Luka 14
14
Yesu akangwisa muka-mushongo
1Yesu wakovelele mu njuvo ya mukulunu umo wa vaFaliseo nakulya nendi a Litangwa Lyakuhwima, co vanu vamukengelele. 2Co munalume umo wavinjile mushongo wakuzimba mendi na mavoko wezile kuli Yesu, 3co Yesu wehwile valongisi va majwi a Lishiko na vaFaliseo ngwendi, “Lishiko lyetu litutavesa kukangwsia munu a Litangwa Lyakuhwima indi embwe?”
4Oloni vakevo volokele kuluu kuvendekele cuma nacimo cai. Yesu wakwatele uje munu wamukangwisile, co uje munu waile. 5#Mat 12:11 Asinoni Yesu wendekele kuli vakevo ngwendi, “Nga umo weni ali na munendi wa munalume nambe ngombe yendi awila mu lisima a Litangwa Lyakuhwima, kuma kasa kumutundisamo a Litangwa Lyakuhwima ndi?”
6Oloni vakevo kuvasele kumukumbulula a cuma eci.
Kulikeesa nakujumbula vangenzi
7Yesu wamwene vangenzi vamo vakele nakulyangwila myela ya kasingimiko, co voshe wavatelelele cisimo eci ngwendi, 8#Vis 25:6-7 “Omo munu akulanya ku ciwano ca vushombolwa, kesi utumbame a citumbamo ca vulemu. Kutewa amo valanya weka nakutuvakana vulemu, 9co uje namilanyele muvavoshe muvavali aija nakwendeka kuli yove ngwendi, ‘Ana citumbamo kuli ou!’ Co ukaziva shwamwa akununguluka nakukatumbama a citumbamo cacindondo. 10Oloni omo vakulanya, tumbama a citumbamo cacindondo, co uje nakulanya omo aija akukuleka ngwendi, ‘Ove musamba tumbama a citumbamo ca vulemu!’ Co ukawana kasingimiko ku mesho a vakweni voshe vaje vaunatumbama navo kukulya. 11#Mat 23:12; Luk 18:14 Omwo woshe uje akalyaka ku vukama vakamukeesa, co woshe uje alikeesa vakamwaka ku vukama.”
12Asinoni Yesu wendekele kuli uje wamulanyele ngwendi, “Nga uvwaesa kulya kwa mutanya nambe kulya kwa cingwezi, kesi ulanye vasamba vove nambe vandolome vove nambe vavushoko vwove nambe vandambo vove vaka-kufuka, omwo navo lalo vakakulanya, co mu ngila eyi vakakwilwisila vije viwalingile. 13Oloni omo ulinga ciwano, lanyako vaka-kuutwa na vaka-kujenduka na vilema na tupuputwa, 14co ukavezika, omwo vakevo kuvakasa kukwilwisila vije viwunavana. Njambi ikeye akakwilwisilavyo a litangwa livakasanguka vaka-vushunga ku vatsi.”
Cisimo ca ciwano cakama
(Mateo 22:1-10)
15Omo munu umo wa vaje vakele ku mesa wazivile evi, wendekele kuli Yesu ngwendi, “Vanavezika vaje vakatumbama ku ciwano mu Vumwene vwa Njambi!”
16Co Yesu wamulekele ngwendi, “Kwakele munu umo wavwaesele ciwano cakama walanyele vanu vavangi. 17Omo simbu ya ciwano yetele, watumine ngamba yendi kuli vaje vavalanyele ngwendi, ‘Ijeni, vyuma vyoshe vinavwaa laja!’ 18Oloni voshe vashangumukile kuleulula. Wakulivanga walekele uje ngamba ngwendi, ‘Njinalanda lihya lyange, co njinapande kuyako njikalimone, njilomba ngwange unjisambese.’ 19Mukwavo lalo ngwendi, ‘Njinalanda vingombe likumi vakulima, co njiya njikaveseke, njilomba ngwange unjisambese.’ 20Weka lalo ngwendi, ‘Njinambata munakazi, cooni a cuma eci kunjasa kuyako.’ 21Co uje ngamba waile wakalekele shukulu yendi vyuma vyoshe vije vivendekele. Co shukulu yendi waluvalele wendekele kuli ngamba yendi ngwendi, ‘Ya vwasi ku vitapalo na ku tuvingila twatundondo twakuya ku nganda ukalanye vaka-kuutwa na vaka-kujendoka na tupuputwa na vilema.’ 22Co vwasi-vwasi uje ngamba wendekele ngwendi, ‘Shukulu cinalingiwa laja ngwe muwanjishikile, anga kunacisala mwela wakama.’ 23Co shukulu yendi wendekele kuli ikeye ngwendi, ‘Ya ku vitapalo vyakama na ku tuvingila twatundondo ukasindiye vanu vaije kuno ngeci njuvo yange yakushule. 24Njimileka muvavoshe ngwange kukwesi umo kuli vaje vanalume vanjalanyele akalya vyakulya vyange!’ ”
Vije vyapande ndongisi
(Mateo 10:37-38)
25Mbunga yakama vakele nakuya amo na Yesu, co watengulukile nakwendeka kuli vakevo ngwendi, 26#Mat 10:37 “Woshe uje aija kuli yange kasa kupwa ndongisi yange kuvanga anjizeme yange kutuvakana mwazema ishe na vaina, munakazi wendi na vana vendi, vandolome vendi na vandokazi vendi, nakuzema yange kutuvakana mwalizema ikeye vavenya lalo. 27#Mat 10:38; 16:24; Mak 8:34; Luk 9:23 Co woshe uje kambata cilindakano cendi nakunjikava kasa kupwa ndongisi yange embwe. 28Nga umo weni ali na vutumbe vwakutunga kaposhi, co akulivanga atumbama nakulava vingai akafweta, nakumona ngeci ali na vimbongo vyakumanesa vipangi vyendi. 29Nga kapwisilemo, co kakasa kumanesa kaposhi omo nendi laja luvula, co vaje vakamona vije vyalingiwa vakashangumuka kumujola, co vakendeka 30ngwavo, ‘Ou munalume washangumukile kutunga oloni kamenesele vipangi vyendi!’ 31Nga mwene aya na vanu vakupwa 10,000 nakulwa nzita na mukwavo mwene uje aija na vanu vakupwa 20,000, co napande kutumbama asi akulivanga ayongole nga ali na nzili yakulwa na uje mukwavo mwene. 32Co nga ikeye kapwisilemo, napande kutuma lijwi nakuliwana na uje mukwavo mwene omo simbu acili kulyala ngeci alombe kwoloka.” 33Yesu wamanesele kwendeka ngwendi, “Na kuli yeni voshe, ou kaseza vyuma vyoshe alinavyo kasa kupwa ndongisi yange.”
Mwongwa wakushamuka
(Mateo 5:13; Mako 9:50)
34“Mwongwa wapwa wauvwa, oloni nga ushamuka, co utovala vatijo? 35Kucitava lalo kuwaka mu lihya, nambe kuulinga vwilo, oloni vaumbila kuti. Nga muli na matwi, ziveni!”
Chwazi Kounye ya:
Luka 14: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006