LapèEgzanp

Lapè ki Ini Nou ak Kris la

Lapè Kris pote pou nou an, se pa yon senp santiman oswa yon moman pasajè; li se yon reyalite pwofon ki ini kè nou ak kè Bondye. Lè nou antre nan lapè sa a, li pa sèlman ranje relasyon nou ak Bondye, men li kreye yon inite ant nou ak Kreyatè nou an. Se yon lapè ki depase tout konprann, k ap koule nan kè moun ki chwazi mete Jezi nan sant lavi yo. Relasyon sa a ak Bondye transfòme lavi nou epi fè nou tounen veso lapè nan yon mond ki souvan divize epi boulvèse.

Lè nou viv nan lapè sa a, li gouvènen tout panse nou, li chanje jan nou wè moun ak sikonstans nan lavi nou. Kris montre nou kijan vrè lapè a pa sèlman gen rapò ak absans konfli, men se yon fos k ap travay nan nou e ki favorize amoni ak lòt moun kèlkeswa diferans yo. Lapè Kris la rale nou pi pre lòt moun, li gide nou pou nou gen pasyans, padon, ak lanmou nan relasyon nou yo. Se nan lapè sa a nou aprann viv nan kominote nou, ki ede nou chèche byen tout moun san gade siperyorite oswa pwòp enterè. ‘’Si yon moun ap viv nan Kris la, li vin yon lòt moun. Bagay lontan yo disparèt, se lòt bagay nèf ki pran plas yo koulye a.’’

Nan Kris, lapè a vin tounen yon pati natif-natal nan kè moun. Lapè sa a se pa lajan ki b aoul, se pa pozisyon ou okipe nan sosyete a ki ba ou l, se pa relasyon ou yo ki ba ou men pito gras Jezi Kris fè w ‘’ Se paske li renmen nou kifè li delivre nou, nou menm ki mete konfyans nou nan li. Sa pa soti nan nou menm menm, se yon kado Bondye ban nou.’’ Lè nou chèche Kris ak lapè li a, li ranpli lavi nou ak yon trankilite ki inifye nou ak Bondye epi ak lòt moun nan lanmou, respè, ak onètete.