METHU 3
3
Jon Baptisma Biniiboka Tonsḛrkhenyoniiñ
(Mk 1.1-8; Lk 3.1-18; Jn 1.19-28)
1 #
Mk 1.3-8; Lk 3.2-17; Jn 1.6-8,19-28. Hiika allo ho Jon Baptisma biniibo lintii, tonsḛr khenyotii Judia ka zabyo ho, 2#Mt 4.17; 4.17; Mt 10.7. “Henkur nyato, niimpalukoda dariiganda ka raddeganda hii alahho dokuke.” 3Niimpalukoda siikasi hiike humina nyibuhenii Aijaya lutiinii,
“Zabyo ho kone gyula do,
Attoh pa lembo miimyo binyato,
mohka lembomi pardapa miibito”.
4Siisi Jon uth ka ammu hokii abitarii giitii, ho ahu giigya ho siilyo hokii huriñ pa tiigiitii, ho mohka diigo hii kormu la morey tangualha tii. 5Hiika hiiba ho Jerusalem ho hikha Judia ganda hokii ho Jordan biilyo biicho daka ganda miilañ hokii ahnyatii, 6ho mohlu mohlo baptisma bikotii Jordan kiiley ho, mohluka ingyamiigya mi khako siibii dola.
7 #
Mt 12.34; 23.33; 1 Tes 1.10. Hojalopa abuje Parisi la Sadusi atañ baptisma ladupa ahniiñ mi kappa lala, mo lutii mohlumi, “Nunu lyolyichochi atañ! hu nunumi Pinii ka hadii hokii hargii he hiila luluñne? 8Henkur giiniika ahee ya hinya to, 9#Jn 8.33; Rom 4.16.ho nunu atoh-atoh lusu nyayo, ‘Ngunukii Abraham du ngunuka aba pa’; niimpalukoda ngo nunumi lukoso, Pinii siika yalañ miilañ sokii tula la Abraham ka oho-asi pa miila kendoke. 10#Mt 7.19.Siisi jalo yahii mi tellii tola do sannii atañka liima ho; sannii buhe abi aya ahee hima niimi papa lala ho yamu ho golii kendo.
11“Ngo nunumi yasie lo baptisma bidu henkur kiine dupa, hojalo ngiika kiiliñ hoka ahnii bo ngiimi tamo-chikho yanii; ngo mohka nyotananii mika biilya binii patḛr lyima. Mo nunumi Darii Yajiyallo la yamu lo baptisma bikiñ doke. 12#Mt 13.30.Mohka yapyo mi mohka alah ho biido, ho mohka amoo piniiñ mi kheppa dupa ho emmo abiñ mi nesu ho atii dupa, hojalo asuh atañmi lyame lamanii yamu ho hompa kendo.”
Jisu Ka Baptisma Laniiñ
(Mk 1.9-11; Lk 3.21-22)
13 #
Mk 1.9-11; Lk 3.21-22; Jn 1.31-34. Ho Jisu Galili hokii Jon ko ahtii Jordan ho, mohlo baptisma biko dupa. 14Jon mohmi lutiñ lakiñ tii, lubiidola, “Noloya ngo baptisma biko kendo, ho noyapo ngiiko ahlyi nii?” 15Hojalo Jisu mohmi lusitii, “Siimi hala lyilya kiineto siisi; niimpalukoda sichulipa ngunu miido kodake miidiko jaho miigomi miipe kendonii.” Ho mo talii biido. 16Ho Jisu baptisma laku lala, mo ohepada yasie hokii chatiiku, ho kato, yapuñ hii betchetii ho mo Pinii ka Yajiyallo mi pakoo chulipa gohi dopa kappatii, ho mohmi yamu chulipa byokhe tii; 17#Mt 12.18; 17.5; Mk 9.7; Lk 9.35.ho kato, aguñ gonge yapuñ hokii luliñdo, lubiidola, “Siikasi ngiika heniiñja oho,#3.17: Malo ngiika Oho, ngiika (malo hii) Heniiñja humina ngo ano hempyo biidunii.”
Jelenleg kiválasztva:
METHU 3: APATBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
