MATIYUT 13
13
Aap awi yumbunit nagagerak eegu laarogo yoragagerak wone
(Mrk 4:1-9, Luk 8:4-8)
1O ti eyom paga at Yetut oome nen wundi nage nagagirik, yi yenggenak aa'nggi paga kwi'nagagerak. 2Kwi'nagagerak wonage me, yi aakumi ndi aakumi ambik aago at owagam kuwak ari wogogwaarak me, yiiro paga unggunuk, kwi'nage nagagirik, it aakumi kuwak aago nogo yi aa'nggi paga taati iigak, 3at Yetut nen yi wone ndi wone apit aret eegu laarogo yoragagerak.
Yorage logonet, ”Kinaruk logonip o,” yorage nagagirik, ”Aap awi yumbungge menggerak nen awi yumbunikit nduk nage nagagirik, 4yumbunit nage kagak, ando tu paga wambit nagagerak. Tu paga wambit nagagerak nogo ti, towe wogo logonet, abok aret nenet nogogwaarak. 5Ando yugum eeri paga nggween ameneno mbuuluk mban wonage me, wambit nagagerak. Yugum eeri paga wambit nagagerak nogo ti, mbilaneegerak mendek, nggween ameneno mbuuluk me, 6omanggen yaka'lek kagak, mo nen teebat age nagagirik, mbuk agagerak. 7Ndi, ando iri'ngga alokwi me wambit nagagerak. Iri'ngga alokwi me wambit nagagerak nogo ti, mbilaneegerak kwe, alok nogo lagangge logonet, mbanogo wurabeegerak. 8Ando nggween mili paga wambit nagagerak. Wambit nage nagagirik, mbilanogo anggen nggwok yi'nage logonet, ero ando anggen 30 yege, ando anggen 60 yege, ando anggen 100 yege, eerit nagagerak.”
9Yorage nagagirik, ”Kinaruk wonage kenok, liirogon aret konenggo logonip o,” yinuk, yoragagerak.
Nonggop nduk Yetut wone eegu laarogo yoragagerak wone
(Mrk 4:10-12, Luk 8:9-10)
10Yorage mbareegi, it Yetut oone waganggwi nogo, wogo nogogwaarik, ”Nonggop nduk wone eegu laarogo yoragandak o?”
11Yogo mbareegwa, at Yetut nen, ”Kit aap yi, mbogut paga mendek abu'me pinagarak wone at inikime lubuk wonagagerak nogo, kineenu arubagip nduk, Ala nen kilikkiroorak mbareegerak kwe, it aap ti perak, kiliriroorak mbarulik o. 12Kit kinamendek wonage kenok ti, ambinom oba luunogo wokkiramenggerak me, ambik aret arigin o. Ndi, kinamendek lek kenok ti, kinamendek mbuuluk porogo wonogwe nogo aret ndinogo kolage kaamunggup o. 13It aakumi ti, inigen kogwe kwe, yelok kogwe, ndi, inaruk konenggwi kwe, liippunuk waganggwi, eeka'lek me, wone eegu laarogo negen yorage minggirak o.
14-15At Ala nen yoge kagak, at Yetaya nen ari logonet,
It aakumi yi, inigen kogwe, inaruk konenggwi,
iniki liippatinuk yunggup melak eekwi, eekwi iinok,
an nen obeelom eeginake neyo,
Ninogogumbuk ogwe, ninaruk logu ogwe, ninigen kubu nogwe,
eeruwok o, yinuk, miikkolagaarak me,
inaruk konenggak mban eerumenggaarak kwe,
liippatugun lek o.
Ndi, inigen kagak mban eerumenggaarak kwe,
yelok kaagun lek o,
yinuk, Ala wone yoragagerak nogo a'me lik yuurak nduk, wone eegu laarogo mban yorage minggirak o.
16Kit perak, kinigen kogwe, kinaruk konenggwi, eeko monggotak me, kiniki ale'nggen aret mbako logorak o. 17Kit kinigen kogwe nogo, it Ala wone yorogo nogogwaarak nabi-nabi inom, iniki koonak wonogogwaarak inom, it apit nen, Ninigen kaawok lak ao, mbako nogogwaarak kwe, kaga'lek aret wonogogwaarak o. Ndi, kit kinaruk konenggwi nogo, Nit ninaruk konenuwok lak ao, mbako nogogwaarak kwe, konengga'lek aret wonogogwaarak o, yinuk, abet aret yokkiragi o,” yoragagerak.
