Génesis 24
24
Isaacpä warmita ashinqan
1Abrahamqa rukunam karqan. Tsaynöllam llapan ruranqankunachö Tayta Dios bendisarnin yanaparqan. 2Abrahampam yärakunqan sirviqnin karqan llapan sirviqninpitapis mas ruku. Tsay sirviqnin llapan imaykantapis rikaq kaptinmi qayaykatsir Abraham nirqan: <<Llillïman makikita churaykur#24.2 Tsay witsan llillinman makinta churar imatapis awnirqa imanöpapis cumplinanpä kanqantam niyaq. 3kay patsatapis ciëlutapis kamaq Tayta Diospa jutinchö llapan ninqäta cumplinaykipä awnimay. Kay taykanqä Canaán marka jipashwanqa tsurïta ama tätsinkitsu. 4Tsaypa rantinqa castäkuna täyanqan Harán markaman aywar juk jipashta ashimunki tsurïpa warminpä>>.
5Tsaynö niptinmi sirviqnin nirqan: <<Taytay, shamuyta mana munaptinqa ¿imatatä rurashä? ¿Tsurikitatsurä pushashä warmipa markanman?>>
6Abrahamnam nirqan: <<Tsurïtaqa ama pushankitsu. 7Ciëluchö kaykaq Tayta Diosmi nimashqa kay taykanqantsik patsata tsurïkunata, willkäkunata y paykunapita miraqkunatapis entregananpä. Paymi papänïpa wayinpita y markäpita jipimar kayman chätsimashqa.#Gén. 12.1-3, 7; 13.14-17; 15.18-21. Tsaymi angelninta mandamunqa qamwan aywananpä. Tsaynöpam tsurïpa warminpä juk jipashta pushamunki. 8Jipash shamuyta mana munaptinqa kay parlanqantsik tsayllachönam ushakanqa. Peru warmipa markanmanqa tsurïta ama pushankitsu>>.
9Tsaynö niptinmi sirviqninqa Abrahampa llillinta yataykur Tayta Diospa jutinchö awnirqan patronnin ninqankunata cumplinanpä. 10Tsaypitanam allin kaq qaraykunata apananpä alistakurqan. Tsay qaraykunata chunka camëllukunawan chaqnakurkurmi Abrahampa wawqin Nacor täranqan markaman aywarqan. Tsay markaqa Mesopotamiachömi karqan. 11Rupay jeqaykaptinnam marka yaykunaman Abrahampa sirviqnin chaykur camëllukunata pözu ñöpanchö jamapätsirqan. Tsay höram jipashkuna aywayaq pözupita yakuta apayänanpä.
12Tsaychömi Tayta Diosta mañakur nirqan: <<Patronnï Abraham yärakunqan Tayta Dios, patronnïta kuyaparnin kanan yanapaykallämay llapanpis alli kananpä. 13Kay pözu lädullanchömi shuyaräshä jipashkuna yakuta apananpä shamuqta. 14Mayqan jipashpis chämuq kaqtam nishä: <Mamïta, uylluykipita yakuta qaraykallämay>. Tsaynö mañakuptï nimätsun: <Upurkullay. Camëlluykikunatapis yakurkatsishä>. Tsaynö nimaq kaq katsun Isaacpa warminpä akranqayki jipash. Tsaynöpam musyashä patronnïta kuyar yanapanqaykita>>.
15Tayta Diosta mañakur manarä ushaptinmi juk jipash uyllun umrushqa pözuman charqan. Tsay jipashqa Betuelpa tsurin Rebecam karqan. Betuelnam Milcachö Nacorpa tsurin karqan. Nacornam Abrahampa wawqin karqan. 16Rebecaqa kuyayllapä doncëlla jipashmi karqan. Paymi pözu kaqman chaykur uyllunman yakuta wishirkur wayinpa kutikuykarqan. 17Tsaymi Abrahampa sirviqnin taripaykur nirqan: <<Jipash, yakuykita qaraykallämay>>.
18Jipashnam nirqan: <<Taytay, upurkullay>>.
Tsaynö nirmi uyllunta tsarapararqan yakuta upunanpä. 19Upuskiptinnam Rebeca nirqan: <<Taytay, camëlluykikunatapis yakurkatsishä>>.
20Tsaynö nirmi ashmakuna yakukuyänanman kutin kutin yakuta ashtarqan camëllukuna yaküyänanpä. 21Tsaymi Abrahampa sirviqninqa Tayta Diosta mañakunqannö tsay jipash kanqanta o mana kanqantapis musyayta munar upällalla rikararqan. 22Camëllunkuna yakuskiyaptinnam jipashpa senqanman qori sortïjata jatitsirqan. Tsay sortïja lasarqan joqta grämunömi. Tsaynöllam makinmanpis jatitsirqan qoripita rurashqa ishkay pulcërakunata. Tsaykunaqa lasarqan pachak (100) grämupita masmi.
