Luk 5
5
Simɔnnu pɔ kiɛre gyɛ
(Mt 4:18–22; Mk 1:16–20; Jn 21:1–11)
1Bléyian va lé Jézu ke Jénésarɛt wɛyi gɔ ta, yé mi gu a tunu Kazambale dére ’male we gi, 2é ’yitagoro fié ye é dɔle wɛyi gɔɔn ma. Pɔgyɛmunu zun wolé pɔgyɛsélinu zurule we gi. 3’Yitagoro ’konu va goro do lé é ke Simɔn zé nya, é vɔ a gi, yé é lé ’bɛ lɛ léé, ’bɛ é si wɛyi gɔɔn ma sɛ. A zuo é nyana ’yitagoro gi, yé é we paa mi gu gi.
4Dé alé wefele nyaa faa é lé Simɔn lɛ léé: ’I go ’yi guru la yé ’ka kalé pɔgyɛsélinu nwɛɛn pɔgyɛle we gi. 5Simɔn a zi pa a lɛ léé: Anzan, ko tu kini nyanama pale nya yé ko ’ka we do kpen ye lɛ lo, naa, i dére ta lé an dan séli nwɛɛn lɛ. 6É a nwɛɛn aan wo, é pɔ kiɛre gyɛ yé wolé séli kun fiale ma. 7Wo bɔlunu lé ’bɛnu ke ’yitagoro bɛ gi bɛ, wo bɛ vɔ ’bɛnu lɛ léé, ’bɛnu ’é da bɔ ’wo va. Wo da yé wo ’yitagoro fiénu fan, naa, é vo sɛ yé wo go ’yi wuo. 8Simɔn Piɛri ’bɛ ye aan wo, é ’wuo wɔra Jézu gane wuo yé é léé: Mizan, maa a wenyanékɛlɛzan nya, amalé ’i si an sɔnɔ. 9Di kini yee valé é vamunu faa gi, pɔ kiɛre gyɛle we ma. 10A zo duo lé é kɛlɛ Zébédé benu Jak valé Jan lé wo ke nyanama ’ko pana ’bɛnu nya ékeva bɛ, ’bɛnu é lɛ. Yé Jézu lé Simɔn lɛ léé: Té i kana lo; é sia bléyi ’ko va i dan kɛlɛ lɛ munuginizan nya. 11Wo da aan wo ’yitagoronu nya wɛyi gɔɔn ma yé wo daan fɛnu faa ma yé wo go a zuo.
Jézu pantɛngyɛzan béli
(LvS 51:12; Mt 8:1–4; Mk 1:40–45)
12Jézu a fla do la aan wo, mi lé pantɛn zén a kɔlɛ faa ma, é Jézu ye yé é dia é bli la Jézu ’lɛ yé é we fe a lɛ nyanaizénladére nya léé: Mizan, dé é sɔ i lɛ, i bɔalɛ yé i pantɛn si an ma. 13Jézu é bɛ soi yé é bɛ mane a ma a fele nya léé: É sɔ an lɛ. ’É si i ma ma. Tɔɔn, pantɛn si a ma. 14A zuo Jézu lé a lɛ léé: Té bé zuo fe mi do kpen lɛ lo. Naa, ’i go ibo nagɔɔn Balebanzan ɛ lɛ, yé fɛ lé Moizi a nɔle béli dɔ, bé banwo, yé ’é kɛlɛ munu lɛ i bélile tɔmase nya.
15A tɔ bɔ ’té é go bɔle nya é ziin, yé munu da mi gu nya a va a dére ’male valé wolé gyɛ sile wo ma we ma. 16Yé é si wo va yé é go bwi gi, yé é bazoro.
