Luka 15
15
Cisimo ca manga wakuzimbala
(Mateo 18:12-14)
1Litangwa limo omo vaka-kutambula lisimu na vaka-vuvi vezile kuli Yesu nakumutolilila, 2#Luk 5:29-30 vaFaliseo na valongisi va majwi a Lishiko vangungutile ngwavo, “Ou munalume akatambula vaka-vuvi nakulya navo.” 3Ngecivene, Yesu wavatelelele cisimo eci ngwendi,
4“Nga umo akati keni ali na vimanga 100, co azimbalesao umo, vati alinga? Aseza vaje vimanga makumi atanu na awana na vimanga vatanu na vawana kuvulilo nakuya nakushakezeka uje nazimbala, noo namuwana. 5Co omo namuwana, amwaka a vitsili vyendi nakujolela, 6nakumutwala kwimbo. Co asana vasamba vendi na vandambo vendi amo avaleka ngwendi, ‘Njinavwaelela akuwana manga yange uje wazimbalele. Tujoleleni!’ 7Njimileka ngwange, mu ngila eyi vene kukakala kujolela mwilu omo muka-vuvi umo atenguluka kutuvakana vaka-vushunga makumi atanu na awana na vatanu na vawana vaje kuvashaka kutenguluka.
Cisimo ca mbongo yakuzimbala
8“Nga munakazi ali na vimbongo vya Siliva likumi, co azimbalesao imo, vati alinga? Ashwameka ndeya nakukomba mu njuvo yendi nakuyisetela kwoshe-ikwoshe noo naiwana. 9Omo naiwana, asana vasamba vendi na vandambo vendi amo avaleka ngwendi, ‘Njinavwaelela akuwana mbongo yange njazimbalesele. Tujoleleni!’ 10Mu ngila eyi vene, njimileka ngwange, tungelo va Njambi vakavwaelela ali muka-vuvi umo uje atenguluka.”
Cisimo ca mwana wakuzimbala
11Yesu wendekele lalo ngwendi, “Munu umo wakele na vana vendi vavali va vanalume. 12Uje mwana washongo wendekele kuli ishe ngwendi, ‘Tate, njane mutambela wa vufuko vuje vukapwa vwange.’ Co wapangele vufuko vwendi akati ka vana vendi vavali. 13Omo kwetile matangwa amandondo lika uje mwana washongo walandesele vufuko vwendi wakatukile waile na vimbongo. Waile ku lifuti lyakulyala, kuje wakashandwele vimbongo vyendi mukuyoya kwa vuuka. 14Washandwele vyoshe vije vyakele navyo. Co kwezile njala ya lyangengela mu lifuti mwoshe muje, washangumukile kuyanda nakuutwa. 15Co waile kuli mundambo umo wa mu lifuti lije nakupangako, co ikeye wamutumine ku lihya lyendi ngeci akalise vingulu. 16Co washakele kulya nakukutisa lifu lyendi na vin̄wekwe vije vakele nakulya vingulu, oloni naumo wai wamwaneneko cuma cimo cakulya. 17Omo waliyongwele, walyendekesele ngwendi, ‘Vangamba voshe va tate valinakulya nakukuta nakusezao, yange njilanduka ku njala! 18Njikakatuka nakuya kuli tate, co njikendeka ngwange, tate, njinalingi vuvi ku mesho a Njambi na ku mesho ove. 19Kunjapandele lalo unjitumbule nji munove, njipwise ngwe umo wa vangamba vove.’ 20Ngecivene, wakatukile welukile kuli ishe.
“Oloni omo wakele kulyala na kwimbo, co ishe wamumwene wamuzivilile mema ku mbunge, co washatukile lumbisi wamuvumbatelele nakumutsemba. 21Co uje mwana wendekele kuli ikeye ngwendi, ‘Tate, njinalingi vuvi ku mesho a Njambi na ku mesho ove, kunjapandele lalo unjitumbule nji munove.’ 22Oloni ishe wasanene vangamba vendi ngwendi, ‘Zambuleniko! Neneni cikoveyo cacivwa mumuzike. Co lalo muzikeni kanzeya ku mulavo wendi na vin̄aku ku mendi endi. 23Co neneni lalo muna ngombe wakununa, co mutsiyeni ngeci tulye nakulisamba tulinge ciwano! 24Omwo ou munange watsile, oloni ololo alinakuyoya, wazimbalele, oloni ololo tunamuwana!’ Co vashangumukile kulisamba nakulinga ciwano.
25“Co uje munendi wa mukulunu a simbu ije wakele mu lihya. Omo wakele nakwiluka, wetele kuyehi na njuvo, co wazivile myaso nakukina. 26Co wasanene ngamba umo nakumwihula ngwendi, ‘Ovyo vika?’ 27Co uje ngamba wamukumbulwile ngwendi, ‘Ndolome yove naija kwimbo, co isho natsii muna ngombe wakununa, omwo namutambula wamuvwa mukangule.’ 28Co uje mukulunu wendi waluvalele manene kakovelele mu njuvo, ngecivene, ishe wezile wamulambelelele ngeci akovele. 29Co wakumbulwile ishe ngwendi, ‘Kenga, a myaka yoshe eyi njinakupangela ngwe nji ndungo yove, co simbu naimo yai njalikelele kwononoka mashiko ove. Co vika wanjana? Nambe vene muna membe kuwanjaneneye ngeci njilinge ciwano na vasamba vange! 30Oloni ou munove washandwele vufuko vwove vwoshe mu ngila ya vukwizi, omo naija kuno kwimbo unamutsiila muna ngombe wakununa!’ 31Oloni ishe wamukumbulwile ngwendi, ‘Munange, yove wakala nange simbu yoshe, evi vyoshe vinjilinavyo vinapu vyove. 32Oloni tunapande kujolela nakuvwaelela, omwo ndolome yove watsile, oloni ololo alinakuyoya, wazimbalele, oloni ololo tunamuwana.’ ”
Chwazi Kounye ya:
Luka 15: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006