LATDIUTATMEI 16
16
Timothi Paul lev Sila Thei Lay Tatmei
1Paul Darbi khou rui Lustra khou guang the. Mi khou tei ziap gaanv khat kazanc Timothi twna kawmeipu nai khwan e. Kapui hei lwmloumei Jihudimei e, kumna kapu thu Grikmei e. 2Kamei hei Lustra khatni Ikonium khou bammei lwmmei guay rui sachuyna bammeipu e. 3Paul rui Timothi ta nduangh tat nii lana gihruamc the. Mi bamv guay khou tei bammei Jihudimei nunc rui kapu hei Grikmei e twmei thay tina mi hei swpui tuang e. 4Kaniw kaidai guay khou tatlouna, Jerusalem khou bammei latdiutatmei nunc khatni gaanvthaih nunc rui dinglou kanmei riak tei kaniw khou dinclou the, kumna mi guay tei piu khang dinclou the. 5Kumna phwamling guay ta tei lwmmei khou titanclou the, kumna tingmik kathuic lwmmei mei sing mbu thau the.
Troa khou Paul Ndawman Howmei
6Kaniw ta Asia kandih khou Gaychamv dinh khang Bumaengh Nthanmei rui nuhlou ti makna, kaniw Phrugia lev Galati ramv tat ruan pat the. 7Kaniw Musia ramv tangc pwkhou, Bithunia kandic thangc tat khang karamc the; tiki hei tei Jisu tuang Bumaengc rui nuhlou mak khe. 8Kum tina kaniw Musia tat kaan keyna,#tat kaan keyna; tat ruan keyna. Troa key the. 9Mi nungc zingbangc tei Paul ndawman akhat how the. Mi khou tei Makidoniameipu gaanv khat dingna, “Makidonia khou guangna aniw ta nkhavlou o!” twna sa the. 10Mi ndawman tei how pwkhou, aniw katumcna Makidonia thangc tat khang sw the; kalam thu mi khou bammei nunc khou tei Gaychamv dinclou khang Ravguangc rui aniw ta kaw the twna aniw laa the.
Philippi khou: Ludia lungh laic Guangmei
11Aniw Troa khou rui rungh tuangcna, nzut phutna Samothraki duipuidic khou guang the, kumna nthuanh thauna Niapolis kaidai tangc the. 12Mi khou tei rui aniw Philippi kaidai khou guang the. Mi hei Makidonia kandic tuang kaidai daihmei#Makidonia kandic tuang reymei district tuang kaidai, hamh e thei Makidonia kandic tuang kaidai daihmei twna baanhhy baibal asaekc khou hylou e. akhat re. Mi hei Rommei nunc bampui bamv akhat ni e. Aniw mi khou tei tingmik mpeyna bamlou e. 13Sabbathneic, raenghkat paengc thangc duibaek daeng khou, Jihudimei nunc huayneypui bamv nai khuangh e twna ningpui bamv khou aniw pat the. Aniw dungc keyna, mi khou tei guang kaduai bammei ntumei nunc khou pary raclou the. 14Aniw pary nkingmei nunc pang khou Thuatira kaidai khou rui guangmei, Ludia twna kawmei, haengc nrymmei phey zuanhmei gaanv khat bam khwan e. Mi pui hei Ravguangc ta kalummeipui e, kumna Paul rui samei tei lungh gutna nking khang Poubauhmei rui kalungning laanclou the. 15Kamei khatni kakai kaikhuncmei guay duilup tang pwkhou, “Ai hei Poubauhmei khou lwmlou changhpui mei di the twna nangniw rui laalou e thei, akai khou guang bangvlou o,” twna aniw ta kaw the. Kumna aniw tat the.
Philippi tuang Kangkai khou
16Zaeng neih khat aniw huayneypui bamv thangc tat khang tat bam khou, kakhou ravsic gutna hei tei rui guang nimei ta dinc kasuakc bammei bangh tunacpui gaanv khat aniw ta ariw the. Kamei rui guang nimei ta khanlouna kakaipouc nunc khang syan mpeyna ntaanvpui chaeng sw bam khwan e. 17Kamei Paul lev aniw thei khou tatna, “Mi pu nunc hei Kauh Liangmei Racguangc bangc nunc e! Kaniw hei nangniw khou kanloumei chaeng dinclou bammei nunc e,” twna kauc the. 18Kamei mi hei kumcna tingmik mpeyna sw guang ti khou, nkhamh khou thu Paul kaningsumcna thei karih patna, “Mi pui khou rui tat pat khang ai rui nang khou Jisu Khrista zanc khou latdanv tii the!” twna mi pui khou bammei bumaengc khou tei sa the. Mi dyng khou tei mi bumaengc tei tat pat kan the.
