1 Musa 24
24
Sinibages si Isak
1Ukum si Abraham enggo ngo tua-tua kalohon, janah i karinana ngo ia ipasu-pasu Jahowa. 2Tikan sidari nina si Abraham mo taba naposona situa-tuana, simengurus hartana, “Doroken mo tanganmu mi terruh kellang-kellang pangkal pahangku. 3Sumpahken mo mi Jahowa Dèbata simengerajai langit dekket tanoh èn magahken oda ndorok riritenmu berru silot i tanoh Kanaan èn gabè sinibages anakku si Isak. 4Kennah mi lebbuhmu ngo kono mengeririt lako bana imo berru kadè-kadèngku.”
5Nai ikusoi naposo i mo ia, “Bakunè nola, mula oda uè simerbaju i menadingken sapona janah oda uè mengèkutken aku mi ladang èn? Kennah kutaruhken ngo anakmu mi lebuhmu?”
6Tapi ialoi si Abraham mo, “Mada! Oda ndorok iarahken kono anakku i mi sadèi. 7Dèbata Jahowa simengkuasai langit dekket tanoh èn sienggo mengarahken aku i bages bapangku dekket i lebbuh kadè-kadèngku nai, janah enggo mo iperbagah taba aku, berèenkenNa ladang èn bai pinemparku. Idokken ma ngo malaèkatNa lako mengurupi kono, asa jupa ko sada kalak mahan sinibages anakku i sidi nai. 8Tapi mula oda uè simerbaju i mangèkutken kono, maluah mo kono ibas bulaban bulaban i nai. Barang bakunè nola pè, ulang arahken anakku i mi sidi.” 9Nai idoroken naposo idi mo tanganna mi kellang-kellang paha tuanna si Abraham, janah mersumpah lako mengulaken kadè sinipido si Abraham idi. 10Ibuat naposona i mo sipuluh unta dekket mermatcam bagè harta maharga milik tuanna janah berkat mo ia mi kuta si Nahor imo kan juluenken kuta Mesopotamia. 11Soh kessa mo ia mi sidi, mentadi mo ibaing unta idi, i gembar sada telaga i ruar kuta. Enggo mo bon ari, janah tikkina mo daberru-daberru roh mi telaga èn lako menakui laè. 12Mersodip mo naposo i, “Ialè Jahowa, Dèbata tuanku si Abraham, urupi mo asa lot hasil sikuulaken, sidari èn. Selloh mo ukurmu midah tuanku si Abraham. 13Tengen mo, cènder ngo aku i gembar telaga èn, sigejap nai merrohen mo simerbaju i kuta nai lako meraleng laè. 14Kudokken mo nahan taba sada kalak bai kalak i nai, ‘Masèh atèmu, berrè mo aku mènum.’ Mula idokken bagèen, ‘Na, mènum mo kènè, janah unta ndènè i pè kupesobur mo!’ Idi mo kalakna alè Jahowa ipilih kono gabè sinibages naposomu si Isak. Mula terjadi ngo bagi, kubettoh mo enggo selloh ukurmu taba tuanku si Abraham.”
15-16Tikan mersodip i ia, soh mo si Rebekka imo sada kalak simerbaju dèng mi talaga i merembah taku-taku i barana. Berru si Betuel ngo ia, janah partuana imo si Nahor dekket si Milka; kaka si Abraham ngo ukum si Nahor. Roh mo si Rebekka mi talaga i, janah itaku mo laè i, nai merdalan mo ia lako balik. 17Nai lojang mo naposo si Abraham menjolmitisa, idokken mo, “Masèh atèmu alè berru, berrè mo aku mènum i taku-takumu nai.”
18Ialoi simerbaju i mo, “Mènum mo kènè,” nai ipesampur mo taku-takuna i barana nai, janah ninganna ijèmak kiongna i ipènumi mo naposo si Abraham i. 19Enggo kessa mènum ia; nina simerbaju i dèng ma mo, “Kutakui pè laè asa mersobur unta ndènè i ma, asa pulak muas pinakan i.” 20Nai iarirken mo laè i kiongna i nai mi pelangkah, nai lojang nola mo ia mi telaga i lako menaku laè, soh pulak pinakan i mersobur. 21Ningan bagidi dak iperdatèken naposo si Abraham ngo ia sipsip. Naing ngo ibettoh tah iuèi Jahowa ngo siniulakena i barang tah oda.
