मत्ती 13

बी बाणै बाळै रा उदाहरण

(मरकुस 4:1-9; लूका 8:4-8)

1तैस ही दिन यीशु घरा थऊँ निकळी करी झीला रै कनारै गिच्ची बैईठा। 2अतै तैस बलै ऐसी भीड़ किटठी गई कि सो किस्ती पुर चड़ी गो, अतै पूरी भीड़ कनारै पुर खड़ी रैई। 3अतै तिनी उदाहरण मन्ज तियां सितै मती सारी गल्ला करी “अक्क बी बाणैबाळा बी बाणा निकळू। 4बान्दै टैमैं कुछ बी बता रै कनारै पै अतै पखेरू ईच्ची करी सो चुगी लै। 5कुछ बी पथरीली जमीना पुर पै, जैड़ी तियां जो मिट्टी ना मुळन री वजह थऊँ झट जमीं पै। 6पर सूरज निकळनै री वजह थऊँ सो फूकी गै। 7कुछ बी झिन्ड़ा मन्ज पै पर झिन्ड़ै सो दबाई दितै। 8पर कुछ बी खरी जमीना पुर पै, अतै फळी पै, कोई सौ गुणा, कोई सठ गुणा, अतै कोई तीह गुणा। 9कन्‍ना खोली करी मेरी ऐसा गल्ला हुणी लैन।”

उदाहरण रा उदेश्य

(मरकुस 4:10-12; लूका 8:9,10)

10चेलै तैस बलै ईच्ची करी बल्लू, “तुहै मणु सोगी उदाहरण मन्ज गल्ला कजो करदै?”

11तिनी जवाव दिता, “तुसिओ स्वर्गा रै राज्य रै भेदा री समझ दितुरी हा, पर तियां जो ना। 12क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ।” 13अऊँ ईयां सितै उदाहरण मन्ज गल्ला ठेरैतांये कणैन्दा कि ऐह हेरी करी भी समझी ना पान अतै हुणी करी भी ना समझन; ऐसा ना भोआ कि ऐह समझन। 14इन्यारै बारै मन्ज यशायाह री ऐह भविष्‍यवाणी पूरी भुन्दी हा:

“तूसु कना थऊँ हुणना पर समझणा निय्आ;

अतै हाख्री हेरना पर तुसिओ ना हुजणा।”

15“क्ओकि ईयां मणु रा मन मोटा भूच्ची गच्छुरा,

अतै ऐह कना रा उच्चा हुणदै अतै इन्यै अपणी हाख्री बन्द करी लैऊरी।”

“करखी ऐसा ना भोआ कि ऐह हाख्री सितै हेरन, कना सितै हुणन,

अतै मना मन्ज समझन, अतै मना फेरन अतै अऊँ ईयां जो ठीक करूं।”

16“पर धन्य हिन तुन्दी हाख्री जैड़ी मेरै करूरै कमां जो हेरदी हिन अतै धन्य हिन तून्दै कन जैड़ै मेरा कणैऊरा हुणदै हिन। 17क्ओकि अऊँ तूसु सोगी सच बलदा कि मतै सारै भविष्‍यवक्तै अतै धर्मीये चाऊ कि जैड़ी गल्ला तुहै हेरू करदै सो भी हेरन पर सो ना हेरी सकै; अतै जैड़ी गल्ला तुहै हुणदै सो भी हुणन, पर सो ना हुणी सकै।”

बी बाणै बाळै उदाहरण रा बखान

(मरकुस 4:13-20; लूका 8:11-15)

18“अबै तुहै बी बाणैवाळै रै उदाहरण रा अर्थ हुणा। 19जैडा कोई प्रमात्मैं रा बचन हुणी करी ना समझदा, तसेरै मना मन्ज जैडा कुछ बाऊ, तैतिओ शैतान ईच्ची करी लेई गान्दा। ऐह सो बी हा जैडा बत्ता रै कनारै मन्ज बाऊ थू। 20अतै जैड़ै पथरीली जमीना मन्ज बाऊ, ऐह सो हिन, जैड़ै बचन हुणी करी झट खुशी सोगी मनी लैन्दा। 21पर ऐह अपणै दिला मन्ज गहरी जड़ा ना रखणै री वजह थऊँ थोड़ै ही दिना रा विस्वासी हा अतै जैहणै सताव या क्‍लेश इन्दा ता सो प्रमात्मैं रै बचना पुर विस्वास करनै थऊँ फिरी गान्दै हिन। 22जैडा बी झिन्ड़ा मन्ज पेऊरा, ऐह तियां मणु सांईयै हिन जैड़ै बचन हुणदै पर ऐस संसारा री चिन्ता अतै धन रा धोखा बचन जो दबी दिन्दा, अतै सो फलदा निय्आ। 23जैडा बी खरी जमीना पुर पैऊ, ऐह सो हिन, जैड़ै बचन जो हुणी करी समझदा अतै फलदा; कोई सौ गुणा, कोई सठ गुणा, अतै कोई तीह गुणा।”

