Luk 6
6
Jézu zuomunu buruwɔlɛ nɛnɛnu poro é ma flinyi nya
(Mt 12:1–8; Mk 2:23–28)
1Flinyi do nya Jézu a giéna aan wo buru féi méléna. Bléyian va lé a zuomunu a giéna woo buruwɔlɛ nɛnɛnu poroan é ma, ’té wa suun boo wo lee, ’té wa blé. 2Farizimi kenu lé wo lɛ léé: We lé wa kɛlɛle yi ga flinyi nya, mɛmalé ka a kɛlɛnaa? 3Jézu lé wo lɛ léé: We lé David valé é vamunu a kɛlɛ, ’té lɔrɔ a wo gyɛna, ka ’ka tan a ta fe lɛ loo? 4Fɛan zo lé é wɔra Kazambale lé kɔn gi yé é Bale ’lɛburu si, yé é a ke ble yé é a ke nɔ é vamunu lɛ, dɔle ’té a blele se a Balebanmunu saa ɛ lɛ, ka ’ka tan a ta fe lɛ loo? 5Yé é lé wo lɛ léé: Maa blami Be, maa a é ziin flinyizan nya.
Bɛgazan lé we
(Mt 12:9–14; Mk 3:1–6)
6Flinyi bɛ nya Jézu wɔra bazorokɔn gi yé é we paa munu gi. Bɛyigazan do ana mi. 7Sɛbɛgifemunu valé Farizimunu vo Jézu naginina, léé, dé é dan mi béli lɛ flinyi nyaa? we dɔle a nwiin we ma. 8Naa, é wolé gibɔrɔlenu dɔɔ, yé é lé bɛgazan lɛ léé: ’I nwa, ’i dɔ loru wo méléna bɛ. ’Bɛ nwa, yé ’bɛ dɔ loru. 9Yé Jézu lé wo lɛ léé: Maa we do laan ka lee; a se a mi lɛ léé, é wezin kɛlɛ flinyi nya laa, taa, é wenyané ɛ kɛlɛɛ? É mi béli flinyi nya laa, taa, é mi gyɛɛ? 10’Bɛ zuo Jézu é yuɛ bɔrɔ é zi munu faa ta tɛɛɛn yé é lé gɔnézan lɛ léé: ’I bɛ soi. É a kɛlɛ yé a bɛ béli.
11Wo bli fli é baba yé wo Jézu ma we ble léé, mɛ lé ’wo dan a kɛlɛ lɛ a lɛɛ?
Jézu mi vu ta fié si a va
(Mt 10:1–4; Mk 3:13–19)
12’Bɛ bléyi va Jézu go gɔ nwiin bazorole we gi, yé é tu kini bazorole nya Kazambale lɛ. 13Dé tu kini faa é zuomunu laa yé é mi si wo va vu ta fié, yé é wo tɔ pa nwunvɔzannu.
14Simɔn lé é a tɔ pa Piɛri, yee valé é zuané André koo, Jak koo, Jan koo, Filip koo, Baatélémi koo, 15Matio koo, Tɔmas koo, Alifé be Jak koo, Simɔn lé wa laama Zélɔt koo, 16Jak be Jud koo, Jézu pa munu leezan Kariɔtzan Judas koo, woo lé.
Jézu mi gu mawe kɛlɛ
(Mt 4:23–25)
17Yee valé é zuomunu si gɔ nwiin yé wo dɔ fɛna dégélé do na, ana lé a zuomunu gu blɛn bozen valé munu gbau ke, ’té wo si Judé tɛrɛ faa koo, Jérusalɛm koo, Tii valé Sidɔn zi wɛyi gɔɔn ma tɛrɛ koo, wona. Wo da a dére ’male valé wolé gyɛ sile wo ma we gi. 18Munu lé yo tiridɔlenu nyané pa wo ta, é wo béli. 19Plɛplɛ do a sina a gi yé é a wo faa bélina, amalé mi gu faa a kwa kulina léé, ’wo bɛ mane a ma.
