Kulaje 13
13
Ndil-mə-nda mbərə Barnabas de kə Sɔl
1 Njê-kilaje mbər tar lə Lubba kə njê-nɛ̂n-tɔjuje eeje mə Egilisi tə̂ kə̂ Antiyos. Ride nan: Barnabas, Simenyɔ kə̂ daw bbarɛ̂ nan Dəw-ndul, Lusiyus kə̂ Sirɛnn, Manayɛn kə̂ ne kə Erodə kə̂ ɔn bbe kə̂ Galile n̂-tɔkəje naan tə̂ kə Sɔl. 2Marə ndɔ n̂-mbɔnje naan mba polo Əbbə-dəwje ngaâ dɔkuje rɔde nɛ̂n-kusa a, Ndil-mə-nda pa nan: «Undaje Barnabas de kə Sɔl dang mba kula kə̂ m-bbarde mbɛɛ̂.»
3Yeenn bba, dɔkuje rɔde nɛ̂n-kusa ngaâ n̂-dujuje Lubba ngaâ goe tə̂, dilaje jide dɔde tə̂ ngaâ dinyade darə dɔtuje.
Barnabas de kə Sɔl dawje Sipərə
4 Ndil-mə-nda ula Barnabas de kə Sɔl arə daw dawje kə bbe tə̂ kə̂ Selisi ngaâ dunnje to lo tə̂ənn ta kaw ər kə dɔ dərə-maann tə̂ kə̂ Sipərə. 5N̂-teeje bbe tə̂ kə̂ Salaminn a, n̂-paje tar lə Lubba darə dəwje kəy mbɔn-naan tə̂ lə Jiipije. Jan-Markə ee tə̂ənn aw umande.
6Daalje dɔ dərə-maann le tɔyn ngaâ n̂-teeje bbe tə̂ kə̂ Papos a, dingaje marə Jiipi kə̂ to nje-əmbili ddəm to nje-kila mbər tar kə̂ tɔkɔrɔ ang ddəm. Ria nan Bar-Jeju. 7N̂-to dəw kə̂ ee mbɔr Sergiyus Polus tə̂ kə̂ to ngonn mbay kə̂ dɔ dərə-maann tə̂ le. Sergiyus Polus le to dəw kə̂ gərə nɛ̂n nya. Nula n̂-bbar Barnabas de kə Sɔl, mba bbo koo tar lə Lubba ddɛɛ̂. 8A Elimas (ri nje-əmbili kə ndɔn-tar lə gɛrɛkəje tokə baann), ndiki ta kɔku ddəw Barnabas de kə Sɔl le ngaâ n̂-sangə ddəw ta dda karə ngonn mbay le unn məɛ̂ arə Jeju ang. 9Yeenn bba, Ndil-mə-nda ddusu Sɔl kə̂ daw bbarɛ̂ nan Pɔl ngaâ aa Elimas le a, 10pa arɛ̂ nan: «Əi, nje-ngəm kə nje-kula dəwje naan tə̂, ngonn lə Əsu, əi kə̂ ə-ndiki nɛ̂n kə̂ gatə gatə ang, ndɔ kə̂ dda bba â kunda ngangə turu nɛ̂nje kə̂ ndɔju kə̂ Əbbə-dəwje gɔl wa? 11Bbasinɛn nəənn njaa Əbbə-dəwje a kundai, kəmi a tɔ. A koo lo ang ngaa mba marə kar.»
Kar tə̂ənn njaa kəm Elimas le il biriri, lo ndul dɔɛ̂ tə̂, nila kə lo kâra baa naw sangə dəw karə ila kakə jia tə̂. 12Ngonn mbay le oo nɛ̂njeenn baann a, unn məɛ̂ arə Lubba mba nɛ̂n-tɔju kə̂ dɔ Əbbə-dəwje tə̂ le gangə singɛ̂.