Jézu furuagyɛzan béli
(LvS 103:3; Mt 9:1–8; Mk 2:1–12)
17Yi do nya Jézu a we paana munu gi. ’Té Farizimunu valé bélidɔwedɔɔmunu a ’bɛna é nyanale. Wo si Galilé tɛrɛ la fla faa koo, Judé tɛrɛ koo, Jérusalɛm koo, wona; yé wo Mizambale lé plɛplɛ ye munu bélina. 18Yé munu da furuagyɛzan nya é yiale yialafɛ ta; wa kwa kulina léé, ’wa wɔra yé wa pla Jézu ’lɛ. 19Mi gu lé we ma, wo ’ka wɔrana ye lɛ lo, amalé wo vɔ kɔn nwiin yé wa fɔn yé wo gɔnézan zun ’bɛna, yee valé élé yialafɛ nya, zén‐ékevamunu méléna Jézu ’lɛ. 20Jézu a ye aan wo léé, wo bli a ’é lɛ, é léma: Gɔnézan, maa i ma we vo ilé wenyané ma. 21Sɛbɛgifemunu valé Farizimunu kun ’wo va weblele ma yé wo léé: Yee mi ’ko lé éé Bale sɔnɔan, de ɛ ke a nyaa? Dé é ’ka Kazambale do kpen nya lo, de ɛ bɔa mi ma we vole lɛɛ? 22Wenu lé wa bɔrɔna wo bɔn gi, Jézu a dɔɔ aan wo é kun wefele ma wo lɛ yé é léé: Mɛmalé bɔn‐in bɔrɔle ’konu ke ka gii? 23Dé maa fe a lɛ léé: Maa i ma we vo ilé wenyanénu ma, ’bɛ a do; dé maa fe a lɛ léé: ’I nwa, ’i tawo, ’bɛ a do, ’naan, a kyɛnzan ɛ ke we blɛn nya é mini é bɔluzan taa? 24É sɔ an lɛ léé, ka a gi dɔɔ léé, a se a maa blami Be lɛ lee, an mi ma we vo tɛrɛ la, amalé é lé furuagyɛzan lɛ léé: Maa lé i lɛ léé, ’i nwa ’ilé yialafɛ sia, yé ’i go ilé kɔn ’léé. 25Tɔɔn ’bɛ nwa wo yuɛ va, yé ’bɛ élé yialafɛ sia yé ’bɛ go élé kɔn ’léé Kazambale tɔ bɔle nya. 26Munu faa gi vuru yé wo Kazambale tɔ bɔ; yé kana zén wo gi yé wo léé: Ko givuruwenu ye kyɔ.
Jézu Lévi laa
(Mt 9:9–13; Mk 2:13–17)
27’Bɛ zuo Jézu bɔra yé é vagɔɔlisizan do ye, wa laama Lévi. É a é nyanale vagɔɔlisina. Yé Jézu lé a lɛ léma: ’I da an zuo. 28Yé é ’élé fɛnu faa vo, yé é nwa yé é go a zuo.
29Lévi fɛti blɛn kɛlɛ a lɛ élé kɔn gi, yé vagɔɔlisimunu kiɛre valé mi bɛnu a fɛblena wo va. 30Farizimunu valé sɛbɛgifemunu gun gyɛ yé wo lé a zuomunu lɛ léé: Mɛmalé ka fɛ blé vagɔɔlisimunu valé wenyanékɛlɛmunu va ’té ka ’yi minian wo vaa? 31Jézu kun wefele ma yé é lé wo lɛ léé: Munu lé we do kpen ’ka wo ma lo, wo mawe ’ka dɔtrɔ gi lo, naa, gyɛgyɛmunu ɛ mawe ke a gi. 32An ’ka da lɛ mi tegelenu laa lɛ léé, ’wo bli nɔla lo, naa, an da wenyanékɛlɛmunu ɛ laa lɛ.
Wo lɔrɔ sɔnle lé we laa Jézu lee
(Mt 9:14–17; Mk 2:18–22)
33Wo lé a lɛ léé: Jan zuomunu valé Farizimunu zuomunu woo lɔrɔ sɔn‐o yi kiɛre nya ’té woo bazoroan, naa, i zuomunu éé fɛ blé ’té woo fɛ minian. 34Yé Jézu lé wo lɛ léma: Dé ledɛrɛsizan a é béénu va, ka bɔalɛ yé ka wo kɛlɛ lɔrɔsɔnzannu nyaa? 35Bléyi do é dan bɔ lɛ yé wo dan ledɛrɛsizan si lɛ wo va; ’bɛ bléyi va lé wo dan lɔrɔ sɔn lɛ. 36É gɔné do vɔ wo lɛ é ziin yé é léé: Wo ’ka varɔ dɛrɛ fiaan ’té wa kuruné bééan varɔ kwa ma lo; naa, dé wa kɛlɛ, ’té wo varɔ dɛrɛ fia é pla, yé a kuruné lé wa si bɛ, é ’ka varɔ kwa nyɛɛan lo. 37Yé wo ’ka dɔrɔ dɛrɛ zén‐é wikɔlɛkuo kwanu gi lo; dé wa kɛlɛ dɔrɔ dɛrɛ éé kuonu faama yé é zana, yé kuonu é sɛrɛ; 38naa, é a lé wo dɔrɔ dɛrɛ zén wikɔlɛkuo dɛrɛnu gi. 39Yé dé mi do dɔrɔ kwa mini, dɔrɔ dɛrɛ ’ka sɔa a lɛ é ziin lo, naa, é léé: Dɔrɔ kwa a é zima.
Chwazi Kounye ya:
Luk 5: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979