Maak 10
10
Jézu le bɔrale lé we fe
(2 BDws 24:1–4; Mt 19:1–12; Lk 16:18)
1Jézu si aan wo ’bɛna, yé é go Judé tɛrɛ la, Juudɛn yuu zi. Yé mi gu zén ékeva a sɔnɔ é ziin, yé é kun we paale ma wo gi é kɛlɛbɛ gi.
2Yé Farizimunu bié a gi danle we ma yé wa laa a lee léé, a se a gɔné lɛ léé, é na bɔraa? 3Yé é a zi pa wo lɛ léé: Moizi lé ka lɛ nɔɔ? 4Wo léé: Moizi zi nɔ gɔnénu lɛ léé, ’wo lebɔrasɛbɛ gyɛ yé wo daan a ma. 5Yé Jézu lé wo lɛ léé: Ka tɔné gi yuyu lé we ma lé Moizi a fe a zo. 6Naa, fɛ kɛlɛle pélisia bléyi va, Kazambale gɔné valé le kɛlɛ. 7Amalé gɔnézan é dan si lɛ é ti valé é bu va, yé é dan péli vɔ lɛ ’é na va, 8yé wo fiénu é dan kɛlɛ lɛ mi do kpen nya. ’Bɛ zo lé wo ’ka mi fié nya é dɛrɛ lo, wa mi do kpen ɛ nya. 9Fɛ lé Kazambale a pa ékema, té mi a si ékema lo.
10Wo wɔra aan wo kɔn gi, a zuomunu we ’ko gi laa a lee é ziin. 11Yé é lé wo lɛ léé: Mian é na bɔra yé é le bɛ si, ’té é le bɛ gini é na va; 12yé lean é si é zana va yé é gɔné bɛ si, ’té é gɔné bɛ gini é zana wuo.
Jézu nénu drɔɔ vo
(Mt 19:13–15; Lk 18:15–17)
13Munu da nunukénénénu nya Jézu va a bɛ manele wo ma we gi. Naa, a zuomunu we ble munu lé, ’bɛnu da nénu nya, ’bɛnu va. 14Jézu a ye aan wo, é ’na a ma, yé é lé é zuomunu lɛ léé: ’Ka daan nunukénénénu ma, ’wo da an va. Té ka wo dale yi ga lo; naa, munu lé wo ke bélé nénu zo, Kazambale a é plale wo ɛ nwiin. 15Dé miomian é ’ka Kazambale plale ’é nwiin nyi sié bélé né kiéné zo lo, é ’ka dan wɔra lɛ Bale va lo. Maa fe ka lɛ. 16’Bɛ zuo, ’té éé nénu sié, ’té éé wo drɔɔ voo é bɛ plale nya wo ta.