जंगली बी रा उदाहरण

24यीशुऐ तियां जो अक्क होर उदाहरण हुणाऊ “स्वर्गा रा राज्य तैस किसाना साईये हा जिनी अपणी बगड़ी मन्ज कणका रा खरा खरा बी बाऊ। 25पर जैहणै मणु सोई गै ता बैरी ईच्ची करी कणका री बीआ मन्ज जंगली बी फड़ाई गै। 26जैहणै बी लूंगी पैऊ अतै हिल्लै आये ता जंगली बीया रै पोधै भी हुजै।”

27ऐह हेरी करी मालका सोगी नौकरै बल्लू, “हे स्वामी, कै तुहै अपणी बगड़ी मन्ज खरा बी ना बाऊरा थू? फिरी जंगली दाणै रै पोधै तैत मन्ज कंऊ आये?”

28तिनी तियां सितै बल्लू, “ऐह कसकि बैरी रा कम भूणा। नौकरै तैस सोगी बल्लू, कै तुन्दी इच्छा हा, कि अहै गिचीकरी जगंली दाणै जो बीणी लैन?”

29तिनी बल्लू, “ना ऐसा मत करदै, ऐसा ना भोआ कि जंगली पोधै जो बीणदै बीणदै तुहै कणका जो भी पुट्टी दीन। 30वढाई तक दूनी जो सोगी सोगी मोटिणा देय्आ, अतै कटनी रै टैमैं कटणैवाळै जो मुँ बलणा कि पैहलै जंगली दाणै रै पोधै बीणीकरी तियां जो फुक्णै तांयें बनी लेय्आ, अतै कणका जो मिन्जो तांयें मेरै पेडू मन्ज इकट्ठा करा।”

राई रै दाणै रा उदाहरण

(मरकुस 4:30-32; लूका 13:18-19)

31तिनी तियां जो अक्क होर उदाहरण हुणाऊ “स्वर्गा रा राज्य राई रै दाणै रै बराबर हा, जिनी किसाने अपणी जमीना मन्ज तैतिओ बाई दिता। 32सो सबी बीआ मन्ज हल्का ता भुन्दा पर जैहणै मोट्टिन्दा ता सब साग-पात थऊँ बड़ा भुन्दा; अतै इन्‍ना रुख भूच्ची गान्दा कि अम्बरा रै पखेरू भी तठेरी छाई मन्ज अपणा बसेरा करदै हिन।”

खमीरा रा उदाहरण

(लूका 13:20,21)

33तिनी अक्क होर उदाहरण हुणाऊ “स्वर्गा रा राज्य तैस खमीरा साईये हा जैसिओ अक्की जनानी लगभग तीह किलो आटै मन्ज मलाई दिता अतै फूली करी सो सब आटा खमीर भूच्ची गो।”

उदाहरण रा प्रयोग

(मरकुस 4:33,34)

34ऐह सब गल्ला यीशुऐ उदाहरण मन्ज मणु सितै बली, अतै सो अपणी सब गल्ला उदाहरण मन्ज ही बलदा थू, 35कि जैडा बचन भविष्‍यवक्तै बलुरा थू सो पुरा भोआ :

“मुँ उदाहरण मन्ज गल्ला करनी

मुँ तियां गल्ला जो जैड़ी संसार मन्ज उत्पति थऊँ

गुप्त रैई प्रकट करना।”

जंगली बी रै उदाहरण री व्याख्या

36ता सो तैहा भिड़ा जो छड़ी करी घरा मन्ज आ, अतै तसेरै चेलै ईच्ची करी तैस सोगी बल्लू, “बगड़ी रै जंगली बीआ रा उदाहरण असिओ समझाई दे।”

37तिनी तियां जो जवाव दिता, “खरै बी बाणैबाळा मणु रा पुत्र हा। 38बगड़ी ऐह संसार रै मणु हिन, खरा बी सो मणु हिन जियां पुर प्रमात्मां राज्य करना चाहन्दा, अतै जंगली बी शैतान री सन्तान हा। 39जिनी बैरीये तैसिओ बाऊ सो शैतान हा; कटनी संसार रा अन्त हा, अतै कटणैवाळै स्वर्गदूत हिन।”

