Jon 3
3
Jesus Nikodemus ele nai madipiɗ
1Aria, ɗo gumak danab-Parasia laa onig Nikodemus, nug am Juda dilag ikki, 2danab amu nug tuqan Jesus gumitta uɗia, Nug amegppa aum. “Ippunittak danab, ig doottem, na am ippunittak danab Kayak toppanu uɗime. Aɗinu? Kayak Nug danab laa ii ehanitteb amu, nug Kayak dabmettaknu kobol danab haknu elele iitta, na hettem ele amu, nug hekkunu elele iitta,” awa aum. 3A amu Jesus oɗeppa awa aum. “Da genabnab genab na amenppa attem. Danab nug bau menuak ii aokku amu, nug Kayaknu ɗo maɗoɗ ii anidma,” awa aum. 4Jesus anam a amu, Nikodemus nug amegppa aum. “Danab nug kaino daatte amu, nug attemun eɗua bau menuak aokku? Nug baula anig ooppa nob, anig nug eɗua menukkunu elelete?” awa aum. 5Nikodemus anam a amu, Jesus oɗeppa awa aum. “Genabnab genab da na amenppa attem. Danab nug leppa, amu Kayak Ouɗippa ele menuak ii aokku amu, nug Kayaknu ɗo maɗoɗ ooppa nokkunu elele iitta. 6Danab nug beɗu bau daakkunu, amuam anig mameg dilahppa aotte, amge danab nug Kayak Bekka bekkunu amu, nug amu Kayak Ouɗi eppegppanu aotte. 7Anam daatte, amu da na bau menuak aokkutoitte ami amu, na amunu dabmak kuɗum aib aome. 8Ulah nug adekkuppanu uɗia, atten gotte amu, na ii doottem, nug ukkak nuhigib dim lamidtte. Na nuhig oqotti aakkuib doottem. Amubia danab ah Kayak Ouɗippa bau menuak aotteb ele amu, danab ag amunu diig oh anidna, oolag maidkkunu elele iitta,” awa aum. 9Jesus anam a amu, Nikodemus oɗeppa awa aum. “Keeke amu nug attemun anam bekku?” awa aum. 10Nug anam a, Jesus baula Nikodemus oɗeppa awa aum. “Na am Israel dilag ippunittak danab okkai laa, amu attemun na keeke imu ii doottem? 11Genabnab genab da na amenppa attem. Keeke ig doottem ele amu, ig amunu mehuqttem, keeke ig anidttem ele amu, ig amunu madittem, amge ihinig mattiak amu ag ii aotteb. 12Da wan kobolnu mattii, ag oolagppa genab ii dooppig amunu, attemun da hab aabppan kobolnu madikkul dayeb, ag oolagppa genab dooglag? 13Laippu laa nug hab aabppa ii teum. Iitta. Danab Bekkalag da aakkuib appa dayeye, hab aabppanu uɗimi. 14-15Anukka atu taɗakppa mat nau ag Israel oolagppa bena, danab ah emalatteg mauheg, ⌊Kayak Nug Moses amegppa a,⌋ nug mat dottog laa brasppa ha qappe, danab ag amu neegna anidna, ag ii mauhppig, amubia danab aun aɗi ag dahilnu oolagppa genab doon, ag bauklel hanhannu aon daaglagnu, ag Danab Bekkalag da, ad emaitakppa aihiɗkkulagoitte.
