पिचो चली पै; अतै तिनी सबी जो ठीक करू। 16अतै तियां जो समझाऊ, कि मेरै बारै मन्ज मत दसदै। 17कि जैडा बचन यशायाह भविष्यवक्तै बलुरा थू, सो पुरा भोआ :
18“हेरा, ऐह मेरा सेवक हा, जैसिओ मैंई चुणुरा;
मेरा प्यारा हा, जैस थऊँ मेरा मन खुश हा
मुँ अपणी आत्मा ऐस पुर पाणी आ अतै
ऐस गैर यहूदी जो न्याय रा समाचार दिणा।
19ऐस ना लड़ाई करनी हा, अतै ना ही हुड़दगं मचाणा;
अतै ना बजारा मन्ज कोई सेरा हल्ला हुणीना।”
20“जैहणै तक सो न्याय री जीत ना करा
तैस दरूडूरै सरकण्ड़ैं ना त्रोड़णै अतै
ना ही धूंआ दिन्दी बत्ती बुझाणी हिन,
मतलब तैस कमजोर, मणु रै प्रति दयावान अतै कोमल रैहणा।”
21अतै गैर यहूदी तैस पुर उम्मीद रखणीआ।
यीशु अतै दुष्टात्मा रा सरदार शैतान
(मरकुस 3:20-30; लूका 11:14-23)
22ता मणु अक्की अन्धै-गूंगै जो जैस मन्ज दुष्टात्मा थी, तैस बलै लेई आये; अतै तिनी तैसिओ खरा करू; अतै गूंगा बलणा अतै हेरना लगी पैऊ। 23ऐह हेरी करी सब मणु हैरान भूच्ची करी बलणा लगै, “कै ऐह दाऊद री औलाद हा?”
24पर फरीसीये ऐह हुणी करी बल्लू, “ऐह ता दुष्टात्मा जो ठेरैतांये नकाळी पाऊ करदा कि ऐह ता शैतान रा दास हा।” 25तिनी तंयारै मना री जाणी करी तियां सितै बल्लू; “जैस कसकि राज्य मन्ज फूट पैई गच्छा, सो उजड़ी गान्दा, अतै कोई नगर या घराना जैस मन्ज फूट भुन्दी हा, सो टिक्की ना सकदा। 26अतै अगर शैतान ही दुष्टात्मा जो कड़आ, ता सो अपणा ही वरोधी भूच्ची गाणा; फिरी तसेरा राज्य किआं करी बणी रैहणा? 27भला, अगर अऊँ शैतान री मदद सोगी दुष्टात्मा जो कड़दा, ता तून्दै चेलै कसेरी मदद सोगी कड़दै हिन? ठेरैतांये सो ही तून्दा न्याय करलै। 28पर अगर अऊँ प्रमात्मैं री आत्मा री मदद सोगी दुष्टात्मा जो कडदा, ता प्रमात्मैं रा राज्य तूसु बलै ईच्ची पुजुरा हा।”
29या किआं कोई मणु कसकि ताकतवर मणु रै घरा मन्ज घुसड़ीकरी तसेरा घर ना लुटी सकदा जैहणै तक पैहलै सो तैस ताकतवर जो बनी ना लेय्आ अतै तां फिरी सो तसेरा घर लुटी सकदा हा।
30“जैडा मणु विस्वास ना करदा कि अऊँ पवित्र आत्मा री शक्ति सोगी दुष्टात्मा जो कड़दा हा सो मेरा विरोधी हा, अतै जैड़ा मणु जो मिन्जो वलै लैईन्दा सो कठेरनै बाळा हा, अतै जैड़ा मणु मेरा चेला ना बणना दिन्दा सो तियां जो मिन्जो थऊँ दूर लेई गान्दा। 31ठेरैतांये अऊँ तूसु सोगी बलदा, कि मणु रा सब तरह रा पाप अतै बुराई माफ करी दिणिआ, पर जे कोई आत्मा री बुराई करदा ता सो कदी माफ ना भूणा। 32जैस कसी मणु रै पुत्रा रै वरोधा मन्ज बलणा, तसेरा पाप माफ भूच्ची गाणा, पर जैडा कोई पवित्र आत्मा रै वरोधा मन्ज कुछ बलणा, तसेरा अपराध ना ता ऐस लोक मन्ज ना ही परलोक मन्ज माफ भूणा।”
रुख अतै तठेरा फळ
(लूका 6:43-45)
