Maak 15
15
Jézu dɔ Pilat ’lɛ
(Mt 27:1–2, 11–14; Lk 23:1–5; Jn 18:28–38)
1Bladi tutu, Balebanmunu segelenu koo, mi segelenu koo, sɛbɛgifemunu koo, mi bɛnu lé ke webolikinimunu nya, wo koo é ziin, wo kun wo va weblele ma. Dé wo bale vɔ Jézu ma faa wo goan yé wa nɔ Pilat lɛ.
2Pilat we laa a lee léé: Juifinu nwiinzan blɛn lé i nyaa? Jézu a zi pa a lɛ léé: Yee lé bé fe bɛ. 3Yé Balebanmunu segelenu we kiɛre dɔ a nwiin. 4Pilat we laa a lee é ziin léé: I ’ka we zi do kpen paan loo? Bé ye, wa we kiɛre dɔna i nwiin. 5Yé Jézu ’ka we do kpen zi vɔ lɛ é ziin lo. Amalé Pilat gi vuru.
Wo ga dɔ Jézu nwiin
(Mt 27:15–26; Lk 23:13–25; Jn 18:39; 19:16)
6Taboyi lé fɛti faa do do bɔle nya, Pilat éé bokɔn gizan do bɔraan munu lɛ, mian mi gu a laa a lee, yee lé. 7Munu lé wo nwa minwiinmunu ma, yé wo mi gyɛ, wa bokɔn gi ’bɛ bléyi ’ko va. Wo wo va mi do laama Barabas. 8Munu zén ékeva yé wo vo we fena Pilat lɛ léé, ’é a kɛlɛ é kɛlɛbɛ yɛrama. 9Pilat lé wo lɛ léé: É sɔ ka lɛ léé, an Juifinu nwiinzan blɛn bɔra ka lɛɛ? 10É a gi dɔɔ léé, Balebanmunu segelenu a maawona Jézu va, amalé wo da a nya ’é lɛ. 11Naa, Balebanmunu segelenu munu ma kyɛ dɔ léé, Pilat ’é Barabas bɔra. 12Pilat we fe é ziin, yé é lé wo lɛ léé: Mi lé ka a laan Juifinu nwiinzan blɛn ’naan, é sɔ ka lɛ léé, maa mɛ ɛ kɛlɛ ’bɛ lɛɛ? 13Yé wo siaa é ziin léé: Bé gyɛ yiliblan ta ma! 14Yé Pilat lé wo lɛ léé: Mɛ wenyané lé é a kɛlɛɛ? Yé wo siaa é ziin plɛplɛ léé: Bé gyɛ yiliblan ta ma! 15É sɔ Pilat lɛ léé, é mi gu lé blibɔmawe kɛlɛ amalé é Barabas bɔra wo lɛ. É Jézu bla aan wo wɛsɛné nya yé é a nɔ sunyanu lɛ a gyɛle yili ta we ma.
Sunyanu we nana Jézu ma
(Mt 27:27–31; Jn 19:2–3)
16Sunyanu go Jézu nya minwiinzan lé weblegɔrɔ gi. Yé wo ’wo pɔnénu laa yé wo faa zén ékeva ’bɛna. 17Wo galunaa sɔ zén Jézu ta, yé wo léli vuru ékema yé wa wo a ’wuo ma alé tɔkoro nya. 18Yé wo kun wele ma a va, yé wo léé: Juifinu nwiinzan blɛn, i nyɔn‐o. 19Yé wo gyan dia a nwiin yé wo ’lélibɔlɛ vɔ a ma, yé wo powuo zun tɛrɛ va, yé wo dia ’wo bli la a ’lɛ a ma yéri sile nya. 20Dé wa ma we nana ’ko zo faa wo galunaa sɔ si a ta, yé wo alé sɔnu zén a ta é ziin yé wo go a nya a gyɛle yili ta we ma.
Jézu gyɛle yiliblan ta
(Mt 27:32–44; Lk 23:26–43; Jn 19:17–27)
21Sirɛnezan Simɔn, yee lé ke Alézandre valé Rufus ti nya, é si féi yé é a giéna, yé wo Jézu lé yiliblan nɔ a lɛ gla nya a gole a nya we gi. 22Wo go Jézu nya fɛana lé wa laama Gɔlgɔta, ’bɛ gi léé, mi ’wuowɔlɛ lé fɛna, ana. 23Yé lia lé wa laama miré, wa vɔɔ dɔrɔ nya yé wa nɔ a lɛ, naa, é ’ka a si lɛ lo. 24Wa gyɛ yiliblan ta, ’bɛ zuo wo ’munnu zun alé sɔ do do ta, dé de ɛ dan a ye lɛ ézé nyaa? 25Wa gyɛ bladi valé é yiéyi méléna.