Fuable pɛniɛ lé we
(Mt 19:16–30; Lk 18:18–30)
17Dé Jézu a zi siana, gɔné do da vlan nya a va, yé é zun é powuo la a ’lɛ, yé é we laa a lee léé: Anzan zin, maa kɛla kaa yé an vo é yuɛma lɛɛfaama yé a glɛ ’ka dɔa loo? 18Yé Jézu lé a lɛ léé: Mɛmalé i maa laan mi ziin? Kazambale do kpen ɛ ke é zin. 19I bélidɔwenu dɔɔ: té i le bɛ gini lo, té i mi gyɛ lo, té i kyeenwo lo, té i viéwo mi ma lo, té i mi ta ble lo, i ti valé i bu lɛdɔma, woo lé. 20É a zi pa a lɛ léé: Anzan, an we ’konu faa kɛlɛle pélisia an kiéné la bléyi va. 21Jézu a nagini, yé é sɔ a lɛ. Yé é lé a lɛ léé: Ilé we do vo. ’I go, ’ilé fɛnu faa dan yé bé mafɛ nɔ nyanégyɛzannu lɛ, yé i dan fɛwezan ye lɛ la gi. Dé i nyaa a nya faa, ’i da an zuo. 22Alé fɛnu a di, amalé dére ’ko ’na a ma, yé é go é bli gi kyɛdɔle nya. 23Jézu é yuɛ bɔrɔ wo ta tɛɛɛn yé é lé é zuomunu lɛ léé: Munu lé fuafɛnu ke wo lee, wo plale Kazambale wuo a wo ma tɔntɔn. 24Jézu wean fe bɛ, é di kini a zuomunu gi. Yé é lé wo lɛ é ziin léé: Anlé nénu, plale Kazambale wuo a tɔntɔn. 25Fuablezan plale Kazambale wuo a tɔntɔn é mini nyɔgɔmé wɔrale sɔ béé sééné yɛrɛ gi ta. 26A zuomunu gi taa vuru ’wo ma yé wo lé ’wo ke lɛ léé: Yé de ɛ bɔalɛ léé, é si we gii? 27Jézu wo nagini yé é léé: Munu ’ka bɔa a kɛlɛle lɛ lo, naa, Kazambale ɛ bɔalɛ. Kazambale éé bɔa we faa kɛlɛle lɛ.
28Piɛri lé a lɛ léé: Bé ye, ko daan fɛ faa ma yé ko da i zuo. 29Jézu lé a lɛ léé: Maa lé ka lɛ webozen nya léé, mian é daan élé fɛnu ma, dé alé kɔn léé, dé a bwenu léé, dé a burunu léé, dé a bu léé, dé a ti léé, dé alé nénu léé, dé alé tɛrɛnu léé, dé é daan wo ma, maa valé Wenéné ’ko lé we ma, 30yé lao, tɛrɛ ’ko la, é ’ka wo lɛgi yé gɔnɔ yɔ soru lo, ’bɛzan ’ka lo; kɔnnu koo, bwenu koo, burunu koo, bunu koo, nénu koo, tɛrɛnu koo, é valé nyanéblelenu koo, é dan wo ye lɛ yé alé tɛrɛla nyaale zuo é dan vo lɛ é yuɛma lɛɛfaama, ’bɛ glɛ ’ka lo. 31Mi vininzannu kiɛre é dan kɛlɛ lɛ mi voélazannu nya, yé mi voélazannu kiɛre é dan kɛlɛ lɛ mi vininzannu nya.
Jézu é gale fale vɔ a gɔnɔ yaazan nya
(Mt 20:17–19; Lk 18:31–34)
32Jézu valé é vamunu go Jérusalɛm. Wa zia, ’té Jézu a wo ’lɛ. Di kini a zuomunu gi, yé munu go a zuo wo ta nya drɔɔdrɔɔ. Yé Jézu mi vu ta fié bié é sɔnɔ é ziin, yé wean é dan bɔ lɛ a ma, é kun a fele ma wo lɛ, yé é léé: 33Ka ye, kaa a gona Jérusalɛm yé wo dan maa blami Be pa lɛ Balebanmunu segelenu valé sɛbɛgifemunu lee. Wo dan ga dɔ lɛ an nwiin, yé wo dan an nɔ lɛ bɛn bɛnu lɛ, 34yé ’bɛnu é dan an ma we nana lɛ; wo dan ’lélibɔlɛ vɔ lɛ an ma, yé wo dan an bla lɛ wɛséné nya yé wo dan an gyɛ lɛ yé yi fié a yaazan nya an dan nwa lɛ gamunu va.