33“अगर रूखा जो खरा बलदै हिन ता तसेरै फळा जो भी खरा बला; या रूखा जो निकम्मा बलदै हिन, ता तसेरै फळा जो भी निकम्मा बला, क्ओकि रूखा री पछैण फळा सोगी ही भुन्दी हा। 34हे कीड़ै सांईयै जहरीलै मणुओ, तुहै बुरै भूच्ची करी किआं खरी गल्ला करी सकदै हिन? क्ओकि जैडा मना मन्ज भरूरा सो ही मुँहा पुर इन्दा हा। 35भला मणु भलै मना रै भण्ड़ारा थऊँ भली गल्ला कड़दा हा; अतै बुरा मणु बुरै भण्ड़ारा थऊँ बुरी गल्ला कड़दा हा। 36अतै अऊँ तूसु सोगी बलदा, कि जैड़ी जैड़ी निकम्मी गल्ला मणु बलणी हिन, न्याय बाळै दिन हर अक्क गल्ला रा लेखा दिणा पैणा। 37क्ओकि तू अपणी गल्ला री ही वजह थऊँ निर्दोष अतै दोषी ठहराया गाणा।”
स्वर्गीय नशाणी री मांग
(मरकुस 8:11,12; लूका 11:29-32)
38ता कैतनै शास्त्री अतै फरीसीये तैस सितै बल्लू, “हे गुरू, अहै तूसु थऊँ अक्क चमत्कार हेरना चाहन्दै हिन।”
39तिनी जवाव दिता, “ऐस युगा रै बुरै अतै अविस्वास योग्य मणु चिन्ह तोपदै हिन; पर योना भविष्यवक्ता सोगी जैड़ा भूआ तैतिओ छडी होर कोई भी चिन्ह तियां जो ना हुजणा। 40जिआं योना त्राई रात दिन पाणी मन्ज मच्छी रै पेटा मन्ज रैऊ, तियां ही मणु रा पुत्र भी त्राई राती दिन धरती रै अन्दर रैहणा। 41नीनवे शहर रै मणु न्याय बाळै दिन ऐस युगा रै मणु सोगी उूठी करी तियां जो दोषी ठहराणा, क्ओकि तियैं योना रा प्रचार हुणी करी, मन फिराऊरा थू। अतै हेरा, ऐठी ता सो हा जैडा योना थऊँ भी बड़ा हा, फिरी भी तुहै मन फेराणै थऊँ इन्कार करदै हिन। 42दक्षिण दिशा री राणी न्याय बाळै दिन ऐस युगा रै मणु सोगी उूठी करी तियां जो दोषी ठहराणा, क्ओकि सो राजा सुलैमान रा ज्ञान हुणनै तांयें दूर देशा थऊँ छुरी थी, अतै हेरा, ऐड़ी ता कोई सुलैमान थऊँ भी बड़ा हा, फिरी भी तुहै मन फेराणै थऊँ इन्कार करदै हिन।”
अधुरै सुधार विपत्ति रा कारण
(लूका 11:24-26)
43“जैहणै कोई दुष्टात्मा मणु थऊँ नकैई गान्दी ता सो सुनसान जगह मन्ज आराम करना तोपदी हिन, पर जगह ना मुळदी। 44ता बलदी हा, ‘मुँ तैस ही मणु मन्ज जैड़ी थऊँ अऊँ नकैऊरी थी, फिरी गाणा।’ अतै ईच्ची करी तैस मणु री जिन्दगी जो खाली घरा सांईयै साफ सुथरा अतै सजुरा सजाऊरा पान्दी हा। 45ता सो गिच्ची करी अपणी सोगी होर सत दुष्टात्मा जो लेई इन्दीआ, अतै सो सब तैस मन्ज वास करदी हिन, तैस मणु री हालत पैहली हालति थऊँ भी होर खराब भूच्ची गान्दी हा; ऐस युगा रै बुरै मणु री हालत भी इन्नी ही भुणीआ।”
यीशु री माता अतै भाई
(मरकुस 3:31-35; लूका 8:19-21)
46जैहणै सो भीड़ सोगी गल्ल करू ही करदा थू, ता तसेरी माता अतै हल्का भाई बाहर खडुरै थियै, सो तैस सोगी मुळना चाहन्दै थियै। 47कुणकी तैस सोगी बल्लू; “गुरू तुन्दी माता अतै भाई बाहर खडुरै हिन, अतै तूसु सोगी कणैणा चाहन्दै हिन।”
48ऐह हुणी करी तिनी जवाव दिता; “कुण हा मेरी माता? अतै कुण हा मेरा भाई?” 49अपणै चेलै री कनारी इशारा करीके बल्लू, “हेरा, मेरी माता अतै मेरै भाई ऐह हिन। 50क्ओकि जैडा कोई मेरै स्वर्गीय पिता री मर्जी पुर चलला, सो ही मेरा भाई, बैहण अतै माता हा।”
Jelenleg kiválasztva:
मत्ती 12: GBKNT
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This work is licensed under Creative Commons Attribution-ShareAlike 4.0 License.