23Tsaypitanam tapurqan: <<¿Pipa tsurintä kanki? ¿Papänikipa wayinchö patsakuyänäpä sitiu kantsurä?>>
24Tsaymi Rebeca nirqan: <<Noqaqa Betuelpa tsurinmi kä. Awilümi Nacor y awilänam Milca. 25Patsakunaykipä wayïpis jäkuykanmi. Päjapis qewapis camëlluykikunapä kanmi>>.
26Tsaynö niptinmi Abrahampa sirviqninqa qonquriykur Tayta Diosta adorar nirqan: 27<<Patronnï Abraham yärakunqan Tayta Dios, alabashqa kaykullay. Patronnïta kuyaparmi imaypis kuyakuq kaynikiwan castanmanpis chätsimarquyki>>.
28Tsaypitanam Rebeca cörrilla aywarqan mamanta willananpä. 29-30Rebecapa turin Labánnam qoripita rurashqa sortïjata y pulcërata makinchö panin jatiraykaqta rikarqan. Runa imata ninqantapis mamanta Rebeca willanqanta wiyaykurmi Labánqa cörrilla aywarqan pözu kaqman tsay runawan tinkunanpä. Aywarmi pözu lädunchö camëllunkunawan kaykaqta tarirqan. 31Tsaymi Labán nirqan: <<¡Taytay, wayïman aywakushun! Qamqa Tayta Dios yanapanqan alli runam kanki. Kaychöqa pununkimanräku. Patsakunaykipä wayi alistashqanam kaykan. Camëlluykikunata wichqanäpäpis corral kanmi>>.
32Tsaynö niptinmi Abrahampa sirviqninqa Labánpa wayinman aywarqan. Wayiman chaykurnam Labánqa camëllukunata paskaskir qewankuna qararqan. Tsaynöllam yakutapis alistaparqan Abrahampa sirviqninwan wallkiq runakuna chakinkunata mayllakuyänanpä.
33Tsaypita mikunanpä mësaman jamatsiyaptinmi Abrahampa sirviqnin nirqan: <<Mikunäpäpis imaq shamunqätapis willashayki>>.
Tsaymi Labán nirqan: <<¡Taytay, juklla willaykallämay!>>
34Tsaymi tsay sirviq nirqan: <<Noqaqa Abrahampa sirviqninmi kä. 35Tayta Diosmi patronnï Abrahamta bendisashqa rïcuyänanpä. Tsaymi üshankuna, cabrankuna, wäkankuna, camëllunkuna y ashnunkunapis atska mirayashqa. Paypaqa atskam ollqupis warmipis sirviqninkuna kayä. Tsaynöllam qorinpis y qellayninpis atska kan. 36Patronnïpa warmin Sarapis chakwanna kaykarmi ollqu wamrata qeshyakurqan. Paypa wamranpämi llapan herencianpis kaykan. 37Tayta Diospa jutinchömi patronnï juratsimashqa: <Kay taykanqä Canaán marka jipashwanqa tsurïta ama tätsinkitsu. 38Tsaypa rantinqa aywanki papänïpa castankuna kaqman. Paykunapita juk jipashta apamunki tsurï Isaacwan tänanpä>.
39<<Tsaynö nimaptinmi nirqä: <Tsay jipash shamuyta mana munaptinqa ¿imatarä rurashä?>
40<<Tsaymi nimarqan: <Yärakunqä Tayta Diosmi yanapashunaykipä angelninta mandamunqa. Tsaynöpam castäkunapita juk jipashta tsurïpa warminpä apamunki. 41Castäkunaman chaptiki tsurinta mana dëjapäshuptikipis awnimanqaykitaqa cumplirquykinam>.
42<<Tsaynö nimaptin shamurmi pözu lädunman kanan junaq chämurqü. Tsaychömi Tayta Diosta mañakur nirqä: <Patronnï Abraham yärakunqan Tayta Dios, yanapaykallämay Isaacpa warminpä kaq jipashwan tinkunäpä. 43Kay pözu lädullanchö shuyaraykäshä jipashkuna yakukuq shamuqta. Taytay, kamakaykatsillay patronnïpa tsurinpä warmita tarinäpä. Tsay jipashtam uyllunpita yakuta mañakushä. 44Tsaynö rugakuptï pay nimätsun: <<Upurkullay. Camëlluykikunatapis yakurkatsishä>>. Tsaynö nimaq kaqmi patronnïpa llumtsuyninpä akranqayki jipash kanqa>.
