Maak 16
16
Jézu nwale
(Mt 28:1–10; Lk 24:1–12; Jn 20:1–10)
1Dé wolé flinyi gié, Magadala le Mari koo, Mari lé ke Jak bu nya koo, Salomé koo, wo lia ginzan lɔ Jézu plaafɛ nya. 2Dimansi nya bladi, yirinwabléyi va, wo go gɔlɛkoro na. 3Yé wo lé ’wo ke lɛ léé: De ɛ dan gɔlɛ burula lɛ ko lɛ yé é si gɔlɛkoro ’léé? 4Yé wa nagini yé wa ye léé, gɔlɛ lé ke blɛɛn bɛ, wa burula kɔɔn é kwakwa. 5Yé wo wɔra gɔlɛkoro gi, yé wo pɛniɛ do ye é nyanale ’wo bɛyila, varɔ fu grɔgrɔ do nya é ta. Wo gi nyɛ blɛn kini. 6Yé é lé wo lɛ léé: Té ka gi nyɛ é kini lo. Mi lé ka ke a naginina, Nazarɛtzan Jézu lé wa gyɛ yiliblan ta, yee lé. É ’ka ’ko lo. É nwa é yuɛma. ’Ka nagini. Fɛana lé wa pa, yee lo. 7Naa, ’ka go yé ’ka fe Piɛri valé Jézu zuomunu pɔnénu lɛ léé: É go ka ’lɛ Galilé tɛrɛ la. Ana lé ka dan a ye lɛ, yee lé é a fe ka lɛ é kyɛn. 8Yé wo bɔra gɔlɛkoro gi é kele vlan nya. ’Té gligli a wo gi, yé é tablaa pa wo ma. Wo kanale lé we ma lé, wo ’ka we ’ko do kpen fe lɛ mi do lɛ lo.
Jézu ébo nagɔɔn Magadala le Mari lɛ
(Jn 20:11–18)
9Jézu nwa é yuɛma aan wo dimansi nya é bladi, é ébozen nagɔɔn Magadala le Mari lɛ é vinin. É kyɛn é yo sɔrafié si lezan ’ko gi. 10Yé é go a zuo fe lɛ munu lé wo ke é kyɛn Jézu va, wo lɛ, ’té wa wuvɔna, ’té wo yuɛyi éé bɔa. 11Wa ’ma aan wo léé, é a é yuɛma, yé Mari a ye, wo bli ’ka vo lɛ a lɛ lo.
Jézu ébo nagɔɔn é zuomi fié lɛ
(Lk 24:13–35)
12’Bɛ zuo é kɔlɛ tavɔɔ yé ébozen nagɔɔn wo va mi fié lé wo ke gona zia, wo lɛ. 13Yé wo da é ziin, yé wa zuo fe mi pɔnénu lɛ, yé wo ’ka wo bli vo lɛ a lɛ é ziin lo.
Jézu é zuomunu nwunvɔ
(Mt 28:16–20; Lk 24:36–49; Jn 20:19–23)
14’Bɛ zuo é ébozen nagɔɔn mi vu ta do lɛ bléyian va lé wa fɛ blena, a bléyi va. Wo ’ka wo bli voo a lɛ lo, yé wo tɔné gi a yuyu, amalé é we ble wo va. Munu lé ’bɛnu a ye a nwale zuo, wo ’ka dɔ lɛ ’bɛnu dére ta lo, azama.
15Yé é lé wo lɛ léé: ’Ka go tɛrɛ faa la, yé ’ka Wenéné ’ko fe munu faa lɛ. 16Mian é bli vo a lɛ yé wa batizéwo, é dan si lɛ we gi. Mian é ’ka é bli vo lɛ a lɛ lo, alé we é dan a gyɛ lɛ. 17Munuan wo bli vo a lɛ, wo dan gyɛzorowenu kɛlɛ lɛ. Wo dan yonu si lɛ munu gi an tɔ nya; wo dan dére dɛrɛnu vɔ lɛ; 18wo dan ménénu sia lɛ ’wo bɛ nya, yé dé wo migyɛlale mini, é ’ka dan we do kɛlɛ lɛ wo lɛ lo; wo dan ’wo bɛ pla lɛ gyɛgyɛmunu ta yé ’bɛnu é dan béli lɛ.
Jézu gole la gi
(Lk 24:50–53)
19Mizan we fe aan wo wo lɛ faa, yé Bale a sia yé é goan la gi, yé é nyana Kazambale bɛyila. 20Yé wo go Bale lé we fe lɛ fɛfaana. Mizan vo nyanama pana wo va, yé é dére dɔ gligli gyɛzorowenu lé wa kɛlɛna, wo nya.
Chwazi Kounye ya:
Maak 16: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979