Maak 11
11
Jézu wɔra Jérusalɛm minwiinzan blɛn nya
(Mt 21:1–11; Lk 19:28–40; Jn 12:12–19)
1Wo bɔ aan wo Jérusalɛm sɔnɔ, ’bɛ gi léé, wo bɔ Bɛtfajé valé Bétani, Ɔlivi gɔ ma zia, Jézu é zuomunu fié nwunvɔ 2yé é lé wo lɛ léé: ’Ka go fla lé ke ka ’lɛ bɛ, a ta. Dé ka bɔ ana tɔɔn, ka dan sokofale boroné do ye lɛ é polu nya é dɔle, ’té mi vinin ’ka tan vɔ lɛ a ta lo. ’Ka a polu so, yé ’ka da a nya. 3Dé mi do a fe ka lɛ léé: Mɛmalé ka kɛlɛ a zoo? ’ka fe a lɛ léé: Mizan mawe a a gi, naa, ko dan da lɛ a nya é ziin é kele.
4A zuomunu go yé wo bɔ sokofale boroné ma, é polu nya é dɔle zi pɛn ma, kɔn do ’léé sɔnɔ. Yé wa polu so. 5Munu lé wo ke ana bɛ, wo va mi kenu lé wo lɛ léé: Ka sokofale polu so ka goan kyɛɛn? 6Fɛan zo lé Jézu we pa wo ’léé, a zo lé wa fe, yé wo zi nɔ wo lɛ yé wo go. 7Yé wo go sokofale boroné nya Jézu va. Wo ’wolé sɔnu pla sokofale boroné punu, yé Jézu nyana a ta. 8Yé mi kiɛre ’wolé sɔnu fwila zia. Yé mi pɔnénu go yilibɛ yéli lɛ zi ma, yé wa zana zia. 9Munu lé wo ke tawona Jézu ’lɛ, é valé munu lé wo ke tawona a zuo, wa siaana léé: Ozana! mi lé é da Mizambale tɔ gi, a drɔɔ ’é vo ma! 10Plale mi nwiin lé é dan da lɛ, ’té é ke ko tra David zé nya bɛ, a drɔɔ ’é vo ma. Lai loru munu, ’ka siaa mi, Ozana!
11Jézu bɔra Jérusalɛm, yé é wɔra Balebangikɔn gi. A nyaale fɛnu faa naginile nya, ’té yiri bɔ baa, yé é go Bétani, yee valé mi vu ta fié nya.
Jézu bale pa bɔrɔyili ma
(Mt 21:18–22)
12’Bɛ é tu kini, wo si Bétani, ’té lɔrɔ a Jézu gyɛna. 13É bɔrɔyili do ye baa, ’té a laanu a a ta. É go a nagini lɛ, dé a poro baa? É bié a ma, yé é a laa saa ɛ ye. Bɔrɔ poro baabléyi ’ka tan bɔ lɛ lo, azama. 14Yé é lé yili lɛ léé: Té i poro é baa é dɛrɛ monomono lo. Yé a zuomunu a dére ’ma.
Jézu Balebangikɔn ’lɛrɛ
(Mt 21:12–17; Lk 19:45–48; Jn 2:13–22)
15Wo bɔ aan wo Jérusalɛm yé Jézu wɔra Balebangikɔn gi. Yé é kun fɛlɔmunu valé fɛdanmunu bɔrale ma Balebangikɔn gi. É gɔɔli tavɔɔmunu lé tablénu zana a gi, yé é plawuoné danmunu lé blinnu yara bua. 16Yé é ’ka a nyi si lɛ léé, mi do kpen é gié fɛ do nya Balebangikɔn gi lo. 17Yé é we pla wo lɛ a fele nya léé: Wo ’ka a gyɛ lɛ Kazambale lé sɛbɛ gi léé, wo dan anlé kɔn laa lɛ bɛn faa lé bazorokɔn loo? Naa, ka a kɛlɛ kyeenwozannu yɔɔkɔn nya.
18Balebanmunu segelenu valé sɛbɛgifemunu we ’ko ’ma aan wo, wo kwa kuli léé, wa gya, naa, munu faa gi vuru alé wepaale ma, amalé wo kana.
19É nyanadi yé Jézu si fla yé é go.
Jézu blipale we lɛ lé we fe
(Mt 18:18–19)
20’Bɛ é tu kini, wa giéna aan wo, yé a zuomunu bɔrɔyili ye é gale, fɔɔ yé é bɔ a suni ma. 21We lé é bɔ, a sele dɔ Piɛri gi, yé é lé Jézu lɛ léé: Anzan, bé nagini. Bɔrɔyili lé i bale pa a ma, é ga. 22Jézu léé: ’Ka bli vo Kazambale lɛ. 23Maa lé ka lɛ webozen nya léé: Dé miomian é a fe gɔ blɛn ’ko lɛ léé: ’I si ’ko yé ibo vuli wɛyi va, dé a bli ’ka kɛlɛ lɛ fié a laale ma lo, naa, dé a bli vo a lɛ léé, we lé é a fe é dan kɛlɛ lɛ, a lɛ é dan sɔɔ lɛ a lɛ. 24Amalé maa lé ka lɛ léé: Fɛ faa lé ka a laan bazorole nya, ’ka bli vo a lɛ léé, é a ka lee, yé a lɛ é dan sɔɔ lɛ ka lɛ. 25Yé bléyian va lé ka a é dɔle bazorona, dé mi do va we a ka gi, ’ka a ma we vo, ka Ti lé é ke la gi, alé ka ma we vole we ma. 26Naa, dé ka ’ka munu ma we voo lo, ka Ti lé é ke la gi, é ’ka ka ma we voo lo é ziin.
Wa laa Jézu lee léé: De ɛ se kɛlɛ i lɛɛ?
(Mt 21:23–27; Lk 20:1–8)
27Yé wo go Jérusalɛm é ziin. Bléyian va lé Jézu a dɔwona Balebangikɔn gɔrɔ gi, Balebanmunu segelenu koo, sɛbɛgifemunu koo, mi segelenu koo, wo da a va. 28Yé wa laa a lee léé: Se ka nya lé i we ’konu kɛlaa? Mi kyɛn ɛ se kɛlɛ i lɛ léé, i wo kɛlɛɛ? 29Jézu lé wo lɛ léé: Maa dan we do laa lɛ ka lee é ziin; dé ka a zi pa an lɛ, yé mian é se ’ko kɛlɛ an lɛ, maa dan ’bɛzan tɔ fe lɛ ka lɛ. 30De ɛ Jan nwunvɔ munu batizéwonaa? Kazambale lé laa, munu léé? ’ka fe an lɛ. 31Yé wo ’wo va we ble, yé wo léé: Dé ko fe léé, Kazambale ɛ a nwunvɔ, ’té é dan a fe lɛ léé: Mɛmalé ka ’ka ka bli vo lɛ a lɛ loo? 32Yé dé ko fe léé, munu ɛ a nwunvɔ . . . Wa kanana munu lee. Munu faa éé Jan yé balelayezan bozen nya, amalé. 33Yé wa zi pa Jézu lɛ léé: Ko ’ka a gi dɔɔa lo. Yé Jézu lé wo lɛ léé: Maa é ziin, sean nya lé maa we ’konu kɛla, maa ’ka dan a fe lɛ ka lɛ lo.
Chwazi Kounye ya:
Maak 11: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979