Aap awi yumbunit nagagerak wone nogo alom liirogon yoragagerak wone
(Mrk 4:13-20, Luk 8:11-15)
18Yorage nagagirik, at Yetut nen, ”Aap awi yumbunit nagagerak wone eegu laarogo yokkiragarak nogo alom liirogon yokkirage me, kinaruk konenggo logonip o. 19Awi tu paga wambi nagagerak nogo ti, it aakumi Ala abu'me piyoorak wone inaruk konembunuk, liippaka'lek iinok, at abu maluk lombok nogo nen wage nagaatik, wone it inikime yarak nogo ndininuk nage menggerak aret. 20Ndi, awi yugum eeri paga wambit nagagerak nogo ti, it Ala wone inaruk konembunuk, iniki ale'nggen paga mbet-mbet waganggo nagaatik, 21wone nogo ti inikime omanggen yaka'lek me, ne ambit logonuk, wone waganggwi nogo paga aaninggin-paaninggin eerogo piigwi, piyak-payak eeginakwi, eekwi iinok, Wone yi nineebi o, yinuk, mbo pugwi nogo aret o. 22Ndi, iri'ngga alokwi me wambit nagagerak nogo ti, it wone inaruk konenggwi kwe, nggween paga mendek mban iniki aberit nugwi, inamendek lek ariyak kagak, inikilom mbarit nugwi, eekwi nogo paga nen Ala wone waganeegwaarak nogo mbanogo wuppugwi me, anggen abe yegeelik nogo aret o. 23Ndi, nggween mili paga wambit nagagerak nogo ti, it wone inaruk konembunuk, liippunuk, eekwi paga anggen yi'nage logonet, ambi 30 yege, ambi 60 yege, ambi 100 yege, eeko menggaarak nogo aret o,” yoragagerak.
Iri'ngga awi maluk mendek inom, obeelom mendek inom, eegu laarogo yoragagerak wone
24Yorage nagagirik, Yetut nen wone ambi eegu laarogo yorage logonet, ”At mbogut paga mendek abu'me piyoorak nogo ti, aap ambi awi obeelom mendek eyabu me yareegerak nogo pogom aret o. 25Aakumi nen yappunuk, nogo yugwi iigak, at imbirak ogoorak menggerak nogo nen wage nagagirik, gandum awi yarak enggela'me nogome iri'ngga maluk mendek yumbunogo punuk, mbaganeegerak. 26Mbagangge kagak, gandum awi yarak nogo mbilangge nagaatik, anggen yi'nage kagak, iri'ngga maluk mendek enggela'me yumbuneegerak nogo kin agagerak. 27Kin age mbareegi, aap eyabu unde ayeloman nogo, at owagam wogo nogogwaarik, Ninogoba wae. Iri'ngga awi obeelom mendek mban keyabu me yakendak kwe, iri'ngga maluk mendek enggela'me wunggerak ti, ngga nen wunggerak o? 28Yogo mbareegwa, aap nogo nen, Lek o. At nimbirak ogoorak nogo nen eekerak kagi o. Yorage mbareegi, ayeloman nen, Nit nogo logomonggoorik, iri'ngga maluk mendek enggela'me wunggerak nogo ti, kinogo wumbuurak op mbaken ilik, lek a? 29Yogo mbareegwa, at nen, Lek o. Iri'ngga maluk mendek kinogo wumbogo logonet, gandum inom kinogo wumbukwak me, mage o. 30Anggen mbaniyak eyom awo me, imbirak lagangge logowak nduk, teppinip o. Ndi, anggen mbaniyak eyom panggoni wage kenok perak, an nen it anggen mbanggo menggaarak nogo yorage logonet, Iri'ngga maluk mendek ti, kani nawak nen aa'nduk kinogo keele maakwi, ndi, gandum kenok kuwak eerogo tilabaga panugwi, eeko logowak nduk, yoraagin o,” yoragagerak.
