Kulaje 12
12
Erodə tɔl Jakə ngaâ ila Piyɛr kəy-kula tə̂
1Dɔ ndɔɛ̂ tə̂ənn, tɔkə mbay Erodə unn kutu dda nɛ̂n kə̂ maji ang kə marə dəwje kə̂ Egilisi tə̂. 2Narə n̂-tɔl Jakə ngokɔn Jan kə tɔkə kiya. 3Noo a, nɛ̂n kə̂ n̂-dda le arə rɔ-nəəl Jiipije. Yeenn bba narə duwa Piyɛr. Kar kə̂ duwa nɛ̂n Piyɛr le to kar kə̂ Jiipije aw ddaje kusu mapa kə̂ n̂-dda kə wum ang. 4Erodə le arə duwɛ̂ dilɛ̂ kəy-kula tə̂. Ninyɛ̂ ji mbambaje tə̂ dɔku gire misan kə̂ uwaje dɔ naan sɔ sɔ karə n̂-ngəmɛ̂je. Nəjə karə kusu Pakə nday bba ta gangə sariya dɔɛ̂ tə̂ kəm dəwje tə̂ tɔyn. 5Piyɛr ee kəy-kula tə̂, a njê-mə-kunnje aw dujuje Lubba til kə kar mbɛɛ̂.
Anjə lə Əbbə-dəwje ɔru Piyɛr kəy-kula tə̂
6Mə til tə̂ kə̂ lo-karɛ̂ a, Erodə a ta gangə sariya dɔ Piyɛr tə̂ le, Piyɛr le aw tibbi horo mbambaje tə̂ joo. N̂-tɔɛ̂ kə kula njamji joo ngaâ marə mbambaje aw ngəmje ta-kəy le tɔ. 7A ta koo a, marə anjə lə Əbbə-dəwje unda lo tee ngaâ mə kəy-kula le ndoko. Anjə le ɔru kar Piyɛr arə ndol ngaâ pa nan: «In taar njangə.» Kula njamjije kə̂ jia tə̂ le gaynje nangə̂. 8Anjə le pa arɛ̂ nan: «Uwa bbəri kə əndaar-kuwa-bbər ləi ta ula nɛ̂n-gɔl ləi.» Piyɛr le dda tokə baann. Anjə le pa bbay nan: «Ula kubbu-kul ləi ta unn gom!» 9Piyɛr tee mə kəy-kula tə̂ le oso goe tə̂. Nəjə to nɛ̂n kə̂ anjə le aw dda le to nɛ̂n kə̂ tɔkɔrɔ ang, mba noo to nin â naw nin. 10N̂-ndayje lo kə̂ dɔngɔr kə ye kə̂ joo kə̂ mbambaje aw ngəmje a, n̂-teeje ta-kəy tə̂ kə̂ n̂-dda kə andə-narɛ. To ta-kəy kə̂ daw dandə nɛ̂n kə mə bbe tə̂ le. Ta-kəy le təəyn kə dɔɛ̂ baa nɔnde tə̂. N̂-teeje ddaka ngaâ dunnje marə ddəw a, kəm naan tə̂ nəənn njaa anjə le tusu Piyɛr inyɛ̂. 11Yeenn ngaâ Piyɛr gərə rɔɛ̂ ngaâ pa nan: «Bbasinɛn m-gərə ngaa. Tɔkɔrɔ njaa, Əbbə-dəwje ula anjə arə ɔrum ji Erodə tə̂ ddəm mə nɛ̂n tə̂ kə̂ maji ang kə̂ Jiipije ndikije ta dda səm ddəm.»
12N̂-gərə nɛ̂n le kə majɛ̂ a, naw kəy lə Mari kɔn Janje. Jan le daw bbarɛ̂ nan Markə tɔ. Lo tə̂ənn, njê-mə-kunnje mbɔnje naan tokə banya aw dujuje Lubba. 13Piyɛr unda ta-ndoko a, marə nje-kula kə̂ dɛnɛ̂n kə̂ ria nan Rodə ddee ta koo. 14N̂-gərə ndu Piyɛr le ngaâ rɔɛ̂ nəəle nya, a nɔru ta-ndoko le ang a, n̂-təl kə ngɔru nandə kəy ta kaw pa karəde to Piyɛr â ar ta-ndoko tə̂ le. 15N̂-paje darɛ̂je nan: «Ayn wooy wa?» A Rodə le pa bbay nan: «Tɔkɔrɔ njaa nee tə̂ənn!» Dilɛ̂je tə̂ nan: «Yeenn a, to anjə laa.» 16Piyɛr unda ta-ndoko le bbay bbay ngaâ n̂-ddee dɔruje ta-ndoko le a, Piyɛr â ar nəənn ngaâ dɔde ayn. 17N̂-dda jia narəde karə n̂-paje tar ang ngaâ nɔru gəl gusu kə̂ Əbbə-dəwje ɔrɛ̂ nɛ̂n kə ddang kəy-kula tə̂ le. Ta kutu nɛ̂n dɔ tar laa a, n̂-pa nan: «Aw paje tar nəənn arəje Jakə kə kəsə njê-mə-kunnje.» Goe tə̂ a, nɔtu ngaâ nunn ddəw naw kə marə lo tə̂ dang.
18Lo arɛ a, mbambaje le jɔkuje rɔde nya ngaâ n̂-dujuje se ddi bba inga Piyɛr le wa? 19Erodə arə daw sangɛ̂, a dingɛ̂ ang. N̂-duju tar njê-ngəmje ta Piyɛr le ngaâ nunn ndu karə n̂-tɔlde. Goe tə̂ a, Piyɛr le in Jude aw Sejare. N̂-dda ndɔ tɛn lo tə̂ənn.
Tar yo lə Erodə Agiripa
20Wungu ɔn Erodə nya dɔ dəwje tə̂ kə̂ Tir ddəm dəwje tə̂ kə̂ Sidɔn ddəm. A njê kə̂ Tir kə njê kə̂ Sidɔn le ooje ta naan ta ddee kooe. N̂-gɔlje tar kə Balastus kə̂ to nje-ngəm nɛ̂nje le tɔkə mbay le darə noso gode tə̂. N̂-ndikije karə ddekeke to horode tə̂, mba nɛ̂n-kusaje ləde inje nangə tə̂ lə tɔkə mbay le bba aw ddee nangə tə̂ ləde.
21Ndɔɛ̂ kə̂ dɔju le asə a, Erodə ula kubbu mbay laa aw isi ngende-mbay tə̂ laa ngaâ pa tar arəde kəm dəwje tə̂ tɔyn. 22Dəwje uruje əkii nan: «Tar kə̂ ta Lubba tə̂ â nəənn bbo tar kə̂ ta dəw tə̂ ang.» 23A kar tə̂ənn njaa, anjə lə Əbbə-dəwje unda Erodə, mba narə dəwje ɔsuje gajɛ̂ turu Lubba tə̂. Yeenn bba koreje ɔɛ̂nje ngaâ noy.
24A tar lə Lubba nja kə kete kete ngaâ aw taa lo. 25Barnabas de kə Sɔl n̂-tungaje kula ləde Jerujalɛm ngaâ daw təlje a, dawje kə Jan kə̂ daw bbarɛ̂ nan Markə jide tə̂.
Jelenleg kiválasztva:
Kulaje 12: KabbaDkS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
