LATDIUTATMEI 13
13
Barnabas lev Saul ta Ndiu Patmei
1Antiokh tuang phwamling khou ravmundinhmei nunc khatni nchamloumei nunc: Barnabas, Miwmei twna kawmei Simon, Kurinimei Lukia, dihlangv akhat sinmei Herod#Mi hei Galili sinmei Herod Antipas ta e. rui makuat thaumei Manaem, khatni Saul, mi nunc hei bam khwan e. 2Kaniw munthiangcna Ravguangc ta kalum bam khou, “Kaney ta ai rui kawloumei taanv taanh khang, Barnabas lev Saul ta akhang reic patlou tho,” twna Bumaengh Nthanmei rui kaniw khou sa the.
3Kumna kaniw munthiangcna huayneyna kaney ruc khou kaniw baanc bouclouna kaney ta ndiu pat the.
Kupra khou
4Bumaengh Nthanmei rui ndiulouna Barnabas lev Saul tei Selukia kaidai khou key the, kumna mi khou tei rui rungh tuangcna Kupra kandic thangc tat the. 5Kaney Salami kaidai khou guangna sinagog guay khou Ravguangc lat dinclou the. Kaney ta nkhav khang kaney Jahon Mark ta nduangh tat khwan e.
6Kaniw mi kandic saanvsaengh tei tat suak keyna Paphos kaidai khou guang the. Mi khou tei, muhzwng khe swmei Jihudimei, duaih thaymei, kazanc Bar-Jisu twmeipu ta sowriu the. 7Kamei hei mi kandic tuang dihlangv sinmeipu, ntakmei Sargi Poula kawmeipu pam e. Dihlangv sinmeipu tei Ravguangc lat nking nii lana Barnabas lev Saul ta kadaeng khou kaw guang the.#Tat 1.7; 12.51 8Tiki duaih sinmeipu Eluma (Grik lat khou kazanc mi kumna kaw e) tei rui mi pu ta tei tilwm kan mak khang swna kaney ta akhangv the. 9Khoutei Saul, Paul twna ni kawmeipu tei Bumaengh Nthanmei rui padikna, mi pu ta tei zauc adyangna, 10sa the, “Ravsic nac nang! Nchumhmei ta howmumei nang! Nang khou simei tuang rouc raengc rui padik ge, khatni Poubauhmei tuang kalingmei ta tei saraamhmei tiswlou khang karamc e! 11Ntaw nang ruc khou Poubauhmei taanv taanclou puni the—nang mik tiat puni the, kumna gaanhmei riw how mak kanak puni the.”
Mi dyng khou tei Eluma mik khou tei muangh guam kumc, zingc guang the, kumna kata meic rui zaylou khang kamana phu thau the. 12Guanghkhyn tei mi pat bammei lwn tei how pwkhou lwmlou the; kalam thu Poubauhmei lam khou nchamloumei tei kakhang ngak the.
Pisidia Kandic tuang Antiokh Kaidai khou
13Paul kapammei nei lev rungh tuangcna Paphos khou rui Pamphulia tuang kaidai Parga khou guang the. Mi khou tei rui Jahon Mark, kaney ta mpatlouna Jerusalem thangc ngalanc dat kan the. 14Kaney Parga khou rui tat thau datna, Pisidia tuang Antiokh kaidai khou guang the. Mi khou tei Sabbathneic kaney sinagog khou guang dungc bam khwan e. 15Mousi tuang Riakdanv khatni muhzwng nunc tuang latrik khou rui pac tang lana, sinagog tuang kapy nunc rui, “Chananeile, nangney rui meic nunc khou hei katiulou nimei tuang nai e thei salou o,” twna meic ndiulouna guang sa the. 16Khoutei Paul dingthauna kabaanc haina sa thau the:
“Isaraelmei khatni mi khou hei Ravguangc ta kalum bammei Zentelmei nangniw meic guayna nkinglou o! 17Aniu pupouc nunc kaniw Izip khou gin swna lungc bammei douc, Isaraelmei Racguangc rui aniu pupouc nunc ta kadah patna kaniw ta zaatc daihmei akhat tiswlou the. Ravguangc rui kaniw ta kapumtan paan rui Izip khou rui nduangh patlou the. 18Kumna tingkwm riakdei tazikramv khou kaniw ruc khou khaengvlou khwan e.#kaniw ruc khou khaengvlou khwan e; baanhhy baibal asaekc khou kaniw ta makavlou khwan e twna hylou e. #Sin 14.34; Ria 1.31 19Kamei rui Kanaan kandih khou zaatc chanei ta tiswmaan lana, mi kandic tei kaniw khang tiilou khwan e.#Ria 7.1; Jos 14.1 20Hei tei tingkwm phay padeih riakngu dou gut khwan e.#Baanhhy baibal asaekc khou Hei tei tingkwm phay padeih riakngu dou tangv khwan e twna hylou e.