Pɔl de kə Barnabas dawje Antiyos nangə tə̂ kə̂ Pisidi
13Pɔl de kə njê-buwa-njaje laa dunnje to Papos ngaâ n̂-teeje Pɛrjə nangə tə̂ kə̂ Pampili. A Jan tusude inyade lo tə̂ənn a təl bbe tə̂ kə̂ Jerujalɛm. 14Pɔl de kə njê-buwa-njaje laa le dinje Pɛrjə le dawje Antiyos nangə tə̂ kə̂ Pisidi. Marə ndɔ-kuwa-rɔ tə̂ lə Jiipije, daw dandəje kəy mbɔn-naan tə̂ lə Jiipije ngaâ disije nangə̂. 15N̂-turaje makəturu-ndu kə makəturu lə njê-kilaje mbər tar lə Lubba a, njê-kɔnje dɔ kəy mbɔn-naan lə Jiipije le arə n̂-paje darəde nan: «Ngakɔnjeje, bbo eeje kə marə tar ta pa karə dəwje nəənn karə arəde singa a, ə-paje.» 16Pɔl in taar, dda jia arəde ngaâ pa nan: «See ngann Ijarayɛlje kə see dəwje kə̂ aw bbəəlje Lubba, ooje tar nəənn. 17Lubba lə dəwje kə̂ Ijarayɛl mbərə kajejedede ngaâ dda arə gəlde banya bbalje tə̂ kə̂ disije nɛ̂n nangə tə̂ kə̂ Ejipitə. Goe tə̂ a, n̂-tee kə de kə ddang Ejipitə le ddəw singa-mɔngu tə̂ laa. 18N̂-ngəmde ngɔsi kə bbal dɔsɔ mə kɔr tə̂. 19N̂-tɔl gəl-dəwje siri nangə tə̂ kə̂ Kanaan ngaâ narə nangə lə gəl-dəwje kə̂ siri le ddee to lə kajejedede. 20Nɛ̂njeenn tɔyn goe əw ngɔsi kə bbal kɔr sɔ kə dɔmin. Goe tə̂ a, narə kajejedede le njê-gangəje sariya ndərəng tee dɔ ndɔ tə̂ lə Samuwɛl kə̂ to nje-kila mbər tar lə Lubba. 21Goe tə̂ a, kajejedede le dujuje karə Lubba unda marə tɔkə mbay dɔde tə̂ ngaâ Lubba arəde Sawul ngonn lə Kis, dəw kə̂ gəl Bɛnjamɛn tə̂. Sawul le ɔn bbe bbal dɔsɔ.
22«Lubba ɔru mbay dɔ Sawul tə̂ ngaâ narə Dabbiti ddee to tɔkə mbay ləde. Lubba pa tar lə Dabbiti le nan: ‹Minga Dabbiti ngonn lə Jese. N̂-to dəw kə̂ məm ndike. Ne â nâ dda nɛ̂nje tɔyn kə̂ məm ndiki.› 23Mə nuju tə̂ lə Dabbiti â duju Jeju kə̂ to Nje-kaji-dəwje kə̂ Ijarayɛl tə̂, ddəw kâra baa kə ndu Lubba kə̂ unn. 24Kete bba karə Jeju unn kutu kula laa, Jan-Batisi ila mbər tar batɛm turu-mə arə ngann Ijarayɛlje tɔyn. 25Kar kə̂ kula lə Jan-Batisi a ta kunda ngangɛ̂ a, naw pa nan: ‹Əjəje to m-to nân wa? M-to dəw kə̂ aw ngəbbeje le ang. Ooje, marə dəw kə̂ masə ta tutu kula nɛ̂n-gɔl laa ang aw ddee gom tə̂.› 26Ngakɔnʼmje, sese kə̂ gəl Abaraham tə̂ kə see kəseje kə̂ aw bbəəlje Lubba, maji karə ə-gərəje to Lubba ula kə tar kaji nəənn ɔju dɔje. 27Njê kə̂ Jerujalɛm kə mbayje ləde gərəje Jeju ang. N̂-gərəje mə tar kə̂ njê-kilaje mbər tar lə Lubba paje kə̂ daw turaje kə ndɔ-kuwa-rɔ kâra kâra tɔyn le ang. N̂-ddaje nɛ̂n kə̂ njê-kilaje mbər tar paje le. Yeenn bba, n̂-gangəje sariya-yo dɔ Jeju tə̂. 