MATIYUT 14
14
Yaya Yiime Wuppiige Menggerak wareegwaarak wone
(Mrk 6:14-29, Luk 9:7-9)
1At Yetut o Nataret wonage kagak, aap endagembogut Keroret nogo nen Yetut eerit nage nogo, aruk konengge nagagirik, 2at awuri yorage logonet, ”Yaya Yiime Wuppiige Menggerak nogo kanggo menggam nen eenik a'nuk, mi'nage nagagirik, eerubok mendek eerit nage yi aret kagi o,” yoragagerak.
3-5At Keroret nogo nen at awuluk Piliput akweeluk kagak, kwe Keroriyat nogo wagangge mbareegi, at Yaya nen Keroret yoge logonet, ”Kwe ti, woorak lek kagak waganggendak me, kimbirak logorak mondok mage o.” Yoge mbareegi, Keroret nogo nen, ”Yaya warikit,” mba'nuk, pigogo keele maarogo mambiigo menggam mambereegwaarak kwe, it aakumi nen, ”Yaya ti, Ala wone yorage menggerak mendek aret o,” yogwe aruk konengge nagagirik, agabiti agagerak.
6Agabiti age nagagirik, puk wonage me, at Keroret nda'nagagerak eyom ari wage mbareegi, kwe Keroriyat aagaluk inenggela'me time kwirabik-kwirabok ari logonet, Keroret iniki ale'nggen eeppege mbareegi, 7at Keroret nen Ala enggaanom paga yoge logonet, ”Nano mendek nggino yo'nege keenok, ti aret wokkirigin o.”
8Yoge mbareegi, agalo nen wone yoreegerak muk koneneegerak me, kolaga nogo nen, ”At Yaya Yiime Wuppiige Menggerak anobak mbanak tenggap paga ndoonogo wo'niri mok o.”
9Yoge mbareegi, aap endagembogut Keroret nogo abuwa nen iniki abu maluk agagerak kwe, it laago lakome wogogwaarak inenggaanom paga Ala owak mbaneegerak me, agabiti nen aap ambi nen anobak mbanogo wogori woraawak nduk nappege mbareegi, 10keele maarogo mambiigo menggam unggwage nagagirik, Yaya enggaanok mbanogo tenggap paga ndoonogo wonok wage nagagirik, 11kolaga nogo wonok wogori wage mbareegi, kolaga nogo nen wonok agalo iri nagagerak. Ti eereegwaarak nogo aret nduk Keroret nogo nen awuri nogo yoragagerak. 12Ndi, at Keroret nogo Yaya wage mbareegi, it Yaya oone waganggwi nogo nen wogo nogogwaarik, eebe warak nogo waganogo nggween taambunuk, Yetut yori nogogwaarak.
Yetut nen aap ineebe 5000 mbi karerogo wogoragagerak wone
(Mrk 6:30-44, Luk 9:10-17, Ya 6:1-14)
13At Keroret nen Yaya wakerak nogo, Yetut aruk konengge nagagirik, ”O yime mbo punuk, aakumi lek me, ambime na o,” yinuk, yiiro paga unggwi nage nagagirik, awo nage kagak, it aakumi nen, ”Yetut nogo yiiro paga nage o,” yogwe inaruk konenggo nogogwaarik, iname lombok nen Yetut tu nggween paga at noorak mbareegim nogome inaa'nduk nogogwaarak wonogwe me, 14at Yetut yiiro paga nen wundi nage logonet, aakumi ambik kuwak aago enegen iige nagagirik, inabuwa lombok mbake logonet, it kugi andi warak inenggela'me nogogwaarak nogo obeelom eeginabeegerak.
15Obeelom eeginake kagak, o kiip age mbareegi, it Yetut oone waganggwi nogo nen at owagam wogo nogogwaarik, ”O wurik yime abu lek o. Ndi, oonegen kunduk muk kilu yuurak eeke me, aakumi inambik iname time inambi onggo mbanogo na nawak nduk, nappiyet o,”
16Yogo mbareegwa, at Yetut nen, ”It ambime nappiyoorak lek o. Inambi nawak nduk, kit nen aret wogoraanip o.”
17Yorage mbareegi, it nen, ”Nit yime we roti mbi 5, ndi, ikan 2 mban porogo wonogwe o.”