“Mi tangv tei muhzwng Samuel ganv nganvna kaniw khang latzanpouc nunc tiilou khwan e.#Lzp 2.16; 1 Sa 3.20 21Kaniw rui guangh ney tipui ganv khou, Ravguangc rui kaniw khang Benjamin kaikhwangmei Kis nac mpouh Saul ta tingkwm riakdei guang sw khang tiilou khwan e.#1 Sa 8.5; 10.21 22Kata laa ganc datmei tangv, Ravguangc rui David ta kaniw guangc tiswlou dat khwan e. Ravguangc rui kalam khou mi kumcna salou e: ‘Jessi nac mpouh David hei alungkwnpui mei e, kamei hei ai rui kahawmei taanv nipui mei e!’#1 Sa 13.14; 16.12; Kal 89.20 23Ravguangc, kamei rui nrianhloumei kumcna, kamei rui Isaraelmei ta kanloumeipu tiiloumei kiu mi David kikta Jisu hei the. 24Kaniw paap khou rui lungh laicna duilup nina e twna, Jisu kataanv taanc thau makmei hu khou Jahon rui Isaraelmei guay khou dinc khwan e.#Mrk 1.4; Luk 3.3 25Jahon tei katuang taanv luai guang ni khou, kamei rui meic nunc khou, ‘Ai hei thow e twna nangniw ning tu cho? Ai hei thu nangniw nkhwan bammei tei hamh e. Kamei athei khou guang the; ai hei thu katuang phaythuapc luak patlou khang na sini biuhpui mei hamh e,’ twna salou e.#Jhn 1.20; Met 3.11; Mrk 1.7; Luk 3.16; Jhn 1.27
26“Achanathiu, Abraham nacthiu khatni mi khou Ravguangc ta kalum bammeithiu, kanloumei chamv hei aniu khou tii guangmei tuang e! 27Tiki Jerusalem khou lungc bammei nunc khatni kaniw tuang kapy nunc tei kamei hei Kanloumeipu the twmei khatni Sabbathneic pum kaniw pac bammei muhzwng nunc lat tei kabah thay lamc makna, kata nkhuaimei tiswlouna, muhzwng nunc lat tiguang tangclou kan the. 28Kata swluai nuhmei khuay kakhou nkhamlou khang kaniw phu tow mak khwan sini, kata swluai khang kaniw rui Pilat khou sa the.#Met 27.22-23; Mrk 15.13-14; Luk 23.21-23; Jhn 19.15 29Kalam khou nthanmei latrik khou saloumei guay tei kaniw rui tiguang nthuihlou lana, kata kros khou rui laa keyna tarou khou mbeihlou the.#Met 27.57-61; Mrk 15.42-47; Luk 23.50-56; Jhn 19.38-42 30Tiki Ravguangc rui kata tiringcthaulou datmei tangv, 31tingmik mpeyna bamlouna, kamei lev Galili khou rui Jerusalem khou ngangh nchamcmei nunc khou kata lyanlou khwan e. Ntaw mi nunc hei rui kalam khou dinc bam tuang e.#Lat 1.3 32Aniw rui nangniw khou gaychamv dincloupui tuang e: Ravguangc kamei rui aniu pupouc nunc khou nrianhloumei tei, 33Jisu ta tiringcthauloumei hei rui, kaniw nac nunc aniu khou tiguang tangclou the. Kaneimei Kalumlu khou:
‘Nang hei anac mpouh e;
aseic hei ai rui nang puanclou the,’
twna hyloumei tei tiguang tangclou the.#Kal 2.7
34“Kata tarou khou titaamclou lak ge, kata tiringcthaulou dat puni twmei lam khou mi kumcna Ravguangc rui sa e:
‘Ai rui David khou nrianhloumei,
nthanmei khatni suai dat lakmei suaihiam guay tei,
ai rui nangniw khang tii puni.’#Isa 55.3
35“Kumna Kalumlu kabamv baihmei akhat khou ni,
‘Nang rui nang tuang nthanmeipu ta tarou khou titaamc maanlou lak ge,’
twna hylouna nai e.#Kal 16.10 36David tei Ravguangc rui kakhang tiiloumei taanv ringh saanv taanclou lana theic kan the, kapu kapouc nunc ta mbeihloumei bamv khou mbeihlou kan the, kumna kapumc tei taamc maan kan the. 37Tiki Ravguangc rui tiringcthaulou kanmeipu tei thu taamc maan kan mak ge.