19Mi pui tuang kaipouc nunc tei kaniw syan ntaanvpui chaeng maan the twmei how la khou, kaniw rui Paul lev Sila ta nymna sanghbamv khou baanhza nunc hu khou zay guang the. 20Kaniw rui kaney ta Rommei ngamvsinmei nunc hu khou zay guangna sa the, “Mi pu nei hei Jihudimei e, kaney rui aniw kaidai khou guangna mpeyna sw katuakclou the. 21Aniw riak rui nuh makmei riak kaney rui dinc the. Aniw thu Rommei mei de; mi riak guay tei aniw laa nuh mak ge khatni tat nuh mak ge.” 22Kumna meic kangdai guang kariuna, Paul lev Sila ta sw kasic khang sw the. Khoutei Paul lev Sila ta tei kaney tuang pheybaan siat kaek lana bai khang ngamvsinmei nunc tei rui latdanv pat the. 23Bai kasiclou lana kangkai khou lou the, kumna so taan ntipna taanlou khang kangkai sinmeipu khou latdanv tiilou the. 24Mi latdanv thei tei layna kangkai sinmeipu tei rui kaney ta kalungcmei kangkai khou gutlouna kaney phay khou kang lou the.
25Zipchwng zaengc khou Paul lev Sila tei Ravguangc khou huayneyna lu suan bam khwan e, kumna baihmei kangmei guay tei kaney lu tei nking bam khwan e. 26Thay mak liang khou baengla zay ranvna zay guang the. Hei tei rui kangkai kaibam tei kanuk the. Khoutei kaikhamv guay laanc pat the. Kumna kangmei nunc tuang kangriang guay kathyng key the. 27Khoutei kangkai sinmeipu tei rak pat the, kumna kangkai kaikhamv guay laanclou bammei ta how lana, kangmei guay tei pak tat ngam kan di the twna ning the. Kumna kamei katuang baengsaeng sat patna karana kata swluai khang sw thau the. 28Khoutei, “Nang rana nang ta swluai riu! Aniw mi khou hei bam ngam de!” twna Paul rui kauc ranvna kauc the.
29Kangkai sinmeipu tei mairam neyna, pak gut the, kumna ping kadunhna Paul lev Sila hu khou pun nkhum laamv key the. 30Khoutei kamei rui kaney ta nduangh patna, “Kaipouc neile, ata kanlou khang ai tabui sw nina cho?” twna sa the.
31“Poubauhmei Jisu khou lwmlou o, kum e thei nang ta ni, nang kai kaikhuncmei ta ni kanlou puni,” twna kaney rui daw the. 32Khoutei kaney rui kakhou khatni kakai khou bammei guay khou Poubauhmei lam khou dinclou the. 33Mi dyng khou tei kangkai sinmeipu tei rui kaney ta nduangh tatna, kaney tuang zam zei guay tei khiulou the. Kumna kadyng khou kamei khatni kakai kaikhuncmei guay tei duilup the. 34Khoutei kamei rui Paul khatni Sila ta kakai khou nduangh kuna titu tizangvlou the. Kamei khatni kakai kaikhuncmei guay tei neihlamei padik the, kalam thu kaniw Ravguangc khou lwmlou the.
35Nthuanh thauna, lauthwan Rommei ngamvsinmei nunc tei rui, “Mi pu nei ta tei mpatlou dat ti tho,” twna kangkai rigaanvpy nunc ta ndiu guang the.
36Kumna kangkai sinmeipu tei rui Paul khou, “Sila nangney ta mpatlou dat ti tho twna ngamvsinmei nunc rui sa guang the. Kumna nangney tat patlou dat tho,” twna sa the.
37Tiki Paul rui rigaanvpy nunc khou tei, “Aney khuay maek ge, tabui swna aney ta kaniw rui charuangc khou tibai tu cho? Aney Rommei dilungmei de! Kum lana kaniw rui aney ta kangkai khou lou the. Ntaw kaniw aney ta nkamhna ndiu ganc dat ni twna cho? Nuh mak ge! Kaniw kahak guangna aney ta laa pat dat kan diu,” twna sa the.
38Rigaanvpy nunc tei rui mi lat hei ngamvsinmei nunc khou tei guang dinclou the. Kaney tei Rommei dilungmei de twmei thay pwkhou kaniw ping the. 39Khoutei kaniw guangna kuaklou khang ney the, kumna kaney ta kangkai khou tei rui nduangh patna, mi kaidai khou tei rui tat patlou dat khang zaenghuay the. 40Paul lev Sila tei kangkai khou rui patna, Ludia kai thangc tat the. Khoutei katiulou lana mi kaidai tei mpatlou the.
Jelenleg kiválasztva:
LATDIUTATMEI 16: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