28Dingaje marə nɛ̂n ta kunda nɛ̂n tar dɔɛ̂ tə̂ karə n̂-tɔlɛ̂ ang ngaâ n̂-dujuje Pilatə karə arə n̂-tɔlɛ̂. 29N̂-ddaje nɛ̂n tɔyn ddəw kâra baa kə tar kə̂ n̂-pa dɔɛ̂ tə̂ Makəturu tə̂ ngaâ dɔru niinnɛ̂ kakə-dəsə tə̂ dila buwa-yo tə̂. 30A Lubba arə n̂-ndol 31ngaâ n̂-tɔju rɔɛ̂ ndɔ banya narə dəwje kə̂ inje saa nangə tə̂ kə̂ Galile dannɛ̂je ndərəng bbe tə̂ kə̂ Jerujalɛm. Dede le ngaâ bbasinɛn n̂-ddeeje to njê-tar-najije laa nɔn dəwje tə̂ kə̂ Ijarayɛl. 32Jeje kara, jila mbər Tar kə̂ Maji nəənn jarəse tɔ. Nɛ̂n kə̂ Lubba unn ndue mbɛɛ̂ arə kajejedede le, 33Lubba dda arə ddee to nɛ̂n kə̂ tɔkɔrɔ horoje jee ngannde tə̂, ddəw ndol tə̂ kə̂ narə Jeju kə̂ oy ndol, tokə n̂-dda tarɛ̂ makəturu tə̂ lə Sɔm 2 nan:
‹Ə-to ngonnəm,
bbokənɛn marə ə-ddee to ngonnəm ngaa.›#13:33 Sɔm 2:7
34«Lubba arə noy, a n̂-ndol mba karə da-rɔɛ̂ təl aw ndum buwa tə̂ ang ngaa. Mba ne njaa n̂-pa nan: ‹Mâ karəse nɛ̂nje kə̂ maji tɔyn kə̂ munn ndum ta karə Dabbiti le njaa.› 35Mba yeenn bba, n̂-pa tarɛ̂ Makəturu tə̂ lə Lubba tɔ nan: ‹Â kinya dəw ləi kə̂ unn rɔɛ̂ tɔyn mbai karə ndum buwa-yo tə̂ ang.›
36«Kar tə̂ kə̂ Dabbiti isi nɛ̂n kəm baa le, n̂-dda nɛ̂n tɔyn kə̂ Lubba ndiki ta karə n̂-dda n̂-tunga. Goe tə̂ a, noy, n̂-dubbe mbɔr kɛɛ̂jedede tə̂ ngaâ da-rɔɛ̂ tuju. 37A ne kə̂ noy, a Lubba ndole le n̂-ndum ang. 38Yeenn bba ngakɔnʼmje, maji karə ə-gərəje to ddəw tə̂ lə Jeju le bba daw pa darəse nan Lubba a kɔru tar majang ləse dɔse tə̂. Ndu lə Mɔyijə asə dda karə dəw ddee gatə gatə kəm Lubba tə̂ ang. 39Ddəw tə̂ lə Jeju bba dəw kə̂ unn məɛ̂ a, tar majang ɔru dɔɛ̂ tə̂. 40Yeenn a, maji karə aaje rɔse mba nɛ̂n kə̂ n̂-dda tarɛ̂ makəturu tə̂ lə njê-kilaje mbər tar lə Lubba nəənn a ddase. Tar nɛ̂n le nan:
41‹Ooje! See njê-yabbəje dəwje,
arəje bbəəl ddase ta ə-gotoje kə ddang,
mba mâ dda marə nɛ̂n ndɔ tə̂ kə̂ isije nɛ̂n kəm baa,
bbo dəw ɔru gəl nɛ̂n le arəse a, â ndikije tə̂ ang#13:41 Abakukə 1:5.› »
42Kar tə̂ kə̂ Pɔl de kə Barnabas daw teeje kə ddaka a, dəwje le dujujede karə ndɔ-kuwa-rɔ kə̂ guku a, n̂-təlje dɔ tar tə̂ənn le bbay. 43Dəwje kə̂ mbɔnje naan le sanrɛje naan a, marə Jiipije nya kə dəwje kə̂ toje to Jiipije ang kə̂ aw poloje Lubba unnje go Pɔl de kə Barnabas. Pɔl de kə Barnabas le n̂-paje tar darəde ngaâ n̂-ndəjəjede karə n̂-naynje kə ndɔ tɔyn ddəw mə-maji tə̂ kə̂ Lubba dda kə de.