Munu lé wozé a néné valé munu lé wozé a naané
(Mt 5:1–12)
20Yé Jézu é yuɛ vɔ é zuomunu ta yé é léma:
’Kaa nyanégyɛmunu, ka a bɛan ’bɛ gi bɛ, ’bɛ a é zima kazé nya, naa, Kazambale a é plale ka nwiin.
21’Kaa lé, lɔrɔ ke ka gyɛna, ka a bɛan ’bɛ gi bɛ, ’bɛ a é zima kazé nya, naa, Bale é dan lɔrɔ si lɛ ka ma.
’Kaa lé ka ke wuvɔna, ’ka a bɛan ’bɛ gi bɛ, ’bɛ a é zima kazé nya, naa, ka dan yéri si lɛ.
22Dé wo ka za paoo, dé wo ka bin?-?oo, dé wo ka sɔnɔoo, dé wo sɔn vɔ ka tɔ ma fɛ naané zo‐oo, maa blami Be lé we ma, ka a bɛan gi bɛ, ’bɛ a é zima kazé nya. 23’Bɛ yi la ka gi ’é nana fɔɔ nɛnɛ bole nya, naa, ka gooli é dan kɛlɛ lɛ blɛn la gi. A zo duo lé wo tranu a kɛlɛ balelayemunu lɛ.
24Naa, fuablemunu, ka gale nyɔ, naa, ka tɔrɔpaafɛnu a ka lee.
25’Kaa lé ka ke é kanle, ka gale nyɔ, naa, lɔrɔ é dan ka gyɛ lɛ.
’Kaa lé ka ke yéri sina, ka gale nyɔ, naa, gyɛ é dan bɔ lɛ ka ta yé ka dan wuvɔ lɛ.
26Dé munu faa ka ma we zin fe, ’té wenaané ɛ kɛlɛ ka lɛ bɛ, naa, ’bɛ zo lé wo tranu a kɛlɛ viébalelayemunu lɛ.
Mi lé ’é nyanémunu lɔrɔ pale
(Mt 5:38–48; 7:12a; Rom 12:17–21)
27Naa, ’kaa lé ka ke ka tɔné dɔna an lɛ, maa lé ka lɛ léé: Ka nyanézannu ’é sɔ ka lɛ ma; ’ka wezin kɛlɛ ka zapamunu lɛ ma; 28munu lé woo bale paan ka ma, ’ka wo drɔɔ vo ma; munu lé woo nyané paan ka ta, ’ka bazoro wolé we ma ma. 29Dé mi i blin do gyɛ, bé koɛzan nɔla a lɛ é ziin ma. Dé mi do ilé sɔ si yé é a a va léé, ’é ilé varɔ sié é ziin, té bé yi ga a lee lo. 30Dé miomian fɛ laa i lee, bé nɔ a lɛ, yé mi lé é ilé fɛ si, té bé laa a lee é ziin lo ma. 31We lé é sɔ ka lɛ léé, munu a kɛlɛ ka lɛ, yee duo lé ka kɛlɛ wo lɛ ma. 32Munu lé ka sɔ wo lɛ, dé wo saa ɛ sɔ ka lɛ, ka dan mɛ tɔnɔ ye lɛ ’bɛ maa? Wenyanékɛlɛmunu é ziin, wo lɔrɔpazannu ɛ sɔa wo lɛ. 33Dé ka wezin kɛla munu lé woo wezin kɛla ka lɛ, wo ɛ lɛ, ka dan mɛ tɔnɔ ye lɛ ’bɛ maa? Wenyanékɛlɛmunu é ziin, yee duoan wa kɛla loo? 34Dé ka drɔn paan munu lé ka bli ke a lɛ léé, wa bɛ no, wo ɛ ma, ka dan mɛ tɔnɔ ye lɛ ’bɛ maa? Wenyanékɛlɛmunu é ziin, woo drɔn paan wenyanékɛlɛmunu ma a lɛgi yele we ma. 35Naa, ka nyanézannu ’é sɔ ka lɛ ma, yé ’ka wezin kɛlɛ ma; ’ka drɔn pa mi ma, yé té ka bli é vo a lɛgi yele lɛ lo ma. Ka gooli é dan kɛlɛ lɛ blɛn, yé ka dan kɛlɛ lɛ Loruzan benu nya; naa, éé wezin kɛla bɔvɔalozannu valé wenyanékɛlɛzannu lɛ. 36Amalé ’ka kɛlɛ nyanaizénzannu nya, fɛan zo lé ka Ti ke nyanaizénzan nya, a zo.
