Jénesii̱s 12
12
Bi̱ tsꞌén kjindiboáni Abraa̱n
Bi̱ tsꞌén Néná katsjáxaá Abra̱n
1Néná bi̱ katsoó Abra̱n:
«Tꞌíjñimasin ji nanguìi̱ ko̱jo xota̱ xingu̱i̱ ji, ko̱jo ndiꞌaa̱ xota̱ xi xcháa̱, kó tꞌen ji ngu̱i̱ndie xi sꞌe̱ kokoo. 2Kó ngo na̱xi̱ńdá xí ta̱nisién je sa̱ꞌin an ngayeje xota̱ tji̱e̱e̱, kó sa̱ꞌinchikonñeé, kó nkꞌa kꞌuijñá an jaꞌée̱n, kó ta̱ngatꞌanii̱ ji nga kjín xota̱ xi ka̱machikonñé. 3Xi nda sa̱ꞌínjoo̱, nda ka̱mataꞌin, kó xi ndajín sa̱ꞌínjoo̱, ndajín ka̱mataꞌin kui. ¡Ta̱ngatꞌanii̱ ji nga ka̱machikonñé ngayeje na̱xi̱ńdá xí tjín nga̱sondiee̱!»
4-5Kó Abra̱n tsintꞌiéꞌeén Néná, kó jatjoni nangui Araa̱n, sꞌe̱ kijí nangui Kanaa̱n, kó kijíjo̱ chjo̱ón ko̱jo nda̱ xi ꞌmí Loo̱t, kui xi ndií ntsꞌi̱e̱, ko̱jo ngayeje moso̱ xi kisꞌiee̱ xi tsꞌatsie ki̱a̱ nangui Araa̱n, kó ti̱ kijíjo̱ ngayeje ni xi kisꞌiee̱ nga. Ichítié ko̱jo kan ún noó Abra̱n nga bo̱a̱ kamá.
6Kui ni̱xtjinján xota̱ Kanaa̱n to̱kó ki̱a̱ kisꞌińdo nanguii̱, ki̱a̱ jaꞌa Abra̱n ngaskande nga jachó ngu̱i̱ndie xi ꞌmí Sikee̱n nínga tikón yámoree̱. 7Kó Néná jatjokjaá Abra̱n ki̱a̱a̱, kó bi̱ katsoó: «Xota̱ tji̱e̱ tse̱ boá xi tsjàa̱ ngayeje kui tꞌananguii̱».
Kó Abra̱n ki̱a̱ katsꞌéndaa̱ ngo ṉchandikón Néná, ngatꞌa̱ ki̱a̱ jatjokjaá. 8Sꞌe̱ kijí ra ngo na̱xi̱ xi tikón xtji̱e̱e̱n nínga fotjo tsꞌueé ki̱a̱ na̱xi̱ńdá Betee̱l, kó nga jachó ki̱a̱a̱, ki̱a̱ katsꞌénda ndiꞌaa̱, kui xi tji̱xi̱ín cho̱ kiniꞌándani. Na̱xi̱ńdá Aii̱ xtji̱e̱e̱n nínga fotjo tsꞌueé kisꞌijñanii̱ kui ngu̱i̱ndiee̱, kó na̱xi̱ńdá Betee̱l xtji̱e̱e̱n nínga ꞌbosꞌien tsꞌueé kisꞌijñanii̱. Kó ti̱ ki̱a̱ katsꞌéndaa̱ ngo ṉchandikón Néná nga. 9Kó Abra̱n jatjoni ki̱a̱a̱, sꞌe̱ kijí xtji̱e̱e̱n nangui kixí xi tikón xtji̱e̱e̱n na̱ngui.
Bi̱ tsꞌén jachó Abra̱n nangui Ejipto̱
10Kui ni̱xtjinján kisꞌie ngo kjindiá xí ta̱nisién ꞌniú ngayeje nangui Kanaa̱n. Achichí ꞌniú kamá kui kjindiaá nga ngaskande Abra̱n nangui Ejipto̱ kijíkꞌíjñá, ngatꞌa̱ kisꞌie ni chinie kui ngu̱i̱ndiee̱. 11Nguije makjáchó má Abra̱n na̱xi̱ńdá Ejipto̱, bi̱ katsoó na̱ Saraii̱ chjo̱ón:
«¡Jéꞌe̱n, jè be an nga achichí tsjákjiꞌi ji! 12Kó nga sku̱i̱e̱e̱ xota̱ Ejiptoo̱, ko̱jo nga sku̱i̱e̱ nga chjo̱ónna má ji, sa̱ꞌínkꞌiénna, ta̱nga ji jmí ni sa̱ꞌínjo̱jiín. 13Kuíni nga kjiꞌa nga ko̱síyaá kui jaá ꞌyá mánii̱ an, ndichja Abra̱n án tꞌíi̱n, tsi̱ꞌe̱ nga nda si̱ꞌanjo̱na, kó si̱ꞌankꞌienjínna ta̱ngatꞌanii̱ ji».
14Kó nguije tsꞌasꞌien Abra̱n na̱xi̱ńdá Ejipto̱, xota̱ xi chji̱a̱ni ki̱a̱a̱ kamábe nga na̱ Saraii̱ achichí tsjákjiꞌi. 15Kó já xí tsꞌenxátꞌaa̱ nda̱ ree̱ kijítsáyaá nda̱ ree̱ nga achichí tsjákjiꞌi kui naa̱. Kó nda̱ ree̱ tji̱e̱nmá tsíꞌá nga tsanguínjo̱ na̱ Saraii̱ ndo̱bo̱a̱xaá. 16Kó kui ree̱ nda katsꞌénjo̱ Abra̱n, ta̱ngatꞌanii̱ na̱ Saraii̱, ngatꞌa̱ katsjaá cho̱tsa̱nga̱, cho̱yojo, bórró xíꞌin ko̱jo bórró ínchjín, moso̱ ko̱jo chji̱ni̱e̱ꞌbo ko̱jo cho̱toꞌoyitsꞌén. 17Kó kui nii̱ tsjájín kamaá Néná, kó chiꞌin xi ta̱nisién ꞌniú ndajín katsanguiyaa̱ nda̱ ree̱ ko̱jo xota̱ ndiꞌaa̱. 18Kósꞌe̱ nda̱ ree̱ tatra katsanguiyakjaꞌá Abra̱n, kó bi̱ katsoó:
«Míkjo̱a̱a̱ nga bo̱a̱ kjiꞌi ni xi kiniꞌínje̱ní. Ánní nga kiꞌmíyéjínní nga chjóo̱n ma na̱ Saraii̱. 19Ánní nga: Ndichja án má kase ji. A yejín ji nga jè chjo̱ónna sa̱ꞌin an katsaki. Jiꞌín, chjábé chjóo̱n, kó chjéndi̱yáa̱ kꞌi̱e̱e̱».
20Kósꞌe̱ nda̱ ree̱ katsjaá kjo̱a̱ xotaa̱ tsi̱ꞌe̱ nga tsꞌaxié Abra̱n kui ngu̱i̱ndiee̱, kó Abra̱n kaꞌnaxié kui ngu̱i̱ndiee̱ ko̱jo chjo̱ón ko̱jo ngayeje ni xi tjiín.
Jelenleg kiválasztva:
Jénesii̱s 12: MAIX
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