26Wean ma lé wo ga dɔ a nwiin, wa sɛbɛ gyɛ léé: Juifinu nwiinzan blɛn lé.
27Wo kyeenwomunu fié gyɛ a va, a do a a bɛyilazia, yé a do a a bɛbolazia. 28We lé ke é gyɛle Kazambale lé sɛbɛ gi léé, wa tɔ vɔ wenyanékɛlɛzannu va, a lɛ sɔɔ a zo.
29Giémunu a sɔnɔ, ’té woo ’wuo nyɔɔn‐an a fele nya léé: Éé! Biian i Balebangikɔn sɛra, yé bé dɔa é ziin yi yaa nya, 30’ibo si we gi, ’i si yiliblan ta, ’i zun. 31Balebanmunu segelenu é ziin, wo valé sɛbɛgyɛmunu, wo we nana a ma ’wo ke va, ’té wa fé léé: É mi bɛnu si we gi, yé é ’ka bɔa ébo sile lɛ we gi lo. 32Krist, Izraɛl nwiinzan blɛn, ’é si sin yiliblan ta yé ’é zun ma. Dé ko ye ’té ko pa a ta. Munu lé wo ’bɛnu gyɛ yiliblan ta a va bɛ, ’bɛnu é ziin, ’bɛnu a sɔnɔ.
Jézu gale
(Mt 27:45–56; Lk 23:44–49; Jn 19:28–30)
33Yiéyi pa aan wo, gunu dɔra tɛrɛ faa la fɔɔ yili tɛnlale plɛplɛ nya. 34Jézu siaa dére plɛplɛ nya léé: Éloi, Éloi, lama sabakatani? ’Bɛ gi léé, anzé Bale, anzé Bale, mɛmalé i an vo an doo? 35’Bɛna mi kenu a ’ma aan wo yé wo léma: Ka ye, é a Éli laana. 36Wo va mi do go vlan nya yé é nézurufɛ sia yé é a vɔ dɔrɔ tɔndɔle va yé é a pa gyan do ’léé yé é a dɔ Jézu lɔ ma, léé, ’é a gi’yi mini, yé é léé: ’Ka a vo. Dé Éli é dan da lɛ a zun lɛɛ? Ko dan a ye lɛ.
37Naa, Jézu siaa plɛplɛ, yé é ga.
38Balebangikɔn gi sɔ lé wa kɛlɛ kɔnmi nya, a fee bo, é sia loru yé é bɔ tɛrɛ.
39Jézu ga fɛan zo bɛ, sunyayɔsoru ’lɛzan lé ke Jézu yara zia, é a ye aan wo yé é léé: Mi ’ko a Kazambale Be nya, webozen nya.
40Lomu ana bɛ é ziin. Wa é dɔle baa, ’té wa naginian. Wo va le kenu lé ke ’ko: Magadala le Mari koo, Mari lé ke Jak kiéné valé Jozé bu nya koo, Salomé koo, woo lé. 41Dé é a Galilé tɛrɛ la wo go a zuo ’té woo a mawenu kɛla. Wo va le kenu a a va, lomu lé wo da wo nya Jérusalɛm, wo nya.
Jézu pale
(Mt 27:57–61; Lk 23:50–56; Jn 19:38–42)
42Flinyi tasi nya é a wolé fɛ ma’lɛrɛyi nya amalé nyanadi pa aan wo, 43Arimatézan Jozɛfu é bli ta dɔ plɛplɛ, yé é go Pilat va Jézu gale laa lɛ a lee. Jozɛfu ’ko, é a webolikinizannu va mi do nya, yé é a Kazambale plale munu nwiin lɛbɛnna. 44Yé Pilat léé: I, é ga tɛkɛɛ? Yé é sunyayɔsoru ’lɛzan laa, yé é we laa a lee léé: A gana mɔɔn? 45Dé é sunyayɔsoru ’lɛzan dére ’ma faa é lé Jozɛfu lɛ léé: Bé si. 46Yé Jozɛfu mipasɔ do lɔ, yé é Jézu gale si yiliblan ta, yé é a pasɔ vuru a ma yé é a pa mi pana lé wa bo gɔlɛ gi, ana. ’Bɛ zuo é gɔlɛ blɛn do burula yé é a dɔ a ’léé. 47Yé Magadala le Mari valé Jozé bu Mari a pana ye.
Chwazi Kounye ya:
Maak 15: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979