22Enggo kessa pulak mersobur karina unta, ibuat naposo si Abraham mo pakèen emmas maharga, nai isahurken mo mi kerahong simerbaju i, ipemasuk mo simpasang gellang emmas mi betekenna, 23nai idokken mo ranana, “Ia bagahken mo, berru isè ngo ko. Lot ma ngo ndia bekkas mermalam bai nami i bagesna?”
24“Ukum bapangku si Betuel ngo, imo anak si Nahor bak si Milka,” nina daberru i. 25“Lot ngo permalamen i bages nami lako bai ndènè, janah mbuè ma ngo komil pangaen pinakan.”
26Nai sujud mo naposo si Abraham i menembah taba Jahowa. 27Nina mo, “Nipoji mo Jahowa, Dèbata tuanku si Abraham. Tuhu ngo Jahowa mermendè basa taba tuanku si Abraham. Iarahken ngo aku tupung mendahi kadè-kadèna.”
28Nai lojang mo simerbaju i mi bages inangna, isukutken mo karina simasa i. 29-30Lot ngo turang si Rebekka mergerar si Laban. Idengkoh ngo sukuten turangna i tersèngèt sinidokken naposo si Abraham i. Idah ma ngo pakèen emmas i ègung dekket gellang i betekken turangna i. Nai lojang mo si Laban mendahi naposo si Abraham i, ai cènder dèng ngo ia rebbak dekket untana i gembar telaga i. 31Nina si Laban mo, “Kènè alè sinipasu-pasu Jahowa. Ulang mo kènè ndong i ruar èn. Ita kènè mo mi bages nami. Enggo kuhantari kami bilik bekkas ndènè bagi ma bak kandang unta ndènè i.”
32Nai ièkutken mo masuk mi bages. Ipesampuri si Laban mo embahen unta i, iberèken mo komil mahan pangaen pinakan i. Kessa i iembah mo laè morih nèhè naposo si Abraham i dekket karina denganna. 33Tikan enggo ihantari pangaen, mongkam mo pasulakken i, “Madèng mangan aku, kum mak lebbè kupesoh tennah sikuembah.”
Idokken si Laban mo, “Ranaken kènè mo.”
34Nai mengerana mo pasulakken si Abraham i, nina mo, “Ukum aku naposo si Abraham ngo. 35Ipasu-pasu Jahowa ngo tuanku idi janah ibaing ngo ia kaya jong. Iberèken Jahowa ngo bana mbuè biri-biri, kambing, lembu, unta, kalodè, bagi ma pirak, emmas, bak naposo daholi dekket daberru. 36Kessa nggeddang umur si Sara sinibages tuanku i, menubuhken anak mo ia, janah enggo mo ipesakat tuanku i karina hartana taba anakna i. 37Ipesumpah ngo aku asa kennah kuuèi nidokkenna. Nina, ‘Ulang iririt ko simerbaju i tanoh Kanaan èn gabè sinibages anakku, 38tapi kennah berru kaum bapangku ngo. Laus mo kono ndor mi sadoi.’ 39Nai kukusoi mo ia, ‘Bakunè mo mula oda uè daberru i mengèkutken aku mi sèn?’ 40Ialoi mo aku, ‘Iurupi Jahowa sikuuèi i ngo ko janah ipasulak ngo malaèkatNa asa idengani ko pesautken ulaenmu i. Kennah jumpa kono ngo mahan sinibages anakku i, berru kadè-kadèngku, imo ibas pemparen bapangku nai. 41Tapi mula itulak kalak i kono, oda kenna persumpahen nè kono.’
