Génesis 25
25
Warmin Ceturachö Abrahampa tsurinkuna yuriyanqan
1 Crónicas 1.32-33
1Abrahampa juk warminpa jutinmi karqan Cetura#25.1 Ceturaqa Abrahampa concubïnanmi karqan (1Crón. 1.32).. 2Tsay warmichömi Abrahampa tsurinkuna karqan Zimram, Jocsán, Medán, Madián, Isbac y Súa. 3Jocsánpa tsurinkunam karqan Seba y Dedán. Dedánpita miraqkunapitam karqan Asur, Letus y Leum runakuna. 4Madiánpa tsurinkunanam kayarqan Efa, Efer, Hanoc, Abida y Elda. Paykunam Cetura warmipita miraqkuna kayarqan.
5Abrahampa llapan imaykanpis tsurin Isaacllapämi karqan. 6Concubïna warminkunachö#25.6 Abrahampa concubïnankunaqa Agar y Ceturam kayarqan. kaq tsurinkunataqa wallka wallkallam imaykankunatapis rakipurqan. Manarä wanukur rakipaykurmi paykunata despacharqan rupay yarqamunan läduman aywakuyänanpä. Tsaynöpam Isaacpita karuchö täyarqan.
Abraham wanunqan
7Abrahamqa kawarqan pachak qanchis chunka pitsqa (175) watayuq kanqanyaqmi. 8Payqa rukuna kaykar wanukurmi unay castankunawan tinkuq aywakurqan. 9Wanuskiptinnam tsurinkuna Isaacwan Ismael Macpela machayman pampayarqan. Tsayqa kaykan Mamripita rupay yarqamunan läduchömi y Zoarpa tsurin Efrónpa chakranchömi. Efrón casta runakunaqa heteo runakunam kayarqan. 10Tsay chakraqa karqan heteo runakunapita Abraham rantinqanmi.#Gén. 23.3-18. Tsaymanmi Abrahamta pampayarqan warmin Sara pamparaykanqan lädunman. 11Abraham wanuskiptinnam tsurin Isaactana Tayta Dios bendisarqan. Payqa tarqan Lahai-Roí ninqan pözu ñöpanchömi.#Gén. 16.1-14.
Ismaelpita miraqkuna
1 Crónicas 1.28-31
12Kaychömi qellqashqa kaykan Abrahampa tsurin Ismaelpa tsurinkunapä y paykunapita miraqkunapäpis.
Ismaelpa maman Agarqa Egiptupitam karqan. Payqa Sarapa sirviqnin warmim karqan. 13Ismaelpa tsurinkunam mayorpita qepayaq kayarqan Nebaiot, Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis y Cedema. 16Ismaelpa tsurinkunaqa chunka ishkaymi kayarqan. Paykuna atskaman mirarmi chunka ishkay trïbu kayarqan. Tsay tsurinkunapa jutinkuna kanqannöllam trïbunkunapa y markankunapa jutinkuna karqan. Paykunam cada ünun trïbunkunachö mandaq kayarqan.
17Ismaelqa pachak kimsa chunka qanchis (137) watam kawarqan. Wanuskirnam unay castankunawan tinkuq aywakurqan. 18Ismaelpita miraqkunam mashtakashqa täyarqan Havilapita Shuryaq. Tsayqa Egipto nación lädunpam kaykan. Tsaypam Asurman näni päsaykan. Kikinpura chikinakuykarpis tsaychömi paykunaqa täyarqan.#Gén. 16.12.
Jacobwan Esaú yuriyanqan
19Kaychömi qellqashqa kaykan Isaacpa tsurinkunapä y paykunapita miraqkunapäpis. Isaacqa Abrahampa tsurinmi karqan.
20Chusku chunka (40) watayuq kaykarmi Isaacqa Rebecawan churakarqan. Rebecaqa karqan Betuelpa tsurin y Labánpa paninmi. Paykunaqa Padan-aramchö täraq arameo runakunam kayarqan. 21Warmin Rebeca qolluq kaptinmi qeshyaq kananpä Tayta Diosta Isaac mañakurqan. Mañakunqanta Tayta Dios wiyaptinmi Rebecaqa qeshyaq rikakurqan. 22Millishta qeshyaq kaptinmi mamanpa pachanchö pelyar pasaypa nanatsiyarqan. Tsaymi Rebecaqa yarpachakur nirqan: <<Tsaynö kaykaptinqa mejor wanukümanpis>>.
Tsaymi imanir tsaynö ñakanqantapis Tayta Diosta mañakur tapukurqan. 23Tsaynö mañakuptinmi Tayta Dios nirqan:
<<Pachaykichö wamraykikuna atskaman mirarmi ishkay nacionkuna kayanqa.
Pachallaykichönam chikinakur pelyaykäyan.
Punta yuriqmi qepa yuriq kaqpa poderninchö kanqa>>.#Rom. 9.11-12.
24Rebecapa killan tinkuptinnam qeshyakurqan millishta. 25Puntata yuriq kaqpa aqtsanmi karqan puka y entëru cuerpunnam shapra karqan. Paypa jutintam churayarqan Esaúta#25.25 Esaú ninanqa shaprasapa ninanmi.. 26Esaúpa atakan aptashqam qepanta yurirqan wawqin. Tsaynö yurinqanpitam jutinta churarqan Jacobta#25.26 Jacob ninanqa ankuta aptan ninan y engañakuq ninanmi.. Rebeca qeshyakunqan witsan Isaacqa joqta chunka (60) watayuqnam kaykarqan.
Mayor kay derëchunta Esaú rantikunqan
27Tsaypitanam Esaúwan Jacob jövinyäyarqan. Esaúqa jirkapa purirmi ashmakunata wanutsiyta yachakurqan. Jacobmi sïqa maypapis mana yarquypa täkuq. 28Tsarimunqan ashmakunapa aytsanta mikurmi Isaacqa tsurin Esaúta mas kuyarqan. Peru Rebecam sïqa Jacobta mas kuyarqan.
29Juk junaq Jacob kusinakuykaptinmi Esaúqa jirkapa aywanqanpita pasaypa ajyashqa charqan. 30Tsaymi wawqinta nirqan: <<Tsay pukay pukay kusinakuykanqayki mikuyta mañakushayki. Mallaqaypitam wanuykäna>>.
(Pukay pukay mikuyta munapanqanpitam Esaúta reqiyarqan Edom jutiwan.#25.30 Edom ninanqa puka ninanmi.)
31Jacobnam nirqan: <<Mikuyta qaranä kaptinqa mayor kay derëchuykita kanan höra entregaykamay>>.
32Jacob tsaynö niptinmi Esaú nirqan: <<Mallaqaypita wanunaykaptïqa ¿imapänatä mayor kay derëchüpis väliman?>>
33Esaú tsaynö niptinmi Jacob nirqan: <<Diospa jutinchö jurarnin awnimay mayor kay derëchuykita trocanantsikpä>>.
Tsaynö niptinmi Esaúqa jurar mayor kay derëchunta tsay mikuywan trocarqan.#Heb. 12.16-17. 34Tsaynam Jacob qararqan tantatawan lenteja picantita. Mikuyta y upuyta ushaskirnam pacha junta aywakurqan. Manam imapis qokurqantsu mayor kay derëchunta trocarpis.
Jelenleg kiválasztva:
Génesis 25: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