Pɔl de kə Barnabas n̂-turuje kəmde kə rɔ dəwje tə̂ kə̂ toje to Jiipije ang
44 Ndɔ-kuwa-rɔ tə̂ lə Jiipije kə̂ goe tə̂ a, dəwje kə̂ Antiyos mbɔnje naan tokə banya ta koo tar lə Əbbə-dəwje. 45Jiipije ooje dəwje kə̂ banya le a, mə ddade. N̂-paje tar kə̂ aw tila kəm tar lə Pɔl ngaâ n̂-tajɛ̂je. 46Pɔl de kə Barnabas n̂-paje tar kə bbəəl ang darəde nan: «Sese â, to ta karə ə-toje to dɔngɔr dəwje kə̂ ja pa tar lə Lubba nəənn karəse. A ə-mbətəje tar le ngaâ sese njaa ə-təlje ooje rɔse to dəwje kə̂ asəje ta kinga təbbə kə̂ to kə ndɔ kə ndɔ ang. Yeenn bba, n-turu kəmje kə rɔ dəwje tə̂ kə̂ toje to Jiipije ang ngaa. 47Mba, ndu kə̂ jinga ta Əbbə-dəwje tə̂ njaa nan:
‹Mundai karə ə-ndoko horo kəsə gəl-dəwje tə̂,
karə ta ə-nja kə tar kaji nəənn kɔyn nangə tə̂ tɔyn.›#13:47 Ejayi 49:6»
48Dəwje kə̂ toje to Jiipije ang ooje tar le a, rɔde nəəlde nya ngaâ dɔsuje gaji tar lə Əbbə-dəwje. Dəwje kə̂ Lubba mbərəde tokə kete karə dinga təbbə kə̂ to kə ndɔ kə ndɔ ddeeje to njê-mə-kunnje.
49Tar lə Əbbə-dəwje taa dɔ nangə kə̂ Pisidi le tɔyn. 50A Jiipije ɔsuje kutu dɛnɛ̂nje kə̂ isije lo kula tə̂ kə̂ bo kə̂ aw poloje Lubba ddəm ɔsuje kutu njê-kɔn-bbeje ddəm arə dinje n̂-ddaje Pɔl de kə Barnabas maji ang ngaâ n̂-tubbade dɔ nangə tə̂ ləde le. 51Pɔl de kə Barnabas le n̂-tundaje bum nangə kə̂ gɔlde tə̂ ngaâ dawje bbe tə̂ kə̂ Ikoniyɔm. 52A njê-njaje go Əbbə-dəwje tə̂ kə̂ naynje bbe tə̂ kə̂ Antiyos eeje kə rɔ-nəəl nya ddəm Ndil-mə-nda ddusude ddəm.
Jelenleg kiválasztva:
Kulaje 13: KabbaDkS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