42Janah tikan soh aku mi telaga i ndai, mersodip ngo aku ibas ukurku, ‘Alè Jahowa, Dèbata si Abraham, baing mo alè Jahowa ulaenku ènda merhasil. 43Dak cènder mo aku tong i gembar telaga èn. Mula roh sada kalak simerbaju lako menaku laè, kupido mo tabasa asa iberrè aku mènum. 44Mula uè ngo ia mènumi aku, janah idokken ma asa ipesobur dekket untangku, ia mo pana ipilih kono alè Jahowa gabè sinibages anak tuanku i.’ 45Madèng dung kuruapken sodipku i ibas ukurku, mèter roh mo si Rebekka mengkadang kiong, janah itaku mo laè i telaga i nai. Nai kudokken mo tabasa, ‘Masèh mo atèmu, berrè mo aku mènum.’ 46Nai mèter ibuat mo kiong nikadangna i, ninganna idokken, ‘Enum kènè mo, unta ndènè i pè kupesobur ma mo.’ Nai mènum mo aku janah enggo kessa i unta-untangku pè iberrè ma mo mènum. 47Kessa i kukusoi mo, ‘Berru isè ngo ko?’ Nai ialoi mo, ‘Ukum bapangku, si Betuel ngo, imo anak si Nahor bak si Milka.’ Nai mèter kupakèken mo mi ègungna emmas dekket sempasang gellang mi betekenna. 48Sujud mo aku mersembah janah memoji Jahowa, Dèbata tuanku si Abraham. Ai enggo iteggu aku soh mi sèn, mendahi kadè-kadè tuanku, soh pejumpa aku dekket berru ndènè èn lako bai anakna i. 49Bagèndari kupidoken taba kènè, mula uè ngo kènè maing mendè taba tuanku si Abraham janah menguèi nipidokenna taba kènè kadè-kadèna bagahken kènè mo bagèndari bangku, tapi mula mberrat ngo iakap kènè, bagahken kènè ma mo, asa kubettoh bakunè nola bakinen.”
50Ialoi si Laban dekket si Betuel mo, “Kumarna bai Jahowa nai ngo karina simasa èn, oda ngo kami maing rèmpunna. 51En ngo si Rebekka; ukum kami mendokken, ièkutken mo kènè asa gabè sinibages anak tuan ndènè i ia, bagè sinidokken Jahowa.” 52Idengkoh naposo si Abraham kessa mo kata i, mèter sujud mo ia menembah Jahowa. 53Nai irongkari mo i bekkasna nai, oles, pirak dekket emmas, janah iberèken mo karina i bai si Rebekka. Bagi ma taba turangna dekket taba inangna, iberèken ngo tokor berruna i mbelgah kalohon.
54Enggo kessa i mangan, mènum mo naposo si Abraham i dekket karina denganna, janah mermalam i si. Ndungo kessa kalak i sibarembenkenna, nina naposo si Abraham i mo, “Paduè kènè mo balik aku mendahi tuanku.”
55Tapi nina turang bak inang si Rebekka mo, “Giam rebbak kami dekket si Rebekka kira-kira seminggu soh sipuluh ari nai, enggo kessa i ndorok mo ia berkat.”
56Tapi nina naposo i mo, “Ulang nè mo nemmu tahani kènè aku. Ai enggo merhasil ibaing Jahowa perdalanenku; padiat kènè mo balik aku mendahi tuanku.”
57Ialoi kalak i mo, “Sidilo mo si Rebekka, janah sikusoken bana bakunè nina.” 58Nai idiloi kalak i mo si Rebekka, janah ikusoi mo, “Nggèut ngo kono mengèkutken kalak èn?”
Ialoi mo, “Uè, nggèut ngo aku.”
59-60Nai ipaduè kalak i mo si Rebekka bak radingna berkat rebbakken dekket pasulakken si Abraham bak karina denganna i. Nai ipasu-pasu kalak i mo si Rebekka merkitè kata bagèen,
“Katerra pè gabè inang kalak merjuta-juta mo ko alè Rebekka.
Katerra pè ipetunduk pinemparmu mo karina kuta musuhna.” 61Kessa i merkebbas mo si Rebekka dekket daberru simenguda radingna, masang unta mo ia berkat mengèkutken pasulakken si Abraham i.
62Sinderrangna i, ukum si Isak enggo roh mi gurun Pasir, mengelausi telaga mergerar “Ia ngo memperdatèken Aku” janah merian kan jèhèenken tanoh Kanaan. 63Tikan sada mbon karuar mo ia i undung-undungna nai naing merdalani mi juma, idah mo lot roh unta. 64Tikan idah si Rebekka kessa si Isak, susur mo ia i untana nai, 65ikusoi mo taba naposo si Abraham i, “Isè ngo anak laki ni juma adoi bagè roh mendahi kita?”
“Tuanku ngo ia,” nina mengaloi. Nai ibuat si Rebekka mo sabè-sabèna, itutupi mo abèna.
66Nai isukutken pasulakken i mo taba si Isak karina sienggo ibahanken. 67Kessa i, iarahken si Isak mo si Rebekka mi bagasen undung-undung si Sara inangna i, janah jejap mo ia dekket si Rebekka; terapo mo ukur si Isak sibonek i kumernaken enggo kumellip inangna.
Jelenleg kiválasztva:
1 Musa 24: LAIBTD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
