1 Musa 23
23
Matè si Sara janah itokor si Abraham tanoh perkuburen
1Enggo kessa merumur 127 tahun si Sara, 2matè mo ia i Hebron i tanoh Kanaan. Bonek ngo si Abraham janah itangisi permatè sinibagesna i.
3Nai itadingken mo lebbè bangkè sinibagesna i, laus mo ia mendahi kalak Het, simengiani aur i. Nina mo, 4#Ul. 7:16; Heb. 11:9, 13 “Kalak siroh ngo aku merian i tengah-tengah ndènè; duè kènè mo kutokor sinterpuk tanoh, asa ndorok kukubur sinibageski.”
5Ialoi kalak i mo, 6“Kuhormati kami ngo kono èkuten merkuasa i tengah-tengah nami, jadi kubur mo sinibagesmi mi perkuburen simerandalna kalohon silot i kuta nami. Lolo ngo kami, merèken tanoh perkuburen bekkas sinibagesmu i.”
7Nai sujud mo si Abraham i hadeppen kalak i, 8ninganna idokken, “Mula toko ngo atè ndènè i sèn kukubur sinibagesku i, urupi kènè mo aku midoken taba si Efron, anak si Zoar, 9asa uè ia mendèaken bangku liang Makhpela nibiding jumana. I sèn mo nemmu idèa tanoh i isaksiken kènè. Luas pè kugarar hargana asa gabè milikku tanoh i.”
10Rebbak kundul ngo si Efron dekket kalak Het i i bekkas perpulungen i pèntu pengkeruhen. Nai ialoi mo ninganna isaksiken karina jelma silot i sidi, 11“Bangsangku mo gabè saksi magahken, enggo kuberèken jumangku i dekket liangna i bamu, asa i sidi ikubur kono sinibagesmu.”
12Nai sujud mo si Abraham i hadeppen kalak Het i, 13janah idengkoh karina jelma i, idokken mo taba si Efron, “Kupido bamu, asa dengkohken lebbè ranangku. Dok atèngku kutokor mo karina juma i. Jalo mo tokorna, asa kukubur sinibagesku i mi sidi.”
14Ialoi si Efron mo, 15“Sinterpuk juma, pellin empat ratus kèpèng pirak ngo hargana kadè mo artina i banta sidua? Kuburken mo sinibagesmu i mi si.” 16Iuèi si Abraham ngo harga i. Ibilang mo riar nasa buè sinidokken si Efron i, imo empat ratus kèpèng pirak, bagè timbangen sinipakkè saudagar. Igarar mo taba si Efron isaksiken karina kalak Het i.
17Bagi mo carana juma si Efron sini Makhpela kan kebincaren Mamre, gabè milik si Abraham. Imo karina juma dekket liangna bak karina kayu bak suan-suanna, bagi dekket kayu silot i perbalengenna. 18Iperketuhu karina kalak Het simertumpu i pèntu Pengkeruhen i ngo tanoh i enggo milik si Abraham.
19Nai ikuburken si Abraham mo sinibagesna i mi liang Makhpela i tanoh Kanaan. 20Bagi mo dalanna, juma dekket liang milik kalak Het kin gabè milik si Abraham mahan perkuburen.
Jelenleg kiválasztva:
1 Musa 23: LAIBTD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