18Yogo mbareegwa, Yetut nen, ”Ti aret wo'niri wa'nip o.” 19Yinuk, aakumi ambik nogo, ”Iri'ngga paga kwi'na'nip o,” yorage nagagirik, kwi'nogo mbareegwa, at Yetut nen roti mbi 5 inom, ndi, ikan 2 inom, wappunuk, ena mbogut paga ni'nage nagagirik, ”Nogoba Ala wa,” yinuk, roti mbi nogo karerogo at oone waganggwi nogo wogorage mbareegi, it nen aakumi kuwak aago nogo tumburirogogwaarak. 20Tumburirogo mbareegwa, it nogo abok aret nonggo nogogwaarik, ndonggoppiyareegerak. Ndonggoppiige mbareegi, roti mbi inom, ikan inom, karerak ando ndiinogo pereegwaarak nogo, mbirim yum 12 eno korok togon aret yonggologo pereegwaarak. 21It roti nunggugwaarak nogo ti, kumi inom, elege mbuulogwe inom, ineebe ti, linggininabulik kwe, aap mban ineebe ti, 5000 aret wonogogwaarak.
Yetut yi ogombaga nagagerak wone
(Mrk 6:45-52, Ya 6:15-21)
22 Roti mbi nonggo mbareegwa, at Yetut nen it aakumi o time nen nappiyaakit nduk, wonage logonet, at oone waganggwi nogo yiiro paga unggwi nanuk, inaa'nduk yi enebagan wunda noorak nduk, oone omaawi paga yoragagerak. 23Yorage nagagirik, nogwe iigak, aakumi nogo iname nappiinok, alik tamban eerikit nduk, puurom paga laganeegerak alik aret wonage kagak, o kiip agagerak. 24O kiip age mbareegi, puurom time alik aret wonage kagak, at oone waganggwi nogo, yi yenggenak oolo muundak ari nogogwaarak me, o wiya inetenggen me nen mban wake logonet, yi kilaarak-mogonik eerogo yiiro nogo punggagak eeke logonet, yiiro tebeninaburak eeke me, 25at Yetut nogo o kilim nagake kagak yi yenggenak ogombaga inowagam wage 26inigen kogo nogogwaarik, inaganak wake logonet, inagabiti nen, ”Ie! Kugi aret ubi!” yinuk, kwa yereegwaarak.
27Kwa yogo mbareegwa, at Yetut nen, ”Kinogut li o.” Yorage nagagirik, ”An neebe aret me, kinagabiti yugup o.”
28Yorage mbareegi, at Peterut nogo nen, ”Ai nogoba. Kat aret kenok, an yi ogombaga kowagam woraakit nduk, yo'niru o.”
29Yoge mbareegi, ”Mok o,” yoreegerak. ”Mok o,” yoge mbareegi, at Peterut nogo yiiro paga nen wungge nagagirik, yi ogombaga Yetut iyok pit owagam nagagerak. 30Nage logonet, o wiya wake nogo enegen kage nagagirik, agabiti a'nuk, yi inikime yobok togon wambuurak eeke mbareegi, oone kwa ari logonet, ”Ie nogoba. Pi'nabi mok ubi!”
31Yoge mbareegi, Yetut eenggi nderogon pigagangge logonet, ”Kat kiniki liirogon abet nombaka'lek yi, nonggop nduk kiniki mbere wonage agandik?”
32Yoge nagagirik, imbirak yiiro paga unggwogo mbareegwa, o wiya nogo abolok lek aret agagerak. 33Lek aret age mbareegi, it yiiro paga wonogogwaarak nogo nen Yetut ayuk wuko logonet, ”Kat Ala aput abet aret keego o,” yinuk, yoreegwaarak.
Yetut nen o Nggenetaret paga kugi andi warak me, obeelom eeginabeegerak wone
(Mrk 6:53-56)
34Yogo nogogwaarik, yi enebagan wunda nogo nogogwaarik, o Nggenetaret ari nogogwaarak. 35Nogo mbareegwa, it aap time mendek nen Yetut yelok kogo nogogwaarik, o tini lombok wiirogo mbareegwa, aakumi andi warak abok aret wogoret, Yetut owagam piya wogogwaarak. 36Piya wogogwaarak nogo nen we ayum abo mban ineenggi pigaawok nduk, nggino yogo nagaatik, pigaganggwi iinok, at nen abok aret obeelom eeginake nagagerak.
Jelenleg kiválasztva:
MATIYUT 14: WNO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