Kulok anggen paga eegu laarogo yoragagerak wone
(Mrk 4:30-32, Luk 13:18-19)
31-32Yorage nagagirik, Yetut nogo wone ambinom eegu laarogo yorage logonet, ”At mbogut paga mendek abu'me piyoorak nogo ti, kulok anggen pogom aret o. Yi awi ndi awi anggen nggwok negen, ndi kulok anggen ti, abu mbuuluk aret kwe, aap nen waganogo ineyabu me yakwi iinok, tirak-wanggit negen iri'ngga alik-alik ti mbuuluk negen kwe, kulok nogo perak, eyo nggwok aret wiganggetak me, yi towe ndi towe mbogut paga nugu menggaarak mendek abok aret wogo nagaatik, inawi kulok nogo eno'mbak paga wuri unggwogo menggaarak o,” yoragagerak.
Roti piike menggerak eegu laarogo yoragagerak wone
(Luk 13:20-21)
33Yorage nagagirik, wone ambi eegu laarogo yorage logonet, ”At mbogut paga abu'me piyoorak nogo ti, roti mbi piike menggerak nogo pogom aret o. Kwe roti lake menggerak ambi nen roti piike menggerak nogo waganogo mbato yigirik togolowak ne kenagan paga kilirogo wuppunuk, inom nombongge kenok, abok apit aret piike menggerak o,” yoragagerak.
”Alom ti nduk, wone eegu laarogo yorage minggirak o,” yoragagerak wone
(Mrk 4:33-34)
34At Yetut nen it aakumi kuwak ogwe iinok, wone yorage nagagerak nogo abok aret wone abe liirogon ambi yorage logolik. Ata, eegu laarogo mban yorage nagagerak. 35Ti yorage nagagerak nogo ti, Ala nen aap wone yorage nagagerak nabi ambi yoge kagak, at nen aakumi yorage logonet, ”An wone yokkirage logonet, eegu laarogo mban yokkirage, ndi, o yi wakkagagerak eyom paga nen nobarak mban wonagagerak mendek aret yokkirage, eeke logogin o,” yinuk, yoragagerak nogo, a'me lik yuwak nduk, yorage nagagerak.
Iri'ngga maluk yumbuneegerak nogo alom liirogon yoragagerak wone
36Yorage nagagirik, it aakumi kuwak aago nogo teppiinok, oome unggwi nagagerak wonage me, at oone waganggwi nogo Yetut owagam wogo nogogwaarik, ”Wone iri'ngga maluk mendek yabu me laganeegerak wone nogo mbinuk-mbenak yo'niret o.”
37Yogo mbareegwa, Yetut nen, ”Aap awi op mendek yake menggerak nogo ti, aap aret nda'nagagirak an aret o. 38Ndi, yabu eeke minggim nogo ti, o yime aret o. Awi obeelom mendek nogo ti, it aakumi Ala abu'me menggaarak nogo aret. Ndi, iri'ngga maluk mendek ti, at abu maluk mendek apuri nogo aret o. 39At aap imbirak ogoorak logonet, awi maluk mendek yumbuneegerak nogo ti, Ibilit aret o. Anggen mbaniyak eyom nogo ti, o age yobok aret o. Ndi, it anggen mbanggo menggaarak nogo ti, it mbogut paga yonggo nugu menggaarak melaikat nogo aret me, 40it aakumi nen iri'ngga maluk mendek kenok, kuwak eerogo kani kunggwi nogo pogom ti, o age yobok paga eeriyak nogo aret o. 41An aap aret nda'nagagirak nogo nen mbogut paga nayonggo nappiige minggirak melaikat nogo nappiya wage neenok, wogo logomenggaarik, it Ala abu'me piige minggim logonet, aakumi maluk eeruwak nduk, inikime manabit nogo menggaarak ineebe inom, yi aap ndi aap maluk eeko menggaarak ineebe inom, kuwak eerogo 42kani kunik me mambiyamenggaarak time logonet, leenggu maakwi, ineyak nggilik maakwi, eeko logogun o. 43Ndi, it iniki koonak menggaarak nogo inogoba abu'me logonet, inoba oonegen pogom pinda yogo logogun o. Kinaruk wonage kenok, liirogon aret konenggo logonip o,” yinuk, yoragagerak.