Jak valé Jan we do laa Jézu lee
(Mt 20:20–28; Lk 22:24–27; Jn 13:3–17)
35Zébédé benu Jak valé Jan bié Jézu ma yé wo lé a lɛ léé: Kozan, we lé ko dan a laa lɛ i lee, é sɔ ko lɛ léé, bé kɛlɛ ko lɛ. 36É lé wo lɛ léé: Mɛ fɛ ɛ sɔ ka lɛ léé, maa a kɛlɛ ka lɛɛ? 37Wo lé a lɛ léé: Dé i wɔra ilé fua gi, ’i zi nɔ ko lɛ yé ko nyana i bɛyila valé i bɛbola. 38Jézu lé wo lɛ léé: We lé ka a laa an lee, ka ’ka a gi dɔɔa lo. Kana lé an dan ’yi mini lɛ a gi ’naan, ka bɔalɛ léé, ka ’yi mini a gii? Yé wo dan an batizéwo lɛ bɛan gi ’naan, ka a nyi sié léé, wo ’ka batizéwo ’bɛ bɛ gii? 39Yé wo léé: Ko bɔalɛ. Jézu lé wo lɛ léé: Webozen lé, kana lé an dan ’yi mini lɛ a gi, a gi lé ka dan ’yi mini lɛ; yé wo dan an batizéwo lɛ bɛan gi, yee bɛ duo gi lé wo dan ka batizéwo lɛ é ziin. 40Naa, nyanale an bɛyila valé an bɛbola, ’bɛ nɔle ’ka sié an va lo. Bale é dan a nɔ lɛ munu lé, é a ta dɔ wozé nya, wo ɛ lɛ. 41Mi vu ’bɛ ’ma aan wo, wo bli fli Jak valé Jan ma. 42Jézu wo faa laa, yé é lé wo lɛ léé: Ka gi dɔɔ léé, munuan woo wo yé minwiinzannu nya bɛnnu va, woo ɛ plaan munu nwiin plɛplɛ, ’té munu lé wo ke vanu nya wo va bɛ, woo mi planu kɛla ’wo wuozannu nya. 43É ’ka ’bɛ zo ka méléna lo. Dé é sɔ miomian lɛ léé, ’é kɛlɛ ka nwiinzan nya, ’bɛzan ’é kɛlɛ ka wuozan nya ma. 44Yé dé é sɔ miomian lɛ lee, ’é kɛlɛ ka vininzan nya, ’bɛzan ’é kɛlɛ ka faa lé luu nya ma. 45Naa, maa blami Be ’ka da lɛ munu lé an mawe kɛlɛle we gi lo; naa, an da munu mawe kɛlɛle we gi, ’bɛ valé an gale mi kiɛre tabofɛ nya we gi.
Yuɛwiizan Baatimé béli
(LvS 146:8; Mt 20:29–34; Lk 18:35–43)
46Jézu koo, é zuomunu koo, mi gu blɛn koo, wo bɔ Jériko. Wo si aan wo ana, ’té Timé be Baatimé lé é ke yuɛwiizan nya, ’té éé doro paan, é a é nyanale zi nɔnɔ. 47É a ’ma léé, Nazarɛtzan Jézu da, yé é kun siaale ma léé: David be Jézu, ’i nyanai zén an ta. 48Yé mi kiɛre siaa a ta léé, ’é tadɔ. Naa, é siaa taawo plɛplɛ é ziin léé: David be Jézu, ’i nyanai zén an ta! 49Jézu dɔ yé é léé: ’Ka a laa, ’é da. Yé wo yuɛwiizan laa yé wo léé a lɛ léé: ’I bli ta dɔ plɛplɛ. ’I nwa, é a i laana. 50Yuɛwiizan élé sɔ dia, yé é nwa fɔrɔle nya yé é go Jézu va. 51Jézu a laa a lee léé: É sɔ i lɛ léé, maa mɛ ɛ kɛlɛ i lɛɛ? Yuɛwiizan a zi pa a lɛ léé: Anzan, an yuɛ ’é fuo ma. 52Yé Jézu lé a lɛ léé: ’I go. Ilé blipale ma lé i béli. ’Bɛna tɔɔn, a yuɛ fuo yé é go Jézu zuo.
Chwazi Kounye ya:
Maak 10: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979