LATDIUTATMEI 17
17
Thessalonika khou
1Kaney Amphipoli lev Apollonia kaidai tat ruan patna, Thessalonika kaidai khou guang the. Mi khou tei sinagog nai khwan e. 2Paul katuang kachav swmei thei layna, sinagog ku khwan e. Khoutei kamei Sabbath dak kathumh meic nunc lev Nthanmei Latrik khou rui kathai nchamc bam khwan e. 3Nthanmei Latrik kabac dinclouna Khrista hei ryanra ryanriu khaengvna theihmei khou rui ringcthau dat nipui ge nai e twmei lyanna, “Ai rui nangniw khou dinc ndauh bammei Jisu hei Khrista kiu the,” twna dinclou he. 4Kumna kaniw pang khou gaanvsaekc ta kabah tithaylou tina, Paul khatni Sila thei laylou the. Mi na hamhna ravning nthukmei Grikmei nunc meic kangdai rui khatni meicdaihmei ntumei nunc mpeyna ni laylou the.
5Tiki Jihudimei nunc rui howti the. Kumna kachangc pat makmei chaengdai khou bammei meic kangdai kabai guangna, kaniw rui mi kaidai tei tikachin karo the. Kaniw rui Jason kai kwamna Paul khatni Sila ta charuangc khou laa pat khang karamc the. 6Kaniw kaney ta phu tow lamc makna, Jason khatni chana punav swmei gaanvsaekc ta kaidai khou ngamv naimei nunc hu khou sat guangna kaucna sa the, “Mi kandic khou swkadat kadaengv tat bammei mei nunc mi khou ni guang the. 7Kumna Jason rui kaniw ta laalou the. Kaniw rui guangh baihmei, kazanc Jisu tumeipu nai e twna sana kaniw kapwmna Kaisar latdanv khumthina taanc the.” 8Kumna meic guay lev kaidai khou ngamv naimei nunc rui mi hei chu pwkhou kaniw lung katuakc the. 9Kaniw rui Jason khatni baihmei nunc khou rui syan laana kaniw ta mpatlou the.
Beria khou
10Kumna zingc keypui lev chana punav guay tei rui kaluak kalat Paul lev Sila ta zingbangc thangc Beria kaidai thangc ndiulou kan the. Kaney mi bamv khou tei guangna sinagog ku the. 11Mi khou tei bammei Jihudimei nunc tei Thessalonikamei nunc suangc chakuy khwan e. Kalam thu kaniw Paul lat lungh gutna nking e khatni Paul lat guay tei kachangc ni twmei Nthanmei Latrik tingmik pum mincna kathai e. 12Kumna kaniw meic mpeyna lwm khwan e, khatni champouhlou nuhmei Grikmei ntumei mpeyna khatni nggaanvmei mpeyna lwm khwan e. 13Tiki Thessalonika khou bammei Jihudimei nunc tei rui Paul rui Beria khou Ravguangc lat dinc ndauhlou kan the twmei thay lana, kaniw rui mi khou tei ni guangna meic kangdai lung kathouh kalanghna lat tipat the. 14Kumna kaluak kalat chana punav guay rui Paul ta duipui paengc nganv suanc patlou the. Tiki Sila lev Timothi thu mi khou tei bam duc the. 15Paul ta suanc patmei nunc rui Athen kaidai suanc tangclou the. Kumna Sila lev Timothi kadaeng khou ngampui kamv katumcna guang dat khang salou khang kadyloumei lat phungcna tat dat kan the.