Aap amendek iniki kunik me, kwaakkolagagerak eegu laarogo yoragagerak wone
44Yorage nagagirik, ”At mbogut paga mendek abu'me piyoorak nogo ti, aap amendek iniki kunik ambi yabu eerak me kiraarak me kwaakkolagagerak nogo pogom aret o. Kwaakkolage nagagirik, obaane'me taambunuk, iniki ale'nggen nen at amendek tigitogon onggo mbambunuk, ti'nuk, obaane'me yabu eerak nogo onggo kunggolagagerak o,” yinuk, yoragagerak.
Wu kirin kwaakkolagagerak eegu laarogo yoragagerak wone
45Yorage nagagirik, ”At mbogut paga abu'me piyoorak nogo ti, aap yi mendek ndi mendek onggo kunggolage menggerak ambi nen wu abu obeelom kero, kwaarit nege logonet, 46wu kirin negen ambi kwaappunuk, nage nagagirik, amendek abok aret onggo mbambunuk, ti'nuk, wu kirin nogo onggo kunggolagagerak nogo pogom aret o,” yinuk, yoragagerak.
Yum ikan waganggo menggaarak eegu laarogo yoragagerak wone
47Yorage nagagirik, ”At mbogut paga abu'me piyoorak nogo ti, ikan waawok nduk, yum yi yenggenak me wuppegaatak me, yi ikan ndi ikan yonggo'nari wogo menggaarak nogo pogom aret o. 48Ikan nogo yum abu yagabit eerogo yonggo'nari unggwogwe iinok, niikkenok, yi ambet paga pi wunggo nagaatik, kwi'na'nuk, ikan abe kenok, togolowa'na yonggoppakwi, ndi, maluk kenok, mbo nappugwi, eeko menggaarak o. 49O age yobok paga togop aret eerigin o. It mbogut paga yonggo nugu menggaarak nogo, wundi wogo logomenggaarik, it aakumi abu maluk nogo it iniki koonak menggaarak inenggela'me nen leenogo 50kani kunik me mambiyamenggaarak time logonet, leenggu maakwi, ineyak nggilik maakwi, eeko logogun o,” yinuk, yoragagerak.
Wone aa'nduk yugu inom, peebi yugu inom, yorogo logorak wone
51Yorage nagagirik, Yetut nen, ”Wone ti, abok aret liippogop a?”
Yorage mbareegi, it nen, ”E o, abu aret liippogoorak o.”
52Yogo mbareegwa, at Yetut nen, ”Ti kenok, it Ala wone liiru mbanak unde nen at mbogut paga abu'me piyoorak wone waganggwi iinok ti, aap inowe ambi nen awuri yabu eeko logowak nduk, amendek iniki kunik ngget mendek inom, maan mendek inom, waganogo wumbege menggerak nogo pogom it togop aret eeko logogun o,” yinuk, yoragagerak.
Aap Nataret mendek nen, ”Yetut nineebi o,” yinuk, mbo pereegwaarak wone
(Mrk 6:1-6, Luk 4:16-30)
53At Yetut wone eegu laarak nogo abok aret yorage nagagirik, o ti mbo punuk, 54at ame wonagagim nogome wage nagagirik, it Yakuri tamban eeko menggam nogome logonet, wone mamunirage mbareegi, ”Wi,” yinuk, pi wako logonet, ”Wone nggeeme nen wagangge nagagirik, iniki warak negen ari, eerubok mendek eeke, eeke agaarik mbakop? 55At yi, o wuke menggerak aput nogo lek a? At agalo endage Mariya aret nogo lek? Ndi, at awuri ti, Yakobut inom, Yutup inom, Timon inom, Yurat inom, nogo lek a? 56At awurilogwe komologwe kunduk abok nit ninom wonogwe nogo lek a? Ninom wonogwe aret kwe, yi wone ndi wone ngga nen wagangge nagagirik, ari agaarik mbakop?”
57Yogo logonet, at Yetut nogo ineebi mbako mbareegwa, at Yetut nen, ”It aap inawi alom paga inowe-inawot inenggela'me logonet, Ala wone yorogwe iinok, inaruk liirogon konenggulik o,” yinuk, yoragagerak. 58Ndi, it aap Nataret mendek nen Yetut abet ombaka'lek wonogo mbareegwa, o time eerubok mendek apit togon eeka'lek aret wonagagerak.
Jelenleg kiválasztva:
MATIYUT 13: WNO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
