METHU 4
4
Jisu Mika Tenkalarka niiñ
(Mk 1.12-13; Lk 4.1-13)
1 #
Mk 1.12-13; Lk 4.1-13; Hib 2.18; 4.15. Hiika hiibaho Jisu mi yajiyallo hii zabyo ho ingiitii igii mi tenkalarka kiine dupa. 2Ho mo allo loalyañpiilye ho ayoh yoalyañpiilye nyotii, hiika hiiba ho mo haya ritii. 3Ho tenkalarka bo ahtii ho mohmi lutii, “No Pinii ka Oho milo, siika yalañ siimi luto yatañ pa lyito hiila.” 4Hojalo mo lusitii, Hiila ketola do,
Miyu diigo diila kontii samake,
hojalo kapane Pinii ka aguñ hoka goliñ niiloke.
5 #
Mt 27.53; Mih 21.10. Hiika hiibaho igii mohmi darii citi ho ingiitii, ho mohmi piniiude mitu jaho chagiitii, 6ho mohmi lutii, No matiirḛ Pinii ka Oho milo, sokiila no huhi huka he; niimpalukoda hiila ketola do,
Mo mohka miidopopi atañmi niipa lubi kendoke, ho
Mohluka alah lo niimi mohlu jotu biilyi diike,
hiilamakoda niika ludu mi yalañ ho tiilyido.
7Jisu mohmi lutii, “Hiira hiila ketola do, ‘Nunu tenkala miiyo Attoh niika Pinii mi.’” 8Hiira, igii mohmi hempḛr putoo ohoh ho chagiitii, ho hikha kiiddiapiñ daka raddeganda mi kakiñtii ho hiika halyiñ milyiñ kapyo mi; 9ho mo mohmi lutii, “Hikha siika atañmi niimi biso, no matiirḛ giihala ho ngiimi herii lyimi lo.” 10#Mk 8.33.Ho Jisu mohmi lutii, “Dasato, Saitan! Niimpalukoda hiila ketola do,
‘Nunu niika Attoh Pinii mi kontii heriito
ho mohmi kontii miihoto.’”
11 #
Mt 26.53; Lk 22.43. Ho igii mohmi apa tela intiiku, ho kato, miidopopi atañ ahbiila ho mohmi kalyañ tiiku.
Jisu Mohka Miigo mi Galili Hokii Miiri Biitii
(Mk 1.14-15; Lk 4.14-15)
12 #
Mk 1.14; Lk 4.14; Mt 14.3; Jn 1.43. Siisi mo Jon mi patiibotii hiila tapa lala, mo Galili ho ingu giitii; 13#Jn 2.12; Mk 1.21; Lk 4.23.ho Nazaret mi apatela mo intii ho Keparnam siimie aruñhopa ahla hiiko dutii, Zebulun la Naptali ka gandaho, 14niimpalukoda nii hiilana nyibuhenii Aijaya lutiinii hiimi lyipe kiine dupa:
15“Zebulun ka kiiddi ho, Naptali ka kiiddi ho,
siimie dalyi pa ahbiila, Jordan mi impo biila,
Midomiyu atañka Galili ho
16kamo hoka miyu dunii atañ
hempḛr uro hutoh kappatii,
ho hutiina hiika ganda siiko ho dutiinii
ho hutiina shiigo ubuho dunya tiinii
hutoh byohu bitii.”
17 #
Mk 1.15; Mt 3.2; 10.7. Hiika myodu hokii Jisu tonsḛrkhenyo ribiitii, lubiidola, “Henkur nyato, niimpalukoda dariiganda ka raddeganda hii tunii dokuke.”
Jisu Ngiiyyi Lanii Piilye Mi Gyobii Do
(Mk 1.16-20; Lk 5.1-11)
18 #
Mk 1.16-20; Lk 5.1-11; Jn 1.35-42. Mo Galili daka siimie aruñho ila dola, mo anuabañ anye kappatii, Saimon humina Pitar hiila lutiinii ho mohka anu Andrew, siimie ho pakhe biitola ngiiyyi ladupa miila dotii; niimpalukoda mo anye ngiiyyi laniitii. 19Ho mo moanye mi lutii, “Ngiika kiiliñho imboto, ho ngo niinyimi miyu atañmika gyoniipa miiso.” 20Nyibyaloda mo anye pakhe mi apatela ho mohmi imbo montii.
21Ho hiiko hokii inku kiile mo koneya anuabañ anye, Jems Zebedi ka oho la mohka anu Jon nyimi kappatii, hulu ho mo anye ka aba Zebedi ka agiñho, pakhe mi miitila dutii, ho mo mohlumi gyotii. 22Nyibyaloda mo anye hulu la mo anye ka aba mi apatela, ho mohmi imbo montii.
Jisu Tonsḛrdo, Khenyodo, ho Miipyado
(Lk 6.17-19)
23 #
Mk 1.39; Lk 4.15,44; Mt 9.35; Mk 3.7-8; Lk 6.17. Ho mo hikha Galili ho intii patii, mohluka sinagog ho tonsḛrla ho miyu atañmi Pinii raddeganda ka ayapuyu mi tonsḛrkhenyo la ho kapane achih ho une mi miipya bitii. 24Hopa mohka tatukatu mi hikha Sairia ho tapa tatii patii, ho mohlu hikha achih niimi mohko ahgii bitii, huna une giila ho achihnii, jarpiñ konii, tahisiitiñ nii, ho liikuñnii atañ, ho mo mohlumi miipya bitii. 25Ho hempḛr miyu taro mohmi imbomontii Galili hokii, ho Lemba polyañhe hokii ho Jerusalem ho Judia ho Jordan ka kiiliñ dalyi hokii miilañ.
Jelenleg kiválasztva:
METHU 4: APATBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