Mi bɛ ma we blele
(Mt 7:1–5, 15–20)
37Té ka mi ma we ble lo, yé wo ’ka dan ka ma we ble lɛ lo; té ka we dɔ mi nwiin lo, yé wo ’ka dan we dɔ lɛ ka nwiin lo; ’ka mi ma we vo, yé wo dan ka ma we vo lɛ. 38’Ka fɛ nɔ, yé wo dan fɛ nɔ lɛ ka lɛ: wo dan a zén lɛ kalé sɔ gi, fɛdangifɛ zin nya, yé wa ta blin, yé wa zuun, yé é zana a ma, naa, ka fɛ no mi lɛ fɛan zo, a zo duo lé wo dan kazé nɔ lɛ.
39É gɔné do vɔ wo lɛ é ziin yé é léé: Yuɛwiizan é bɔalɛ léé, é zi gɔɔn yuɛwiizan lɛɛ? Wo fiénu ’ka dan dia lɛ guru gi loo?
40Wedraanzan ’ka minié wepaaé?-?gizan lɛ lo; naa, mi faa lé wo bɔ we ma, woo kɛla bélé wozan zo.
41Mɛmalé lɔɔ gɔ do lé é ke i bwe yuɛ va, i ’bɛ yé, yé yilifee blɛn lé é ke ibo yuɛ va, i ’ka ’bɛ yé loo? 42Bii lé i ’ka i yuɛ va yilifee blɛn yé lo, é kɛlɛ kaa yé i lé i bwe lɛ léé: An bwe, ’i an vo yé an lɔɔ gɔ do si i yuɛ vaa? Bodrɔzan, i yuɛ va yilifee blɛn si faa ’lɛ, yé i fɛna ye wéiin, yé i lɔɔ gɔ do si i bwe yuɛ va.
Wo yili dɔɔan é poro ma
(Mt 7:17–20; 12:34b–35)
43Yili zima lé éé poro naané baan, yé yili naané lé éé poro zima baan, ’bɛ yili ’ka lo. 44Woo yili do do faa dɔɔan ’wo poro ma. Wo ’ka bɔrɔyili poro soo léliyili ma lo, yé wo ’ka dɔrɔporo soo plénsɔné léliyili ma lo. 45Mi zin éé fɛ zimanu sié é bli gi fɛwezan zimanu va, yé mi naané éé fɛ naanénu sié élé fɛwezan naanénu va; naa, we lé éé mi bli faan, yee ɛ bɔraan a ’léé.
Kɔngane fié
(Mt 7:24–27; 2 Pi 1:5–10)
46Mɛmalé ka an laan Mizan, Mizan, yé ka ’ka tawoo an dére ta loo? 47Dé mian é da an va, dé é an dérenu maan yé azan a tawenu kɛla, éé kɛla bélé mian zo, maa dan ’bɛzan gɔɔn lɛ ka lɛ. 48É a bélé mi lé é ke kɔn dɔna, yé é kɔngane vɔna guru bo baa, yé é kɔngane vɔ gɔlɛ ta, a zo. ’Yi fan yé ’yiyoro plɛplɛ zén kɔn ’ko ma yé é ’ka zana lɛ lo; wa dɔ é zima, azama. 49Naa, mi lé é a maan yé azan ’ka a tawenu kɛla lo, éé kɛla bélé mi lé é kɔn dɔ tɛrɛ yuɛ la ’té a gane ’ka é vɔle lo, a zo. ’Yiyoro plɛplɛ zén kɔn ma; tɔɔn, a guru zana a gi, yé é sɛrɛ tata.
Chwazi Kounye ya:
Luk 6: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979