40“अतै जिंआ जंगली बी बीणदै अतै फुकदै हिन तियां ही संसार रै अन्त मन्ज भूणा। 41मणु रै पुत्रा अपणै स्वर्गदूता जो भैजणा, अतै तियां तसेरै राज्य थऊँ सब पाप करनै बाळै अतै पाप करवाणै बाळै जो नकाळी दिणा। 42अतै स्वर्गदूता तियां जो अगी रै कुण्ड़ा मन्ज पाई दिणा, जैड़ी रूणा अतै दन्द पीणै हिन। 43तैस टैमैं धर्मी अपणै पिता रै राज्य मन्ज सूरजा साई चमकणा। कन्‍ना खोली करी ईयां गल्ला हुणी लेय्आ।”

छिपुरै खजानै रा उदाहरण

44“स्वर्गा रा राज्य तैस बगड़ी मन्ज छिपुरै धना साईये हा, जैडा कसकि मणु जो मूळु अतै तिनी भी सो छुपाई दिता, अतै खुशी सितै अपणा सब कुछ बेची दिता अतै तैसा बगड़ी जो खरीदी लैऊ।”

अनमोल मोती

45“स्वर्गा रा राज्य तैस अक्क व्यपारी साईये हा जैडा सुच्चै मोती री खोज मन्ज थू। 46जैहणै तैसिओ सो किमती मोती मूळु ता तिनी अपणा सब कुछ बेची दिता अतै तैसिओ खरीदी लैऊ।”

जाल रा उदाहरण

47“स्वर्गा रा राज्य तैस बड़ै जाळा साईये हा जैडा समुंद्र मन्ज पाऊ, अतै हर तरह री मछली जो लेई आ। 48अतै जैहणै जाल भरी गो, ता मछुआरै तैसिओ कनारै पुर खिन्जी लेई आये, अतै बैही करी खरी खरी मच्छली ता भान्डै मन्ज कठेरी अतै बेकार फैंकी दिती। 49संसारा रै अन्त मन्ज ईयां ही भूणा। स्वर्गदूता ईच्ची करी दुष्‍टा मणु जो धर्मी मणु थऊँ अलग करना, 50अतै तियां दुष्‍ट मणु जो अगी रै कुण्ड़ा मन्ज पाणा, जैड़ी रूणा अतै दन्द पीणा ही भूणा।”

पुराणी अतै नोई शिक्षा रा महत्व

51“कै तुहै ऐह सब गल्ला समझी?” तिन्यै बल्लू, “हाँ।” 52यीशुऐ तियां सितै बल्लू, “ठेरैतांये हर अक्क शास्त्री जैडा स्वर्गा रै राज्य रा चेला बणुरा, सो तैस घरा रै मुखिया साईयें हा जैडा अपणै भण्ड़ारा थऊँ नोई अतै पुराणी चिजा कड़दा।”

नासरत मन्ज यीशु रा अनादर

(मरकुस 6:1-6; लूका 4:16-30)

53जैहणै यीशु ऐह सब उदाहरण कणैई बैहु, ता तैड़ी थऊँ चली गो। 54अतै अपणै नगरा मन्ज ईच्ची करी यहूदी रै सभागार मन्ज उपदेश दिणा लगु कि हुणनैबाळै हैरान भूच्ची करी बलणा लगै, “ऐसिओ ऐह ज्ञान अतै सामर्थ रै कम कंऊ आये? 55अहै जाणदै ऐह ता तरखाण हा, अतै कै सेरी मौआ रा नां मरियम अतै सेरै भाई रै नां याकूब, यूसुफ, शमौन अतै यहूदा नियां? 56अतै कै सेरी सब बैहणी इन्दै मन्जै ना रैहन्‍दी? फिरी ऐसिओ ऐह सब कंऊ मूळु?”

57ऐस तरीकै तिन्यै तैस पुर विस्वास ना करू, पर यीशुऐ तियां सितै बल्लू, “भविष्‍यवक्ता रा अपणै देशा अतै अपणै घरा जो छड़ी करी बाकी सबी जगह आदर भुन्दा हा।” 58अतै तिनी तैड़ी तंयारै अविस्वास री वजह थऊँ मतै सामर्थ रै कम ना करै।

Jelenleg kiválasztva:

मत्ती 13: GBKNT

Kiemelés

Megosztás

Másolás