16Kayak Nug wanppan danab ah dilagnu oo huana mauhom amunu, Nug Bekka laippunab me uɗiom. Nug me uɗiom amunu, aun nug nuhignu ooppa genab dootte ele, nug padal ii mema. Iitta! Nug bauklel hanhannu aokku. 17Kayak Nug, Nug Bekka wan imuppa me uɗiom, amge Nug wanppan danab ah epeɗiadkkunu me ii uɗiom. Iitta. Kayak Nug nuhigppa wanppan danab ah eɗua diiadkkunu me uɗiom. 18Am aun nug nuhignu ooppa genab dootte amu, nug nob nau awaknu hettoɗiakppa ii daatte, amge aun nug nuhignu ooppa genab ii dootte amu, nug aakku nob nau awaknu hettoɗiakppa teum daatte. Aɗinu? Nug Kayak Bekka laippunab, nug nuhignu ooppa genab ii doyom. 19Nob nau awaknu hettoɗiak diig am iikku. Amahlak wanppa uɗiom, amge danab ag wanppanu gatatu, ag amunu oolag mauhom; ag amahlaknu oolag ii mauhom. Aɗinu? Ahilag kobol am nau. 20Anam amu, danab oh ag hak nauppa daatteb amu, ag amahlaknu nau ninig ele dootteb. Ahilag hak nau miag atimanu amu, ag amahlakppa daaglagnu oolag ii daatte. 21Amge laa nug doyak diig genabib kobol dim lamidtte, nug laa ag Kayak a doya hette miag atiak anidkkulagnu, nug amahlakppa daakkunu uɗia daatte,” awa aum.
Jesus, Layattak Jon ele dilah nai
22Anam matti malaeh, dimppa Jesus Nug nuhikkud ippunittak awak danab ele ag Jerusalemnu ahan, Juda wanppa aben laih gona, Nug ag ele deɗ laala daanna, danab ah layattom.
23Anam amu, aria Layattak Jonnu amu, aben onig Ainon, ab Salim guguittak, appa le kuɗum ele amunu, nug appa danab ah ele layattette, laa kuɗum ele ag uɗin layattak aoppig. 24Amuam Herot Antipas nug Jon ii maniguittom, haen amuppa beum. 25Anam heegeg, Jonnu ippunittak awak danab laala ag Juda danab laa ele, ag danab attem ha Juda dilag ɗoppa oppiak daakkunu aeg ona aeg doum. 26Ag anam hena amu, Jonnu ippunittak awak danab ag gona, Jon amegppa inam appig. “Ippunittak danab, danab laa Nug na ele anukka Jodan le laihppa daayya, na nuhignu mattime ele, danab amu Nug danab layattette, danab ah oh nuhigppaib gotteb,” aon appig.
27Anam aeg amu Jon oɗelagppa awa aum. “Kayak Nug hab aabppanu keeke laa danab eppegppa ii meeb amu, danab nug nukka nuhig dabmakppa keeke amu aokkunu elele iitta. 28Ag akka ele anukka da inam mattiyi doon malappig. ‘Da am Kristus iitta, amge Kayak da meiɗe, da nuhig ib bappaidkkulnu anuqe uɗimi.’ 29Amunu amu da am nid baunu kadoi bia. Nid bau nug ah aotte amu, ah amuam nuhigib, amge kadoi nuhig nug layag ah aotte doya, maɗoɗppan gamag ahak dootte. Nid baunu kadoi nug maɗoɗppan gamag ahak amu dootte, amubia da Jesusnu oolppa maɗoɗppan gamag ahak okkainab doottem. 30Nug onig am okkainab daakku, da am nug waappaib daakkul.
31Am laa Nug hab aabppanu nette amu, Nug keeke oh eɗittak daatte. Laa nug wanppa bette amu, nug wan imuppanu keekeib maditte. Laa Nug hab aabppanu nette amu Nug keeke oh eɗittak. 32Laa Nug hab attannu neum amu, keeke Nug doya malom, keeke Nug anttom ele, Nug amunu maditte, amge laala ag oolagppa genab ii dootteb. 33Amge danab nug nuhig mattiak doya dabmedatte ele amu, nug Kayak Nug doyak diig genabib diig daatte, nug amu ooppa ɠagattag genab dootte danab ah ippunadtte. 34Yo, laa Kayak me uɗiom amu, Nug Kayak nai maditte. Aɗinu? Kayak Nug nuhig Ouɗi ambak medatte. 35Mame Kayak Nug Bekkanu oo mauhtte amunu, keeke oh Nug eppegppa meum. 36Am laa nug Kayak Bekkanu ooppa genab dootte ele amu, nug bauklel hanhannu awom daatte. Laa nug Bekka geɗitte amu, nug bauklel hanhannu ii awom. Iitta. Kayaknu oppoɗi bak nuhigppa daatte,” awa aum.
Chwazi Kounye ya:
Jon 3: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.