Yɔanɨ 2
2
Ʉmbɔ wɔ mʉsɨkana anɔ Kana
1Makwaa kapɨnɨ ambise ɔngɔ, ya꞉ɓio tɨa nɔ ʉmbɔ wɔ mʉsɨkana akɔ gʉlʉ ɔ Kana, ihoi mɛngana yɔ Galilaya. Inye ɔ Yeso a꞉ɓio ɨyɔ kʉ inani. 2Ɓa꞉ɓisoko atɨ Yeso nɔ ɓakpata ngʉɓangɔ, kʉ inani aʉmbɔ ngʉwɔnanɨ. 3Ɨyɛ ndʉ ʉkyɛpʉ a꞉sio, ga inye ɔ Yeso nɔ mwana angɔ ɓɔ: «Ɓangɔmʉ ɓata nɔ ʉkyɛpʉ.» 4Yakamɛngana, ɨyɔ Yeso ɔ꞉mutosio ɓɔ: «Ha ɨna-e, ɨyɛsɛmɨ nɔwɛ yɔkwɔ tanɨ? Angbinga ngɨasɛmɨ angɔndanamʉ.»
5Ga inye ɔ Yeso nɔ ɓombi ngʉɓa ɓa꞉ɓio amʉpaka ɓɔ: «Kɨɛni yaka ta iɓomu ngɨyɛ a꞊ɓio nenu anʉngɨa.» 6Ɨnadɔ, lɨkɔchɔ lɛta lɨkpɔkpɔ mɛɗɨa, ngɨlɛ ɓa꞉lɨkɨa aikopi, la꞉ɓio kʉ ananɨ. Ɓayuda ɓa꞉ɓichochoko mipo kɔ mʉgyaɓa amati ɔngɔ. Ɨkɔchɔ ngɨyɛnɛnɨ mɛngana, ya꞉ɓikumonio ɓalitɛlɛ ndʉ mɨa mʉnga.
7Kʉdɔ, Yeso ɔ꞉ɓusigio ɓɔ: «Huikiseni lɨkɔchɔ ngɨlɛ nɔ mipo ɓɔ kyɛɛ kyɛɛ.» Kʉdɔ ɨɓɔ, ɓɔ꞉lɨhuikiso ta ɓanɨ. 8Ga Yeso ɓata naɓɔ ɓɔ: «Mʉtʉkɨeni-sɨ makwɔ ɔ ʉmbɔ mwana ɔ mipo ngʉkɔnanɨ bele, nɔ, nɔmukaniso.» Kʉdɔ, ɓɔ꞉mʉsɨa nakɔ. 9Makwɔ ɔ ʉmbɔ ɔ꞉kana mipo ngʉka ɓa꞉kʉnatakanakiso ʉkyɛpʉ. Sɔkɔmʉ ɨmbɨa ɓɔ, ʉkyɛpʉ wɛ꞉kɔ gbanɨ. Yakamɛngana, ɓombi ɓɔ mʉpaka ngʉɓa ɓa꞉tʉka mipo, ɓɛ꞉mbɨa ɨɓɔ ta ɨmbɨanɨ. Kʉdɔ, ɛ꞉soko tɨa swaɨ ɔ moi, 10ga ɨyɔ nayɔ ɓɔ: «Ha gue, wɔnayɔ-sɨ ʉkyɛpʉ ngʉwa wɔta ɓʉkaɨ, akɔɓɔya kʉndʉ ɨtakɨtakɨ ngɨyɛ, dɔtanɨ? Sɨ ɓangɛ ɓapʉnga anuchochoko ta ʉkyɛpʉ ngʉwa wɔta ɓʉkaɨ, ɓɔtɔpipio dɔ tɨa nɔ jalamba ɔngɔ, dɔ ɓombi ɓa꞉ɓio tɨa ɓɔ ɓɔdamʉeni damʉanɨ.»
11Kɔkɔ ata mʉmbangɛ ngɨa Yeso a꞉pʉnga pananiso, ɨyɔ ɨyananɨ. A꞉mʉkɨa aɨkʉmbʉ yɔ Kana, amati ɔ Galilaya. Ɨyɔ, a꞉pananiso ʉbɨba ngʉwangɔ, nɔ, ɓakpata ngʉɓangɔ ɓɔ꞉mʉbaya.
12Mbise ɔ yaka ngɨyɛnɛnɨ, Yeso ɨɓɔ nɔ atɨ inye, nɔ ɓamanye, kʉ nɔ ɓakpata, ɓɔ꞉tɔsa tɨa anɔ Kapalanaumu. Inani, ɓa꞉gbalɨamʉ makwaa maja.