Athen khou
16Paul Athen khou Sila lev Timothi ta nkhwan bam khou, mi kaidai khou tei ravmaengc rui padik bammei ta kamei howna kalung kabiu the. 17Kumna kamei sinagog khou Jihudimei nunc khatni ravning nthukmei nunc lev, khatni kaithyan khou tingmik pum kamei lev kadouchana ariwmei nunc lev kathai nchamc khwan e. 18Kumna Ipikuriamei, khatni Stoikmei ntakmei gaanvsaekc rui ni kata lat adow khwan e. Gaanvsaekc rui, “Lat pare bampui mei hei tabui sa nii lana cho?” twna sa the. Baihmei nunc rui, “Kamei hei kandih baihmei rav nunc lam dinhpui mei khang zi e,” twna sa the. Kalam thu kamei rui Jisu khatni theihmei khou rui ringcthaumei lam dinc bam khwan e. 19Kaniw rui Paul ta zayna Areopagas kawmei meitin bamv khou laa guangna, “Nang rui nchamloumei latdyn kathanc hei tabui cho, aniw thay nii e. 20Kalam thu nang rui aniw nukuanc khou ramhkhat kadath datmei tichulou the. Hei zaeng rui lat guay hei tabui cho twmei aniw thay nii e,” twna sa the. 21Athenmei nunc khatni mi khou tei lungc bammei gin nunc tei lat thanh thanh samei hamh e thei nkingmei khou kaniw kaganv swmaan bam ni khwan e. 22Khoutei Paul rui Areopagas tuang meitin bamv mav khou ding thauna sa the, “He Athenmeithiu, nangniw hei ramh lam katana khou ravning nthukmei nunc e twmei ai how e. 23Kalam thu ai tat ruanna nangniw tuang kalumpui bamv guay zauc pw ki, ‘Thay Makmei Racguangc khou,’ twna karuc khou hyloumei ravchabamv akhat how e. Nangniw thay makna kalum bammei kiu ai rui nangniw khou dinc bammei Racguangc hei the. 24Mbaanv khatni mi lungc khou naimei ramh katana damcloumei Racguangc hei tingkauh lev kandih Kaipouc e, kumna kamei maansei baanc rui kasiamhmei ravkai khou lungh mak ge.#1 Ki 8.27; Isa 42.5; Lat 7.48 25Khatni kakhang ramh ntangh mak tuang nai e twna maansei baanc rui kata siamruai sw khang kage maek ge. Kalam thu kamei rui ramh katana khou ringhmei thiu khatni ramh katana tiilou e. 26Kumna kamei rui meic gaanv khat khou rui maansei zaat kapwmna ta kandih nam ruc kapwm khou lungh khang kasiamhlou the. Kamei rui dingloupui tuang kakwm kaganv guay lev kaniw lungc nipui ramvrei guay damclou the. 27Kamei rui mi kumna swloumei hei kaniw kata phu khang e, kumna kalam khou geicna howpui thei layna kata phu tow nuh khang e. Kum khwan sini kamei thu aniu kathuic khou rui ducna bam mak ge. 28Kalam thu,
‘Kakhou rui aniu ringcna,
kalung kaguanna meic swna lungc bam tuang e.’
“Nangniw tuang latlu lianghmei gaanvsaekc rui ni mi kumna sa e,
‘Kalam thu aniu ni kanac nunc e.’
29“Hei zaeng rui aniu hei Ravguangc nac nunc swna, aniu rui Ravguangc hei kachaekc rui, daandi rui, ham e thei, ntauh rui maansei thyam rui kasiamhmei ravmaengc hei kumc khuangh e twna aniu ning lak nina e. 30Hei zaeng rui, ramh thay makpui ganv guay tei Ravguangc rui zauc samlou the; tiki ntaw thu kamei rui kabamv kathuic khou maansei katana lungh laih khang latdanv patlou the. 31Kalam thu kamei rui kadah patloupui mei gaanv khat paan rui mbaanv kapwm ta nchumhmei khou latzan sw nipui Tingmik akhat nrianhlou the twmei kamei rui mi pu ta kiuc theihmei khou rui tiringcthaulouna meic kathuic khou lyanlou the.”
32Theihmei guay ringcthaupui lam khou Paul rui samei tei kaniw chu la khou kaniw pang khou meic gaanvsaekc rui sinnui e; tiki baihmei nunc rui, “Mi lam hei aniw nang khou rui nking dat nii e,” twna sa the. 33Kumna Paul mi khou tei rui tat pat kan the. 34Tiki meic gaanvsaekc kathei laylouna lwm the. Mi nunc kiu Areopagas tuang mei Dionusia; Damari kawmeipui gaanv khat, khatni baihmei nunc ni e.
Jelenleg kiválasztva:
LATDIUTATMEI 17: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