38“Hei zaeng rui, chanathiu, Jisu paan rui paapc kuakloumei chamv hei, aniw nangniw khou dinc bam tuang e twmei nangniw thaylou o. 39Mousi tuang Riakdanv rui nangniw ta paapc khou rui sw nthanlou ngam makmei khou tei rui lwmmei kathuic ta kapaan rui paapc khou rui sw nthanlou the. 40Muhzwng nunc rui mi kumcna saloumei hei nangniw khou#nangniw khou twmei hei baanhhy baibal asaekc khou thu maek ge. guanglou mak khang ramhthay o:
41‘He, nangniw sinnui sinnumeithiu!
Nangniw ngak tho kumna mut tho!
kalam thu ai aseic taancloumei hei,
thowkumhmei rui dinclou bam tisini nangniw lwm mak puni the!’ ”#Hab 1.5
42Paul lev Barnabas tei sinagog khou tei rui tat dat kan nina bam khou, kaney guang datmei Sabbathneic ni guang datna mi lam khou tei raclou dat ro twna meic nunc rui kaney khou sa the. 43Sinagog khou tei rui piang pat dat pwkhou, Jihudimei khatni Jihudi ravriak ningmei Zentelmei meic mpeyna Paul lev Barnabas thei lay the. Apostal nei tei rui kaniw ta Ravguangc zauzian khou bam tanh tan bam o twna dinclou the khatni katiulou the.
44Guang datmei Sabbathneic, mi kaidai mei kapwm duak Poubauhmei lat nking khang guang the. 45Jihudimei nunc tei mi meic kangdai ta tei how lana mamavmei rui padik the; kumna Paul lat ta tei nsic the kumna kata sw zak khang sw the. 46Tiki Paul lev Barnabas tei bauc ranv thauna sa the, “Ravguangc lat hei nangniw khou salou rey khang kage naipui zaeng rui salou tuang e; tiki nangniw mi hei laalou makpui zaeng rui khatni nangniw rana nangniw ta ringcsuangmei laa nimei nunc e twna ning makpui zaeng rui, nangniw ta ganclouna Zentelmei biak thangc tat dat kan ni the. 47Kalam thu,
‘Ai rui nang ta Zentelmei guay khang gaanhmei tiswlou the,
mi hei nang paan rui mbaanv kapwm ta kanlou khang e.’
twna Ravguangc rui kalatdanv patlou the.”#Isa 42.6; 49.6
48Mi hei chu pwkhou Zentelmei nunc tei neihla the khatni Ravguangc lat ta tei thuanc the; kumna ringcsuangmei laa khang kapahloumei nunc tei lwmlou the.
49Mi ramv khou tei kabamv kathuicna khou Ravguangc tuang lat zin lik pat kan the. 50Tiki Jihudimei nunc rui mi kaidai tuang meicdaihmei nunc khatni lungcgaymei ravning nthukmeipui nunc ta kathuatc thaulou the. Kaniw rui Paul lev Barnabas ta tisw kasic khang sw thau the, kumna mi ramv khou tei rui nthau ganc the. 51Kumna kaney phay tuang mbut kaniw khang kadiw keylouna Ikonium thangc tat kan the.#Met 10.14; Mrk 6.11; Luk 9.5; 10.11 52Ziapc guay tei neihlamei khatni Bumaengh Nthanmei rui padik the.
Jelenleg kiválasztva:
LATDIUTATMEI 13: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