Yeso ɔkponyo ɓombi ɓɔ magabʉ aɨkáá yɔ Asɔɓɨɨ
(Mat 21:12,13; Mlk 11:15-17; Luk 19:45-46)
13Ɨyɛ ndʉ Ʉmbɔ wɔ chwɛya aɓubaya wɔ Ɓayuda wa꞉ɓio tɨa tinene, kʉdɔ, Yeso a꞉sa anɔ Yelusalɛma. 14Inani, a꞉tɔgbʉka ɓombi akɔgaba magabʉ tɨa amati ɔ ɨkáá yɔ Asɔɓɨɨ. Ɓa꞉ɓio agaba ɓangɔmbɛ, ɓakɔndɔlɔ, kʉ nɔ ɓanjua. Ɓombi ngʉɓɔ nacho ɓagyɛgyɛ, ɓa꞉ɓio ɨɓɔ ɓaweleke tɨa kʉ ananɨ. 15Kʉdɔ, a꞉ɓanga miki, akɔkɨa mufimbo, nɔ, ɔ꞉goiso naɓɔ akɔkponyo ta ɓaɓomu, aɓei ɔ ɨkáá yɔ Asɔɓɨɨ. A꞉ɓʉkponyo ɨhɔ nɔ ɓakɔndɔlɔ, nɔ ɓangɔmbɛ ngʉɓeɓo ta taa. Ɓombi ngʉɓɔ nacho ɓagyɛgyɛ, ɔ꞉ɓungbengio eɓo, nɔ ɔ꞉titoko ɓagbɔ́gbɔ ɓɔngɔ ɛsɨ ɓɔ gbuku gbuku. 16Ga ɨyɔ nɔ ɓombi ngʉɓa ɓa꞉ɓio agaba ɓanjua ɓɔ: «Unguseni ɓayaka ngʉɓa aka. Nátɨkɨamʉ ɨkáá ngɨyɛ Aba, aɓio tɨa ɨda yɔ sɔkɔ.»
17Kʉdɔ, ɓakpata ɓa꞉tɔtunguo yaka ngɨyɛ, ya꞉tɛndanakɨa amati ɔ Mabii kɔ Asɔɓɨɨ ɓɔ: «Ɓʉkʉnda ɓʉja ngʉɓa nanaɓɔ akʉʉ ɔ ɨkáá ngɨyɛsɔɔ, ɓanɛmɨ asiokiso ndʉ dyaa.»#popoko Mmb 69:10
18Kʉdɔ, ɓangama ɓɔ Ɓayuda ɓɔ꞉muɓokuo ɨyɔ Yeso ɓɔ: «Kɔkɔ ata mʉmbangɛ nga eno tanɨ, ɨya watɨpana anɨmbiiso ɓɔ, wanɔ ʉpanʉ akɨa ɨkananja yɔ yaka ndʉ ɨyɛnɛnɨ?» 19Ga Yeso naɓɔ ɓɔ: «Uteni ɨkáá yɔ Asɔɓɨɨ ngɨyɛ, nɔ ɨmɨ, na꞊ɨtuɓoko amati ɔ makwaa kaatʉ.» 20Ga Ɓayuda ɓɔ: «Ɓa꞉tuɓoko ɨkáá ngɨyɛ, amati ɔ mago ɓatɛkɛɓɛ ɓɔgɨna nɔ mɛɗɨa. Ʉwɛ, wa꞊ɨtuɓoko ndɨ tuɓokoni, amati ɔ makwaa kaatʉ?»
21Ɨnadɔ, ɨkáá yɔ Asɔɓɨɨ ngɨyɛ, ɨyɔ, Yeso a꞉ɓio ayaka akʉʉ ɔngɔ, ya꞉ɓio ta isisenio yɔ ndʉtʉ ngɨangɔ ingainga. 22Ngbinga ngɨa Yeso a꞉tɔjʉkana-ɔɔ akɔ ingwo, ɓakpata ngʉɓangɔ, ɓɔ꞉tɔtunguo tɨa ɓɔ, Yeso asugo jɛnɛ yaka ngɨyɛnɛnɨ ta sugoni. Kʉdɔ, ɓɔ꞉baya yaka ngɨyɛ ya꞉tɛndanakɨa amati ɔ Mabii kɔta Tu, nɔ yaka ngɨyɛ, ɨyɔ, Yeso a꞉sugo jɛnɛ.
Yeso ɛmbɨa mɨtɨma yɔ ɓombi
23Angbinga ngɨa Yeso a꞉ɓio-ɔɔ anɔ Yelusalɛma, akɔ Ʉmbɔ wɔ chwɛya aɓubaya wɔ Ɓayuda, ɓombi ɓaja ɓa꞉mʉbaya. Ɓa꞉mʉbaya ɓanɨ, akpatanakɨa nɔ yaka yɛta ɨmbangɛ ngɨyɛ a꞉ɓio akɨa. 24Yakamɛngana, Yeso a꞉napɨanamʉ mʉtɨma akʉʉ eɓo, dɔ, a꞉ɓio naɓɔ anɨmbɨa ta ɓaɓomu ɓɔ sɛ. 25Ya꞉ɓiomʉ anɨtanɨa ɓɔ, ɓɨmusigio yaka akʉʉ ɔ mombi, dɔ ɨyɔ makwɔngɔ, aɓimbɨa yaka ngɨyɛ ya amɨtɨma yɔ ɓombi ɨmbɨanɨ.
Chwazi Kounye ya:
Yɔanɨ 2: buuN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc.