LATDIUTATMEI 14
14
Ikonium khou
1Ikonium khou ni Paul lev Barnabas sinagog khou tatna pary raclou pui ganv khou, Jihudimei khatni Zentelmei meic mpeyna lwmlou the. 2Tiki lwmlou makmei Jihudimei nunc rui Zentelmei ta kathuatc thaulouna lwmmei nunc ta tizauczihlou the. 3Kaney mi khou tei bam saengc sihlouna, baucna Poubauhmei lam khou dinclou the, kumna Poubauhmei rui kaney khou charynmei khatni sw-nchinmei taanv taanh khang pumtan tiilouna kaney rui katuang zauzian lam khou dinc bammei tei kalingmei e twmei lyanlou the. 4Mi kaidai mei nunc tei kalangv kanei patna, gaanvsaekc rui Jihudimei biak, khatni gaanvsaekc rui latdiutatmei nunc biak liangc the.
5Khoutei Zentelmei khatni Jihudimei, kaniw tuang kapy nunc lev lungh chamcna, latdiutatmei nei ta tei sw kasic khang khatni ntauh kwam khang dinglou the. 6Hei tei latdiutatmei nei tei thay lana, Lukaunia ramv tuang Lustra khatni Darbi khatni mi daeng anamei bamv guay thangc tat the. 7Mi bamv khou tei kaney Gaychamv dinclou the.
Lustra khatni Darbi khou
8Kapui bungpuak khou rui katan chuanchayna puanhmei, kapanty khou tat zat makmeipu Lustra khou nai khwan e. 9Kamei ni Paul lat tei nking bam khwan e. Paul rui kata zauc pw khou, tigaylou puni twmei lwmmei nai the twmei how lana kata zaucna, 10“Dingthau tho,” twna kauc ranvna sa the. Mi pu tei kachakc thauna tat thau the. 11Paul rui taancloumei tei how lana, meic kangdai tei Lukauniamei lat rui, “Rav nei tei maansei swna key the!” twna kauc the. 12Kumna kaniw rui Barnabas ta Dia the khatni Paul ta, kamei lat samei khou kapy sw tina Harma the twna sa the. 13Dia rav tuang ravkai mi kaidai paengc khou na tei nai khwan e. Kumna mi tuang amuc khatni meic nunc tei rui latdiutatmei nei khang tei khaenglou ni the twna guaituamchic nunc khatni mwntuc raenghmun daeng khou tei laaguang the.
14Mi kumna kaniw rui sw bammei tei chu lana, Barnabas lev Paul tei kaney phey siatna, meic kangdai la khou tei pak gutna kaucna sa the, 15“Meic nuncthiu, tabui swna nangniw mi kumna sw bam tu cho? Aney ni nangniw kumhmei maansei de. Aney guangmei thu mi kumhmei gaeng makmei ravmaengc khou rui tingpuk, kandih, duipui khatni mi guay khou naimei guay damcloumeipu ringhmei Racguangc khou ngalanc guang khang Gaychamv dinclou khang de.#Tat 20.11; Kal 146.6 16Tat kanmei ganv khou tei thu meic nunc ta kaniw rui ningmei thei layna tat khang kamei rui nuhlou khwan e. 17Tiki kamei rui gaymei taanv taanclouna kamei thow cho twmei lyanlou e— kamei rui nangniw khang tingpuk thangc rui ting tiilou e kumna nap bi kakwm kaganv khou tiilou e. Kamei rui nangniw khang taektw tiilouna nangniw lung tineihlalou e.”
18Mi lat hei sana latdiutatmei nei tei kaniw ta mi kumna khaengna kalum mak khang ranv sihna khaam keylou the.
19Pisidia tuang Antiokh khatni Ikonium khou rui guangmei Jihudimei nunc rui meic kangdai ta tei kaniw biak thangc zay lana, Paul ta ntauh kwamna, theic the twna kaidai paengc thangc zay patlou the. 20Tiki lwmmei nunc tei kadaeng khou guang kaduai bam dat pwkhou, kamei thau datna kaidai khou tei gut dat the. Nthuanh thau datna kamei Barnabas lev Darbi thangc tat the.
Asia tuang Antiokh khou Guang Datmei
21Paul lev Barnabas Darbi khou Gaychamv dinclouna ziap mpeyna kasiamhlou the. Mi khou tei rui Lustra, Ikonium khatni Pisidia tuang Antiokh khou guanglou dat the. 22Kaney rui ziap nunc ta tei lwmmei khou titanclou the khatni lwmmei khou ntipna bam khang katiulou the. “Ryanramei azuh tat ruanna aniu Ravguangc Guangcdic gut nina e,” twna kaney rui katiulou the. 23Phwamling kathuic khou gaanvthaih nunc kapahlouna, munthiangcna huayneyna kaniw ta kaniw rui lwmloumei Poubauhmei khou nsinlou the.
24Pisidia ramv tat ruan keyna, kaney Pamphulia ramv khou guang dat the. 25Mi khou tei kaney Parga khou chamv dinclou the, kumna Attalia thangc tat the. 26Mi khou tei rui kaney, ntaw kaney taanc suakna guangmei taanv dwan khang hei Ravguangc zauzian khou kaney ta tiiloumei bamv Antiokh khou tei rungh tuangcna guang dat the.
27Kaney Antiokh khou guang tangc pwkhou, phwamlingmei guay guang kaduaina, Ravguangc rui kaney khou taancloumei guay raclouna khatni Zentelmei guay khang ni lwmlou khang kaikhamv laanclou the twna raclou the. 28Kumna kaney mi khou tei ziap guay tei lev tingsaengc sihna bamlou the.
Jelenleg kiválasztva:
LATDIUTATMEI 14: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
