Matyo 2
2
Bi tɨ mum una tuna meri sul hina Jesu ləg
1A toy Jesu tɨ Betlehɛm#2.1 1Sam 16.1, nəgri sul tɨ Jude. Tɨ an ne Erod tɨ wa̰ay. Bi tɨ mum una tuna meri sul o̰ tɨ lula lɔ a hina tɨ Jerusalɛm 2la a ɓiri bi jaa ɓə: «Wa̰ay tɨ Juyb-a maan ne a toy ər ndog le wo ɓay a? Yini ləg ər mɨra tɨ lula lɔ la i hina ər yabu.» 3Gorne wa̰ay Erod laa jaa ne gɨna, ər sul tɨ tugla lo la bi gun tɨ Jerusalɛm sul tɨ tugla lo na ər. 4Ər ton ər soon woom tɨ bi tɨ hima ɓina la, bi tɨ gṵ hul ɓla la, ər ɓiri a un ne a wo Krist, wo ne Ndɨla ɛr twila tɨ nin. 5A duga gɨ ər: «A ɓə ər twila tɨ Betlehɛm, nəgri sul tɨ Jude. Kəysul nejo tɨ jaa ne Ndɨla na nebi kya̰ tuna ər sul:
6“Yḭ bi tɨ Betlehɛm ne i wo tɨ lɔr nəgri sul tɨ Jude,
i lɔr gaw tɨ peer daan tɨ nəgri sul tɨ Jude lo,
kəysul wa̰ay ne ɓə ən bi tɨ Israhel kwi jul
ɓə wag tɨ ər hul#2.6 Mic 5.1.”»
7Gɨna Erod soon bi tɨ mum una tuna meri sul na kuru, ka a ja gɨ ər ɗa̰y ne mɨra ne wag na, 8la ər toon a tɨ Betlehɛm. Ta ər ja gɨ a ɓə: «Yi si, i jab jaa lɔ ne tuna ɓa̰ ne sul, la gorne yḭ ten ər gɨna, ka ən una taal la, ta yin maan kaw ən wo saal tɨ ər yabu la.»
9Gorne a laa wa̰ay jaa tong gɨna, a si. A ləg mɨra ne a ləg toni tɨ lula lɔ: Ər si tɨ a kwi marway gorne ər an tɨ un ne ɓa̰ ne wo nin gɨna, ər lor tɨ gor. 10Gorne a ləg ər lor tɨ gor gɨna, a ndula laar a nari. 11A wur tɨ li hul la a ləg ɓa̰ a na ər na̰ tɨ Mari. A ha̰w a ɗa̰y tɨ ər kwi a yabu ər, ta a təng a bɔg mu a naa ər wa̰y kede ne tɨ a daa kuna daab la, mum ne uun laar ne towol tɨ dɨbla ne a soon la̰sa̰ la, mire#2.11 Mire tɨ itɨr ne a ka na tɨla ɔri. la. 12Gɨna, Ndɨla ja gɨ a na nenɨm ɓə a ka duga na ul tɨ Erod sul lo. Le ka a so ul jak a si tɨ a lɔr hul.
Yaal saal tɨ Ejipt
13Gorne bi tɨ mum una tuna meri sul duga si gɨna, Baali Ndɨla na malayka paa wag tɨ Josep sul na nenɨm la ər ja gɨ ər ɓə: «O̰ ndal, əm so ɓa̰ la ər na̰ la, əm yey əm si na a tɨ Ejipt pi, əm ti tɨ pi marway gorne ən ja gɨ əm ɓə əm duga na ər barita əm hina na ər. Kəysul Erod jab ɓa̰ ne tɨ ər humna.» 14Josep o̰ ndal la, ər so ɓa̰ hari na ər na̰ na syɛl, ər si na a tɨ Ejipt. 15Ər ti tɨ pi marway Erod na ulu. Wa̰y ne an kuna ne ka jaa ne Baali ja toni na ər nebi mu ɓə: «Ən soon ən ɓa̰ ka ər wag tɨ Ejipt teni#2.15 Osé 11.1» tɨ jaa kuri.
Ɓimi na humna
16Gorne Erod una ɓə bi tɨ mum una tuna meri ka ər siri gɨna, hul laa ka ər nari. Ər naa gṵ ka a hun ɓimi ɓərgɨ ne a an lɛm tɨ ndidi lo tɨ Betlehɛm la tɨ lwərgɨ gun ne yeri ər sul. Tɨ lula sul tɨ an tɨ ndidi ne bi tɨ mum una ja gɨ ər kum. 17Kuna nejo, jaa ne Jeremi, Ndɨla na nebi ja tɨ kuri. Ər ja ɓə:
18«Aa tɨ Rama ɗo ngɔr,
A cḛy a ndɔ nari la a ka a jindemni la
tɨ Rasel jo cḛy ər ɓimi.
Ər taam ɓə wo ka ər sul dula lo, kəysul ər ɓimi uy gun#2.18 Jér 31.15.»
A hina tɨ Nasarɛt
19Gorne Erod uy gɨna, Baali na malayka wag na nenɨm tɨ Josep sul, tɨ Ejipt, 20ər ja gɨ ər: «O̰ ndal, əm so ɓa̰ hari na ər na̰ əm duga əm si tɨ lɔr nəgri sul tɨ Israhel, kəysul bi ne taam ɓa̰ ne humna a uy gun.» 21Josep o̰ ndal, ər so ɓa̰ la ər na̰ la, ər duga ər si tɨ lɔr nəgri sul tɨ Israhel. 22Gorne ər hina tɨ Israhel, ər laa ɓə Arkelos twi wa̰ay tɨ lɔr nəgri sul tɨ Jude tɨ ər ba tɨ Erod gor gɨna, ər oy saal tɨ pi. Ndɨla ja gɨ ər na nenɨm cam, ɓə ka ər si ər ti tɨ lɔr nəgri sul tɨ Galile. 23Ər ti tɨ lɔr ɗəng ne ndil ɓə Najarɛt. Ti in ka jaa ne Ndɨla na nebi ja ti ɓə: «A ɓə ər soon wo tɨ Nasarɛt» tɨ kuri.
Chwazi Kounye ya:
Matyo 2: nie
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023, ATALTRAB