45<<Tayta Diosta mañakuyta manarä usharmi rikarqä Rebeca uyllun umrushqa yakukuq shamuykaqta. Pözupita yakuta jipiskiptinnam mañakur nirqä: <Yakuyki qaraykallämay>. 46Tsaymi uyllunta marqarkur nimarqan: <Taytay, upurkullay. Camëlluykikunatapis yakurkatsimushä>. Tsaynö nimaptinmi upurqü. Tsaynöllam camëllükunatapis yakutsimushqa. 47Tsaypitanam tapurqä: <¿Pipa tsurintä kanki?> Tsaymi nimarqan: <Noqaqa Betuelpa tsurinmi kä. Awilümi Nacor y awilänam Milca>. Tsaynö nimaptinmi juk sortïjata senqanman jatitsirqä. Tsaynöllam ishkan makinman pulcërakunata jatitsirqä.
48<<Tsaymi qonqurikuykur Tayta Diosta adorar nirqü: <Patronnï Abrahampa Diosnin, qam alli nänipam pushamarquyki patronnïpa castanpita jipashta tarinäpä>. 49Tsaynö nirmi Tayta Dios mañakurqü. Kananqa niyämay patronnïpa llumtsuyninpä tsurikita awninqaykita o mana awninqaykitapis. Mana awnimaptikiqa alfin imanashätä>>.
50Tsaymi Labánpis Betuelpis niyämarqan: <<Kayman chämunaykipä Tayta Diosmi rasunpa yanapashurquyki. Tsaynö kaykaptinqa ¡imanirrä awnïmantsu! 51Tayta Dios tsaynö kananpä destinashqa kaykaptinqa patronnikipa tsurinpa warmin kananpä Rebecata entregashayki>>.
52Tsaynö niyaptinmi Abrahampa sirviqninqa Tayta Diosta agradëcikurnin urkunpis patsaman töpanqanyaq qonqurikuykurqan. 53Tsaypitanam qoripita qellaypita alhäjakunata y fïnu röpakunata jipiskir Rebecata qararqan. Tsaynöllam turintapis mamantapis qararqan. 54Tsaypitanam Abrahampa sirviqninqa wallkiqninkunawan mikuskir y upuskir tsaychö punuyarqan. Patsa waraskiptin shärikuskirnam nirqan: <<Taytay, kananqa patronnï kaqman kutikuyänäpä despachaykayällämay>>.
55Tsaynö niptinmi Rebecapa turinwan maman niyarqan: <<Chunka junaqllapis Rebecawan qoyäriyäshärä. Tsaypitam sïqa despachayäshayki>>.
56Tsaynö niptinnam Abrahampa sirviqnin nirqan: <<Kayman shamuptï llapantapis Tayta Dios kamakaykätsiptinqa patronnïpa wayinman kutikuyänäpä juklla despachaykayällämay>>.
57Tsaymi paykuna niyarqan: <<Jipashtarä tapushun. Mä, ¿ima ninqash?>>
58Tsaynö nirmi Rebecata qayaykur tapuyarqan: <<¿Kay runawan aywayta munankiku?>>
Tsaynö tapuyaptinmi nirqan: <<Awmi>>.
59Tsaynö niptinmi ichikninpita cuidaqnin warmitawan despachayarqan. Tsaymi Abrahampa sirviqninwan y paywan shamuq runakunawan aywakuyarqan. 60Castankunam Rebecata bendisarnin niyarqan: <<Wamraykikuna, willkaykikuna y paykunapita miraqkunapis atskaman mirar waranqanpa waranqanpa kaykullätsun. Tsaynölla qampita miraqkuna llapan contrankunata vincir poderninchö katsiyätsun>>.
61Tsaypitanam Rebecaqa sirviqnin warmikunawan camëllukunata muntakurkur aywakurqan Abrahampa sirviqnin pushanqanpa. Tsaymi Abrahampa sirviqninqa Rebecata pushakurkur kutikurqan.
62Paykuna chäyänanpämi Isaacqa Lahai-Roí ninqan pözu kaqpita kutishqana kaykänä. Payqa Neguevchömi täkurqan. 63Patsa tsakaykaptinnam Isaacqa aywarqan rikachakuq. Rikachakunqanchömi camëllukuna shamuykaqta rikarqan. 64Tsaynöllam Rebecapis Isaacta rikaykur muntaranqan camëllupita yarpurqan. 65Abrahampa sirviqnintanam tapurqan: <<¿Pitä taqay shamuykaq runa?>>
Tsaymi nirqan: <<Paymi patronnï>>.
Tsaynö niptinmi Rebecaqa vëlunwan cäranta tsapakurqan.
66Isaacwan tinkuskirnam sirviqninqa willarqan llapan ima päsanqantapis. 67Tsaypitanam Isaacqa Rebecata pusharqan maman manarä wanukur täranqan toldu wayiman. Tsaychönam Rebecawan churakarnin paywan täkurqan. Rebecataqa Isaac pasaypam kuyarqan. Tsaymi mamanpäpis llakirqannatsu.
Jelenleg kiválasztva:
Génesis 24: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
