LapèEgzanp

Lapè ak Konfyans nan Bondye

Lapè nanm nou depann anpil de jan nou mete konfyans nou nan Bondye. Lè nou chwazi fè l konfyans ak tout kè nou, lapè li a vin tankou yon boukliye ki pwoteje nou kont dout ak krent. Konfyans sa a fè nou santi n an sekirite menm lè lavi parèt pa klè pou nou, epi li ban nou fòs pou nou kanpe fèm nan mitan eprèv nou yo. Bondye pa janm lage nou; li toujou ap gide nou nandireksyon ki bon pou nou, menm lè nou pa konprann tout bagay nan moman an.

Nou kapab sonje istwa Jozèf, ki te pase nan anpil difikilte, yo te trayi l, e menm imilye l. Men, malgre tout sa li te sibi, Jozèf te kenbe lapè nan kè li paske li te gen yon konfyans solid Bondye t ap toujou ap travay pou byen li, menm nan moman ki pi difisil yo. Li te konte sou plan Bondye pou li, menm lè sikonstans yo te sanble kont li, epi se konfyans sa a ki te fè li rete kalm epi asire nan pwomès Bondye yo. Se menm jan an, lè nou kite konfyans nan Bondye gouvène lavi nou, nou jwenn yon lapè ki pa brannen. ‘’Menm si m ap pase nan yon ravin kote ki fè nwa anpil, mwen p'ap pè anyen, paske, Seyè, ou la avèk mwen. Se baton ou ak gòl ou ki fè kè m pa kase.’’

Lapè sa a se pa yon bagay nou jwenn fasilman san lafwa nan Bondye; li mande pou nou remèt tout enkyetid nou bay Bondye epi rete nan prezans li ak lafwa. Konfyans ak lapè mache ansanm, paske lè nou sispann chèche solisyon nan pwòp fòs nou epi nou bay Bondye kontwòl, lapè li a ranpli kè nou ‘’Mete tout konfyans ou nan Seyè a. Pa gade sou sa ou konnen.Toujou chonje Seyè a nan tou sa w'ap fè. Li menm, l a moutre ou chemen pou ou pran.’’ Kenbe men Bondye, rete branche nan Bondye epi kite li ba ou lapè.